KREBA DI'A LESO HO'O 28-03-12

HO’O DḖ INJIL DE MORI YḖSUS ATA TUNTI LIHA YOHANES 8:31-42
PAKA NARING GA LITḖ MORI KRAẺNG (28-03-12)


Poli hitu ga mai taé Diha latang te sanggéd ata Yahudi ata poli imbi ngger oné Hia, “Ẻmé méu ngai ka’éng kin oné reweng Daku, méu dé tetu’ung kéta ata nungku Daku, agu méu ce pisa ngancéng baé kebenaran, agu kebenaran hitu ngancéng pandé lego (merdéka) méu.” Mai walé disé ga, “Ami ho’o dé wa’u diha Abraham agu ami ho’o toé di perna jiri ata taki mendi laing data. Co’o tara ne nggo’on taé Dité ga: Méu cepisa merdéka?” Mai taé de Mori Yésus ga ngger oné isé, “Tetu’ung kéta taé Daku ngger oné méu ho’o, sanggéd ata siot pandé ndékok, isé dé mendi de ndékok. Mendi dé toé ka’éng kin oné mbaru boné, maik hanang anak kali ata ka’éng oné mbaru boné dengkir tayin agu tédéng lén. Wiga wili ga, émé hia Anak hitu pandé merdéka (lego) méu, méu kolé tayi merdéka (lego) tetu’ung kéta.”
“Baé Laku méu ho’o dé wa’u diha Abraham, maik méu nanang kéta te mbelé Aku ai reweng Daku toé ngancéng tiban le nai de méu. Apa ata ita Daku oné Hia Ema, apa hitu dé ata taé Daku, ai ne nggitu kolé méu, méu ho’o pandé apa ata poli dengéd le méu oné mai ema de méu.” Mai wale disé ga ngger oné Hia, “Ema dami dé hia Abraham.” Mai taé de Mori Yésus ngger oné isé, “Ẻmé méu ho’o dé anak diha Abraham, pasti méu ho’o pandé gejur ata poli pandéd liha Abraham danong ga. Maik méu ho’o ga nanang te mbelé Aku, ata ata toing kebenaran ngger oné méu, yaitu ngong kebenaran ata poli dengén Laku oné mai Mori Kraéng; gejur ne nggitu dé toé manga pandéd liha Abraham danong. Méu ho’o dé pandé gejur de ema de rus méu.” Mai walé disé ga, “Ami ho’o toé loas oné mai kawing pé’ang puar é. Ema dami cay kali, hia dé Mori Kraéng.” Mai taé de Mori Yésus ga ngger oné isé, “Ẻmé Mori Kraéng hitu dé Ema de méu, méu pasti momang Aku, ai Aku ho’o dé mai one mai Mori Kraéng agu te ho’on ga Aku manga cé’é ho’o. Apan kolé Aku ho’o mai toé landing de ngoéng de Rug Aku, maik Hia dé ata poli jera Aku te mai cé’é ho’o.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)