KREBA DI'A LESO HO'O 29 JULI 2012

HO’O DḖ INJIL DE MORI YḖSUS ATA TUNTI LIHA YOHANES 6:1-15
PAKA NARING GA LITḖ MORI KRAẺNG (29-07-12)


1 Poli hitu ga Yésus téti te ngo ngger sina Sano Galiléa, ko Sano Tibérias.
2 Ata do lako londang lut Hia, ai isé poli ita’d sanggé’d taung tanda lenget ata poli pandé’d Liha latang te ata beti.
3 Poli hitu Yésus tuké ngger éta ca golo agu lonto nitu agu sanggé’d ata nungku Diha.
4 Leso ramé mésé Paskah ga, leso ramé mésé data Yahudi, tiong te cai’y gi.
5 Cang du Yesus lélo lupi baling-baling Hia agu ita’s Liha do kéta ata ata mai lut ngger cé’é Hia, mai taé Diha ga ngger oné hia Filipus, “Nia wa’n ité ngancéng weli roti, kong sanggé’d isé so’o ngancéng hang’d?”
6 Hia taé ne nggitu kudut te damang hia Filipus hitu, ai Hia weki Ru’n baé apa ata nanang te pandé Diha te ho’o’n ga.
7 Mai walé diha Filipus ga ngger oné Hia, “Koném po roti ata harga suaratus dinarn é Mori toé kin di ngancéng sakong isé so’o, koném po isé hanang tiba ca kepu/ketek koé’n roti hitu.”
8 Cengata ata oné mai ata nungku Diha, hia Andréas, asé-ka’é diha Simon Pétrus, taé ne nggo’o ngger oné Hia,
9 “Cé’é ho’o manga cengata anak koé; hia hitu manga ba lima’d roti jelai (hosu) agu sua’d ikang’n; maik capa laing’y bokong situ latang te ata do so’o ga?”
10 Mai taé de Yésus ga, “Damang dé jera ata so’o te lonto’s di.” Sina dungka osang hitu do todo remang’n. Poli hitu lonto’s ata situ ga, am lima sebu’d hanang ata rona’d kali.
11 Poli hitu Yésus emi roti hitu, agu torok taé delék agu poli hitu pu’il-pu’il Liha te pati-pati ngger oné isé’d lonto sina hitu’d, ne nggitu kolé apa ata pandé Diha oné dungka ikang-ikang situ, jiri’d ga do keta’s lorong apa kaut ata ngoéng disé situ.
12 Cang du poli becur’d isé ga mai taé Diha ngger oné sanggé’d ata nungku Diha, “Damang dé nongko’s le méu retang’d roti situ rantang boto oke bo ne nggitu kaut’d.”
13 Poli hitu cébong nongko’s lisé, agu hasil’n ga manga campulu sua roto ata penong kéta le retang’d oné mai lima roti jelai ata siot poli hang’d lata situ ného bao’n ga.
14 Cang du ita’d lata situ tanda lenget ata poli pandé’n Liha ga, mai taé disé, “Hia ho’o dé ata tetu’ung kéta nabi ata te mai’y tay ngger oné lino ho’o.”
15 Ai baé le Yésus ngong ata do situ nanang te ba Hia le paksa molé kudut te téti jiri raja laing Hia lisé, wiga Hia Yésus gélang-gélang ngo inggos-pesot’N ngger éta ca poco; Hia ngo hanang koé’n kaut.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 28 JULI 2012

HO’O DḖ INJIL DE MORI YḖSUS ATA TUNTI LIHA MATIUS 13:24-30
PAKA NARING GA LITḖ MORI KRAẺNG (28-07-12)


24 Mori Yésus téing kolé ca tombo ného rapang ce bana ngger oné isé; ne nggo’o taé Diha, “Perénta de Surga hitu dé cama ného ata hio’t ngo wéras/wécak wini ata di’ad oné dungka uma’n hia.
25 Maik cang du rémé tokod sanggé’d taung ata ga, mai kaut cengata ata bali diha agu pandé weri’s liha remang ri’i oné be reha gandum (hosu) situ, poli hitu hia ga ngo’y gi.
26 Cang du wangka pu’ung todo’d gandum (hosu) situ ga agu wangka pu’ung koles berat’d ga, rodo ita kolé’s todo’d remang ri’i situ.
27 Poli hitu mai’s de sanggé’d taung mendi de ata ngara’n uma hitu ngger oné hia’t ngara’n agu taé ne nggo’o: Mori é, ai bom toé weri wini ata di’ad lité ata poli werid lité oné dungka uma Dité ho’o yo Ité? Wiga wili ga, nia mai kéta mai’d dé remang ri’i so’o ga?
28 Mai walé de mori hitu: Cengata ata bali dé ata pandé’d apa situ é. Poli hitu mai taé de ata mendi situ ngger oné hia ga: Wiga wili ga, cala ngoéng’d Ité kong ami ngo te kebut kéta taung’s remang ri’i situ?
29 Maik mai taé diha ga: Néka e, ai am kebut cala kolé’s le méu gandum (hosu) situ cang du kebut’d le méu remang ri’i situ.
30 Kong kaut’d isé todo cama-camas sanggé kéta du leso nongko dani ce pisa. Cang du hitu ce pisa ga manga kaut laku jera’d ata ata tukang nongko dani situ: Damang olo nongko’s dé le méu remang ri’i situ agu pongo wo’os le méu kudut te tapa pandé utung’s; poli hitu nongko’s dé le méu gandum (hosu) situ ga ngger oné langkok (cécér, joréng) daku.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 27 JULI 2012

HO’O DḖ INJIL DE MORI YḖSUS ATA TUNTI LIHA MATIUS 13:18-23
PAKA NARING GA LITḖ MORI KRAẺNG (27-07-12)


18 Wiga wili ga, séngét ga le méu apa betua’n tombo ného rapang ngong ata wécak wini hitu.
19 Latang te sanggé’d taung ata ata sio’t dengé reweng ngong Perénta de Surga, maik toé ngancéng idep’n, mai dé jing da’at agu tako’s liha apa ata poli wécak agu weri’d oné nai data hitu; hitu’s dé wini ata wécak oné lupi salang.
20 Wini sio’t wécak oné tana ata do kéta watu cirang’n ga hitu dé ngong ata hio’t séngét reweng hitu agu gélang-gélang kéta liha tiba’n le nisang nai’n.
21 Maik reweng hitu toé délem’n waké celer’n ngger wa agu toé nais koé’n mosé’n. Ẻmé mai’s dé mosé susa ko mosé tatong landing reweng hitu, ata hitu dé gélang-gélang kéta legong ko oké’n liha sanggé’d reweng hitu.
22 Sio’t wécak oné dungka be réha karot ndang ga ngong ata sio’t séngét reweng hitu, poli hitu mosé simpung de tana lino ho’o agu adong de mosé bora ga pandé kekep ngger wa reweng hitu wiga toé ngancéng wua’n hia.
23 Sio’t wécak oné dungka tana hitut di’a kéta ga ngong ata sio’t séngét reweng hitu agu idep, wiga wini hitu ngancéng manga wua’n ce pisa, manga’s ata ceratus ngkali’n, manga’s ata enampulu ngkali’n, manga kolé’s ata telumpulu ngkali’n.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 26 JULI 2012

HO’O DḖ INJIL DE MORI YḖSUS ATA TUNTI LIHA MATIUS 13:16-17
PAKA NARING GA LITḖ MORI KRAẺNG (26-07-12)


16 Maik senang ga mata de hau ai ngancéng ita agu tilu de hau ai ngancéng dengé.
17 Ai bo setu’u’n Aku taé ne nggo’o ngger oné méu: Do’d nabi agu ata mosé molor ata nanang kéta te lélo apa ata ngancéng ita’n le méu, maik isé toé ngancéng ita’n, agu nanang kéta te séngét apa ata dengé’n le méu, maik isé toé ngancéng dengé’n lisé.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 25 JULI 2012

HO’O DḖ INJIL DE MORI YḖSUS ATA TUNTI LIHA MATIUS 20:20-28
PAKA NARING GA LITḖ MORI KRAẺNG (25-07-12)


20 Poli hitu mai dé endé disé mantar diha Zébédéus, mai agu anak disé, mai te cumang Mori Yésus; isé suju paka di’a olo mai ranga Diha ai manga ca tegi’d isé ga ngger oné Hia.
21 Mai réi de Mori Yésus ga, “Apa dé ngoéng de hau endé?” Mai walé diha ga, “Téing koé perénta lité ta Mori Sengaji, kong sua mantar daku so’o tayi ngancéng lonto oné baté perénta Dité, cengata’n ga du racap wanang Dité, cengata’n kolé ga du racap léo Dité.”
22 Maik ne nggo’o walé de Mori Yésus, agu taé’n ga, “Méu ho’o toé baé apa ata tegi de méu. Ngancéng méu ko te inung cawan, ata hio’t te inung Daku ce pisa?” Mai walé disé ga ngger oné Hia, “Ngancéng lami yo Mori.”
23 Mai taé’d Mori Yésus ga ngger oné isé, “Cawan Daku ce pisa, ngancéng kolé inung’n le méu, landing te lonto du racap wanang Daku ko du racap léo Daku, toé dé hak Daku hitu te pandé beté’n a. Hak hitu ce pisa manga kaut téing oné ata siot senang le Ema Daku; poli niak latang te isé’n ga.”
24 Du dengé hitu rabo kéta taung’s campulu ata nungku situ’t iwo’d ga rabo isé’t sua asé ka’é situ.
25 Maik Mori Yésus bénta isé agu taé oné isé ne nggo’o, “Baé le méu ho’o sanggé’d pemerénta data bangsa-bangsa de ba weki ného tuang mésé béta mai ro’éng’d, ne nggitu kolé’s sanggé’d ata tuang mésé disé; isé pandé sara nai ru kaut latang te ro’éng’d.
26 Landing toé ne nggitu dé adak’n oné beréha méu ho’o. Céing-céing kaut ata ngoéng te jiri ata mésé laing oné mai méu ho’o, ata hitu dé paka ngoéng te jiri ata jera laing le méu;
27 agu céing-céing kaut ata ngoéng te jiri ata taki olo’n kéta oné mai méu ho’o, ata hitu dé paka ngoéng te jiri mendi de méu;
28 cama ného Anak Mensia mai toé kudut te jiri ata mésé hio’t sakong lata molé’m taung, maik mai te jiri ata jera laing (pelayan) agu téing condo mose nawa’n kudut jiri bajar laing latang te ata do.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 24 JULI 2012

HO’O DḖ INJIL DE MORI YḖSUS ATA TUNTI LIHA MATIUS 12:46-50
PAKA NARING GA LITḖ MORI KRAẺNG (24-07-12)


46 Cang du Mori Yésus rémé tombo-tombo kin agu ata do situ ga, Endé Diha agu pisa tau’s haé wa’u Diha hesé be pé’ang mai agu nanang kéta te cumang Hia.
47 Poli hitu manga cengata ata ata taé ne nggo’o ngger oné Hia, “Lélo dé ga, Endé Dité agu pisa tau’s asé-ka’é Dité manga hesé be pé’ang mai hio’s agu nanang kéta te cumang Ité’s.”
48 Maik mai walé de Mori Yésus ga ngger oné ata hitu’t ban kréba hitu ngger oné Hia, “Ai céi léng Endé Daku ta? Agu céi léng asé-ka’é Daku ta?”
49 Poli hitu mai kolé taé Diha ga, agu toso ngger sina dungka baté hesé’d sanggé’d ata nungku Diha, “Ho’o’s dé Endé Daku agu asé ka’é Daku é!
50 Ai céing-céing kaut ata ata sio’t pandé agu lorong apa ata ngoéng de Ema Daku éta surga, hia hitu dé asé ka’é Daku ata rona, asé ka’é Daku ata inéwai agu Endé Daku.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 23 JULI 2012

HO’O DḖ INJIL DE MORI YḖSUS ATA TUNTI LIHA MATIUS 12:38-42
PAKA NARING GA LITḖ MORI KRAẺNG (23-07-12)


38 Cang du hitu mai taé de pisa tau’d ata mbeko getok Taurat agu ata Farisi ngger oné Mori Yésus, “Tuang Guru e, ami ho’o ngoéng kéta te lélo ca’n tanda oné mai Ité hitu.”
39 Maik mai walé Diha ga ngger oné isé situ, “Olé sanggé’d méu wa’u so’ot toé manga di’ad agu toé manga setia’d ho’o nanang te tegi ca’n tanda. Maik ngger oné isé ce pisa ga toé kéta manga téing can tanda hitu be pé’ang mai tanda nabi Yunus.
40 Ai ného hia Yunus danong ka’éng boné mai tuka de ikang mésé lawang kaut telu leso agu telu wié, ne nggitu kolé dé Anak Mensia ce pisa manga kaut Hia ka’éng’n oné mai tuka dading de tana lino ho’o lawang telu leso agu telu wié.
41 Cang du leso penghakiman tayi, sanggé’d taung ata Niniwé cepisa manga kaut to’o kolé’d cama-cama agu sanggé’d ata leso ho’o agu pandé téing penghakiman kolé latang te isé. Ai sanggé’d taung ata Niniwé situ dé mosé teser’s cang du poli dengé’n lisé kréba ata ba liha Yunus, agu bo setu’u’n tah ata ho’o’t manga cé’é ho’o dé céwé mésé oné mai hia Yunus!
42 Cang dulu leso penghakiman tayi, hia ratu hio’t mai Lau mai tana Selatan ga manga kaut to’o kolé’n tayi cama-cama agu sanggé’d taung ata leso ho’o agu hia kolé tayi manga kaut pandé téing penghakiman latang te isé. Ai hia ratu hitu dé mai kéta tadang mai’n mai sina mai biting’n tana lino ho’o latang te séngét kaut hikmat diha Salomo, agu bo setu’u’n tah ata ho’o’t manga cé’é ho’o dé céwé mésé oné mai hia Salomo hitu!”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 21 JULI 2012

HO’O DḖ INJIL DE MORI YḖSUS ATA TUNTI LIHA MATIUS 12:14-21
PAKA NARING GA LITḖ MORI KRAẺNG (21-07-12)


14 Poli hitu ga ngo ngger pé’ang’s dé ata Farisi situ agu pandé ca bantang lisé kudut te mbelé Hia.
15a Maik Mori Yésus baé apa ata nanang te pandé’n lisé wiga Hia ga gélang-gélang lécé’n oné mai osang hitu.
15b Do kéta ata ata lut Mori Yésus agu Hia kolé pandé ina sanggé’d taung ata situ.
16 Ré’ing paka di’a’s Liha isé situ kudut néka to’ing ngong céi dé Hia hitu,
17 kong te pandé rapak’n dé reweng ata poli céngka’n liha Nabi Yésaya danong ga,
18 “Lélo, hitu’y dé Mendi Daku ata poli pili’n Laku, ata momang’n Laku, nai Daku senang kéta ngger oné Hia; Aku cepisa manga kaut téing Nai Nggeluk Daku ngger éta lobo Hia, agu Hia cepisa ga pandé céngka keadilan latang te sanggé’d bangsa-bangsa.
19 Hia cepisa toé manga pandé koléng’n agu toé manga pandé ciék-ciék idé’n agu toé manga dengé reweng Diha’d sanggé’d ata cepisa oné sanggé’d taung salang.
20 Wakas ata poli doal’d agu tepo’d ga toé pandé tepo danung’s Liha, agu sulu ata sio’t sabem’s ke’é'd ga toé pandé pesa danung’s Liha, sanggé kéta Hia poli pandé hukum jiri ata menang’n.
21 Agu oné Hia dé bengkes de sanggé’d taung bangsa-bangsa ce pisa.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 20 JULI 2012

