Rabu, 30 Desember 2009

INJIL LESO HO'O, 23-12-09

PENERJEMAH: FRANSISKUS BORGIAS M.
PENELITI CCRS (Center for Cultural and Religious Studies) FF-UNPAR BANDUNG.

LUK.1:57-66.




Poli hitu ga, rapak cain leson te loasn hia Elisabet agu loas liha cengata anak ata rona. Cang du maid sangged ata hae beod ga agu sangged hae wa'ud ga denge ai Mori Kraeng poli toto widang nggeluk mese latangt hia, hitu tara nisang keta nai dise agu naka cama-cama agu hia. Poli hitu ga mais ise du rapak leso te alon, mai kudut te sunat anakkoe hitu agu ise kole nanang te teing hia ngasang Zakharias kole lorong ngasang de eman, landing mai tade de enden ga, "Neka e, hia paka teing ngasang Yohanes." Mai tae dise ga one hia, "Toe de manga one mai wa'u ko uku de meu ata ata ne nggitu ngasangn." Mai ise ga teing bahasa isyarat latang te eman ga kudut rei apa ngasang te teing ngasang latang t anak koe hoo? Mai hia ga tegi watu tulis, agu hia tulis ne nggo'o: "NgasangN hia Yohanes." Sangged ise lenget keta taungs. Pas keta cang du hitu ga rodo cengkakole mu'un agu rodo kedok ne nggitu kaut leman, hitu tara nganceng curup kolen hia agu naring Mori Kraeng. Sangged taung ata ata ka'eng ruis ise ga rantang keta taungs, agu sangged taung apa situ ga jiri tombo mu'u laing lata one golo Yudea hitu. Sangged ata ata dengen ga, nuk lise one naid agu mai taed ga, "Jiri apa ketay peng anak ho'o ce pisa?" Ai lime de Morin manga kamping tedeng len agu hia.


BANDUNG, 22-12-2009
SIS B (CCRS FF-UNPAR BANDUNG)

INJIL LESO HO'O, 22-12-09

PENERJEMAH: FRANSISKUS BORGIAS M.
PENELITI CCRS (Center for Cultural and Religious Studies) FF-UNPAR BANDUNG


LUK.1:46-56




Poli hitu mai taed Maria ga, "O nai go mai paka naring Morin, agu ati go nisang keta nai ai Mori Kraeng, ata pande selamak aku, ai Hia poli lelo kasi-asi de mendiN ho'o. Ata te tu'ungn wili ga, pu'ung kaut te ho'on ga sangged taung wa'u data manusia nanang te caro aku ata cebo moseg, ai Hiat Pu'un Kuasa poli pande sangged taung pande-mese latang te aku, ai nggeluk de ngasang Diha. Widang Nggeluk Diha loli tedeng len latang te ata mose nggeluk agu imbi Hia. Toto liha kuasaN le pande de limeN agu Hia pande mbecar sangged taung ata mese nai; Hia pande sorok wa'u sangged ata siot manga kuasad one mai tahta dise, agu poli hitu ga teti sompo taungs liha sangged ata ro'eng koe; Hia kole teing do do sangged apa kaut ata di'ad latang te ata darem, agu mbers liha ata bora te ngo ne nggitu kaut agu lime hanang; Hia campe Israel, ata mendi Diha, ai Hia nuk kole widang NggelukN, neho ata poli reke Diha danong latangt sangged empo-empo dise, latang hia Abraham agu sangged taung wa'un dengkir tayn agu tedeng len." Poli hitu ga hia Maria ka'eng kira-kira telu wulang agu hia Elisabet; poli hitu ga hia kole nggere one mbaru bate ka'eng de run.


CCRS (Center for Cultural and Religious Studies) FF-UNPAR BANDUNG.
SIS B.
22 Desember 2009

INJIL LESO HO'O, 20-12-09

PENERJEMAH: FRANSISKUS BORGIAS M.
PENELITI CCRS (Center for Cultural and Religious Studies) FF-UNPAR BANDUNG.

