KREBA DI'A LESO HO'O 24 MEI 2012

HO’O DḖ INJIL DE MORI YḖSUS ATA TUNTI LIHA YOHANES 17:20-26
PAKA NARING GA LITḖ MORI KRAẺNG (24-05-12)


20 Toé latang te isé so’o kanang dé Aku ho’o sembaéng, maik Aku kolé sembaéng latang te sanggéd ata, ata siot imbi ngger oné Aku le tombo kréba disé cepisa;
21 kong sanggéd isé situ ga jiri neki ca weki, cama ného Ité, yo Ema, oné Aku agu Aku ga oné Ité, kong isé kolé ka’éng oné Ité, kong lino ho’o imbi ngong Ité hitu dé ata poli jera Aku te mai oné lino ho’o.
22 Aku poli téingd ngger oné isé néra-bé’ang ata hiot poli téingn Lité ngger oné Aku, kong isé jiri neki ca weki, cama ného Ité ho’o dé neki ca:
23 Aku oné isé agu Ité ga oné Aku kong isé jiri neki ca di’a-di’a kétas, kong baé le lino ho’o ngong Ité hitu dé ata poli jera Aku te mai agu ngong Ité hitu poli momang isé, cama ného Ité momang Aku.
24 Yo Ema, ngoéng daku ga porong, nia kaut mangag Aku, isé kolé manga cama-cama agu Aku, isé siot poli téingd Lité ngger oné Aku, kong isé ngancéng lélo néra-bé’ang Dité hiot poli téingn Lité ngger oné Aku, ai Ité poli momang Aku be bolon pandé jirin lino ho’o danong.
25 Yo Ema ata nai ngalis agu tuka nggéngga (adil) kéta, lino ho’o dé toé baé Ité, maik Aku dé baé Ité, agu isé so’o ga baé ngong Ité hitu dé ata poli jera Aku te mai cé’é ho’o;
26 agu Aku kolé poli toingn ngasang Dité ngger oné isé agu Aku nanang te toing ngasang hitu cepisa, kong momang ata poli téingn Lité ngger oné Aku manga agu oné beréha isé agu Aku ga manga oné isé.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)