HO’O DḖ INJIL DE MORI YḖSUS ATA TUNTI LIHA MATIUS 12:1-8
PAKA NARING GA LITḖ MORI KRAẺNG (20-07-12)


1 Cang du hitu, pas kéta oné dungka leso Sabat, Mori Yésus rémé lako oné be réha ca uma gandum (hosu). Ata nungku Diha rémé kéta darem’d cang du hitu wiga isé ga pua/emi wua gandum situ agu hang’s lisé gandum ata poli pua’d lisé.
2 Ita hitu ga, mai taé data Farisi ngger oné Hia, “Lélo dé Lité ga, ata nungku Dité situ pandé apa ata ré’ing te pandé’n du leso Sabat.”
3 Maik mai walé Diha ga ngger oné isé, “Ai toé léng baca le méu ko apa ata poli pandé diha David danong, cang du hia agu sanggé’d ata lut hia ngai darem éros kid,
4 co’o hia ngo ngger oné Mbaru de Mori Kraéng agu co’o isé hang roti hélang/takung ata toé dis te hang’d lisé, koném po liha David ne nggitu kolé le sanggé’d taung ata lut hia, be pé’ang mai sanggé’d taung imam-imam?
5 Ko toé léng baca le méu ko buku nggeluk Taurat ngong oné leso-leso Sabat, sanggé’d taung imam-imam situ weki ru’d kolé toé hiang (melanggar) hukum leso Sabat hitu oné dungka Mbaru de Mori Kraéng, landing isé toé manga sala’d?
6 Aku taé ne nggo’o ngger oné méu: Cé’é ho’o manga dé ata ata céwé mésé oné mai Mbaru de Mori Kraéng hitu.
7 Ẻmé méu ngancéng idep’n apa maksud’n reweng ho’o: Apa ata ngoéng’n laku dé yé ngong momang agu toé ngong takung/hélang, tentu méu ho’o toé pandé wahéng ata sio’t toé manga sala’d.
8 Ai Anak Mensia dé Mori’n be béta’n leso Sabat hitu.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 19 JULI 2012

HO’O DḖ INJIL DE MORI YḖSUS ATA TUNTI LIHA MATIUS 11:28-30
PAKA NARING GA LITḖ MORI KRAẺNG (19-07-12)


28 "Mai ga méu, mai cé'é ruis (lupi) Aku. Sanggé’s taung méu ata maél ko ata pola mendo mésé kéta. Ai Aku ho’o dé nanang te téing méu asi-asi maél oné dungka mbau.
29 Pola ga le méu mendo ata téing Daku agu nungku ga méu oné mai Aku, ai Aku ho'o dé ata nggalas (nihas) nai agu toé mésé nai. Wakar dé meu ce pisa ngancéng ka'éng temer dungka lupi Aku.
30 Ai mendo Daku ho’o dé, mendo ata pandé nisang nai; ai mendo Daku ho'o de héal/géal kéta’y."


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 18 JULI 2012

HO’O DḖ INJIL DE MORI YḖSUS ATA TUNTI LIHA MATIUS 11:25-27
PAKA NARING GA LITḖ MORI KRAẺNG (18-07-12)


25 Cang du leso hitu Mori Yésus taé ne nggo’o, “Aku kepok torok delék ngger éta Ité, Yo Ema, Mori Kraéng de sanggé’d awang agu tana lino, ai sanggé’d taung apa situ ceha’s Lité oné mai ata bijaksana agu sanggé’d taung ata pintar, maik Ité pandé céngka kéta taungs apa situ latang te ata ro’éng koé taki wa’d kéta.
26 Yo Ema, hitu’y dé ata ngancéng pinga di’a’n oné Ité.
27 Sanggé’d taung apa situ ga poli téing’d ngger oné Aku le Ema Daku agu toé kéta manga cengata’n ata ata baé Anak be pé’ang mai hia Ema, agu toé kéta manga cengata’n ata ata baé hia Ema be pé’ang mai Anak agu ata sio’t ngoéng te toing Hia Ema hitu ngger oné isé le Anak hitu.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 17 JULI 2012

HO’O DḖ INJIL DE MORI YḖSUS ATA TUNTI LIHA MATIUS 11:20-24
PAKA NARING GA LITḖ MORI KRAẺNG (17-07-12)



20 Poli hitu Mori Yésus wangka pu’ung mu’u toé di’a ngger oné sanggé’d kota-kota sio’t toé ngoéng te teser’s, koném po oné osang hitu Hia céwé do pandé tanda lenget Diha,
21 “Woréng mosé de hau é Khorazim! Woréng kolé mosé de hau é Bétsaida! Ai émé sina Tirus agu sina Sidon jiri’y dé tanda lenget sio’t poli jiri’d kolé ga oné be réha méu, maik isé situ nais’d poli mosé teser’d ga agu mosé wéong nai.
22 Maik Aku taé ne nggo’o ngger oné méu ho’o: Du leso penghakiman tayi, mendo wahéng de Tirus agu Sidon céwé héal’n itu po oné mai mendo wahéng de hau.
23 Ne nggitu kolé hau é Kapernaum, ai co’o léng cepisa ga, apa hau hitu pandé téti haéng kéta éta awang béta ko? Toé yé, hau hitu ce pisa manga kaut pandé cecut ngger wa gonggém osang baté ka’éng d’ata mata! Ai émé sina Sodom manga jiri’n dé tanda lenget ata poli jiri’n kolé oné be reha méu ho’o, maik kota hitu dé pasti ngai hesé kin dengkir leso te ho’on ga.
24 Maik Aku taé ne nggo’o ngger oné méu: Du leso penghakiman tayi, mendo wahéng de tana Sodom céwé heal itu po mendo wahéng de méu.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 16 JULI 2012

HO’O DḖ INJIL DE MORI YḖSUS ATA TUNTI LIHA MATIUS 10:34-11:1
PAKA NARING GA LITḖ MORI KRAẺNG (16-07-12)


34 “Néka ne nggo’o nuk de méu, Aku ho’o mai te ba hambor ngger oné lino ho’o; Aku ho’o dé mai toé latang te ba hambor, maik te ba pedang sempilang.
35 Ai Aku ho’o mai te pandé bégas ata oné mai ema’n, anak inéwai oné mai endé’n, wote oné mai inang diha,
36 agu ata bali data dé sanggé’d taung ata oné mbaru boné diha.
37 Céing kaut ata momang ema’n ko endé’n céwé mésé oné mai Aku, hia hitu toé patun latang te Aku; agu céing kaut ata momang anak ata rona’n ko inéwai’n céwé mésé oné mai Aku, hia hitu toé patun latang te Aku.
38 Céing kaut ata ata hio’t toé pola panggol’n agu lako lut Aku, hia toé patun latang te Aku.
39 Céing kaut ata pengkut (po’é) nawa’n, hia manga kaut mora nawa’n hitu cepisa, agu céing kaut ata mora nawa’n landing Aku, hia ngancéng tiba kolé nawa’n hitu cepisa.
40 Céing kaut ata ata tiba méu, hia hitu dé tiba Aku, agu céing kaut ata tiba Aku, hia hitu dé tiba Hia ata jera Aku te mai.
41 Céing kaut ata hio’t tiba cengata ata nabi sebagai nabi, hia hitu cepisa manga kaut tiba upah de nabi, agu céing kaut ata tiba cengata ata ata mosé molor (benar) sebagai ata mosé molor, hia hitu cepisa manga kaut tiba upah data mosé molor.
42 Céing kaut ata ata téing waé inung ata ngelo kéta koném po ca mok’n kaut, landing ata hitu dé ata nungku Daku, tetu’ung dé Aku taé ngger oné méu: Hia hitu dé toé manga mora upah’n tayi.”
1 Cang du Mori Yésus poli taung tewo’d sanggé’d pedé Diha latang te campulusua tau’s ata nungku Diha, Hia téti te ngo lako oné mai osang hitu kudut te téing toing agu ba Kréba Di’a ngger oné kota-kota disé.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 15 JULI 2012

HO’O DḖ INJIL DE MORI YḖSUS ATA TUNTI LIHA MARKUS 6:7-13
PAKA NARING GA LITḖ MORI KRAẺNG (15-07-12)


7 Hia bénta campulusua tau’s ata nungku Diha agu wangka pu’ung te jera isé kudut te ngo agu lako sua-sua tau’d. Hia téing ngger oné isé rang kuasa be béta mai sanggé’d jing-jing da’at,
8 agu téing pedé ngger oné isé kong isé néka ba apa-apa oné lako labok disé, be pé’ang mai dongkar (do’ar) kaut, toé kolé te ba roti, ne nggitu kolé luni kamé/bokong néka ba lisé, ne nggitu kolé doi ko séng oné kendik disé néka ba lisé,
9 ngancéng paké alas wa’i, landing néka ba sua’n baju.
10 Mai taé Diha kolé ga poli hitu ngger oné isé, “Ẻmé oné ca osang méu ocok ngger oné ca mbaru data, ka’éng ga méu nitu sanggé leso kudut te téti kolé’s méu mai oné mai osang hitu.
11 Ẻmé manga ca osang ata toé ngoéng te tiba méu agu émé isé toé ngoéng te séngét méu, téti ga méu lako ngger pé’ang oné mai osang hitu agu tempang paka di’a le méu kebok oné mai wa’i de méu kudut te téing jiri peringatan laing’y latang te isé.”
12 Poli hitu téti te ngos dé isé ga kudut ba kréba ngong ata paka mose teser,
13 agu isé sonda do kéta jing da’at, agu pandé sapel do kéta ata beti le mina agu pandé ina isé situ.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 14 JULI 2012

HO’O DḖ INJIL DE MORI YḖSUS ATA TUNTI LIHA MATIUS 10:24-33
PAKA NARING GA LITḖ MORI KRAẺNG (14-07-12)


24 Cengata ata ata nungku toé céwé di’a oné mai tuang guru diha, ko cengata ata ata mendi oné mai mori sengaji diha.
25 Remo dé latang te cengata ata nungku émé hia ngancéng jiri cama ného tuang guru diha agu latang te cengata ata mendi émé hia ngancéng jiri cama ného tuang sengaji diha. Ẻmé ata ngara mbaru caro Béélzebul, apa’n kolé sanggé’d taung ata ka’éng oné mbaru hitu.
26 Wiga wili ga, méu paka néka rantang ngger oné isé, ai toé kéta manga ca’n kéta ata ngai tadu kin ata sio’t toé céngkas tayi, agu toé kéta manga ca’n kéta ata sio’t ngai ceha kid ata siot toé baé kid cepisa.
27 Apa ata nanang te taé Daku ngger oné méu oné be réha dungka nendep, taé ga le méu apa situ oné be réha dungka gérak; agu apa ata tombo siwi-sok kaut ngger oné dungka tilu de méu, kréba ga apa situ éta mai bobong mbaru.
28 Méu paka néka rantang ngger oné isé sio’t ngancéng mbelé weki de méu, maik toé ngancéng berkuasa kudut te mbelé wakar de méu; rantang ga méu ngger oné Hia ata hio’t manga rang kuasa’n te pandé lerak toé hanang weki maik kolé agu wakar oné api naraka.
29 Ai émé pika’s dé sua’d peti lélap harga’d ga ca keping séng ata dai koé’d kéta? Landing, toé kéta manga ca’n ce pisa ata ngancéng pa’u ngger wa tana be pé’ang mai ngoéng de Ema de méu.
30 Agu weki ru’s kolé méu ga, wuk éta wuwung de méu kolé pandé bilang kéta taung’d ga.
31 Wiga wili ga, méu paka néka rantang, ai méu ho’o dé céwé berharga mésé itu po sanggé’d peti lélap sio’t do kéta’s.
32 Céing-céing kaut ata sio’t pali Aku olo mai ranga data mensia, Aku kolé tayi mengaku baé hia olo mai ranga de Ema Daku ata ka’éng éta surga.
33 Maik céing-céing kaut ata ata pali Aku olo mai ranga de mensia, Aku kolé tayi pali hia olo mai Ranga de Ema daku ata ka’éng éta surga.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 13 JULI 2012

HO’O DḖ INJIL DE MORI YḖSUS ATA TUNTI LIHA MATIUS 10:16-23
PAKA NARING GA LITḖ MORI KRAẺNG (13-07-12)


16 Lélo ga, Aku jera méu te ngo cama ného jimbal ngo ngger oné be réha acu puar, wiga wili ga méu dé paka porong pintar-pintar koé cama ného ular agu sundur koé cama ného tekur jawa.
17 Maik jaga di’a-di’a méu ngger oné sanggé’d ata do; ai manga’s dé ata ata ngoéng te téing méu ngger oné ranga de majelis agama agu isé cepisa ongga méu le wasé lempa oné mbaru sembaéng d’isé.
18 Wajol/Landing Aku ho’o dé, méu cepisa manga kaut deko te sorok ngger olo mai ranga de sanggé’d penguasa agu sanggé’d raja-raja kudut te jiri kesaksian laing latang te isé agu latang te sanggé’d bangsa ata toé di baé Mori Kraéng.
19 Ẻmé isé deko te téing méu, néka simpung le méu co’o’y cara’n agu apa ata paka taé’n le meu cepisa, ai sanggé’d taung apa situ cepisa manga kaut téing’d ngger oné méu pas du oné leso hitu kolé.
20 Ai toé méu weki ru’s dé ata curup cepisa, maik Nai Nggeluk de Ema de méu; Hia hitu dé ata curup oné mai nai de méu cepisa.
21 Cengata asé-ka’é manga kaut deko te téing asé-ka’én cepisa kudut te mbelé, ne nggitu kolé dé cengata ata éma latang te anak de ru’n. Anak-anak kolé cepisa pandé berontak (rampas) ngger oné ata tua’d cepisa agu mbelé isé.
22 Méu cepisa manga kaut toé senang laing lata landing ngasang Daku; maik ata siot ngancéng ta’ong sanggé kéta du leso cemol’n cepisa ata hitu cepisa manga kaut tiba selamak’n.
23 Ẻmé isé situ pandé ndaék méu oné ca kota, gélang-gélang koé losi’s méu ngger oné kota cebana; ai tetu’ung kéta Aku curup ne nggo’o ngger oné méu: Du be bolo’n sanggé’s méu poli la’at sanggé’d taung kota-kota Israél, Anak Mensia dé poli cai’n ga.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 12 JULI 2012

HO’O DḖ INJIL DE MORI YḖSUS ATA TUNTI LIHA MATIUS 10:7-15
PAKA NARING GA LITḖ MORI KRAẺNG (12-07-12)


