KREBA DI'A LESO HO'O 13-03-12

HO’O DḖ INJIL DE MORI YḖSUS ATA TUNTI LIHA MATIUS 18:21-35
PAKA NARING GA LITḖ MORI KRAẺNG (13-03-12)


Poli hitu ga mai’y Pétrus agu mai taén ngger oné Mori Yésus, “Mori é, sanggé pisa ngkalin kéta dé aku paka ampong asé-ka’é daku émé hia pandé ndékok ngger cé’é aku? Sanggé pitu ngkali ko Ité?” Mai taé de Mori Yésus ga ngger oné hia, “Toé yé! Aku taé agu hau: Toé hanang sanggé pitu ngkalin kaut, maik sanggé pitumpulu ngkali pitu ngkali.
Ai Perénta de Surga dé cama ného rapang cengata raja; hia ngoéng te pandé uji sanggéd mendi diha. Du wangka pu’ungn pandé uji hitu ga dadés lata ngger olo mai ranga diha cengata ata manga raungn campulusebu talénta. Maik hia toé kéta ngancéng lékod raung situ; wiga wili ga Raja hitu téing perénta (jera) ata kong pikan kaut hia agu sanggéd taung mantarn agu winan agu sanggéd cecan te léko raung diha situ. Tikul paka di’ay dé ata mendi hitu, io agu suju raja hitu, agu mai taén ga: Géréng koé ce koén lité ta sengaji, lékos laku ce pisa sanggéd raung daku situ. Wéong kéta nain raja hitu le momang, wiga legoy liha ata hitu agu koso kéta taungs liha sanggéd raungn diha.
Maik cang du ata mendi hitu ngo ngger pé’ang, hia cumang tau agu cengata ata mendi haén; hia ho’o manga raung seratus dinar koés ngger oné hia. Deko liha ata hitu agu hajel liha ata hitu, agu mai taén ga: paka lékos raung de hau é! Tikul paka di’ay ata haé mendin hitu agu tegi liha ngger oné hia: Géréng koé cekoén lité ta ité, lékos laku ce pisa sanggéd raung daku situ. Maik toé tiba liha; mai hia ga sorok haén hitu ngger oné bui sanggé kéta hia ngancéng léko raungn hitu.
Ita hitu ga sanggéd haé reba iwod situ ga wéong kéta naid; mai isé baro sanggéd taung kejadian situ ngger oné mori sengaji disé. Poli hitu ga raja hitu jera ata te siro ata mendi hitu agu mai taén ga ngger oné hia: Oé hau mendi ata da’at, poli koso kéta taung’d laku sanggéd raung de hau ai hau tegi le io ngger oné aku. Co’o tara toé momang’n le hau haé de hau hitu cama ného aku poli momang hau?” Rabo mésé kétay mori sengaji hitu; sorok liha ata hitu agu téing ngger oné ata algoju, sanggé kéta hia ngancéng léko taung sanggéd raung’n.
Ai ne nggitu koléy dé apa ata pende de Ema Daku éta surga latang te méu, émé néténg-néténg méu ho’o toé ampong haé de méu mai wa mai nain kéta.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS
@Copyright terjemahan: Fransiskus Borgias M. (Anggota Pakar LBI)