Selasa, 31 Januari 2012

KREBA DI'A LESO HO'O

HO’O DE INJIL DE MORI YESUS ATA TUNTI LIHA MARKUS (6:1-6)
NARING GA LITE YESUS KRISTUS
(01-02-12)

Yesus Wur Lau Mai Nazaret
Poli hitu ga Yesus teti nitu main agu cai lau beo de Run; sangged taung ata nungkuN lut Hia taungs. Du leso Sabat ga Hia ngo teing toing one mbaru ngaji sinagoga; sangged ata do situ lenget keta taungs du senget toing Diha, agu mai taed ga, “Nia keta maid emid Liha sangged apa so’o ga? Hikmat apa keta de ata teing one Hia? Co’o keta peng carad sangged tanda lenget situ nganceng panded Liha? Ai cala anak diha tukang hajup Hia ta, anak di Maria, ase-ka’ed Yohanes, Yoses, Yudas agu hia Simon? Ai sangged wetan ka’eng ruis tau agu ite ce’e ho’o?” Itu de tara wurn lise Yesus. Poli hitu mai taed Yesus ga agu ise, “Nabi e hiang keta taung lata labok tana, landing toe de manga hiangn one beo de run, one be reha wa’un agu one mbaru ko uku de run.” Toe keta nganceng pande can tanda lenget Liha sina hitu; hia hanang pande di’a pisa taus ata beti le sapel ali lime Diha eta ulu/sa’i dise. Lenget kole weki Run Yesus ai ata situ toe gori/ngoeng te imbi. Poli hitu ga Yesus lako labok neteng beo agu toing agu titong ise.

HO’O DE REWENG DE MORI KARAENG:
NARING GA LITE YESUS KRISTUS

Senin, 30 Januari 2012

KREBA DI'A LESO HO'O

HO’O DE INJIL DE MORI YESUS ATA TUNTI LIHA MARKUS (5:21-43)
NARING GA LITE YESUS KRISTUS (31-01-12)

Du polin Yesus ngo be sina agu lambo/perahu, mai londang ata do mai kudut impung lupi/ruis Hia. Du reme heseN Hia lupi sano, cain kaut ce ngata ata tu’a laingy one mbaru ngaji, ngasang na hia Yairus. Du itan liha hia Yesus ga, tikul pada di’a de hia wa wa’i de Yesus, agu tegi tu’u-tu’ung keta liha wa mai nain, “Anak inewai daku reme keta betin, am tiong te roway gi; eme ngoengD Ite Mori, cenggo koe ce koen agu sapel kole le lime Dite one sa’i/ulu diha, kong hia nganceng ina agu selamak agu terus mose kin.” Lakoy Yesus ga agu ata hitu. Ata do lako londang lut Hia, agu sangge doet-daet taud ruis Hia.

Manga ce ngata ruis hitu ata inewai; campulu sua ntaung hia ga hena le beti cegong losa/lula dara. Poli donden keta hia rewos/musa le ata mbeko (tabib), wiga taungs sangged ceca diha, landing toe keta manga guna koe ce koen; tambang da’at moley beti diha. Poli dengen liha sangged kreba ngong Yesus; itu tara beranin hia te ngo ruis Yesus one be reha ata do situ; hia ngo ruis Yesus mai musi mai toni; poli hitu ga cau liha baju leweD Yesus. Ai ne nggo’o nuk diha wa nai koen: “Eme cau kaut laku ce koen baju lewe Diha, pasti ina muing beti daku.” Pas cang du hitu ga bae le Yesus manga loli nai mberes one mai weki Diha, wiga holes Hia one be reha ata do situ agu mai reiN ga, “Cei de ata ho’ot cau baju lewe Daku ta?” Mai waled ata nungku Diha ga, “Yo Ite, poli di’a itaD Lite do ketas ata so’ot nempung baling Ite, cewur agu doet-daet taud, pasti manga kaut ata dudi agu Ite; com neka benggat kaut Lite ga." Landing Yesus lelo lupi baling weki Run kudut te baen ata hitut cau baju lewe Diha. Rantang da’at inewai hitu ga agu jejer keta hia du baen liha poli jiri di’a agu inan beti diha ga. Konem po jejer hia ga, hia lako ngo bolo agu suju olo mai rangaD Yesus agu tura liha sangged taung apa ata pande diha agu betuan pande hitu. Poli hitu ga mai taeD Yesus one inewai hitu: “Enu e, le imbim de hau tara selamak agu ina de betim. Kole ga agu hambor one naim, agu jaga di’a-di’a porong neka hena le beti hitu kole hau ce pisa.”