7 Ngo méu ga agu tombo kréba: Perénta de Surga tiong te cai gi.
8 Pandé ina ga ata beti; pandé mosé kolé ata mata. Pandé ina ga ata beti kusta (boké rowés); sonda ga sanggé’d jing da’at. Méu poli tiba ne nggitu kaut, wiga méu ga téing kolé ne nggitu kauts.
9 Néka ba le méu emas ko pérak ko tembaga oné bombol de méu.
10 Méu kolé néka ba luni kamé (bokong) oné lako de méu hitu, méu kolé néka ba sua’n baju, sepatu ko do’ar (dongkar), ai sanggé’d ata siot pandé duat patun kéta dé te tiba nafkah’d.
11 Ẻmé méu ngo ngger oné ca kota ko béo, kawé ga le méu sina hitu cengata ata ata patun kéta agu ka’éng ga méu agu hia sanggé lako kolé’s méu ga.
12 Ẻmé méu ocok ngger oné mbaru data, olo téing tabé di ngger oné isé.
13 Ẻmé isé situ patun te tiba tabé hitu, tabé de méu hitu dé wa’u ngger oné isé, maik émé toé ga, tabé de méu hitu kolé kolé ngger oné weki ru’s méu.
14 Emé manga cengata ata ata toé tiba méu agu toé séngét curup agu réwéng de méu, téti méu ga agu legong le méu mbaru ko kota hitu agu tempang le méu kebok’n oné mai wa’i de méu.
15 Tetu’ung kéta Aku taé ne nggo’o ngger oné méu ga: Du leso penghakiman cemol tayi mendo wahéng de tana Sodom agu Gomora cepisa céwé géal itu po mendo wahéng de kota hitu.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 11 JULI 2012

HO’O DḖ INJIL DE MORI YḖSUS ATA TUNTI LIHA MATIUS 10:1-7
PAKA NARING GA LITḖ MORI KRAẺNG (11-07-12)


1 Mori Yésus bénta campulusua tau’s ata nungku Diha agu téing rang kuasa latang te isé kudut te sonda/wur sanggé’d taung jing da’at agu kudut te pandé ina sanggé’d ata one mai sanggé’d beti agu weki lemes disé.
2 Ho’o’s dé ngasang de campulusua tau’s rasul situ: Te can, hia Simon hio’t caro kolé hia Petrus agu hia Andréas asé-ka’én, agu hia Yakobus anak diha Zébédéus agu hia Yohanés asé-ka’én,
3 hia Filipus agu hia Bartoloméus, hia Tomas agu hia Matius ata hio’t tukang nongko blasténg, hia Yakobus anak diha Alféus, agu hia Tadéus,
4 hia Simon ata Zélot agu hia Yudas Iskariot ata hiot pandé khianat Hia cepisa.
5 Ata campulusua tau’s ata nungku situ jera te ngo’s le Mori Yésus agu Hia téing pedé ne nggo’o ngger oné isé, “Méu neka laki-lako mpéo-mpaong salang be pé’ang ngger oné salang data bangsa cebana ko ngo ngger oné kota data Samaria,
6 maik ngo méu ga ngger oné jimbal-jimbal sio’t weleng agu mora’d oné mai umat Israél.
7 Ngo méu ga agu téing le méu kréba ho’o: Perénta de Surga tiong te cai’y gi.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 10 JULI 2012

HO’O DḖ INJIL DE MORI YḖSUS ATA TUNTI LIHA MATIUS 9:32-38
PAKA NARING GA LITḖ MORI KRAẺNG (10-07-12)


32 Du rémé ata sua tau’s ata buta situ ga ngo be pé’ang, ba kolé lisé ngger olo mai ranga de Mori Yésus cengata ata dopel ata ngai woréng le jing da’at’n.
33 Cang du poli sonda’n jing da’at hitu ga, ata dopel hitu nganceng curup kolé’y gi. Poli hitu lenget kéta taung’s ata do situ, agu ne nggo’o taé’d, “Apa ne nggo’o é toé di manga dé’it ita’n lata oné tana Israél ho’o.”
34 Maik ata Farisi ga taé ne nggo’o, “Le rang kuasa de pemimpin de jing da’at situ dé Hia pandé sonda jing da’at hitu.”
35 Ne nggitu’y dé Mori Yésus lako labok ngger oné sanggé’d taung kota agu béo; Hia téing toing oné mbaru-mbaru sembaéng disé agu ba kréba di’a ngong Perénta de Surga agu pandé di’a sanggé’d ata oné mai beti agu weki lemes disé.
36 Cang du ita ata do situ ga, wéong kéta nai’N Mori Yésus le momang mésé ai ita ata do situ, ai isé maél kéta’s agu nggili-nggoéng cama kéta ného jimbal ata toé manga ata mori gembala laing’d.
37 Poli hitu mai taé Diha ga ngger oné ata nungku Diha, “Do kéta dé dani te ako so’o ga, maik ce koé’s dé ata te ako’d.
38 Wiga wili ga, tegi ga ngger oné ata mori ngara’n sanggé’d dani te ako situ, kong Hia katu ata tukang duat laing kudut te nongko’d sanggé’d dani situ.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 09 JULI 2012

HO’O DḖ INJIL DE MORI YḖSUS ATA TUNTI LIHA MATIUS 9:18-26
PAKA NARING GA LITḖ MORI KRAẺNG (09-07-12)

18 Du rémé curup ne nggitu kin Mori Yésus ga ngger oné isé, mai’y dé cengata ata kepala mbaru sembaéng laing’y, poli hitu tikul suju Hia agu taé ne nggo’o, “Anak inéwai daku ho’o’y di rowa’n Ite, maik mai cénggo koé Ité agu sapel koé le limé Dité lobo hia, kong hia ngancéng mosé kolé’n.”
19 Poli hitu téti te lako’y Mori Yésus agu lut ata hitu cama-cama agu ata nungku Diha.
20 Cang du hitu ga manga cengata ata inéwai ata poli campulu sua ntaung’n ga beti losa dara terus; hia mai ruis-ruis dungka Mori Yésus mai musi mai’n agu cau cekoé’n liha rénda-rénda oné dungka lobo’n juba léwé Diha.
21 Ai ne nggo’o dé nuk diha wa nai’n, “Ẻmé cau kaut cekoé’n laku juba léwé Diha, pasti ngancéng ina/di’a muing kolé beti daku ho’o.”
22 Maik Mori Yésus holés ngger musi agu lélo hia agu taé ne nggo’o, “Pandé mberes ga nai de hau, oé anak Daku, imbi de hau hitu poli pandé selamak mosé de hau.” Wangka pu’ung kaut du hitu ga, rodo ina kaut beti de inéwai hitu.
23 Cang du cai’n Mori Yésus oné mbaru data kepala mbaru sembaéng hitu ga agu ita’s Liha ata tebang sunding agu ata do situ reme keta ngai-ngaok’d,
24 mai taé Diha ga ngger oné isé, “Ngo be pé’ang dé méu ho’o ga, ai anak koé ho’o toé di mata’y, maik hia ata ngai rémé toko’n.” Maik isé situ pandé loér Hia.
25 Cang du poli jera ngo be pé’ang’d ata do situ ga, Mori Yésus ocok ngger oné mbaru hitu agu cau Liha limé de anak koé hitu, agu to’o agu mose kolé’y dé anak koé hitu ga.
26 Agu rodo labok sanggé’d tana agu béo kaut kréba ngong kejadian hitu.

HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 08 JULI 2012

HO’O DḖ INJIL DE MORI YḖSUS ATA TUNTI LIHA MARKUS 6:1-6
PAKA NARING GA LITḖ MORI KRAẺNG (08-07-12)


Poli hitu ga Mori Yésus téti mai nitu mai’n agu cai lau béo de Ru’n; sanggé’d taung ata nungku’N lut Hia taung’s. Du leso Sabat ga Hia ngo téing toing oné mbaru sembaéng sinagoga; sanggé’d ata do situ lenget kéta taung’s du séngét toing Diha, agu mai taé’d ga, “Nia kéta mai’d de emi’d Liha sanggé’d taung apa so’o ga? Hikmat apa kéta dé ata téing oné Hia? Co’o kéta péng cara’d sanggé’d tanda lenget situ tara ngancéng pandé’d Liha? Ai cala anak diha tukang haju’p Hia ta, anak diha Maria, asé-ka’é’d Yohanés, Yosés, Yudas agu hia Simon? Ai sanggé’d weta’n ka’éng ruis-ruis tau agu ité cé’é ho’o?” Itu dé tara wur’n lisé Mori Yésus. Poli hitu mai taé’d Mori Yésus ga agu isé, “Nabi é hiang kéta taung lata labok tana, landing toé dé manga hiang’n oné béo de ru’n, oné be réha wa’u’n agu oné mbaru ko uku de ru’n.” Toé kéta ngancéng pandé ca’n tanda lenget Liha sina hitu; Hia hanang pandé di’a pisa tau’s ata beti le sapel ali limé Diha éta ulu/sa’i disé. Lenget kolé weki Ru’n Mori Yésus ai ata situ toé gori/ngoéng te imbi. Poli hitu ga Mori Yésus lako labok néténg béo agu toing agu titong isé.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 07 JULI 2012

HO’O DḖ INJIL DE MORI YḖSUS ATA TUNTI LIHA MATIUS 9:14-17
PAKA NARING GA LITḖ MORI KRAẺNG (07-07-12)


14 Poli hitu ga mais sanggé’d taung ata nungku diha Yohanés ngger olo mai ranga de Mori Yésus, agu mai taé disé ga, “Ami ho’o agu sanggé’d taung ata Farisi dé pandé puasa, landing sanggé’d taung ata nungku Dité so’o toé kéta manga pandé puasa’d? Co’o dé tara ne nggitu’n kali go Mori?”
15 Mai walé de Mori Yésus ga latang te isé, “Ai dis’n ko toé ta émé sanggé’d haé reba de kopé harat pandé susa nai’d pas kéta du rémé manga kéta kin oné bréha isé’n hia kopé harat hitu? Ai manga’y dé cai’n rapak leso’n ce pisa du kopé harat hitu rodo toé manga ne nggitu kaut’y oné mai bréha sanggé’d isé taung, cang du hitu dé isé po pandé puasa.”
16 Toe keta manga cengata’n ata ata pande tumpak ca ketek’n towe ata ngai weru kin one baju hio’t manga keta gi, ai eme pande ne nggitu liha towe tumpak hitu pande tambang-tambang bete’n baju hitu, wiga tambang-tambang keta mese bete’n ga.
17 Ne nggitu kole de anggor weru toe de lege ngger one kantong loke tu’a, ai eme pande ne nggitu lise ga kantong hitu cepisa manga kaut bete agu laés le ru’n wigga anggor hitu bowo keta taung agu kantong hitu kole lerak’y gi. Maik anggor weru de na’a one kantong ata weru’n kole, wiga le hitu ga, apa situ’t sua ga ngai di’a kéta kid.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 06 JULI 2012

HO’O DḖ INJIL DE MORI YḖSUS ATA TUNTI LIHA MATIUS 9:9-13
PAKA NARING GA LITḖ MORI KRAẺNG (06-07-12)


9 Cang du Mori Yésus poli téti nitu mai’n ga, Hia ita cengata ata ngasang’n hia Matius ata ngai lonto kin oné osang baté nongko blasténg, poli hitu mai taé Diha ga ngger oné hia, “Lut Aku hau ga.” Hesé paka di’a hia Matius hitu agu lako lut Hia.
10 Poli hitu cang du Mori Yésus hang oné mbaru diha Matius, mai’s dé do kéta ata tukang nongko blasténg situ agu sanggé’d taung ata ndékok do agu hang cama-cama agu Hia agu sanggé’d ata nungku Diha.
11 Cang du hitu ga ata Farisi ita kejadian nempung hang cama hitu, agu mai taé disé ga ngger oné ata nungku de Mori Yésus, “Co’o dé guru de méu hitu ta tara hang cama-cama’n agu ata tukang nongko blasténg agu sanggé’d ata ndékok do?”
12 Dengé le Mori Yésus curup hitu agu mai taé Diha ga, “Toé dé ata ngai weki di’a dé ata perlu kawé ata mbeko ko tabib, maik ata weki beti.”
13 Wiga wili ga, ngo méu ga agu nungku kolé le méu apa dé betuan reweng ho’o: Apa ata ngoéng’n laku dé ngong momang di’a agu toe takung, ai Aku ho’o dé mai toé latang te bénta ata mosé molor, maik ata ndékok do.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 05 JULI 2012

HO’O DḖ INJIL DE MORI YḖSUS ATA TUNTI LIHA MATIUS 9:1-8
PAKA NARING GA LITḖ MORI KRAẺNG (05-07-12)


1 Poli hitu Mori Yésus léti ngger éta ca perahu agu téti te ngo be sina tana be sina. Poli hitu cai Hia ga oné kota de Ru’n.
2 Poli hitu ba l’ata ngger olo ranga Diha cengata ata péko ata ngai halas kin oné wongka baté toko’n. Cang du Mori Yésus ita imbi disé ga, mai taé Diha ngger oné ata péko hitu, “Pandé mberes ga nai’m é, anak Daku, sanggé’d taung ndékok de hau poli ampong’d ga”
3 Cang du dengé’n lisé curup hitu, mai taé de pisa tau’d ata mbeko getok Taurat oné nai disé, “Ata ho’o dé pandé hojat Mori Kraéng.”
4 Landing Mori Yésus baé apa ata ngai nuk’n lisé, poli hitu ga Hia taé ne nggo’o, “Ai co’o dé méu ta tara cébo kéta nuk ata to’é di’a kéta taung oné nai de méu?
5 Ai nia kéta léng ata céwé émong’n ta, taé ne nggo’o: Sanggé’d ndékok de hau poli ampong’d ga, ko taé ne nggo’o: Hesé agu lako ga?
6 Landing kudut méu ngancéng baé ngong oné lino ho’o dé Hia Anak Mensia manga rang kuasa’N te ampong ndékok” – wiga mai taé Diha ga ngger oné ata péko hitu – “To’o ga, téti wongka toko de hau agu kolé ga ngger oné mbaru’m hau!”
7 Rodo to’o kaut ata hitu agu kolé’n hia gaé.
8 Cang du ita’n lisé apa hitu ga, ata do situ rantang kéta agu pandé hiang Mori Kraéng ata poli téing rang kuasa ného hitu ngger oné mensia.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 04 JULI 2012

HO’O DḖ INJIL DE MORI YḖSUS ATA TUNTI LIHA MATIUS 8:28-34
PAKA NARING GA LITḖ MORI KRAẺNG (04-07-12)