LUK.1:39-45




Toe naisn poli hitu ga hia Maria ngo lako gelang-gelang (hidi-hada) nggere sina ca kota koe sina golo Yudea. Sina hitu hia ocok nggere one mbarud Zakharias agu teing tabe liha latang te hia Elizabet (Sebet). Cang du dengen liha Elizabet reweng tabe diha Maria hitu ga, noing liha neha keta reme congka (wuli-walin) nakan anak koe one tuka dading diha, agu hia kole rodo penong kaut le Nai Nggeluk; agu mai hia ga curup mese-mese ne nggo'o: "Ite kali cewe don berkak one inewai agur berkak kole wua tuka dite." Ai bom cei keta bo aku ho'o ga tara mai keta la'at akun ende de Mori daku? Ai bo setu'un ta, cang du dengen laku reweng tabe de hao le tilu daku, anak one tuka daku hoo neho keta reme congka nakan. Cebo ga hia ata imbi, ai apa kaut ata tae nggere one hia one mai Morin, pasti manga jirin ko betuan ata di'a laingn ce pisa."

Bandung, 22 Desember 2009
Sis B (CCRS FF UNPAR BANDUNG)

Rabu, 23 Desember 2009

INJIL LESO HO'O, 19-12-2009

PENERJEMAH: FRANSISKUS BORGIAS M.
PENELITI CCRS (Center for Cultural and Religious Studies)FF-UNPAR BANDUNG

LUK.1:5-25



Pas cang du cekeng perenta diha Herodes, raja Yudea, manga cengata tuang imam ngasangn hia Zakharias one mai impung-nabi diha Abia. Winan kole one mai wa'u (uku) diha Harun; ngasangn hia Elisabet (Sebet). Iset sua so'o mose molor olo mai ranga de Mori Kraeng; ise kole lorong keta taungs sangged perenta de Morin; toe keta manga can ata hemongd lise. Landing ise so'o de toe manga anakd (mantard), ai hia Elisabet de toe manga wingn; iset sua kole tu'a ketas mosed ga. Pas cang du ca leso ga, du cai giliran de impung-nabi dise ga, hia Zakharias pande tugas de tuang imam be bolo mai rang de Morin. Ai cang du teka oke nduad ise, neho lasengn ata pande dise, kudut te pili cengatan tuang te panden tugas hitu, hia Zakharias de ata pili laingn te ngo nggere one Mbaru di Mori Kraeng agu tapa dupa sina hitu. Cang du tapan dupa hitu liha ga, sangged taung ro'eng de Morin nempung be pe'ang mai agu ise ngaji keta terus. Rodo cai agu itan kaut liha Zakharias cengata malaekat de Morin; hia reme keta hesen du cupu wanangn one mai mezbah bate tapan dupa hitu. Cang du itan liha malaekat hitu ga, hia gege agu rantang da'at. Landing mai taed malaekat hitu ga agu hia: "Neka rantang e Zakharias, ai ngaji de hau lawang ho'o manga betuad ga. Hia Elisabet, wina de hau, kudut te loas cengata anak ata ronay ce pisa agu paka teing le hau ngasan ce pisa hia Yohanes. Hau wili ce pisa ge nisang agu senang keta naim; sangged taung lawa do kole ce pisa nisang nai du denge kreba loas meka weru hitu. Ai hia ce pisa jiri tuang mese olo mai ranga de Morin agu hia toe inung anggur ko inung ata pande langu lain; hia kole ce pisa penong le Nai Nggeluk pu'ung kaut one mai tuka wing de enden; agu hia kole ce pisa nganceng pande lawa Israel kole nggere one rang de Mori, Mori Kraeng dise. Hia wili ce pisa ga lako be bolo mai Mori le nai agu rang diha Elia kudut te pande nai data ema tua kole nggere one anak-anak dise agu nai data durhaka kole nggere one (jiri) nuk ata molorn. Ne nggitu de hia ce pisa siap latang te Mori ca ro'eng ata patun latang te Hia." Poli hitu ga mai taed Zakharias nggere one malaekat hitu, "Co'o wili baen laku ce pisa ga, bahwa sangged taung curup situ ata te tu'ung keta? Ai tu'a keta mose daku ho'o ga, ne nggitu kole mose de wina daku." Mai waled de malaekat hitu ga, "Aku hoo de hia Gabriel, malaekat ata melayani Mori Kraeng, agu aku hoo poli jera kudut te curup agu hau te toing kreba di'a hoo latangt hau. Pu'ung ho'o kaut ga hau jiri bapa agu toe nganceng curup sangge kaut leso sangged taung apa soo ce pisa jadi keta tu'u-tu'ungs, ai hau hoo toe imbi reweng daku, reweng ata jiri laing ce pisa eme cai cekengn ga." Cang du hitu lawa do reme gereng kin hia Zakharias. Lenget te tu'ungs keta ise ai nais bailn hia Zakharias one mai mbaru di Mori Kraeng hitu. Cang du ngo be pe'angn hia ga, hia toe nganceng curup agu ise; hitu po idep lise hia manga itangn one Mbaru Nggeluk hitu. Mai hia ge teing isyarat le limen latang te ise; hia toe curup. Du poin cekeng tugas nggeluk hitu ga, hia kole nggere one mbarun. Toe naisn poli hitu ge, Elisabet, wina diha, na'ang wekin (ge haen); lawang kaut lima wulang hia toe nge be pe'ang mai mbaru, agu ne nggo'o taen: "Ho'o de ca tanda lenget de Morin latangt aku, agu te ho'on ga Hia poli koson ritak mese ranga daku be bolo mai ata do."


