KREBA DI'A LESO HO'O 26-03-12

HO’O DḖ INJIL DE MORI YḖSUS ATA TUNTI LIHA LUKAS 1:26-38
PAKA NARING GA LITḖ MORI KRAẺNG (26-03-12)


Oné wulang te enamn ga malékat Gabriél jera le Mori Kraéng te ngo sina Nazaret, ca kota sina Galiléa, ngger oné ca inéwai molas ata poli manga nacan ga, hia Yoséf ngasang nacan hitu; hia Yosef ho’o dé ata oné mai wa’u de uku diha raja David kin; ngasang de inéwai molas hitu ga hia Maria. Cang du main malékat hitu ga ngger oné hia Maria, mai taé diha ga, “Tabe o ité, itét ata tiba do berkak, Mori manga agu ité.” Hia Maria géga kétay cang du dengén liha reweng hitu; mai réi diha oné nai koén ga, apa kéta péng arti betuan tabé hitu ga. “Néka rantang, é Maria, ai hau tiba berkak mésé oné mai Mori Kraéng. Tetu’ung kéta ce pisa hau na’ang wekim agu loas le hau ce pisa cengata anak ata rona agu porong téing ngasangn le hau ce pisa ga Hia Yesus. Hia tayi jiri éta-éta uwan agu caro lata Anak de Mori Kraéng Déwa Mésé Bail. Mori Kraéng kolé ce pisa teing ngger oné Hia tahta diha David, empo Diha danong, agu Hia ce pisa ga téing perénta latang te ata wa’u diha Yakub dengkir tayin agu tédéng lén agu Perénta Diha kolé tayi toé manga baé beténgn ce pisa.” Mai taé diha Maria ga ngger oné malékat hitu, “Co’o kétay caran ga, ai aku ho’o toé di manga rona’g?” Mai walé de malékat hitu ga ngger oné hia, “Nai Nggeluk ce pisa wa’u béta mai hau agu rang kuasa de Mori Déwa Mésé Bail lami hau; wiga anak ata loas le hau hitu ce pisa ga caro lata anak Nggeluk, Anak de Mori Kraéng. Tetu’ung kolé taé daku, hia Elisabét, ka’é de hau hitu, hia kolé rémé kéta nang wekin kolé; anak diha ga anak ata rona; hia nang wekin oné umur tu’an ho’o ga agu ho’o de wulang te enemn hia nang wekin, hia hitu ata caro lata toé manga wingn lawang ho’o. Ai latang te Mori Kraéng toé kéta manga can ata toé ngancéng te jiri laing.” Mai taé diha Maria ga, “Tetu’ung kéta de aku ho’o mendi de Morin, nia kaut taé Dite lorong kauts laku.” Poli hitu ga malékat hitu moray nitu main.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)