28 Cang du Mori Yésus cai be sina tana be sina ga, ngong sina tana data Gadara, rodo mai kaut sina mai boa ata sua tau’s ata ngai woréng le jing da’at; ise mai te cumang Hia. Ise situ de ata pande rantang laing keta’s, wiga toé kéta manga cengata’n ata ata rani nai’d te lako liba salang hitu.
29 Mai ciék disé ga, “Ai apa léng urusan Dité hitu ta agu ami ho’o, oé hau Anak de Mori Kraéng? Ai Ité hitu mai nanang te ndaék ami ho’o ko be bolo’n toé di cai’y rapak reké’n ga?”
30 Toé tadang’d oné mai isé situ do kéta’s ela ata ngai rémé élor kawé hang’d isé.
31 Poli hitu jing da’at situ tegi ngger oné Hia, “Émé Ité hitu sonda ami ho’o, jera koé ami lité te ngo ngger oné sanggé’d ela situ.”
32 Mai taé de Mori Yésus ga ngger oné isé, “Ngo méu ga!” Poli hitu losa’s isé agu ngo ngger oné sanggé’d ela-ela situ. Sanggé’d taung ela-ela situ ga teku ngger wa longka mésé ngger wa waé sano agu mata kéta taung’s wa waé situ.
33 Poli hitu losi kéta taung’s sanggé’d ata lami’d ela-ela situ agu cang du cai’d isé oné kota, isé tombo kéta taung’s sanggé’d apa situ, ne nggitu kolé ngong ata sio’t woréng le jing da’at.
34 Sanggé’d taung ata oné kota hitu ngo be pé’ang kudut te cumang Mori Yésus agu cang du cumang agu Hia, tegi paka di’a lisé ngger oné Hia, kong Hia gélang-gélang koé téti’n te ngo oné mai tana disé situ.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 03 JULI 2012

HO’O DḖ INJIL DE MORI YḖSUS ATA TUNTI LIHA YOHANES 20:24-29
PAKA NARING GA LITḖ MORI KRAẺNG (03-07-12)


24 Maik hia Tomas, cengata ata oné mai sanggé’d campulusua taus ata nungku situ, ata caro kolé hia Didimus, toé manga nempung cama-cama agu isé’n hia, cang du mai’n Mori Yésus ngger sina hitu.
25 Wiga, mai taé de ata nungku situ’t iwo’d ga ngger oné hia, “Poli ita Mori’g ami ho’o gé!” Maik hia Tomas taé ne nggo’o ngger oné isé, “Ẻmé aku toé ki’n di ita le mata de ru’g aku baté réu le paku’n oné dungka limé Diha agu émé aku toé ki’n sapel rempa limé daku oné dungka réu le paku situ agu cau laku réu oné dungka racap Diha, toé ki’n di ngancéng imbi’n laku tah.”
26 Alo leso poli hitu ga sanggé’d ata nungku Diha Mori Yésus pandé nempung kolé oné mbaru hitu ki’n agu te ho’on ga manga kolé hia Tomas cama-cama agu isé. Du ngai rémé tadu jimed ki’d sanggé’d para mbaru hitu ga, rodo mai kaut Hia Mori Yésus agu Hia hesé oné beréha isé agu mai taé’n ga, “Hambor ga latang te méu!”
27 Poli hitu mai taé Diha ga ngger oné hia Tomas, “Damang dé na’a no’o le méu rempa limé de hau agu lélo ga limé Daku, damang dé los limé’m hau agu sapel dapang dé le hau racap Daku agu néka toé imbi kolé le hau e, maik hau paka imbi.”
28 Mai walé diha Tomas ga, “Yo Mori agu Mori Kraéng daku!”
29 Mai taé de Mori Yésus ga ngger oné hia, “Ai le poli ita Aku;m dé hau tara ngancéng agu ngoéng te imbi’m dé hau é. Mosé di’a dé sanggé’d isé sio’t toé ita, maik imbi.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 02 JULI 2012

HO’O DḖ INJIL DE MORI YḖSUS ATA TUNTI LIHA MATIUS 8:18-22
PAKA NARING GA LITḖ MORI KRAẺNG (02-07-12)


18 Cang du Mori Yésus ita ata do sio’t mai lupi baling Hia, jera Liha te téti ngo be sina tana be sina.
19 Poli hitu mai’y dé cengata ata mbeko getok Taurat agu taé ne nggo’o ngger oné Hia, “Tuang Guru é, aku ho’o cepisa nanang te lut Ité, ngger nia kaut Ité ngo’d.”
20 Mai taé de Mori Yésus ga ngger oné hia, “Acu puar dé manga liang’d agu kaka lélap ga manga kolé cewo’d, maik Anak Mensia dé toé manga ca osang te na’a pandé halas sa’i’N Hia.”
21 Ata cengata kolé, ngong cengata oné mai ata nungku Diha, taé ne nggo’o ngger oné Hia, “Mori Sengaji é, sendo koé aku Lité te ngo kudut te boak ema daku di.”
22 Maik Mori Yésus taé ne nggo’o ngger oné hia, “Lut Aku kaut ga agu kong kaut de ata mata boak ata mata d’isé.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 01 JULI 2012

HO’O DE INJIL DE MORI YESUS ATA TUNTI LIHA MARKUS (5:21-43)
NARING GA LITE YESUS KRISTUS (01-06-12)


21 Du poli’n Mori Yésus ngo be sina agu lambo/perahu, mai londang ata do mai kudut impung lupi/ruis Hia. Du rémé hesé’N Hia lupi sano,
22 cai’n kaut ce ngata ata tu’a laing’y one mbaru sembaéng, ngasang na hia Yairus. Du ita’n liha hia Mori Yésus ga, tikul paka di’a dé hia wa wa’i de Mori Yésus,
23 agu tegi tu’u-tu’ung kéta liha wa mai nai’n, “Anak inéwai daku rémé kéta beti’n, am tiong te rowa’y gi; émé ngoéng’D Ité Mori, cénggo koé ce koé’n agu sapel koé le limé Dité oné sa’i/ulu diha, kong hia ngancéng ina agu selamak agu terus mosé kin.”
24 Lako’y Mori Yésus ga agu ata hitu. Ata do lako londang lut Hia, agu sanggé doét-daét tau’d ruis Hia.
25 Manga ce ngata ruis hitu ata inéwai; campulu sua ntaung hia ga hena le beti cégong losa/lula waé dara.
26 Poli dondé’n kéta hia rewos/musa le ata mbeko (tabib), wiga taung’s sanggé’d ceca diha, landing toé kéta manga guna koé ce koé’n; tambang da’at molé’y beti diha.
27 Poli dengé’n liha sanggé’d kréba ngong Mori Yésus; itu tara berani’n hia te ngo ruis Mori Yésus oné be réha ata do situ; hia ngo ruis Mori Yésus mai musi mai toni; poli hitu ga cau liha baju léwé de Mori Yésus.
28 Ai ne nggo’o nuk diha wa nai koé’n: “Émé cau kaut laku ce koén baju léwé Diha, pasti ina muing beti daku.”
29 Pas kéta cang du hitu ga rodo meti kaut losa waé dara diha, agu noing liha ina’y weki diha oné mai beti’n hitu.
30 Pas cang du hitu ga baé le Mori Yésus manga loli nai mberes oné mai weki Diha, wiga holés Hia oné be réha ata do situ agu mai réi’N ga, “Céi dé ata ho’o’t cau baju léwé Daku ta?”
31 Mai walé data nungku Diha ga, “Yo Ité, poli di’a ita’D Lité do kéta’s ata so’o’t nempung baling Ité, cewur agu doét-daét tau’d, pasti manga kaut ata dudi agu Ité; com néka bénggat kaut Lité ga."
32 Landing Mori Yésus lélo lupi baling weki Ru’n kudut te baé’n ata hitu’t cau baju léwé Diha.
33 Rantang da’at inéwai hitu ga agu jejer kéta hia du baé’n liha poli jiri di’a agu ina’n beti diha ga. Koném po jejer hia ga, hia lako ngo bolo agu suju olo mai ranga de Mori Yésus agu tura liha sanggé’d taung apa ata pandé diha agu betua’n pandé hitu.
34 Poli hitu ga mai taé de Mori Yésus oné inéwai hitu: “Enu é, le imbi’m dé hau tara selamak agu ina dé beti’m. Kolé ga agu hambor oné nai’m, agu jaga di’a-di’a porong néka hena le beti hitu kolé hau ce pisa.”
35 Du rémé tombo kin Mori Yésus ga, cai’d ata wéro oné mai haé wa’u de tu’a laing’n mbaru sembaéng hitu bao, agu mai taé disé ga, “Yo ité, ai manga kréba susa’d ité, lut rowa’y anak dité ga, wiga wili ga, asi kaut pandé répot’n lité Mori Tuang Guru ho’o.”
36 Landing Mori Yésus toé dangang nipu Liha curup disé, agu mai taé’n ga agu ata tu’a mbaru sembaéng hitu: “Néka rantang ité, imbi kaut lité!”
37 Du cai’d isé oné mbaru mata hitu ga, Mori Yésus ba hanang hia Pétrus, Yakobus, agu Yohanés, (asé diha Yakobus), te raés Hia; toé sendo’s liha ata iwo’d te ngo cama-cama agu isé.
38 Cai’s isé ga oné mbaru data tu’a mbaru sembaéng hitu; ita’s liha Mori Yésus ata do kéta oné mbaru hitu rémé ngai-ngaok, rétang agu lorang nolol kéta.
39 Du cai’d isé oné mai mbaru ga, mai réi Diha oné sanggé’d ata situ, “Co’o tara ngaok agu rétang’s dé méu ta? Toé di manga mata’n anak ho’o é, ata rémé toko kin hia?”
40 Landing sanggé’d isé ipo pé Hia agu tawa loér Hia.
Jera ngo be pé’ang kéta taung’s Liha sanggé’d ata situ; dadé;s Liha endé agu ema’n anak koé hitu agu haé lako Diha bao; isé ngo boné lo’ang d’anak koé hitu.
41 Mai Hia ga cau limé d’anak koé hitu, agu mai taé’n ga, “Talita kum,” ngong ne nggo’o’y dé hitu ga, “Oé enu molas, séngét apa ata taé Daku, to’o hau ga!”
42 Cang du hitu rodo to’o kaut anak hitu agu hesé agu laki-lako’n, ai campulu sua ntaung dé umurn ga. Lenget kéta taung’s sanggé’d ata situ’t manga nitu.
43 Tegi Liha oné ata do situ, kudut ceha kejadian hitu, néka kéta tombo olo-olo, oné ata do. Poli hitu ga mai Hia jera ata kudut te téing hang anak koé hitu.


HO’O DE REWENG DE MORI KRAENG:
NARING GA LITE YESUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 30 JUNI 2012

HO’O DḖ INJIL DE MORI YḖSUS ATA TUNTI LIHA MATIUS 8:5-17
PAKA NARING GA LITḖ MORI KRAẺNG (30-06-12)


5 Cang du Mori Yésus ngo ngger oné Kapernaum, mai cengata ata perwira mai te cumang Hia agu tegi ngger oné Hia ne nggo’o,
6 “Mori Sengaji é, mendi daku ngai toko kin sina mbaru ai hia beti péko agu hia kolé ga sengsara kéta mosé’n.”
7 Mori Yésus taé ne nggo’o ngger oné hia, “Manga kaut mai’G Aku to’ong mai te pandé ina hia.”
8 Maik mai walé de perwira hitu ga ngger oné Hia, “Mori Sengaji é, aku ho’o toé kéta patun te tiba ité’t Mori oné mbaru daku, maik pa’u kaut ca reweng Dité’t Mori, wiga ina muing mendi daku hitu oné mai beti’n ga.
9 Ai aku weki rug ho’o dé ata cengata bawahan kolé, be wa mai aku ga manga kolé prajurit. Émé aku ho’o taé ngger oné cengatan prajurit situ: Ngo ga! hia hitu ngo’y gi, agu ngger oné ata iwo’d kolé ga: Mai cé’é ho’o ta! hia hitu manga kaut mai’n cepisa, ko ngger oné mendi daku: Damang dé pande apa ho’o ta! hia hitu manga kaut pandé’n liha ce pisa.”
10 Cang du dengé’n Liha tombo hitu, Mori Yésus lenget agu taé ne nggo’o ngger oné isé’t ngai cébong lut Hia’d, “Tetu’ung kéta Aku taé ne nggo’o ngger oné méu ho’o, imbi ata ne nggo’o’y mésé’n toé di manga ita dé’it’n Laku oné mai cengata’n kaut oné mai ata Israél.
11 Aku taé ne nggo’o ngger oné méu: Do ata ata mai ce pisa mai awo mai agu mai salé mai agu mai lonto hang cama-cama agu hia Abraham, Ishak agu hia Yakob oné dungka Perénta de Surga,
12 maik anak-anak de Perénta hitu ga manga kaut péncar’d tayi ngger oné dungka osang ata baté nendep kéta, agu sina hitu ce pisa ga manga kaut dengé’n lité déré lorang agu ngetek tau’d ngi’is.”
13 Poli hitu Mori Yesus taé ne nggo’o ngger oné ata perwira hitu, “Kolé ga agu manga kaut jiri’n latang te hau cama ného apa ata imbi’n le hau.” Pas cang du hitu kéta ga rodo ina kaut dé mendi diha hitu.
14 Cang du cai’d isé oné mbaru diha Pétrus, Mori Yésus ita inang diha Pétrus rémé kéta halas toko kin ai le beti pémpang.
15 Cau Liha limé data tu’a endé hitu, wiga poli hitu ga rodo mora kaut’y beti pémpang diha hitu ga.
16 Du tiong te wié tana ga ba’s lata do situ ngger oné Mori Yésus do kéta ata sio’t woreng le jing da’at agu Mori Yésus ga pa’u kaut ca reweng Diha Hia Mori Yésus sonda sanggé’d jing da’at situ agu pandé ina sanggé’d ata sio’t rémé beti kéta kid.
17 Sanggé’d apa situ dé jiri laing kudut te pandé genap’n de reweng ata poli tombo’d danong ga lut hia Nabi Yésaya danong: “Hia hitu dé ata pola’d sanggé’d maél dité agu eké’d sanggé’d beti dité.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 29 JUNI 2012

HO’O DḖ INJIL DE MORI YḖSUS ATA TUNTI LIHA MATIUS 16:13-19
PAKA NARING GA LITḖ MORI KRAẺNG (29-06-12)


13 Cang du cai’n Mori Yésus sina Kaisaréa Filipi, mai Hia ga réi ngger oné ata nungku Diha, “Lorong taé data ga, ai céi léng Anak Mensia hitu tah?”
14 Mai walé disé ga, “Manga’s ata ne nggo’o taé’d o ité: Hia Yohanes Cebong, ata iwo’d kolé ga walé ne nggo’o: Hia Élia, agu ata iwo’d kolé ga walé ne nggo’o: Hia Yérémia, ko cengata’n oné mai sanggé’d nabi.”
15 Poli hitu Mori Yésus réi ngger oné isé: “Maik co’o wili ga taé de méu, céi léng dé Aku ho’o ta?”
16 Mai walé diha Simon Pétrus ga, “Ité hitu dé hia Mésias, Anak de Mori Kraéng ata mosé!”
17 Mai taé de Mori Yésus ga ngger oné hia, “Mosé di’a hau gé Simon anak diha Yunus ai toé dé mensia dé ata céngka’n apa hitu ngger oné hau, maik Ema Daku ata ka’éng éta surga.
18 Agu Aku kolé taé ne nggo’o ngger oné hau: Hau ho’o dé Pétrus agu be béta’n watu pogor ho’o Aku ce pisa pandé hesé ro’éng nggeluk Daku agu lino data mata ga toé ngancéng te rendak isé tayi.
19 Ngger oné hau hitu dé Aku ce pisa téing kunci’n Perénta de Surga. Apa-apa kaut ata ngai pongo kid le hau oné lino ho’o ngai pongo kid tayi éta surga agu apa kaut ata sio’t lego’s le hau oné lino ho’o manga kaut lego’d tayi éta surga.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 28 JUNI 2012