BANDUNG, 23 DESEMBER 2009
SIS B.
CCRS - FF UNPAR BANDUNG.

Selasa, 22 Desember 2009

INJIL LESO HO'O, 18-12-2009

PENERJEMAH: FRANSISKUS BORGIAS M
PENELITI CCRS (CENTER FOR CULTURAL AND RELIGIOUS STUDIES) FF UNPAR BANDUNG

TEKS, MAT.1:18-24



Ne nggooy de tombo turukn loas diha Yesus Kristus: Cang du hia Maria, endeN ga, pande pu'ung tunangan (naca) agu hia Yusuf, kali poli na'ang wekin (ge haen) hia Maria ga one mai Nai Nggeluk, du ise toe di ka'eng neki ca neho wina-rona. Hia Yusuf, ronan ga, ata pucu dia (pucu lembak, pucu nggeluk); hia toe ngoeng te pande wau ngasang de winan hitu olo mai ranga data do. Hitu tara ne nggo'on wili ga, hia ngoeng te lego winan hitu, one nuk hanang koen. Landing wili ga cang du hia reme keta nukn liha te pande ne nggitu, rodo mai agu itan kaut liha malaekat de Mori Kraeng one nipin agu ne nggo'o taen malaekat hitu, "Yusuf, anak diha Daud, neka rantang hau ta te emi ko tiba hia Maria kudut te jiri wina laing le meu, ai anak hiot one tuka diha de anak one mai Nai Nggeluk. Hia ce pisa loas ce ngata anak ata rona; agu hau ga paka teing ngasang hia Yesus, ai Hia de ata pande selamakd ce pisa sangged taung ro'engN one mai sangged ndekok dise." Ne nggitu te tungy de ce pisa jirin apa hitu, kudut te pande penongn reweng de Mori Kraeng danong lut taed nabi-nabi: "Te tu'ung de, ce ngata inewai molas kudut te na'ang wekin ce pisa agu loas cengata anak ata rona, agu ise ce pisa teing ngasang latangt Hia, Immanuel," (ngong ne nggo'o de hitu ga, Mori Kraeng manga agu ite). Pas cang du to'to tokon hia ga, Yusuf pande neho keta ata poli perentan le malaekat de Mori Kraeng hitu latangt hia. Mai hia ga emi (tiba) hia Maria kudut jiri wina laing liha. (Landing hia toe neki ca agu winan hitu sangge keta hia Maria loas anakn ata rona agu mai hia Yusuf ga teing ngasang latangt Hia; ngasangN ga hia Yesus).

