KREBA DI'A LESO HO'O 31-03-12

HO’O DḖ INJIL DE MORI YḖSUS ATA TUNTI LIHA YOHANES 11:45-56
PAKA NARING GA LITḖ MORI KRAẺNG (31-03-12)


Do ata ata oné mai bangsa Yahudi ata mai la’at isé Maria; isé lélo le mata de rud apa ata poli pandé de Mori Yésus, wiga isé imbi ngger oné Hia. Landing pisa taus oné mai isé ngo ngger oné ata Farisi agu mai isé baro/tombo ngger oné isé, apa ata poli pandé de Mori Yésus hitu. Poli hitu ga sanggéd taung tuang-tuang imam ata taki étad agu sanggéd ata Farisi siro Sanhédrin kudut te mai nempung agu mai taé disé ga, “Olé apa ata paka pandé dité te ho’on ga? Ai Ata hitu pandé do kéta tanda lenget. Ẻmé kong kaut lité Hia, olé sanggéd taung ata ce pisa ga imbi ngger oné Hia agu mai tayi sanggéd ata Romawi agu tako osang nggeluk dité agu bangsa dité.” Landing cengata oné mai isé situ, ngansang na hia Kayafas, ata Imam Mésé laing du ntaung hitu, taé ne nggo’o ngger oné isé, “Toé manga baé apa-apas méu ho’o ta, agu toé manga doingn le méu bahwa céwé mésé gunan latang te méu, émé mata cengatan ata latang te bangsa hitu po sanggén taung bangsa dité ho’o lerak kéta taungs.” Hia taé curup hitu toé mai oné mai weki run kaut, maik hia tombo sebagai Imam Mésé du ntaung hitu hia tombo ca nubuat ngong Mori Yésus ce pisa matay latang te bangsa hitu, agu toé hanang latang te bangsa hitu kaut, maik kolé te kumpul agu pandé neki ca kéta taungs sanggéd anak de Mori Kraéng ata poli bécangd ga. Wangka pu’ung kaut leso hitu isé ca reweng te mbelé Hia.
Wiga Mori Yésus ga toé toto rangaN kolé olo mai ata do oné be réha sanggéd ata Yahudi situ, maik Hia téti te ngo mai nitu main te ngo sina baté ruis satar laing, ngger sina kota Ẻfraim ngasangn; sina hitu Hia ka’éng cama-cama agu sanggéd taung ata nungku Diha.
Cang du hitu ga leso ramé Paska data Yahudi tiong te cai gi agu do kéta ata one mai tana hitu ata téti te ngo ngger sina Yérusalem, ngo te pandé nggeluk weki’d isé be bolon leso Paska hitu. Isé cébo kawé Mori Yésus; du rémé hesé kid isé oné Mbaru de Mori Kraéng, mai taé disé ga agu cama taud, “Co’o le nuk de méu ga? Maiy wili Hia ce pisa ko ngger cé’é pésta hitu?” [Rémé ne nggitun ga sanggéd taung Imam ata tu’a laing agu sanggéd ata Farisi poli téing perénta kudut céing-céing kaut ata baé osang baté ka’éng Diha paka toi osang hitu ngger oné isé, kudut isé ngancéng deko Hia.].


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)