Du reme tombon kin Yesus ga, caid ata wero one mai hae wa’u de tu’a laingn mbaru ngaji hitu bao, agu mai tae dise ga, “Yo ite, ai manga kreba susad ite, lut roway anak dite ga, wiga wili ga, asi kaut pande repotn lite Mori Tuang Guru ho’o.” Landing Yesus toe dangang nipu Liha curup dise, agu mai taen ga agu ata tu’a mbaru ngaji hitu: “Neka rantang ite, imbi kaut lite!” Du caid ise one mbaru mata hitu ga, Yesus ba hanang hia Petrus, Yakobus, agu Yohanes, (ased Yakobus), te raes Hia; toe sendos liha ata iwod to ngo cama-cama agu ise. Cais ise ga one mbaru data tu’a mbaru ngaji hitu; itas li Yesus ata do keta one mbaru hitu reme ngai-ngaok, retang agu lorang nolol keta. Du caid ise one mai mbaru ga, mai rei Diha one sangged ata situ, “Co’o tara ngaok agu retangs meu ta? Toe di manga matan anak ho’o e, ata reme toko kin hia?” Landing sangged ise ipo pe Hia agu tawa loer Hia.

Jera ngo be pe’ang keta taungs Liha sangged ata situ; dades Liha ende agu eman anak koe hitu agu hae lako Diha bao; ise ngo bone lo’ang danak koe hitu. Mai Hia ga cau lime de anak koe hitu, agu mai taen ga, “Talita kum,” ngong ne nggo’o de hitu ga, “Oe enu molas, senget apa tae Daku, to’o hau ga!” Cang du hitu rodo to’o kaut anak hitu agu hese agu laki-lakon, ai campulu sua ntaung de umurn ga. Lenget keta taungs sangge ata situt manga nitu. Tegi Liha one ada do situ, kudut ceha kejadian hitu, neka tombo olo-olo, one ata do. Poli hitu ga mai Hia jera ata kudut te teing hang anak koe hitu.

HO’O DE REWENG DE MORI KARAENG:
NARING GA LITE YESUS KRISTUS

Minggu, 29 Januari 2012

KREBA DI'A LESO HO'O

HO’O DE INJIL DE MORI YESUS ATA TUNTI LIHA MARKUS (5:1-20)
NARING GA LITE YESUS KRISTUS

(30-01-12)

Poli hitu ga cais ise be sina sano be sina, one dungka tana data Gerasa. Cang du poli wa’uN Yesus one mai perahu ga, rodo cain kaut ce ngata ata woreng le jing da’at mosen; hia mai one mai boa, kudut te cumang Yesus. Ata hitu ka’eng one boa situ; toe keta manga ce ngatan ata nganceng langki/pongo hia, konem po langki le rante, ai poli donden hia langkin ga, landing nganceng liha pande beten rante hitu, agu pande tepon liha panggan, wiga toe keta manga atan ata cewe mberes te pande merup agu hema hia. Wie leson hia nggili-nggoeng kaut one boa hitu agu one golo-golo agu ciek mese-mese agu tutak/ongga weki run le watu. Cang du itan liha Yesus mai tadang main ga, mburuk diha ge kudut te ngo cumang Hia agu tikul te io Hia; ciek mese hia ga agu mai taen: “Apa keta de sampit Ite ye Yesus tara mai ce ho’o, ai Ite Anak de Mori Karaeng? Io Ite, tegi laku le ngasang de Morin, yo neka koe ndaek aku ite?” Ai neho baon ga poli tae ne nggo’on Yesus one hia, “Oe hau jing da’at! Pe’ang hau one mai ata ho’o e!” Poli hitu ge Yesus rei ata hitu, “Cei ngasang de hau?” Mai walen ga, “Ngasang daku hia Legion, ai ata dooo keta kami.” Tegi keta liha wa mai nain ga porong Yesus toe wur ise ngger pe’ang mai tana hitu. One dungka kebe golo koe hitu do keta ela ata reme elor kid kawe hang; mai tegid jing-jing situ ga one Yesus, “Jera koe ami Lite te ngo ngger one ela situ, kong ami ka’eng one weki dise!” Sendo kaut li Yesus apa tegi dise. Losad jing-jng situ ge agu ocok ngger one ela-ela situ. Sangged taung ela-ela situ ga, am sua sebu dod, teku eta mai lupi ngampang ngger wa sano agu mata lempes naid one sano hitu. Ata lamid ela situ ga losi keta taungs ngo tombo kreba ho’o one kota agu beo-beo lupi kota hitu. Ise mai kudut lelo betuan tombo dise situ. Ise mai one Yesus; ita lise ga ata woreng le jing da’at hitu reme keta lonton, agu pake wengko-wekin (bajun) ga, ina gi one mai beti wedoln hitu; ai be bolon ata hitu ga woreng le jing da’at. Sangged ata situ ga rantang keta taungs. Ata situt ita le rud tanda-lenget (kejadian) hitu tombo olo-olo lise kreba hitu, tombo ngong ata hitut poli inan ga one mai beti woreng le jing da’atn, agu kreba ngong ela-ela situ. Ise tegi one Yesus kudut Hia ga gelang-gelang ngon one mai tana hitu. Cang du hitu, Yesus leti kole ngger one lambo/perahu. Ata hiot di’a one mai betin bao ga, tegi one Yesus porong hia kole sendo te lut Hia. Landing toe sendo li Yesus ata hitu, agu mai tae Diha one ata hitu, “Kole ngger one mbarum hau ge, ngger one hae beom; tombo ga agu ise sangged taung ata pande de Morin latangt hau agu co’o Hia momang hau!” Ngo data hitu ga agu tombo labok beo liha one tana Dekapolis sangged taung ata poli pandeD Yesus latangt hia; sangged taung ata denge tombo diha ga lenget keta taungs.