Bandung, 23 Desember 2009
SIS B, CCRS FF UNPAR BANDUNG.

Senin, 21 Desember 2009

INJIL LESO HO'O, 17-12-2009

TERJEMAHAN: FRANSISKUS BORGIAS M.
PENELITI PADA CCRS (CENTER FOR CULTURAL AND RELIGIOUS STUDIES) FF-UNPAR BANDUNG

TEKS: MAT.1:1-17



Hooy de turuk empo de Mori Yesus, anak diha Daud, anak diha Abraham. Abraham anakn ga hia Ishak; Ishak anakn ga hia Yakub. Yakub anakn ga hia, Yehuda agu sangged taung ase-ka'en, Yehuda anakn ga hia Peres agu Zerah one mai hia Tamar, Peres anakn ga hia Hezron, Hezron anakn ga hia Ram; Ram anakn ga hia Aminadab; Aminadab anakn ga hia Nahason; Nahason anakn ga hia Salmon; Salmon anakn ga hia Boas one mai hia Rahab, Boas anakn ga hia Obed one mai hia Rut, Obed anakn ga hia Isai Isai anakn ga hia Raja Daud. Daud anakn ga hia Salomo one mai enden, wina diha Uria; Salomo anakn ga hia Rehabeam; Rehabeam anakn ga hia Abia; Abia anakn ga hia Asa; Asa, anakn ga hia Yosafat; Yosafat anakn ga hia Yoram; Yoram anakn ga hia Uzia; Uzia anakn ga hia Yotam; Yotam anakn ga hia Ahas; Ahas anakn ga hia Hizkia; Hizkia anakn ga hia Manasye; Manasye anakn ga hia Amon; Amon anakn ga hia Yosia; Yosia anakn ga hia Yekhonya agu ase ka'en pas cang du cekeng oke ngger lau tana Babel. Du poli cekeng oke ngger lau tana Babel ga, Yekhonya anakn ga hia Sealtiel; Sealtiel anakn ga hia Zerubabel; Zerubabel anakn ga hia Abihud; Abihud anakn ga hia Elyakim; Elyakim anakn ga hia Matan; Matan anakn ga hia Yakub; Yakub anakn ga hia Yusuf rona di Maria, ata loasn hia Yesus ko caro ce banan ga hia Kristus. Jadi wili ga, sangged taung manga campulu pat wa'u pu'ung kautone mai hia Abraham sangge hia Daud; campulu pat wa'u pu'ung kaut one mai hia Daud sangge du cekeng oke ngger sina tana Babel, agu campulu pat wa'u pu'ung kaut one mai cekeng oke ngger sina tana Babel sangge du leso cain hia Kristus.

Bandung, 22 Desember 2009
Sis B.
CCRS - FF UNPAR BANDUNG.

Kamis, 17 Desember 2009

INJIL LESO HO'O, 16-12-09

PENERJEMAH: FRANSISKUS BORGIAS M.
PENELITI PADA CCRS UNPAR BANDUNG (Center for Cultural and Religious Studies)
LUK.7:18-23


Cang du hia Yohanes denge kreba ngong sangged kejadian situ ga one mai ata nungkun diha, hia benta sua taus one mai ise agu jeras liha ise te ngo rei one Mori, "Mori e, kom Ite hitu Y ata ata hitut mai ce pisa, ko ami ho'o paka gereng ata ce bana kole?" Cang du caid ata sua situ ga Yesus reme keta pande di'a ata do one mai sangged taung beti dise agu one mai susa mosed agu one mai poti jing daat. Hia kole reme keta pande di'a kole mata data hitu tara ngganceng ita koled ise. Mai waled Yesus ga agu ise: "Ngo meu ga, agu tae le meu one hia Yohanes sangged kaut apa ata ide de mau agu apa ata denge de mau: ata buta nganceng lelo, ata peko nganceng lako kole, ata kusta ina kole wedkid, ata nenteng nganceng denge kole, ata mata nganceng pande mose kole, agu latang te sangged ata lengge ga manga kreba di'a. Cebo ga mose data siot toe oke ko mber Aku."

