KREBA DI'A LESO HO'O 20-03-12

HO’O DḖ INJIL DE MORI YḖSUS ATA TUNTI LIHA YOHANES 5:1-16
PAKA NARING GA LITḖ MORI KRAẺNG (20-03-12)


Poli hitu ga manga ca leso ramé mésé data Yahudi; Mori Yésus téti te ngo ngger sina Yérusalém. Sina Yérusalém hitu, ruis dungka Léwang de Domba manga ca tiwu; Bétésda’y caron oné curup Ibrani. Manga lima’d natas mésén; oné natas-natas situ dé baté halas’d sanggéd ata manga betid: ata buta, ata lako senggot agu ata péko. [Isé so’o cébo kéta géréng bumbuluak’n waé oné tiwu hitu. Ai manga kaut cain waktun malékat de Mori Kraéng wa’u ngger oné tiwu hitu agu pandé hémbur waé hitu; céing-céing kaut ata dai bolon kéta teku ngger wa tiwu hitu du rémé bumbuluak’n waé hitu, ata hitu ngancéng ina betin, konem po apa kaut betin hia.] Sina hitu manga cengata ata telumpulualo ntaung lor’n betin ga. Cang du Mori Yésus ita ata hitu rémé kéta halasn sina hitu agu ai baé kolé Liha ata hitu naisn ne nggitu taran mosén ga, mai taé Diha ga ngger oné hia, “Ngoéng te ina betim hau ko?” Mai walé data beti hitu ga ngger oné Hia, “Mori é, toé kéta manga cengatan ata campé aku te wa’u ngger wa tiwu hitu pas kéta du rémé bumbuluak kin waé na; rémé di’a gaku hésot ngger wa tiwu hitu, landing olo ata bana molém taung itu po aku.” Mai taé de Mori Yésus ga ngger one hia, “To’o hau ga, téti locém hitu agu laku hau ga.” Cang du hitu ga rodo ina kaut beti data hitu; poli hitu téti locén hia agu lakoy gi.
Landing leso hitu dé pas kéta leso Sabat. Wiga ata tu’a laing’d data Yahudi situ taé ne nggo’o oné ata hitut poli inan retuk ga, “Leso ho’o dé leso Sabat; wiga hau toé dis te pola locém hau.” Landing mai walé data hitu ga ngger oné isé, “Ata hiot poli pandé ina aku, ata hitu dé ata taé ngger oné aku: Téti ga locém agu lako hau ga.” Mai réi disé ga ngger oné hia, “Céi léng ata hitut jera hau: Téti ga locem agu lako hau ga?” Landing ata hitut poli ina betin retuk ga toé baé céi ata hitu bao, ai Mori Yésus poli lako pesotn ga oné be réha ata do situ. Poli hitu Mori Yésus cumang kolé hia oné Mbaru de Mori Kraéng; mai taéN ga oné ata hitu, “Nuk dé yé, poli inan beti de hau ga; néka pandé ndékok kolé, rantang boto cai’y ata céwé da’atn kolé oné mosé de hau ce pisa.” Ngo be pé’ang ata hitu; tombo liha oné ata tu’a laing data Yahudi ngong Mori Yésus dé ata poli pandé ina hia. Wiga sanggéd ata tu’a laing data Yahudi situ ga nanang kéta te deko agu ndaék Mori Yésus, ai Hia pandé sangged apa situ pas kéta du leso Sabat.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)