HO’O DḖ INJIL DE MORI YḖSUS ATA TUNTI LIHA MATIUS 7:21-29
PAKA NARING GA LITḖ MORI KRAẺNG (28-06-12)


21 Toé sanggé’d ata sio’t kepok ngger cé’é Aku: Mori, yo Mori! ata ocok ngger oné mbaru surga’y tayi, maik ata sio’t seber te pandé apa ata ngoéng de Ema Daku éta surga.
22 Du leso turung cemol tayi ga dooo kéta ata ata kepok ngger cé’é Aku: Mori, yo Mori, ami ho’o olo poli céngka nubuat le ngasang Dité, poli sonda jing da’at le ngasang Dité, agu dondé poli pandé tanda lenget le ngasang Dité kolé!
23 Cang du hitu tayi ga Aku tombo toé ceha kaut ngger oné isé agu ne nggo’o taé Daku: Néka kéta rabo, toé kéta manga baé’s Laku méu ho’o! Ngo méu ga oné mai ranga Daku, sanggé’s méu ata pandé apa ata da’at’d!”
24 Wiga wili ga, sanggé’d taung ata ata séngét reweng Daku ho’o, agu tunti’s liha oné mosé’n, ata hitu cama ného cengata ata bijaksana, ata pandé hesé mbaru’n lobo watu.
25 Poli hitu cai’n usang mésé agu ronco waé wa’a, agu ngkeng kolé buru mésé liba dungka mbaru hitu, landing mbaru hitu toé renco’y ai mbaru hitu hesé/pésék lobo watu.
26 Landing céi-céi kaut ata ata séngét, reweng Daku maik toé tunti’s liha oné mosé’n, ata hitu dé cama kéta ného ata bodok éros, ata hio’t pandé hesé mbaru’n lobo laing.
27 Poli hitu cai’n usang mésé agu ronco waé wa’a, agu ngkeng kolé buru mésé liba dungka mbaru hitu, wiga renco muing’y mbaru hitu agu rusak da’at kéta’y jiri’n ga.”
28 Cang du poli’n Mori Yésus pandé cemol’d taung curup situ ga, lenget kéta taung’s ata do situ dengé sanggé’d taung toing situ Diha,
29 ai Hia toing isé ného ata manga rang kuasa mésé’n, toé cama ného ata mbeko getok Taurat disé.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 27 JUNI 2012

HO’O DḖ INJIL DE MORI YḖSUS ATA TUNTI LIHA MATIUS 7:15-20
PAKA NARING GA LITḖ MORI KRAẺNG (27-06-12)


15 “Jaga-jaga koé méu dungkang ata nabi-nabi adong siot mai ngger oné méu agu ba tara cama ného jimbal merup, maik bo setu’un isé situ dé acu puar ata rani kéta’s.
16 Oné mai wua’d dé ngancéng baé’d le méu ce pisa isé situ. Ai ngancéng léng ata pua wua anggor ko oné mai pu’u karot bombo ko wua ara oné mai rémang rami karot?
17 Ai ne nggitu’y dé yé sanggé’d taung pu’u haju sio’t di’a’d manga kaut ba dani ata di’a’d tayi, maik pu’u haju sio’t toe di’a’d ga manga kaut ba dani ata toe di’a’d tayi.
18 Ai toé kéta manga de’it olo mai’n dé pu’u haju ata sio’t di’a’d manga ba dani ata toe di’a’d, ko pu’u haju sio’t toe di’a’d manga ba dani ata di’a’d.
19 Sanggé’d pu’u haju sio’t toé manga ba dani ata di’a’d, pasti manga kaut ndapu’d ce pisa agu oké ngger oné api.
20 Wiga wili ga, oné mai wua’d dé tayi ngancéng baé’d le méu isé situ.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 26 JUNI 2012

HO’O DḖ INJIL DE MORI YḖSUS ATA TUNTI LIHA MATIUS 7:6,12-14
PAKA NARING GA LITḖ MORI KRAẺNG (26-06-12)


6 “Méu néka téing céca nggeluk ngger oné acu agu méu néka oké mutiara de méu ngger oné ela, rantang boto wegi-wegi lisé le wa’i’d, poli hitu ga hia mai te cowit ko wincang méu.”
12 Sanggé’d taung apa ata ngoéng laing’n le méu kong ata pandé ngger oné méu, olo pandé ne nggitu di le méu ngger oné isé. Hitu’y dé sanggé’d ici’n hukum Taurat agu sanggé’d kitab de nabi-nabi.
13 Ocok ga méu oné dungka para ata ké’ot kéta, ai nggéngga’n dé para agu ngalis’n dé salang hio’t tua oné osang baté susa agu mata, agu do kéta’s dé ata ata poli lako lut salang hitu;
14 ai ké’ot’n dé para agu koé kéta’y dé salang hio’t tua oné dungka mosé di’a, agu ce koé kéta’s de ata sio’t ngancéng baé salang hitu.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 25 JUNI 2012

HO’O DḖ INJIL DE MORI YḖSUS ATA TUNTI LIHA MATIUS 7:1-5
PAKA NARING GA LITḖ MORI KRAẺNG (25-06-12)


1 “Méu néka pandé hakim ata haé, kong méu kolé toé hakim lata ce pisa.
2 Ai le penghakiman hio’t paké le méu te hakim ata, méu kolé ce pisa hakim lata agu tongka paka hio’t paké le méu kudut te paka, manga kolé’y tay paké’n te paka weki ru’s méu.
3 Co’o kéta méu tara ngancéng lélo lokap koé oné mata data bana, maik siri léba éros oné dungka mata de ru’s méu toé ngancéng ita’n le méu?
4 Co’o kéta’y cara’n hau ngancéng curup ngger oné haé wa’u de méu ga: Kong aku cokét’n lopat lokap hitu oné mai mata de hau, rémé manga ngai nitu ki’n léba éros kéta oné dungka mata de ru’m hau?
5 Oé méu’t ata munafik tah, olo oké’y di le méu siri léba éros oné mai mata de ru’s méu, wiga hau ngancéng lélo nggirong kéta kudut ngancéng te cokét lopat lokap oné mai dungka mata de haé wa’u de hau.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 24 JUNI 2012

HO’O DḖ INJIL DE MORI YḖSUS ATA TUNTI LIHA LUKAS 1:57-66,80
PAKA NARING GA LITḖ MORI KRAẺNG (24-06-12)


57 Poli hitu ga, rapak cai leso’n te loas’n hia Elisabet agu loas liha cengata anak ata rona.
58 Cang du mai’d sanggé’d ata haé béo’d ga agu sanggé’d haé wa'u’d ga dengé ai Mori Kraéng poli toto widang nggeluk mésé latang te hia, hitu tara nisang kéta nai d’isé agu naka cama-cama agu hia.
59 Poli hitu ga mai’s isé du rapak leso te alo’n, mai kudut te sunat anak koé hitu agu isé kolé nanang te téing hia ngasang Zakharias kolé lorong ngasang de ema’n,
60 landing mai taé de endé’n ga, "Néka é, hia paka téing ngasang Yohanés."
61 Mai taé disé ga ngger oné hia, "Toé dé manga oné mai wa'u ko uku de méu ata ata ne nggitu ngasang’n."
62 Mai isé ga téing curup isyarat molé latang te ema’n ga kudut réi apa ngasang te téing ngasang latang te anak koé ho’o?
63 Mai hia ga tegi watu tulis, agu hia tulis ne nggo'o: "Ngasang’N hia Yohanés." Sanggéd isé lenget kéta taung’s.
64 Pas kéta cang du hitu ga rodo céngka kolé mu'u’n agu rodo kedok ne nggitu kaut lema’n, hitu tara ngancéng curup kole’n hia agu naring Mori Kraéng.
65 Sanggé’d taung ata ata ka'éng ruis isé ga rantang kéta taung’s, agu sanggé’d taung apa situ ga jiri tombo mu'u laing lata oné golo Yudéa hitu.
66 Sanggé’d ata ata dengé’n ga, nuk lisé oné nai’d agu mai taé’d ga, "Jiri apa kéta’y péng anak ho'o ce pisa?" Ai limé de Mori’n manga kamping tédéng lén agu hia.

80 Anak koé hitu éta-éta’y tu’a’n ga agu tambang-tambang kéta mberes nai’n ga. Hia ka’éng one satar laing sanggé leso du hia paka toto weki’n ngger oné ata Israél.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 23 JUNI 2012

HO’O DḖ INJIL DE MORI YḖSUS ATA TUNTI LIHA MATIUS 6:24-34
PAKA NARING GA LITḖ MORI KRAẺNG (23-06-12)


24 Toé kéta manga cengata’n ata ata ngancéng iyo ngger oné sua tau’s tuang sengaji’n hia. Ai émé ne nggitu’y gi, hia cepisa toé momang hio’t cengata’n agu momang ata hio’t cebana’y, ko hia ce pisa sundur kéta ngger oné hia’t cengata agu kembeluak kéta’y ngger oné hia’t cengata kolé. Méu toé ngancéng iyo ngger oné Mori Kraéng agu ngger oné Mamon.”
25 “Wiga wili ga, Aku taé ne nggo’o ngger oné méu: Néka simpung bail ngong mosé de méu, ngong apa ata nanang te hang’d le méu ko te inung, agu néka simpung kolé méu lut weki de méu, ngong apa ata nanang te paké’d le méu. Ai bom toé céwé penting kéta’n dé mosé hitu itu po ngong hang agu weki hitu dé céwé penting kéta’n itu po wéngko weki?
26 Lélo ga le méu sanggé’d kaka lélap éta awang, sio’t toé manga weri wini’d agu toé manga ako’d agu toé manga nongko bokong ngger oné langkok mésé, maik ngai téing hang kid le Ema de méu ata ka’éng oné surga. Ai bom toé méu ho’o dé ata céwé penting kéta’n itu po sanggé’d kaka lélap situ?
27 Ai céing léng ata oné mai be réha méu ho’o hio’t le simpung nai’n hia ga nganceng pandé tambang léwé-léwé koé ce koén salang mosé’n?
28 Ai co’o léng tara simpung kéta’s méu ngong wéngko weki situ? Lélo ga le méu wéla wangkung oné satar, hio’t todo le ru’n kaut agu toé manga pandé duat’n ko pandé tiling kampas,
29 maik Aku taé ne nggo’o ngger oné méu: Hia Salomon oné sanggé’d taung mosé méwah diha toé kéta manga dé’it wéngko weki’n ata cama kéta di’a’d ného can oné mai wéla situ.
30 Wiga wili ga, émé ne nggitu’y dé Mori Kraéng pandé di’a kéta remang oné satar, hiot leso ho’o ngai manga kin agu diang’n ga oké ngger oné dungka api, yo ai bom toé lélo agu pandé di’a-di’a koé’y Liha ga sanggé’s méu ho’o, ata toé do imbi’s?
31 Wiga wili ga, méu paka néka simpung agu taé ne nggo’o: Apa dé hang dami ce pisa ga? Apa dé latang te inung dami ce pisa ga? Apa dé latang te wéngko weki dami ce pisa ga?
32 Sanggé’d taung apa situ dé cébo kéta kawé-kawé’d lata sanggé’d bangsa sio’t toé baé/pecing Mori Kraéng. Maik Ema de méu ata ka’éng éta surga baé ngong méu ho’o dé perlu sanggé’d taung apa situ.
33 Maik olo kawé di le méu Perénta de Mori Kraéng agu ngoéng Diha, wiga sanggé’d taung apa situ ga manga kaut jiri tambang-tambang’d latang te méu.
34 Wiga wili ga, méu néka simpung ngong léso diang ce sua, ai léso diang ce sua hitu manga kolé’y simpung de ru’n. Mosé susa ca leso remo dé’it latang te ca leso hitu kaut.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 22 JUNI 2012

HO’O DḖ INJIL DE MORI YḖSUS ATA TUNTI LIHA MATIUS 6:19-23
PAKA NARING GA LITḖ MORI KRAẺNG (22-06-12)


19 “Méu néka nongko céca latang te weki ru’s méu oné lino ho’o; ai oné lino ho’o de do kéta naing agu ta’i upa te pandé lerak’d ceca situ agu manga kolé ata tako te wangkér-walék agu tako’d ceca situ.
20 Maik nongko ga le méu ceca oné surga; ai éta surga hitu dé toé manga naing agu ta’i upa te pandé lerak’d ceca situ agu toé manga kolé ata tako te wangkér-walék agu tako’d ceca situ.
21 Ai nia wan na’a’d ceca de méu, nitu kole’s dé manga’n nai de méu.
22 Mata dé cama ného lampu pelita latang te weki. Ẻmé di’a’n mata de méu, jiri gérak kolé dé sanggé’d taung weki de méu;
23 émé da’at’n mata de méu, nendep kéta dé sanggé’d taung weki de méu. Wiga wili ga, émé gérak ata manga oné méu hitu jiri nendep’y gi, nendep kéta’y dé jiri’n nendep hitu ce pisa ga.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 21 JUNI 2012

HO’O DḖ INJIL DE MORI YḖSUS ATA TUNTI LIHA MATIUS 6:7-15
PAKA NARING GA LITḖ MORI KRAẺNG (21-06-12)


7 Agu oné sembaéng de méu hitu, méu néka sembaéng léwé-léwé ného laséng data siot toé baé Mori Kraéng. Nuk disé ga émé léwé’n sembaéng pasti sendo’s tegi disé.
8 Wiga méu wili ga néka ného isé, ai Ema de méu poli baéd taung sanggéd apa kaut ata perlu de méu, be bolo’n tegi’n le méu ngger oné Hia.
9 Wiga, ne nggo’o kaut sembaéng de méu ga:
Yo Ema dami ata ka’éng oné surga
Nggeluk koé ngasang Dité Mori
10 Cai koe perenta Dite Mori,
Jari koé ngoéng Dité Mori
Oné lino agu ného oné surga.
11 Mosé dami leso-leso’n téing koé ami leso ho’o’n
12 Ampong koé’s ndékok dami, ného ami ami ampong ata pandé sala agu ami;
13 agu néka dadé kami ngger oné damang, maik tadang koé’s sanggé’d da’at. (Ai Ité Mori Ema pu’un kuasa agu Perénta agu néra bong dengkir tay’n agu tédéng lén, Améng).
14 Ai émé méu ampong ndékok data, Ema de méu éta surga kolé ampong méu ce pisa.
15 Landing émé méu toé ampong ndékok data, Ema de méu kolé toé ampong sanggé’d sala de méu.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 20 JUNI 2012

HO’O DḖ INJIL DE MORI YḖSUS ATA TUNTI LIHA MATIUS 6:1-6, 16-18
PAKA NARING GA LITḖ MORI KRAẺNG (20-06-12)


1 “Nuk di’a-di’a dé, méu ho’o néka pandé sanggé’d taung adak de agama be bolo ranga data do kudut te ita lisé sanggé’d apa ata pandé de méu, ai émé ne nggitu dé pandé de méu, méu ho’o ce pisa toé ngancéng tiba widang di’a oné mai Ema de méu éta surga.
2 Itu tara ne nggo’o’n wili ga, émé hau nanang te téing sedeka, néka tombo siwisok lé lau kéta le hau pandé di’a hitu, ného kéta pandé data munafik oné mbaru-mbaru ngaji agu oné dungka salang-salang mésé, kudut te naring lata do. Tu’u-tu’ung kéta taé Daku ho’o latang te méu: Isé situ dé poli tiba widang di’a’d ga.
3 Landing émé méu nanang te téing sedeka, apa kaut ata pandé le limé wanang de méu paka néka baé le limé léo de méu.
4 Ata di’a’n dé ga téing le méu sedeka hitu oné dungka paté ciko, wiga Ema de méu éta surga ngancéng ita gauk di’a hitu one paté ceha agu Mori Ema hitu dé ce pisa ata téing lékon pandé di’a hitu latang te méu.”
5 “Ẻmé méu nanang te ngaji, méu néka sembaéng ného kéta ata munafik so’o. Isé situ dé ngoéng kéta te sembaéng mbongang mésé-mésé agu sembaéng pas kéta rémé hesé’d oné mbaru-mbaru sembaéng ko one jéko-jéko salang mésé, ai kudut te ita agu naring lata do. Tu’u-tu’ung kéta dé taé Daku latang te méu ho’o: Isé situ poli tiba’d widang di’a’d ga.
6 Landing émé méu nanang te sembaéng, méu paka ngo oné lo’ang de méu, tadu di’a-di’a paran lo’ang hitu, poli hitu ga ngaji méu nitu sina ngaji nggere oné ranga de Ema ata ka’eng one osang paté ceha. Ẻmé ne nggitu pandé de méu ga, Ema de méu hitu ngancéng ata ita pandé di’a oné paté ceha, manga kaut léko’n/wali’n Liha ce pisa pandé agu gauk di’a de méu hitu.”

