KREBA DI'A LESO HO'O 22 MEI 2012

HO’O DḖ INJIL DE MORI YḖSUS ATA TUNTI LIHA YOHANES 17:1-11a
PAKA NARING GA LITḖ MORI KRAẺNG (22-05-12)


1 Ne nggituy dé reweng de Mori Yésus. Poli hitu ga Hia lélo ngger éta awang agu mai taén ga, “Yo Ema, caiy rapak leson ho’o ga; pandé hiang koé lité Anak Dité, kong Anak Dité hitu pandé hiang Ité.
2 Cama ného Ité poli téing ngger oné Hia rang kuasa be bétan sanggéd ca o ca ata mosé, ne nggitu kolé dé Ité cepisa téing mosé tédéng lén ngger oné sanggéd ata siot poli téingd Lité ngger oné Hia.
3 Ho’oy dé mosé tédéng lén, yaitu ngong isé baé Ité, Mori Kraéng ata benarn agu toé manga kolé be pé’ang mai hitun ga, agu baé Mori Yésus Kristus ata poli jeran Lité te mai.
4 Aku ho’o poli pandé hiang Ité oné lino ho’o le poli pandéd Laku sanggéd gejur ata poli téingd Lité ngger oné Aku kong pandéd Laku.
5 Agu te ho’on ga, yo Ema, pandé hiang ga Aku oné ranga de Rud Ité le néra-bé’ang ata manga oné Ité du be bolon toé di mangay lino ho’o.
6 Aku poli pandé céngka ngasang Dité ngger oné sanggéd ata ata téingd Lité ngger oné Aku oné mai lino ho’o. Isé situ dé Dité taungs Morid agu Ité poli téingd isé situ ngger oné Aku agu isé kolé poli lorong reweng Daku.
7 Te ho’on ga isé baé ngong sanggéd apa ata téingd Lité ngger oné Aku, sanggéd situ dé mai oné mai Ité’d taung.
8 Ai sanggéd reweng ata poli téingd Lité ngger oné Aku poli kolé taéd Laku ngger oné isé agu isé kolé ga poli tibad reweng situ. Baé tetu’ung lisé ngong Aku ho’o dé mai one mai Ité agu isé kolé imbi ngong Ité hitu dé ata poli jera Aku te mai oné lino ho’o.
9 Aku sembaéng-tegi latang te isé. Toé latang te lino ho’o dé Aku sembaéng-tegi, maik latang te isé, ata poli téingd Lité ngger oné Aku, ai isé dé Dité taungs Morid
10 agu sanggéd ca o ca ata manga oné Aku dé Dité kolé’s Morid agu apa ata manga oné Aku Dité kolé’s Morid, agu Aku ho’o ga poli pandé hiang oné beréha sanggéd isé situ.
11a Aku te ho’on ga toé manga kolé oné lino ho’o, maik isé ngai manga ka’éng kid oné lino ho’o; Aku ga mai ngger oné Ité.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)