KREBA DI'A LESO HO'O 22-03-12

HO’O DḖ INJIL DE MORI YḖSUS ATA TUNTI LIHA YOHANES 5:31-47
PAKA NARING GA LITḖ MORI KRAẺNG (22-03-12)


Ẻmé Aku téing saksi latang te weki Rug Aku, kesaksian hitu Daku toé manga benarn; manga ata ce bana ata téing saksi latang te Aku agu baé Laku kesaksian ata téing data hitu latang te Aku hitu dé benarn a. Méu poli jera ata penggawa ngger oné hia Yohanes; agu hia poli téing kesaksian ngong kebenaran; landing Aku toé perlu kesaksian oné mai mensia, maik Aku taé sanggéd taung apa so’o, kong mau ngancéng tiba mosé selamak (mosé di’a). Hia dé lampu pelita ata ngai keté kin agu ngai néran; agu méu ga nanang te lélo keté de lampu hitu konem po ce koén kaut. Maik Aku ho’o manga ca kesaksian ata céwé pentingn kéta oné mai kesaksian diha Yohanés, ngong sanggéd gejur ata poli téingd liha Ema ngger oné Aku, kudut te pandé kid Laku. Gejur hitu dé ata pandé Daku te ho’on ga; agu sanggéd gejur hitu dé ata téing kesaksian latang te Aku bahwa hia Ema dé poli jera Aku te mai cé’é ho’o. Hia Ema dé ata jera Aku te mai, Hia dé ata poli téing kesaksian latang te Aku. Méu toé manga dé’itn di dengé reweng Diha, taraN kolé toé di ita dé’it le meu, agu rewengN ga toé manga oné nai de méu, ai méu ho’o toé imbi oné Hia ata poli jera Diha te mai cé’é ho’o. Méu ho’o gemergujuk skola Buku Nggeluk, ai nuk de méu ga one Buku hitu méu ngancéng haéng mosé léwé lén, landing koném po Buku Nggeluk hitu téing kesaksian latang te Aku, méu toé mai ngger oné Aku kudut te tiba mosé di’a hitu.
Aku ho’o toé perlu tiba hiang oné mai mensia. Landing ngong méu ho’o, poli baén Laku ga oné nai de méu toé manga momang latang te Mori Kraéng. Aku ho’o mai oné mai agu ba ngasang de Ema Daku, landing méu toé tiba Aku; émé manga ata ce bana ata mai oné mai agu ba ngasang de run kaut ga, tiba le méu hia hitu. Ai co’o kéta léng te ngancéng imbis méu ho’o ta, méu ho’o ata tiba hiang one mai cama taus maik toé kawé hiang ata mai oné mai Mori Kraéng hitut cengata kanangy kali? Néka ne nggo’o nuk de méu ga Aku ho’o tayi mangkong-mangkong méu bolo mai ranga de Ema; ata mangkong-mangkong méu tayi dé hia Moses ai méu ho’o manga bengkes mésé kéta ngger oné hia. Ai émé méu imbi oné hia Mosés, pasti méu kolé imbi oné Aku, ai hia poli tulis do ngong Aku. Landing émé méu toé imbi oné apa ata poli tulis diha, co’o kétay caran méu te ngancéng imbi oné apa ata taé Daku tayi ga?”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)