Bandung, 17-12-09
SIS BM
CCRS UNPAR Bandung.

INJIL LESO HOO, 15-12-09

OLEH: FRANSISKUS BORGIAS M.
PENELITI CCRS (Center for Cultural and Religious Studies)
MAT.21:28-32



"Landing co'o pendapat Dite ngong soal ho'o: manga cengata ata manga sua taus anak ata ronan. Hia ngo one anak ata ngason agu mai taen ga: Anake, ngo kerja (duat) koe meu leso ho'o one uma anggur. Mai waled anak hitu ga: toe ngoeng gaku e. Landing poli hitu ga hia weong (menyesal) keta nain hitu tara ngon hia ga ngo kerja. Ata hitu ga ngo nggere one anak ata te suan agu tae ne nggitu kole liha. Mai waled anakhitu ga: Iyo, ema,landing hia toe ngo duat. Ceing one mai ised sua situ ga ata lorong ngoeng de eman?" Mai wale dise ga: "Anak ngaso hitu." Mai taed Yesus ga agu ise: "Te tu'ung tae Daku agu meu, ata nongko pajak agu ata inewai sundal de ce pisa ata ocok be bolo mai meu nggere one Kerajaan de Mori Kraeng. Ai mai hia Yohanes mai te toso (toto) salang molor, landing toe imbi le meu hia. Landing ata nongko pajak agu ata inewai sundal situ imbi one hia. Konem po ita le meu hia, landing poli hitu meu toe teser (menyesal) agu meu kole toe keta gori imbi one hia."

Bandung, 15-12-09
SIS BM.
CCRS UNPAR Bandung.

INJIL LESO HOO, 14-12-09

OLEH: FRANSISKUS BORGIAS M.
PENELITI PADA CCRS (Center for Cultural and Religious Studies UNPAR Bandung)
MAT.21:23-27



Poli hitu ga Yesus ngo nggere one Bait Allah; cang du ajarn Hia nitu, mais sangged tuang-tuang mese agu sangged taung ata tu'a laingn data Yahudi, mai cumang Hia; mai rei dise situ ga, "Le rang apa peng Hau ho'o panded sangged taung apa so'o ta? Cei de ata teingn rang hitu latang te Hau?" Mai waled Yesus ga nggere one ise, "Aku kole manga ca reig latang te meu, agu eme mau nganceng walein rei Daku, hitu po Aku kole wale agu tae one meu le rang apa Aku ho'o panded sangged taung apa situ. Nia main wili ga cebong nggeluk diha Yohanes? Eta mai surgan, ko one mai ata manusian?" Olo bantang cama taud ise, agu ne nggo taed cama isen: "Eme ne nggo'o tae dite, eta mai surgan, ne nggo'o kole de waleng Diha latangt ite: Eme ne nggitu ga,co'o tara toe imbin le meu? Landing eme ne nggo'o tae dite ga: one main manusian, ite hoo rantang ata lawa do so'o, ai sangged taung lawa do so'o imbi hia Yohanes hitu nabi." Itu tara ne nggoon wale dise ga one Yesus: "Toe bae lami walen rei Dite hitu ta." Mai taed Yesus ga latangt ise: "Eme ne nggitu ga, Aku kole toe keta ngoengG te toi agu meu le rang apa Aku pande sangged taung apa so'o."


Bandung, 13-12-09
Sis BM.
CCRS Bandung.

