KREBA DI'A LESO HO'O 21 MEI 2012

HO’O DḖ INJIL DE MORI YḖSUS ATA TUNTI LIHA YOHANES 16:29-33
PAKA NARING GA LITḖ MORI KRAẺNG (21-05-12)


29 Mai taéd de sanggéd ata nungku Diha ga, “Lélo ga, te ho’on Ité curup terus terang kaut agu Ité kolé toé paké tombo ného rapang.
30 Te ho’on ga baé lami ngong Ité hitu baé sanggéd ca o ca agu toé perlun ata réi-réi ngger oné Ité. Wiga wili ga, ami ho’o imbi ngong Ité hitu dé mai oné mai Mori Kraéng.”
31 Mai walé de Mori Yésus ga ngger oné isé, “Imbi le méu te ho’on ga?
32 Lélo ga, manga kaut cain rapak leson cepisa, agu caiy te ho’on leso hitu ga, cang du méu cepisa pandé bégas agu wécak ngger oné osang baté ka’éng de rus méu agu méu ga ngo legong Aku ne nggitu kaut ka’éng hanang koég Aku. Maik Aku ho’o cepisa toé kéta manga ka’éng hanang koég, ai Hia Ema dé kaéng agu lami Aku.
33 Sanggéd taung apa so’o dé poli taéd Laku ngger oné méu, kong méu ngancéng tiba hambor nai’s oné Aku. Oné lino ho’o méu cukung susa, maik pandé mberes ga nai de méu, ai Aku ho’o poli pandé kodan lino ho’o ga.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)