16 “Ẻmé méu nanang te pande puasa, paka neka pande rengus ko susa kéta ranga de méu ného kéta pandé data munafik so’o. Ai isé situ pandé diod kéta ranga’d émé rémé puasa’d, kudut te ita lata bana ngong isé rémé kéta puasa mésé’d.Tu’u-tu’ung kéta taé Daku latang te méu ho’o: Sanggé’d isé situ ga poli tiba widang di’ad latang sanggé’d apa ata pandé disé.
17 Landing émé méu nanang te pandé puasa, pandé loma le meu sa’i de méu agu baki kolé ranga de méu kudut nggélok agu mbilar kéta ita’n lata,
18 kudut toé baé lata bana ngong méu ho’o rémé kéta puasa mésé. Kong hanang Ema de méu ata ka’eng oné osang paté ceha ata ita’n apa ata pandé di’a de méu. Ema hitu dé ce pisa ata ita’n pandé de méu hitu oné paté ceha, Hia kolé dé ata léko’n pandé agu gauk di’a de méu hitu ce pisa.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 19 JUNI 2012

HO’O DḖ INJIL DE MORI YḖSUS ATA TUNTI LIHA MATIUS 5:43-48
PAKA NARING GA LITḖ MORI KRAẺNG (19-06-12)


43 Poli dengé’n kolé le méu ca réwéng ata ne nggo’oy runi’n: Momang ga le méu sanggé’d haé cama ménsia agu reget ga le méu sanggé’d ata bali de méu.
44 Maik Aku taé ne nggo’o ngger oné méu: Momang ga le méu ata bali de méu agu sembaéng-tegi ga latang te isé sio’t ndaék méu.
45 Ai le hitu’y de méu jiri anak-anak de Ema dé méu éta surga, hio’t pandé par leso latang te ata da’at agu latang te ata di’a agu pandé wa’u usang éta mai awang latang te ata sio’t molor agu latang ata sio’t toé molor.
46 Ẻmé méu hanang momang ata sio’t momang méu, apa’n kolé ga betua’n latang te méu? Ai bom toé ne nggitu kolé’s dé ruku pandé d’ata sio’t nongko blasténg?
47 Ẻmé méu hanang téing tabé latang te sanggé’d haé wa’u de méu kanang, apa dé lebi’n ruku-pandé de méu hitu oné mai ruku-pandé d’ata iwo’d situ ga? Ai bom toé ne nggitu kolé’s dé ruku-pandé data sio’t toé di baé Mori Kraéng?
48 Wiga wili ga, méu ho’o de paka jiri di’a kéta (sempurna), cama ného Ema de méu éta surga dé di’a kéta’y (sempurna).


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 18 JUNI 2012

HO’O DḖ INJIL DE MORI YḖSUS ATA TUNTI LIHA MATIUS 5:38-42
PAKA NARING GA LITḖ MORI KRAẺNG (18-06-12)


38 Poli dengé’n le méu ga apa ata poli taé’n ne nggo’o: Mata léko le mata agu ngi’is léko le ngi’is.
39 Maik Aku taé ne nggo’o ngger oné méu: Méu ho’o néka koléng ata ata pandé da’at ngger oné méu, maik céing kaut ata pak baka pacu wanang de méu, téing kolé le méu ga pacu léo de méu.
40 Latang te ata sio’t ngoéng te baro hau ai nanang te emi baju de hau, yo com téing kolé ga le méu juba léwé de méu.
41 Céing kaut ata paksa hau te lako lawang kaut ca mil déu’n ga, lako cama-cama agu hia lawang kaut sua mil.
42 Téing ga ngger oné ata sio’t tegi ngger oné méu agu méu néka wur ata sio’t ngoéng te célong oné mai méu.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 17 JUNI 2012

HO’O DḖ INJIL DE MORI YḖSUS ATA TUNTI LIHA MARKUS 4:26-34
PAKA NARING GA LITḖ MORI KRAẺNG (17-06-12)


26 Poli hitu mai taé de Mori Yésus, “Ne nggo’oy de rapang’n Perénta de Mori Kraéng hitu: Cama ného cengata ata ata hiot ngo wécak wini oné pétak uma,
27 poli hitu le wié tana ga hia ngo toko agu du siang tana ga to’o kolé’y hia, agu wini hitu ga wangka pu’ung gumuk agu todo’y gi, landing co’o’y cara’n toé baé lata hitu.
28 Lino ho’o rodo le ru’n kaut pandé gumuk’n wini hitu, wangka pu’ung’n ga dangka haju’n, poli hitu coko wua’n, poli hitu kolé ga manga wini ko wua’n ata penong kéta ici’n oné coko hitu.
29 Ẻmé pas remo té’é’n wua hitu ga, ata hitu gélang-gélang pua wua situ, ai cai’y gi cekeng te nongko dani.”
30 Mai taé Diha kolé ga, “Le pai kolé’y dé ité ho’o nanang te pandé rapang Perénta de Mori Kraéng hitu, ko le rapang apa kolé dé ité ho’o nanang te pandé gérak’n apa hitu ga?
31 Perénta hitu dé cama kéta ného wini sesawi koé hiot poli wécak éta lobo tana’d ga. Bo setu’un wini hitu kéta dé ata dai koé’n oné mai sanggé’d taung tara’d wini ata manga oné lino ho’o.
32 Maik émé poli wécak’n hia ga, wini hitu manga kaut todo’n cepisa agu jiri céwé mésé itu po sanggé’d uté-uté cebana situ agu do kéta dangka-dangka siot mésé kéta’s, wiga sanggé’d kaka lélap éta awang mai te pandé cewo oné mbau de haju hitu.
33 Le tombo ného rapang ného hitu bao, Hia kréba reweng di’a latang te isé lorong ata ngancéng deko agu idép’n lisé,
34 agu Hia toé tombo apa-apa ngger oné isé émé toé paké tombo ného rapang, maik latang te sanggé’d ata nungku’N, Hia tombo sanggé’n taung latang te isé kanang kali.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 16 JUNI 2012

HO’O DḖ INJIL DE MORI YḖSUS ATA TUNTI LIHA LUKAS 2:41-52
PAKA NARING GA LITḖ MORI KRAẺNG (19-03-12)


41 Néténg-néténg ntaung ata tu’a de Mori Yésus ngo ngger sina Yérusalém du cekeng leso ramé mésé Paska.
42 Cang du Mori Yésus pas campulusua ntaung umur’n ga isé ngo ngger sina Yérusalém cama ného ata laséng’n pandé disé du leso ramé mésé hitu.
43 Du cemol’n leso ramé mésé hitu ga, cang du londang’d isé te kolé béo, Mori Yésus ngai ka’éng kin sina Yérusalém landing toé baé lata tu’a’N.
44 Nuk disé ga Hia Mori Yésus manga oné be réha ata do situ ata cama-cama lako londang kolé cama-cama agu isé, wiga isé lako lawang ca leso ménan; poli hitu isé kawé Hia oné be réha wa’u agu sanggé’d ata baé disé.
45 Maik isé toé ita ko cumang Hia. Itu tara gélang-gélang kolé’d isé ngger sina Yérusalém te kawé Hia sina hitu.
46 Telu leso wa ga cemol’n isé cumang Hia oné Mbaru de Mori Kraéng; Hia rémé lonto’N oné be réha sanggé’d guru-guru agama, rémé séngét tombo disé agu do kéta réi’N Hia ngger oné isé.
47 Sanggé’d taung ata séngét Hia lenget kéta taung’s ai nggepuk (pintar) kéta Hia; sanggé’d walé Diha kolé ata minak’d kéta taung.
48 Cang du ita Hia’n ata tu’a Diha ga, lenget kolé’s isé; poli hitu mai taé de endé’n ga, “Nana é, co’o kéta tara ne nggo’o’n pandé’M Hau latang te ami? Lélo dé, ema de Hau agu aku bonga kéta nai’g ami te kawé Hau.”
49 Mai walé Diha ga ngger oné isé, “Co’o kéta tara kawé Aku’s méu? Toé baé le méu ko ngong Aku ho’o dé paka ka’éng oné mbaru de Ema Daku?”
50 Landing isé toé idep apa ata taé Diha ngger oné isé.
51 Poli hitu Hia kolé cama-cama agu isé ngger sina Nazarét; sina hitu Hia ka’éng tédéng agu isé; isé lami agu tinu Hia. Endé Diha na’a kéta taung’s sanggé’d apa situ oné nai’n.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 15 JUNI 2012

HO’O DḖ INJIL DE MORI YḖSUS ATA TUNTI LIHA YOHANES 19:31-37
PAKA NARING GA LITḖ MORI KRAẺNG (15-06-12)


31 Leso hitu de leso te pandé mengkek; rantang boto rapu-rapu situ ngai pangkot ndéong kid éta panggol du leso Sabat – ai leso Sabat hitu dé leso mésé – wiga mai’s dé sanggéd ata tu’a laing data Yahudi ngger oné hia Pilatus agu tegi lisé porong wa’i data situ pandé tepo kaut’s agu poli hitu ga, pandé wa’u’s lisé sanggé’d rapu situ.
32 Poli hitu mai’s sanggé’d ata prajurit mai te pandé tepo wa’i diha’t cengata ne nggitu kolé wa’i diha’t cengata kolé ata panggot oné panggol cama-cama agu Mori Yésus;
33 maik du cai’d isé oné Mori Yésus agu lélo lisé Hia poli rowa’n gi, toé jadi pandé tepo’n lise wa’i Diha,
34 maik cengata oné mai sanggé’d prajurit situ ceka le korung racap Diha; poli hitu ga rodo concang nitu main dara agu waé.
35 Ata hitu’t ita le run kéta apa hitu dé ata téing kesaksian agu kesaksian diha hitu dé benar, agu baé kolé liha ngong hia poli curup kebenaran hitu, kudut nganceng te imbi kolé’s mé’u ho’o.
36 Ai poli jiri’d kéta taung’d sanggé’d ca o ca situ kudut te pandé genap’n apa ata poli tulis’n oné Buku Nggeluk, “Toé manga ca’n toko Diha ata pandé tepo’d.”
37 Manga kolé ca nas ce bana ata ne nggo’o’y taén, “Isé ce pisa lélo Hia ata poli ceka’n lisé.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 14 JUNI 2012

HO’O DḖ INJIL DE MORI YḖSUS ATA TUNTI LIHA MATIUS 5:20-26
PAKA NARING GA LITḖ MORI KRAẺNG (14-06-12)


20 Aku taé ne nggo’o ngger oné méu: Ẻmé méu toé pandé apa ata ngoéng de Mori Kraéng céwé di’a oné mai sanggé’d ata mbeko getok Taurat agu sanggé’d ata Farisi, setu’un hitu ga méu hitu dé toé ngancéng ocok ngger oné osang baté Perénta de Mori Kraéng tayi.
21 Poli dengé’n le méu réwéng ata poli téing’n ga latang te empo dité danong mai’n: Néka paki ata; céing kaut ata paki ata hia hitu dé paka téing wahéng.
22 Maik Aku taé ne nggo’o nggér oné méu: Céing-céing kaut ata ata rabo ngger oné haé wa’u’n ata hitu paka hena le wahéng; céing-céing kaut ata mu’u da’at ngger oné haé wa’u’n ata hitu dé paka baro ngger oné Mahkamah Agama, agu céing-céing kaut ata taé: Acu poti da’at! ata hitu dé paka oké ngger oné gonggém api naraka ata ngai keté kéta kin dila api’n.
23 Wiga wili ga, émé méu nanang te téing takung de méu lobo compang agu pas kéta cang du hitu rodo nuk kaut le méu ngong ca nuk nai toé di’a oné nai de haé wa’u de méu latang te méu,
24 paka olo legong’s di takung de méu hitu lobo compang agu olo ngo pandé agu tegi hambor di agu hia hitu, poli hitu di po kolé kudut te pandé danung takung de méu hitu.
25 Gélang-gélang koé méu pandé tegi hambor agu ata bali de méu lawang méu ngai manga cama-cama agu hia oné be réha salang, kong ata bali de méu hitu toé baro méu ngger oné ata hakim agu ata hakim itu ga ba méu ngger oné ata pengawal agu poli hitu hau ga sorok lisé ba ngger oné bui.
26 Tetu’ung kéta Aku curup ngger oné méu ho’o: Méu ce pisa toé kéta kin losa oné mai bui hitu, be bolon méu pandé léko taung’s di raung de méu.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 13 JUNI 2012

HO’O DḖ INJIL DE MORI YḖSUS ATA TUNTI LIHA MATIUS 5:17-19
PAKA NARING GA LITḖ MORI KRAẺNG (13-06-12)