Minggu, 13 Desember 2009

INJIL LESO HOO, 13-12-09

TERJEMAHAN FRANSISKUS BORGIAS M
PENELITI PADA CCRS (CENTER FOR CULTURAL AND RELIGIOUS STUDIES, UNPAR BANDUNG)
LUK.3:10-18



Ata lawa do situ rei one hia: "Eme ne nggitu ga, coo wili ata di'an pande dami ga?" Mai wale diha ga: "Cei-ceing kaut ata manga sua bajun, teing ga can liha latang te ata ata toe manga bajun, agu cei-ceing kaut ata manga hang (bokong), paka pande cama ne nggitu koley hia." Ata ata nongko pajak mai koles ise mai tegi te cebong nggeluk agu mai rei dise ga nggere one hia: "Tuang guru, apa ata paka pande lami ho'o ga?" Mai wale diha ga, "Meu neka paeng pajak lage one mai ata poli tetapkan latang te tegi de meu." Sangged lawa tentara kole rei nggere one hia: "Ami ga, apa ata paka pande lami?" Mai wale diha Yohanes ga latang te ise: "Meu neka rampas agu neka ngerek ata, agu meu ga paka atur moses (mose de meu) lorong te jepek gaji koes." Landing ata do situ ga gereng agu bengkes, agu sangged ise rei one nai koed ngong hia Yohanes ho'o; ne nggo'o rei dise: hia Mesias ko co'o peng ata ho'o ta? Mai wale agu tae diha Yohanes latang te ise ga, "Aku ho'o de cebong meu le wae kanang,landing Hia atat cewe mese rangn one mai aku, Hia hitu de kudut mai, agu te caca kaut wase sepatu koen ga aku toe patun. Hia hitu ce pisa cebong meu pake Nai Nggeluk agu pake api. Hia kole ba doku te tepi kudut mai te pande bersi liha oka te rik woja agu te nongko gandum Diha nggere one langkok-langkok mese Diha; sangged taung woja embo tapa taungs Liha one api ata kete tedeng len." Hia Yohanes kreba Injil latang te ata do situ pake do keta nasihat agu tombo di'a.

Bandung, 13 Desember 2009
Sis B.
CCRS UNPAR BANDUNG.

Kamis, 10 Desember 2009

INJIL LESO HOO, 11-12-09

TERJEMAHAN: FRANSISKUS BORGIAS M.
PENELTI CCRS (CENTER FOR CULTURAL AND RELIGIOUS STUDIES) FF UNPAR BANDUNG.
MAT.11:16-19



Le pai koley Laku pande rapangd sangged ata lawa leso ho'o ga? Ise situ de cama keta neho ata koet siot lonto one (breha) pasar agu ciek latang te cama koed: Ami tebang sunding, landing meu toe congka, ami dere dere weong nai, landing meu toe lorang ko weong nai. Ai mai hia Yohanes olo; hia toe hang, toe inung, agu mai tae dise ga: Hia hoo de ata hoeng le jing daat. Poli hitu ga cain kole Anak Manusia; Hia hang, agu inung, agu mai tae di se ga: Lelo de, Hia hoo de ata tuka mese, agu ata langu tuak, hae reba data nongko pajak, agu ata ndekok. Landing wili ga Hikmat de Mori Kraeng de ata ka'eung dungka keta one sangged gauk agu wintuk Diha.


Bandung, 11-12-09
Sis B.
CCRS FF UNPAR BANDUNG.

INJIL LESO HOO, 12-12-09

TERJEMAHAN: FRANSISKUS BORGIAS M
PENELITI CCRS (CENTER FOR CULTURAL AND RELIGIOUS STUDIES) FF UNPAR BANDUNG.
MAT.17:10-13.



Mai reid ata nungku Diha ga ngger one Hia: "Eme ne nggitu ga, co'o tara tae ne nggood ata mbeko getok Taurat ai hia Elia tay kudut olo maiy di hia?" Mai waled Yesus ga: "Bo tu'ung ta hia Elia hitu tay maiy agu pande molor kole sangged keta taung. Aku kole tae ne nggoo one (agu) meu: Hia Elia hitu poli cain hoo ga, landing toe bae hia lata; sara nai kaut panden lise hia Elia hitu. Ne nggitu kole Anak Manusia ce pisa; Hia tay cukung susa wajol pande dise." Cang du hitu di po idep le sangged ata Nungkun Hia Yesus ai Hia curup ngong hia Yohanes Ata Pande Cebong Ata.


