KREBA DI'A LESO HO'O 27-03-12

HO’O DḖ INJIL DE MORI YḖSUS ATA TUNTI LIHA YOHANES 8:21-30
PAKA NARING GA LITḖ MORI KRAẺNG (27-03-12)


Poli hitu mai taé de Mori Yésus kolé ngger oné isé, “Aku ho’o nanang te ngo ce pisa; du hitu ce pisa ga méu kawé Aku maik méu tayi mata oné déméng sanggéd ndékok de méu. Ngger sina osang baté ngo Daku, méu toé ngancéng ngo sina hitu. Wiga mai taé data tu’a laing data Yahudi situ ga, “Olé am nanang te mbelé weki Run dé Hia ho’o ta, hitu tara ne nggo’o taén Hia: Ngger sina osang baté ngo Daku, méu toé ngancéng ngo sina hitu?” Poli hitu ga mai taé Diha ngger oné isé, “Méu ho’o dé ata mai wa mai, Aku ga ata mai éta mai; méu ho’o ata mai oné mai lino ho’o, Aku ho’o toé mai oné mai lino ho’o. Itu tara ne nggo’on taé Daku bao ga ngger oné méu, bahwa méu ho’o ce pisa mata oné déméng sanggéd ndékok de méu; ai émé méu toé imbi bahwa Aku ho’o dé Hia hitu, méu ce pisa mata oné déméng sanggéd ndékok de méu.” Poli hitu ga mai taé disé ngger oné Hia, “Ai céi léng Hau ho’o ta?” Mai walé de Mori Yésus ga ngger oné isé, “Apa léng ata poli taé Daku lawang ho’o wangka pu’ung danong main ga? Do kéta ata paka taé Laku agu paka pandé beté bicar laku ngong méu ho’o; landing Hiat ata jera Aku te mai cé’é ho’o, ata hitu de benarn, agu apa kaut ata séngét Daku oné mai Hia, apa hitu dé ata taé Daku latang te tana lino.” Landing isé toé idep ai Hia rémé tombo agu isé ngong Hia Ema. Mai taé de Mori Yésus ga, “Ẻmé méu poli téti ngger étan Anak Mensia ce pisa ga, cang du hitu po baé le méu bahwa Aku dé Hia hitu, agu bahwa Aku ho’o toé pandé sanggéd ca o ca oné mai weki de Rug kaut Aku, maik Aku ho’o curup sanggéd ca o ca situ, cama ného ata poli toingd liha Ema ngger oné Aku. Hia, ata poli jera Aku te mai cé’é ho’o, Hia kolé ata lami Aku tayi. Hia toé sendo Aku te ka’éng hanang koé kaut, ai Aku ho’o laséng pandé apa-apa kaut ata senang laingd oné nai Diha.” Du poli taé sanggéd taung apa situ ga, doo kéta ata ata imbi ngger oné Hia.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)