“Néka ne nggo’o nuk de méu, Aku ho’o mai kudut te oké kéta taung’s hukum Taurat agu kitab-kitab de sanggé’d nabi-nabi. Mai Daku ho’o dé toé te oké taung’s sanggé’d apa situ, maik te pandé lengkap sanggé’d apa situ. Ai te-tu’ung kéta taé Daku ngger oné méu: lawang toé di mora’y awang agu tana lino ho’o, toé kéta manga ca’n huruf koé ko ca’n titik ata oké oné mai hukum Taurat, bé bolo’n sanggé’d taung apa situ jiri taung’s gi. Wiga gili ga, céing kaut ata oké ca’n kaut perénta oné mai hukum Taurat, koném ata dai koé’n kéta, poli hitu ga toing kolé ne nggitu’s liha oné ata do, ata hitu tay lonto oné dungka osang ata taki wa’n kéta oné baté Perénta Surga; maik céing kaut ata lorong perénta situ agu toing lorong perénta situ kolé, ata hitu tay lonto oné osang ata langkas kéta oné Perénta Surga.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 12 JUNI 2012

HO’O DḖ INJIL DE MORI YḖSUS ATA TUNTI LIHA MATIUS 5:13-16
PAKA NARING GA LITḖ MORI KRAẺNG (12-06-12)


13 Méu ho’o dé ci’é de tana lino ho’o. Ẻmé ci’é hitu jiri hebas gi, le pai kolé’y cepisa te pandé nggera kolé’n ga? Toé manga kolé’y guna’n ga; kong oké’n kaut ga agu wegi kélo-bali lata’y.
14 Méu ho’o dé gérak de tana lino ho’o. Ca kota ata manga éta lobo poco toé kéta ngancéng ceha’n.
15 Ai ata toé pandé keté lampu pelita poli hitu ga na’a liha lampu pelita hitu be wa mai gumbang mésé, maik na’a liha lampu hitu béta mai wa’i te pésék’n lampu hitu wiga lampu hitu ngancéng pandé gérak sanggé’d taung ata oné mbaru hitu.
16 Ne nggitu kolé dé gerak de méu, porong gérak de méu ga pandé gérak-néra olo mai ata do, kong sanggé’d isé ngancéng ita sanggé’d gejur de méu ata di’ad agu pandé hiang Ema de méu éta surga.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 11 JUNI 2012

HO’O DḖ INJIL DE MORI YḖSUS ATA TUNTI LIHA MATIUS 10:7-13
PAKA NARING GA LITḖ MORI KRAẺNG (11-06-12)


7 Ngo méu ga agu tombo kréba: Perénta de Surga tiong te cai gi.
8 Pandé ina ga ata beti; pandé mosé kolé ata mata. Pandé ina ga ata beti kusta (boké rowés); sonda ga sanggé’d jing da’at. Méu poli tiba ne nggitu kaut, wiga méu ga téing kolé ne nggitu kauts.
9 Néka ba le méu emas ko pérak ko tembaga one bombol de méu.
10 Méu kolé néka ba luni kamé (bokong) oné lako de méu hitu, méu kolé néka ba sua’n baju, sepatu ko do’ar (dongkar), ai sanggé’d ata siot pandé duat patun kéta dé te tiba nafkah’d.
11 Ẻmé méu ngo ngger oné ca kota ko béo, kawé ga le méu sina hitu cengata ata ata patun kéta agu ka’éng ga méu agu hia sanggé lako kolé’s méu ga.
12 Ẻmé méu ocok ngger oné mbaru data, olo téing tabé di ngger oné isé.
13 Ẻme isé situ patun te tiba tabé hitu, tabé de méu hitu dé wa’u ngger oné isé, maik émé toé ga, tabé de méu hitu kolé kolé ngger oné weki ru’s méu.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 10 JUNI 2012

HO’O DḖ INJIL DE MORI YḖSUS ATA TUNTI LIHA MARKUS 14:12-16, 22-26
PAKA NARING GA LITḖ MORI KRAẺNG (10-06-12)


12 Cang du leso te can oné mai Leso Ramé mésé Roti ata toé manga Ragin, pas cang du ata mbelé Domba Paska, ata nungku de Mori Yésus taé ne nggo’o ngger oné Hia, “Ngger nia Ité nanang jera ami te ngo kudut pandé siap-siap latang te Hang Paska latang te Ité ga?”
13 Poli hitu Hia jera sua taus ata nungku Diha agu mai pedé Diha ga, “Ngo méu ga ngger sina kota; sina hitu manga cengata ata ba sémpé/gélo ata manga waén bonén; ata hitu manga kaut mai cumang méun. Lut kaut hia méu
14 agu taé ne nggo’o le méu ngger oné ata morin mbaru ata cénggo diha: ne nggo’o de pedé de Mori Tuang Guru: Nia wan lo’ang osang baté Aku hang Paska cama-cama agu sanggéd ata nungku Daku?
15 Poli hitu ata hitu toto ngger oné méu ca lo’ang béta lobo, loang ata mésén kéta; poli taungs lengkapd sanggéd persiapan kudut pésta hitu. Sina hitu dé méu paka pandé siap hang Paska hitu latang te sanggéd ité ho’o!”
16 Sua taus ata nungku situ téti te ngo sina hitu; cang du caid isé ga sina kota hitu, isé ita kéta taung cama ného apa ata poli taé de Mori Yésus latang te isé bao. Poli hitu ga isé pandé siap ramé Paska.

22 Cang du Mori Yésus agu sanggéd ata nungkuN rémé hangd ga, Mori Yésus emi roti, torok paka di’a Liha sanggéd delék Disé, poli hitu pandé pati-pati Liha roti hitu poli hitu ga téing roti hitu ngger oné isé agu mai taéNga, “Ẻmi ga le méu, ho’o dé weki Daku.”
23 Poli hitu Hia émi piala, torok paka di’a Liha delék Disé, poli hitu téing Liha piala hitu ngger oné isé; sanggéd isé ga inung oné mai piala hitu.
24 Mai taé Diha ga ngger oné isé, “Ho’o dé dara Daku, dara reké, dara ata concang latang te ata do.
25 Tetu’ung kéta taé Daku ngger oné méu: Aku ho’o toé tara inung kolé tayi dani oné mai pu’u anggor sanggé du leso Aku inung anggor hitu, pas du leso weru tayi, oné Perénta de Mori Kraéng.”

26 Cang du polid isé déré sanggéd déré naring’d ga, isé ngo ngger sina Golo Zaitun.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 09 JUNI 2012

HO’O DḖ INJIL DE MORI YḖSUS ATA TUNTI LIHA MARKUS 12:38-44
PAKA NARING GA LITḖ MORI KRAẺNG (09-06-12)


38 Oné ca toing’n, Mori Yésus taé ne nggo’o’y, “Jaga-jaga koé méu ngger oné ata mbeko-mbeko getok Taurat, sio’t ngoéng kéta laki-lako paké déméng juba léwé’d agu ngoéng kéta tiba io data oné pasar,
39 sio’t ngoéng kéta lonto oné dungka bangku ata di’a’n kéta oné mbaru sembaéng agu oné osang ata émong’n te ita agu io lata’n oné leso ramé hang mésé,
40 sio’t cébong kéta la’at mbaru data inéwai luang agu isé kolé ga pandé adong ata do le sembaéng disé sio’t léwé-léwé kéta’s. Isé situ dé cepisa pasti manga kaut tiba wahéng ata mésé agu mendo kéta.”
41 Manga du cengkali’n ga Mori Yésus lonto be bolo mai peti kotak takung agu lélo di’a-di’a’s Liha co’o kéta cara’n ata do situ cecop séng ngger oné peti kotak takung hitu. Do kéta’s ata bora ata téing séng do kéta’s.
42 Poli hitu ga mai’y cengata ata inéwai luang ata lénggé mosé’n agu hia ga cecop sua koéd séng gobang; hitu’s dé séng ata dai koé’d kéta jumla’d ga.
43 Mori Yésus bénta taung’s sanggé’d ata nungku’n Hia ga agu taé ne nggo’o ngger oné isé, “Tetu’ung kéta Aku taé ngger oné méu ho’o, hia endé inéwai luang ho’o dé ata téing céwé do itu po sanggé’d ata do ata poli cecop séng ngger oné kotak peti takung ho’o.
44 Ai sanggé’d isé situ dé téing oné mai bora éros’d, maik endé inéwai luang ho’o téing oné mai mosé kasi-asi’n hia sanggé’d apa kaut ata manga oné hia, ngong sanggé’d taung nafakah mosé diha.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 08 JUNI 2012

HO’O DḖ INJIL DE MORI YḖSUS ATA TUNTI LIHA MARKUS 12:35-37
PAKA NARING GA LITḖ MORI KRAẺNG (08-06-12)


35 Cang du Mori Yésus rémé téing toing oné Mbaru de Mori Kraéng, Hia curup ne nggo’o, “Co’o kéta dé ata mbeko getok Taurat so’o nganceng taé ne nggo’o ngong hia Mésias dé anak diha David?
36 Hia David weki run kaut, le dadang de Nai Nggeluk, taé ne nggo’o: Mori poli téing réwéng ngger oné Mori daku: Lonto ga oné dungka racap wanang Daku, sanggé kéta taung ata bali Dité ga, poli na’a kéta taung’d Laku ngger wa mai wa’i Dité.
37 Hia David weki run kaut caro hia “Mori,” wiga co’o kétay dé cara’n Hia hitu dé anak diha kolé’y ga?” Sanggé’d ata do situt do kéta’s neki’d sangge’d taung ga, séngét toing Diha le nisang nai.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 07 JUNI 2012

HO’O DḖ INJIL DE MORI YḖSUS ATA TUNTI LIHA MARKUS 12:28-34
PAKA NARING GA LITḖ MORI KRAẺNG (07-06-12)


Poli hitu manga cengata ata mbeko getok Taurat, ata séngét Mori Yésus, agu cengata ata Saduki ata rémé léwang taud, agu baé lisé Mori Yésus ngancéng walé di’a-di’a réi disé, mai cé’é Hia agu mai réid ga, “Apa péng perénta ata céwé taki étan kéta ta?” Mai walé de Mori Yésus ga, “Perénta ata dai étan kéta dé ho’oy: Séngét le méu é ata Israel, Mori Kraéng dité, Mori hitu cay kali. Momang Mori Kraéng de hau, le sanggéd nai’m hau agu le sanggéd wakar’m hau agu le sanggéd nuk’m hau agu le sanggéd mberes’m hau. Perénta te suan ga: Momang ga haé mensia de méu cama ného (momang) weki de rum. Toé manga perénta pali bana kolé ata céwé mésén oné mai sua perénta so’o.” Poli hitu ga mai taé de ata mbeko getok Taurat hitu ngger oné Mori Yésus, “Tu’ung kéta é Tuang Guru, tu’ung kéta taé Dité hitu, Mori dité hitu cay kali; toé manga kolé ce banan be pé’ang mai Hia. Momang Hia le sanggéd nai agu le sanggéd idep agu le sanggéd mberes, agu momang haé mensia cama ného (momang) weki de ru, hitus dé perénta ata céwé mésén oné mai sangged takung tapa agu takung siot pali banad. Lélo le Mori Yésus ga ata hitut walé réi hitu le walé ata bijaksanan kéta, wiga mai taé Diha ga ngger oné hia, “Hau toé manga tadang oné mai Perénta de Mori Kraéng!” Poli hitu ga, toé kéta manga cengatan ata ata branin te réi apa-apa kolé ngger oné Mori Yésus.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 06 JUNI 2012

HO’O DḖ INJIL DE MORI YḖSUS ATA TUNTI LIHA MARKUS 12:18-27
PAKA NARING GA LITḖ MORI KRAẺNG (06-06-12)


18 Poli hitu pisa taus ata Saduki mai nanang te cumang Mori Yésus; isé situ dé toé imbi oné mosé tédéng lén. Mai isé ga réi ngger oné Hia,
19 “Tuang Guru é, hia Mosés danong poli tulis ne nggo’o latang te ité ho’o: Ẻmé cengata ata, ata manga asé-ka’é ata rona’n, ata hitu matay gi agu legong ca winan maik toé di manga mantar koé’n, asé-ka’é’n hitu dé paka kawing lili wina data mata hitu agu téing mantar latang te asé-ka’é’n hitut poli matan ga.
20 Manga ata pitu tau’s dé asé-ka’é. Ka’é ngaso ga kawing agu cengata inéwai agu poli hitu mata’y hia maik toé manga di mantar koén hia.
21 Ata hiot te suan kolé ga kawing lili inéwai hitu agu mata kolé’y hia landing toé kolé di manga mantar’n. Ne nggitu kolé dé hiat te telu’n ga.
22 Ne nggitu kaut terus’n, wiga isé’t pitu situ toé kéta manga mantar’d isé. Cemol’n ga, du poli mata taung’d asé-ka’é situ ga, mata kolé’y dé inéwai hitu.
23 Du leso to’o kolé’d ata mata tayi ga, cang du to’o kolé’d isé wa mai boa’d tayi, céing dé ata jiri rona data inéwai hitu ga? Ai isé’t pitu situ poli kawing lili agu hia kéta taung’d.”
24 Mai walé de Mori Yésus ga ngger oné isé, “Mpéong lako’n nuk de méu hitu ta, le toé idep’n le méu Buku Nggeluk agu rang kuasa de Mori Kraéng.
25 Ai du isé tayi to’o kolé wa mai boa’d tayi, isé toé kawing agu toé pandé kawing kolé’s ga, maik isé mosé cama ného malékat éta surga.
26 Ne nggitu kolé dé ngong to’o kolé’d tayi ata mata wa mai boa’d, ai toé di manga baca dé’it’n le méu ko oné buku diha Mosés, oné tombo nunduk ngong puar poncéng hio pé, co’o’y Mori Kraéng téing pa’u reweng’N ngger oné hia: Aku ho’o dé Mori Kraéng diha Abraham, Mori Kraéng diha Ishak agu Mori Kraéng diha Yakob?
27 Hia hitu dé toé Mori Kraéng de ata mata, maik Mori Kraéng data mosé. Mpéong salang pé’ang kéta dé lako’n nuk de méu hitu ta!”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 05 JUNI 2012

HO’O DḖ INJIL DE MORI YḖSUS ATA TUNTI LIHA MARKUS 12:13-17
PAKA NARING GA LITḖ MORI KRAẺNG (05-06-12)


13 Poli hitu ga pisa taus ata Farisi agu ata dukung hia Hérodes jera te ngo cumang Mori Yésus kong isé ngancéng deko Hia le ca réi ata téing disé ngger oné Hia.
14 Sanggéd ata situ ga mai agu taé ne nggo’o ngger oné Hia, “Tuang Guru é, baé lami tah, Ité hitu dé ata jujur kéta, agu Ité toé kéta manga rantang ata céing-céing kaut, ai Ité hitu toé do kembeluak sosok ata, maik Ité hitu toing ata di’a-di’a kéta toing ngong salang de Mori Kraéng. Asa léng ta Tuang Guru, sendo ko toé dé ité ho’o te bajar blasteng latang te Kaisar? Paka bajars lami ko, ko toé?
15 Landing Mori Yésus poli baén Liha nuk-nai munafik disé situ, agu mai taén ga ngger oné isé situ, “Co’o tara tatong Akus dé méu ho’o ta? Damang dé ba can le méu ngger oné Aku séng ca dinar’n kong Aku ngancéng lélo’n séng hitu!”
16 Ba lisé ga séng hitu. Poli hitu mai réi Diha ga ngger oné isé situ, “Ai gambar agu tulisan diong léng ho’o ta? Mai walé disé ga, “Iyo ité, hitu dé gambar agu tulisan diha Mori Kaisar.”
17 Poli hitu mai taé de Mori Yésus ga ngger oné isé, “Téing ga le méu ngger oné Kaisar apa kaut ata paka téingn le méu ngger oné Kaisar hitu, agu ngger oné Mori Kraéng sanggéd apa kaut ata paka téingd le méu ngger oné Mori Kraéng?” Isé ga lenget kéta taungs du dengén lisé walé Diha.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 04 JUNI 2012

