KREBA DI'A LESO HO'O 01 JUNI 2010

HO’O DḖ INJIL DE MORI YḖSUS ATA TUNTI LIHA MARKUS 11:11-26
PAKA NARING GA LITḖ MORI KRAẺNG (01-06-12)


11 Cang du caid isé sina Yérusalém ga Hia ngo boné Mbaru de Mori Kraéng. Sina hitu Hia lélo-lélo sanggéd taung apa ata manga sina hitu, landing wajol tiong te wié tana ga, Hia téti te ngo ngger sina Bétania cama-cama agu campulusua taus ata nungku Diha.
12 Ného diangn ga cang du Mori Yésus agu campulusua taus ata nungku Diha téti te ngo sina mai Bétania’d ga, Mori Yésus jiri darem gi.
13 Ita Liha mai tadang main ca pu’u haju ara ata lebo kéta saungn ga. Ngo sina ruis haju hitu Hia ngo te lélo cala ngancéng ita apa-apan Hia sina pu’u haju hitu. Landing du cai ruis lupi pu’u haju hitu’n Hia ga, toé kéta manga ita apa-apan Hia sina hitu be pé’ang mai saung hajun kanang, ai toé di cekeng te wuan haju ara hitu.
14 Mai taén ga ngger oné pu’u haju hitu, “Toé kéta manga cengatan kolé tayi ata ata hang wua de hau dengkir tayin agu tédéng lén!” Dengé le sanggéd ata nungku’n curup Diha hitu.
15 Poli hitu cais isé Mori Yésus ga atu sanggéd ata nungku’n hitu sina Yérusalem. Cang du poli ngo be boné’n Mbaru de Mori Kraéng hitu ga, Mori Yésus wangka pu’ung sonda kéta taungs Liha ata siot rémé pika-pika’d oné natas Mbaru de Mori Kraéng hitu. Pandé wali-gélaks Liha sanggéd méja data siot pandé te paluk séng ne nggitu kolé méja-méja data siot pika tekur jawa,
16 agu Hia kolé ga ré’ing ata te ba barang pika disé lako liba oné natas Mbaru de Mori Kraéng hitu.
17 Poli hitu ga Hia pu’ung toing isé, agu mai taén ga, “Ai bom toé manga ata poli tulisn ne nggo’oy dé: Mbaru Daku tay caro mbaru sembaéng laing latang te sanggéd bangsa oné lino ho’o? Maik méu ho’o ga poli pandé mbaru ho’o cewo baté impungd ata penyamun!”
18 Tuang-tuang ata tu’a laing’d agu sanggé’d ata mbeko getok Taurat dengé ngong apa ata poli pandé de Mori Yésus; isé ga kawé paté’n co’oy caran te pandé lérak Hia, ai isé rantang ngger oné Hia, ai sanggé’d ata lawa do ga lenget kéta taung dengé sanggéd toing Diha.
19 Cang du tiong te wié tana ga isé ngo be pé’ang mai kota hitu.
20 Du gula ucap ného diangn ga cang du Mori Yésus agu sanggéd ata nungkun lako liba, ita lisé pu’u haju ara hio oné meseng ga jiri dango kéta’y gi dengkir kéta wa waké celern.
21 Poli hitu nuk kolé liha Pétrus agu mai taén ga ngger oné Mori Yésus, “Mori Rabi, lélo Lité ga, pu’u haju ara hiot poli mawang’n (kutuk’n) lité oné meseng jiri dango’y gi.”
22 Mai walé de Mori Yésus ga ngger oné isé, “Imbi ga le méu oné Mori Kraéng!
23 Tetu’ung kéta Aku curup ngger oné méu ho’o: Céing-céing kaut ata ata curup ngger oné poco ho’o: Damang dé téti weki rum hau ga agu péncar ngger sili tacik! asal toé kéta manga gegé (bimbang) koé ce koén oné nain hia, maik imbi apa ata poli curup’n liha hitu manga kaut jirin cepisa, wiga apa hitu cepisa manga kaut jirin.
24 Wiga wili ga Aku curup ngger oné méu ho’o: Apa kaut ata tegi-sembaéng agu tegi le méu, imbi ga le méu ngong méu poli tiba’d ga, wiga apa situ cepisa manga kaut téingd ngger oné méu.
25 Ẻmé hesé méu kudut te sembaéng, olo ampongs di ata siot am manga salad ngger oné méu, kong Ema de méu hiot ka’éng éta surga ampong kolé sanggé’d sala de méu.”
26 [Landing émé méu toe ampong, Ema de méu hiot ka’éng éta surga kolé toé ampong sanggé’d sala de méu.]


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)