HO’O DE REWENG DE MORI KARAENG: NARING GA LITE YESUS KRISTUS

Sabtu, 28 Januari 2012

KREBA DI'A LESO HO'O

HOO DE INJIL DE MORI YESUS ATA TUNTI LIHA MARKUS (1:21-28) (29-01-12)
NARING GA LITE YESUS KRITUS

Yesus agu sangged taung ata nungkuN ga cai sina Kapernaum. Du wangka cain leso Sabat ga, gelang-gelang ngon Yesus ngger one mbaru ngaji (sinagoga) kudut pande toing (ajar) nitu. Lenget keta taungs sangged ise situ du denge apa ata toing Diha, ai Hia toing ise le rang kuasa meseN, toe cama rang kuasa diset ata mbeko getok (ahli) Taurat. Cang du hitu ga one mai mbaru ngaji (sinagoga) hitu, manga ce ngata ata woreng le jing da’at y. Mai kaut ciek (weres) data hitu ga: “Apa keta sampitn Ite Yesus, ata Nazaret, tara mai keta pande rampo mose dami ce’e hoo? Am mai kudut pande lerak ami Ite ta de? Bae laku ta, cei Ite hitu e: Ite de Ata nggeluk one mai Mori Karaeng.” Mai Yesus ge renti hia: “Hema hau e, agu ngo be pe’ang mai weki diha.” Jing da’at hitu kengkung weki data hitu; ciek ide mese y jing da’at hitu ago losan one mai ata hitu. Sangged taung ata situ lenget keta taungs, wiga ise ga tombo-tombo ngong Yesus, agu mai taed ga, “Apa kole ho’o ge? Toing weru agu pake rang kuasa? Hia teing perenta latangt sangged jing da’at wiga ise ga lorong kaut perenta Diha!” Rodo labok neteng beo kaut kreba ngong Hia, labok sangged kaut tana Galilea hitu.

HOO DE REWENG DE MORI KARAENG:
NARING GA LITE YESUS KRITUS

KREBA DIA LESO HO'O

HOO DE INJIL DE MORI YESUS ATA TUNTI LIHA MARKUS (4:35-41)
NARING GA LITE YESUS KRISTUS
(28 JANUARI 2012).

Du leso hitu, du tiong wie tana ga, mai taeD Yesus one sangged ise: “Ole mai ge, com ngo be sinad ite ga.” Legongs lise sangged ata do situ agu leti perahu (lambo) agu dade kole lise Yesus cama-cama agu ise one perahu hitut bate lontoD Yesus, agu manga koles perahu (lambo) pali bana ata teti cama-cama agu ise. Rodo cain kaut buru pote mese one reha sano hitu; bombang mese keta tekar haeng one perahu (lambo) dise, wiga penong wae perahu hitu. Pas du hitu ga, reme toko kin lobo tangeN Yesus be musi main kepal wae hitu. Sangged ata nungku Diha kengko Hia agu mai taed ga agu Hia, “Mori e, ole toe keta manga simpungd Ite ko eme mata delep ite one sano ho’o?” To’o Yesus wa mai tokoN ga, mai Hia kenta (renti) buru hitu agu mai taen ga one sano hitu: “Hema ga! Lik ga!” Rodo lik kaut buru hitu; sano hitu kole likkkk ketay. Poli hitu ga mai tae Diha ga agu ise: “Co’o tara rantangs meu? Co’o tara toe imbis meu?” Landing ise ga rantang mese agu mai taed go ngong cama taud: “Ole cei keta de ata ho’o ta, ai buru mese agu sano ho’o rodo lorong kaut apa tae Diha.”

HO'O DE REWENG DE MORI KARAENG
NARING GA LITE YESUS KRISTUS