HO’O DḖ INJIL DE MORI YḖSUS ATA TUNTI LIHA MARKUS 12:1-12
PAKA NARING GA LITḖ MORI KRAẺNG (04-06-12)


1 Poli hitu ga Mori Yésus wangka pu’ung curup ngger oné isé paké tombo ného rapang, “Manga cengata ata pandé ciwal ca uma te weri anggor laing agu pandé kolé liha kenan pé’ang lupi bali-baling’n uma hitu. Caké liha ca ngembo mésé kudut te pandé kera’d anggor situ agu pandé hesé kolé liha ca mbaru menara te lami uma hitu. Poli hitu téing liha uma hitu te duat-séwa lata bana te ciwaln uma hitu, weki run hia ga téti te ngo lako ngger pé’ang tana cebana.
2 Pas cang du cain cekeng wuad anggor situ ga, jeras liha cengata ata mendi diha te ngo cumang ata duat-ciwal’n uma hitu kudut te tibad iwod dani oné mai uma hitu oné mai isé situt duat-ciwal’n lawang ho’o.
3 Landing deko lisé ata mendi hitu agu ongga lisé hia, poli hitu ga jera lisé te kolé kolé lako linga kaut.
4 Poli hitu jera kolé liha cengata ata mendi cebana te ngo cumang ise. Ata ho’o kolé ongga lisé wiga réu muing sa’i’n agu pandé ritak kéta lisé hia.
5 Poli hitu jera kolé liha cengata ata mendi cebana; ata ho’o ga mbelé lisé. Ne nggitu kolé agu ata dod situt iwod kolé ga, mangas ata onggad lisé agu manga kolés ata mbeléd lisé.
6 Ngai manga cengata kin di ata ata manga oné hia, ngong anak momang kéta de run hia. Cemoln ga jera liha anak hitu te ngo ngger sina isé, ai ne nggo’oy nuk diha wa nai koé’n: mat toé rantang lisé cepisa anak daku ho’o ko.
7 Maik mai taé data duat-ciwal’n uma hitu ga agu cama taud: Ho’oy dé ata hiot te tiba ceca mbaté tayi, yo co’om mbelé kaut lité hia ga, kong ceca mbaté ho’o tayi ga jiri dité’y morin.
8 Deko paka di’a lisé hia agu mbelé lisé hia, agu peké lisé hia ngger pé’ang mai uma anggor hitu.
9 Te ho’on wili ga apa kolé ata nanang te pandé le mori ngaran uma anggor hitu cepisa ga? Hia hitu manga kaut main cepisa agu pandé lerak kéta taungs liha sanggéd ata duat-ciwal’n uma hitu, poli hitu ga téing liha uma hitu ngger oné ata cebana kudut te ciwal lisé’y gi.
10 Ai toé kéta di manté dé’it le méu ko baca nas ho’o: Watu ata poli okén le sanggéd tukang ata pandé mbaru, poli jiri watu siri bongkok laing ga:
11 Apa hitu de cipsa manga kaut jirin mai oné mai Morin, ca pande ata pandé lenget laing oné mata dité.”
12 Poli hitu sanggéd isé nanang te deko Mori Yésus, ai baé lisé ngong isé dé apa ata poli tombo Diha bao le tombo rapang hitu. Maik isé rantang kéta oné ata do situ. Hitu tara kongn kaut lisé Hia, agu poli hitu ngos isé ga.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 03 JUNI 2012

HO’O DḖ INJIL DE MORI YḖSUS ATA TUNTI LIHA MATIUS 28:16-20
PAKA NARING GA LITḖ MORI KRAẺNG (03-06-12)


16 Sanggéd ata campuluca taus ata nungku situ téti te ngo ngger sina Galiléa, ngger sina ca golo ata poli toin le Mori Yésus olo ga ngger oné isé.
17 Cang du itan lisé Hia ga, isé tikul suju-iyo Hia, maik pisa taus oné mai isé situ, bimbang kéta naid.
18 Mori Yésus mai ruis-ruis isé agu mai taé Diha ga, “Ngger oné Aku ho’o dé poli téingd sanggéd rang kuasa éta surga agu oné lino ho’o.
19 Wiga wili ga, ngo méu ga, pandé ga sanggéd bangsa-bangsa jiri ata nungku Daku kéta taungs agu cebong ga isé le ngasang de Ema agu de Anak agu de Nai Nggeluk,
20 agu toing kolé isé ga le méu kudut te pande sanggéd ca o ca ata poli jerad Laku ngger oné méu. Nuk di’a-di’a dé le méu ga, Aku ho’o manga tédéng lén agu sanggés taung méu dengkir tayin agu tédéng lén du turung cemoln lino ho’o tayi.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 02 JUNI 2012

HO’O DḖ INJIL DE MORI YḖSUS ATA TUNTI LIHA MARKUS 11:27-33
PAKA NARING GA LITḖ MORI KRAẺNG (02-06-12)


27 Poli hitu ga Mori Yésus agu sanggéd taung ata nungkun Hia mai kolé ngger sina Yérusalem. Cang du Mori Yésus laki-lako oné natas Mbaru de Mori Kraéng hitu, mais ga ngger oné Hia sanggéd imam ata tu’a laingd, ata mbeko getok Taurat agu ata tu’a-tu’a,
28 agu mai réi disé ga ngger oné Hia, “Le rang kuasa apa léng Ité hitu ta pandé sanggéd taung apa so’o? Céi léng ata téingn rang kuasa hitu ngger oné Ité hitu, wiga Ité hitu ga pandé sanggéd taung apa situ?”
29 Mai walé de Mori Yésus ga ngger oné isé, “Aku ho’o nanang kolé te téing ngger oné méu ho’o ca réi. Damang dé olo walé koé le méu ngger oné Aku, itu po Aku kolé walé réi de méu le rang kuasa apa Aku ho’o pandé sanggéd taung apa situ.
30 Ai nia mai’n léng Cebong diha Yohanés tah, éta mai surga’n ko oné mai mensia’n? Damang walé Aku dé le méu ga?”
31 Isé cébong kéta tombo agu cama taud ngong réi hitu, agu mai taéd ga, “Olé, émé walé ne nggo’o’y lité: Ẻta mai surga’n, ne ngo’oy dé koléng-taé Diha: Ẻmé ne nggitu ga, co’o tara toé imbin le méu hia ga?
32 Landing, ba’ang kéta émé walé ne nggo’o lité yé: Oné mai mensian é!” Ai isé situ rantang kéta ata do situ, ai sanggéd lawa do situ imbi oné hia Yohanés hitu dé ngong nabi tetu’ung kéta.
33 Wiga mai walé disé ga ngger oné Mori Yésus, “Olé, toé baé lami é Ité.” Mai taé de Mori Yésus kolé ga ngger oné isé, “Ẻmé ne nggitu ga, Aku kolé toé walé réi de méu hitu, le rang kuasa apa dé Aku ho’o pandé sanggéd taung apa situ.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 01 JUNI 2010

HO’O DḖ INJIL DE MORI YḖSUS ATA TUNTI LIHA MARKUS 11:11-26
PAKA NARING GA LITḖ MORI KRAẺNG (01-06-12)


11 Cang du caid isé sina Yérusalém ga Hia ngo boné Mbaru de Mori Kraéng. Sina hitu Hia lélo-lélo sanggéd taung apa ata manga sina hitu, landing wajol tiong te wié tana ga, Hia téti te ngo ngger sina Bétania cama-cama agu campulusua taus ata nungku Diha.
12 Ného diangn ga cang du Mori Yésus agu campulusua taus ata nungku Diha téti te ngo sina mai Bétania’d ga, Mori Yésus jiri darem gi.
13 Ita Liha mai tadang main ca pu’u haju ara ata lebo kéta saungn ga. Ngo sina ruis haju hitu Hia ngo te lélo cala ngancéng ita apa-apan Hia sina pu’u haju hitu. Landing du cai ruis lupi pu’u haju hitu’n Hia ga, toé kéta manga ita apa-apan Hia sina hitu be pé’ang mai saung hajun kanang, ai toé di cekeng te wuan haju ara hitu.
14 Mai taén ga ngger oné pu’u haju hitu, “Toé kéta manga cengatan kolé tayi ata ata hang wua de hau dengkir tayin agu tédéng lén!” Dengé le sanggéd ata nungku’n curup Diha hitu.
15 Poli hitu cais isé Mori Yésus ga atu sanggéd ata nungku’n hitu sina Yérusalem. Cang du poli ngo be boné’n Mbaru de Mori Kraéng hitu ga, Mori Yésus wangka pu’ung sonda kéta taungs Liha ata siot rémé pika-pika’d oné natas Mbaru de Mori Kraéng hitu. Pandé wali-gélaks Liha sanggéd méja data siot pandé te paluk séng ne nggitu kolé méja-méja data siot pika tekur jawa,
16 agu Hia kolé ga ré’ing ata te ba barang pika disé lako liba oné natas Mbaru de Mori Kraéng hitu.
17 Poli hitu ga Hia pu’ung toing isé, agu mai taén ga, “Ai bom toé manga ata poli tulisn ne nggo’oy dé: Mbaru Daku tay caro mbaru sembaéng laing latang te sanggéd bangsa oné lino ho’o? Maik méu ho’o ga poli pandé mbaru ho’o cewo baté impungd ata penyamun!”
18 Tuang-tuang ata tu’a laing’d agu sanggé’d ata mbeko getok Taurat dengé ngong apa ata poli pandé de Mori Yésus; isé ga kawé paté’n co’oy caran te pandé lérak Hia, ai isé rantang ngger oné Hia, ai sanggé’d ata lawa do ga lenget kéta taung dengé sanggéd toing Diha.
19 Cang du tiong te wié tana ga isé ngo be pé’ang mai kota hitu.
20 Du gula ucap ného diangn ga cang du Mori Yésus agu sanggéd ata nungkun lako liba, ita lisé pu’u haju ara hio oné meseng ga jiri dango kéta’y gi dengkir kéta wa waké celern.
21 Poli hitu nuk kolé liha Pétrus agu mai taén ga ngger oné Mori Yésus, “Mori Rabi, lélo Lité ga, pu’u haju ara hiot poli mawang’n (kutuk’n) lité oné meseng jiri dango’y gi.”
22 Mai walé de Mori Yésus ga ngger oné isé, “Imbi ga le méu oné Mori Kraéng!
23 Tetu’ung kéta Aku curup ngger oné méu ho’o: Céing-céing kaut ata ata curup ngger oné poco ho’o: Damang dé téti weki rum hau ga agu péncar ngger sili tacik! asal toé kéta manga gegé (bimbang) koé ce koén oné nain hia, maik imbi apa ata poli curup’n liha hitu manga kaut jirin cepisa, wiga apa hitu cepisa manga kaut jirin.
24 Wiga wili ga Aku curup ngger oné méu ho’o: Apa kaut ata tegi-sembaéng agu tegi le méu, imbi ga le méu ngong méu poli tiba’d ga, wiga apa situ cepisa manga kaut téingd ngger oné méu.
25 Ẻmé hesé méu kudut te sembaéng, olo ampongs di ata siot am manga salad ngger oné méu, kong Ema de méu hiot ka’éng éta surga ampong kolé sanggé’d sala de méu.”
26 [Landing émé méu toe ampong, Ema de méu hiot ka’éng éta surga kolé toé ampong sanggé’d sala de méu.]


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 31 MEI 2012

HO’O DḖ INJIL DE MORI YḖSUS ATA TUNTI LIHA LUKAS 1:39-56
PAKA NARING GA LITḖ MORI KRAẺNG 31 MEI 2012


39 Toé nais’n poli hitu ga hia Maria ngo lako gélang-gélang (hidi-hada) te ngo ngger sina ca kota koé sina golo Yudéa.
40 Sina hitu hia ocok ngger oné mbaru diha Zakharias agu téing tabé liha latang te hia Ẻlizabét (Sebét).
41 Cang du dengé’n liha Ẻlizabét reweng tabé diha Maria hitu ga, noing liha ného kéta rémé congka (wuli-wali’n) naka’n anak koé oné tuka dading diha, agu hia kolé rodo penong kaut le Nai Nggeluk;
42 agu mai hia ga curup mésé-mésé ne nggo'o: "Ité kali ata céwé don berkak oné inéwai agu berkak kolé wua tuka dité."
43 Ai bom céi kéta bo aku ho'o ga tara mai kéta la'at aku’n endé de Mori Sengaji daku?
44 Ai bo setu'un ta, cang du dengé’n laku reweng tabé dité bao le tilu daku, anak oné tuka daku ho’o ného kéta rémé congka naka’n.
45 Cébo ga hia ata imbi, ai apa kaut ata taé ngger oné hia oné mai Mori’n, pasti manga jirin ko betua ata di'a laingn ce pisa."
46 Poli hitu mai taé diha Maria ga, "O nai go mai paka naring Mori’n,
47 agu ati go nisang kéta nai ai Mori Kraéng, ata pandé selamak aku,
48 ai Hia poli lélo mosé kasi-asi de mendi’N ho'o. Ata te tu'ungn wili ga, pu'ung kaut te ho'o’n cepisa ga sanggé’d taung wa'u data mensia nanang te caro aku ata cébo mosé’g,
49 ai Hiat Pu'un Kuasa poli pandé sanggé’d taung pandé-mésé latang te aku, ai nggeluk dé ngasang Diha.
50 Widang Nggeluk Diha loli tédéng lén latang te ata mosé nggeluk agu imbi Hia.
51 Toto liha rang kuasa’N le pandé de limé’N agu Hia pandé mbécar kéta taung’s sanggé’d ata siot mésé nai’d;
52 Hia pandé sorok wa'u ngger wa sanggé’d ata siot manga rang kuasa’d one mai tahta disé, agu poli hitu ga téti sompo taung’s Liha sanggé’d ata ro'éng koé;
53 Hia kolé téing do do sanggéd apa kaut ata di'a’d latang te ata darem, agu mbérs liha ata bora te ngo lako ne nggitu kaut agu limé hanang;
54 Hia campé ata Israél, ata mendi Diha, ai Hia nuk kolé widang Nggeluk’N,
55 ného ata poli reké Diha danong main latang te sanggé’d empo-empo disé, latang hia Abraham agu sanggé’d taung wa'un dengkir tayn agu tédéng lén."
56 Poli hitu ga hia Maria ka'éng am telu wulang agu hia Ẻlisabét; poli hitu ga hia kolé ngger oné mbaru baté ka'éng de ru’n.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)