KREBA DI'A LESO HO'O 25 MEI 2012

HO’O DḖ INJIL DE MORI YḖSUS ATA TUNTI LIHA YOHANES 21:15-19
PAKA NARING GA LITḖ MORI KRAẺNG (25-05-12)


15 Cang du poli jumikd ga, Mori Yésus taé ngger oné hia Simon Pétrus, “Simon, anak diha Yohanés, momang Aku hau ko, céwé mésé oné mai momang latang te isé so’o?” Mai walé diha Pétrus ga ngger oné Hia, “Tu’ung yo Mori, baé Lité ngong aku ho’o dé momang kéta Ité.” Mai taé de Mori Yésus ga ngger oné hia, “Lami di’a-di’a koés le hau anak-anak de jimbal Daku.”
16 Mai taé de Mori Yésus kolé ngger oné hia te sua ngkalin ga, “Simon, anak diha Yohanés, momang Aku hau ko?” Mai walé diha Pétrus ga ngger oné Hia, “Tu’ung yo Mori, baé Lité ngong aku ho’o dé momang kéta Ité.” Mai taé de Mori Yésus ga ngger oné hia, “Ba élor di’a-di’as le hau jimbal-jimbal Daku so’o.”
17 Mai taé de Mori Yésus ngger oné hia te telu ngkalin ga, “Simon, anak diha Yohanés, momang Aku hau ko?” Wéong kéta nai diha Pétrus ai Mori Yésus réi hia telu ngkalin ga, “Momang Aku hau ko?” Wiga mai walé diha Pétrus ga ngger oné Hia, “Mori sengaji é, baé Lité sanggéd ca o ca, baé kolé Lité ngong aku ho’o dé momang kéta Ité.” Mai taé de Mori Yésus ga ngger oné hia, “Lami di’a-di’a koés le hau jimbal-jimbal Daku.
18 Tetu’ung kéta Aku curup ngger oné hau: Ẻmé du ngai reba uwa kim dé hau é, hau ngancéng pongo kendikm one lé’as de rum agu ngancéng laki-lako ngger nia kaut ata ngoéng de hau, maik émé tu’a umurm cepisa ga, hau ga sotor agu téti kaut limém agu manga ata cebana ata pongo kendik de hau agu dadang hau ngger oné osang ata toé ngoéng laingn le hau.”
19 Mori Yésus taé sanggéd taung apa so’o kudut te toing ngong co’oy caran hia Pétrus matan tay agu pande hiang Mori Kraéng. Cang du poli curup ne nggitun Hia ga, hia curup ne nggo’o ngger oné hia Pétrus, “Lut Aku ga.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)