Bandung, 10 Desember 2009
Sis B.
CCRS FF UNPAR BANDUNG.

Selasa, 08 Desember 2009

INJIL LESO HOO, 10-12-09

TERJEMAHAN: FRANSISKUS BORGIAS M.
MAT.11:11-15.


Aku tae agu meu te-tu'ung keta: One mai sangged ata ata loas le inewai, toe di manga y di cain ata ata cewe mese one mai hia Yohanes Ata Pande Cebong Ata. Landing ata cewe koen one Mbaru (Kerajaan) Surga ga ngai cewe mese kin one mai hia. Pu'ung kaut du cain hia Yohanes Ata Pande Cebong Aga, sangge keta te ho'on ga, Mbaru (Kerajaan) Surga hitu cebo pande tewur kin lata, agu ata situt pande tewurn ga nanang te lonto lise. Ai sangged taung nabi aku Kitab Taurat danong maid ga tombo bundu nubuat sangge kaut cain hia Yohanes, agu - eme ngoengs meu te tiba hia - hia hitu de hia Elia ata hitut kudut maiy ce pisa. Cei-ceing kaut ata manga tilu, porong ngoeng te senget sangged kaut tombo so'o!

Bandung, 09 Desember 2009
Sis B.

INJIL LESO HOO, 09-12-09

TERJEMAHAN: FRANSISKUS BORGIAS M.
MAT.11:28-30.

"Mai meu ga, mai ce'e ruis (lupi) Aku. Sangges taung meu ata mael ko ata pola mendo mese keta. Ai Aku nanang te teing meu asi-asi mael one mbau. Pola ga le meu mendo ata teing Daku agu nungku ga meu one mai Aku, ai Aku ho'o de ata nggalas (nihas) nai atau toe mese nai. Wakar de mau ce pisa nganceng ka'eng temer dungka lupi Aku. Ai mendo Daku hoo, mendo ata pande nisang nai; ai mendo Daku ho'o de heal/geal ketay."

Bandung, 09-12-09
Sis B.

INJIL LESO HOO, 03-12-09

TERJEMAHAN: FRANSISKUS BORGIAS M.
PENELITI PADA CCRS (CENTER FOR CULTURAL AND RELIGIOUS STUDIES) FF UNPAR BANDUNG.
MRK.16:15-20



Mai tae Diha ga agu ise: "Ngo meu ga, ngo lako labok tana lino, ba koe le meu Kreba di'a latang te sangged ca o ca one tana lino hoo. Cei-ceing kaut ata imbi agu tiba sakramen cebong nggeluk, ise ce pisa tiba selamak one mai Mori. Landing cei-ceing kaut ata toe imbi, ise ce pisa tiba waheng mese. Sangged taung ata imbi (kreba dia hitu) manga kaut ise tiba widang agu tanda lenget: Ise ce pisa nganceng sonda jing da'at one/le ngasang Daku, ise kole nganceng curup bahasa-bahasa weru latang te ise, ise kole nganceng cau ular; konem po ise inung wae rasung data landing ise toe nganceng mata ko boat; ise kole ce pisa nganceng cau sa'i data beti, wiga ata beti situ ga ina koles ga." Cang du poli curup ne nggitun Hia Mori Yesus ga latang te ise, Mori Yesus hendeng ngger eta surga, poli hitu ga Hia lonto one lupi racap wanang de Mori Kraeng. Poli hitu ga ise (ata nggeluk) ngo ba kreba di'a hitu labok tana lino hoo; Mori Kraeng ka'eng kole agu ise, te dadang ise, agu pande mberes n kreba dia hitu le tanda lenget ata cewe mesen keta.

Bandung, 03 12 09
Sis B.
CCRS FF-UNPAR BANDUNG.