KREBA DI'A LESO HO'O 21-03-12

HO’O DḖ INJIL DE MORI YḖSUS ATA TUNTI LIHA YOHANES 5:17-30
PAKA NARING GA LITḖ MORI KRAẺNG (21-03-12)


Landing mai taé Diha ga ngger oné isé, “Ema Daku ngai kerja kin dengkir te ho’on ga, itu tara kerja kig kolé Aku ho’o ga.” Wiga, ata tu’a laing data Yahudi situ nanang kéta te mbelé Hia, toé hanang landing Hia poli lagé peraturan Leso Sabat, maik ai Hia kolé taé ne nggo’o ngong Mori Kraéng de Ema de Run Hia; ai betuan dé curup hitu ga, Hia lélo weki Run cama ného Mori Kraéng. Poli hitu mai walé de Mori Yésus ga ngger oné isé, “Te tu’ung kéta taé Daku ho’o ngger oné méu; Anak dé toé ngancéng pandé apa-apa oné mai weki Run kaut, émé toé lélo liha apa ata pandé de Eman; ai apa kaut ata pandé de Ema hitu, hitu kolé dé apa ata pandé de Anak. Ai Hia Ema momang kéta AnakN agu Hia poli toto ngger oné Hia sanggéd ca o ca ata poli pandé le Run Hia; Hia kolé ce pisa nanang te toto ngger oné Hia apa ata céwé mésén kolé oné mai sanggéd apa ata poli pandé Diha lawang ho’o, wiga méu ce pisa ga lenget kéta taung. Ai cama ného hia Ema pandé to’o kolé ata mata agu pandé mosé kolé isé, ne nggitu kolé de Anak pandé mosé kolé céing-céing kaut ata ngoéngd Liha. Hia Ema toé manga pandé beté bicar latang te ata; maik poli téingd Liha sanggéd urusan beté bicar hitu ngger oné Anak, kong sanggéd taung ata io Anak cama ného isé io Ema. Céing kaut ata ata toé io Anak, ata hitu toé io Ema ata poli jera Hia te mai.
Te tu’ung kéta taé Daku ngger oné méu: Céing kaut ata séngét curup Daku agu imbi ngger oné Hia ata jera Aku te mai, ata hitu ngancéng haéng mosé léwé lén agu toé hena le wahéng hia, ai hia poli lécé oné mai mata ngger oné mosé. Te tu’ung kéta taé Daku ngger oné méu: Manga kaut cain waktun ce pisa agu waktu hitu poli cain ga; cang du hitu sanggéd ata mata séngét reweng de Anak de Mori Kraéng; ata siot séngét Hia, ata hitu mose’y tayi. Ai cama ného Hia Ema manga MoséD oné weki Run, ne nggitu kolé Hia téing latang te Anak kudut ngancéng manga mosé oné weki Run Hia. Hia poli téing rang kuasaN latang te Hia (Anak) kudut te pandé beté bicar, ai Hia dé Anak Mensia. Néka lenget méu émé dengé sanggéd apa situ, ai manga kaut cain turung cemoln ce pisa pas du sanggéd ata siot ka’éng oné boa dengé reweng Diha; sanggéd isé siot poli pandé gauk di’a lawang moséd isé situ tay ngo be pé’ang agu to’o kolé te ka’éng oné mosé tédéng lén; landing isét sio poli pandé gauk da’at mosé kolés tayi kudut te wahéng isé. Aku ho’o toé ngancéng pandé apa-apa oné mai weki de Rug; Aku pandé beté bicar lorong apa ata poli dengé Daku; pandé beté bicar Daku dé adiln, ai Aku toé lorong ngoéng de weki Rug Aku, maik lorong ngoéng Diha ata poli jera Aku te may cé’é ho’o.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)