KREBA DI'A LESO HO'O 30-03-12

HO’O DḖ INJIL DE MORI YḖSUS ATA TUNTI LIHA YOHANES 10:31-42
PAKA NARING GA LITḖ MORI KRAẺNG (30-03-12)


Cangkalin kolé ga sanggéd ata Yahudi situ emi watu kudut te mbarap ngger oné Mori Yésus. Mai taé de Mori Yésus ga ngger oné isé, “Dod de gejur ata di’ad ata mai oné mai Ema Daku ata nanang te toto Laku ngger oné méu; gejur he nia kéta péng ata pandé heres nai laing le méu wiga méu ga nanang kéta mbarap Aku le watu?” Mai walé sanggéd data Yahudi situ ga, “Toé landing le gejur ata di’ad de wiga ami ho’o ngoéng te umbar Hau le watu; ami umbar Hau le watu ai Hau mbécik (hojat) Mori Kraéng, ai Hau kolé, koném po mensia biasa kaut weki Rum ga, anggap kéta weki Rum hitu de Mori Kraéng.” Mai taé de Mori Yésus ngger oné isé, “Ai bom toé manga ata poli tulisn ga oné Buku Taurat de méu: Aku poli pa’u reweng: Méu ho’o dé ilah? Ẻmé ise, latang te céi danong reweng hitu poli taén ga, caro ilah laing – agu baé kolé lité Buku Nggeluk hitu toé ngancéng pandé bataln kolé ga – ngai ngoéngs méu ho’o caro Hiat ata poli pandé nggeluk le Ema agu Hiat ata poli jeraN Liha te mai one lino ho’o: Oé Hau é mbécik (hojat) Mori Kraéng! Ai Aku ho’o poli taé ne nggo’o: Aku ho’o dé Anak dé Mori Kraéng? Ẻmé Aku ho’o toé pandé gejur-gejur de Ema Daku, méu ga néka imbi ngger oné Aku, landing émé Aku ho’o pandé sanggéd gejur situ maik méu ga toé ngoéng te imbi ngger oné Aku, ta dé tamal imbi kaut oné sanggéd gejur-gejur situ ga, kudut méu ngancéng baé agu idep bahwa Hia Ema dé manga oné Aku agu Aku ho’o ga manga oné hia Ema.
Cengkalin kolé isé nanang te deko Hia, maik Hia toé kin di ngancéng dekon lisé.
Poli hitu ga Mori Yésus ngo kolé be sina mai Yordan, ngo nggér sina osang baté cebong atan hia Yohanés danong, agu Hia ga ka’éng sina hitu. Doo kéta ata mai ngger oné Hia agu ne nggo’o taé disé, “Yohanés danong é toé manga pandé can koé tanda lenget, landing sanggéd apa kaut ata poli taé diha Yohanés hitu ngong ata ho’o dé benar kéta taungd.” Wiga ata do situ ga imbi ngger oné Hia.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)