KREBA DI'A LESO HO'O 10-03-12

HO’O DḖ INJIL DE MORI YḖSUS ATA TUNTI LIHA LUKAS 15:1-3.11-32
PAKA NARING GA LITḖ MORI KRAẺNG (10-03-12)


Sanggéd ata nongko blasténg agu sanggéd ata ndékok, mai ngger cé’é Mori Yesus kudut te séngét Hia. Wiga rengus muing ranga data Farisi agu ata mebeko getok Taurat, agu mai taéd ga, “Ata ho’o tiba ata ndékok agu hang cama-cama agu isé.” Mai Hia ga tombo rapang ho’o latang te isé. [Mai taéd Mori Yésus ga, “Manga cengata ata manga sua taus anak ata ronan. Mai taé de anak cucun ga ngger oné eman: Ema é, téing koé oné aku lite sanggéd maki daku oné mai sangged ceca dité, ata jiri hak dakud. Mai eman hitu ga patis liha sanggéd ceca agu paéng disé latang te isé. Pisa leso poli hitu ga, anak cucu hitu pika kéta taungs liha sanggéd ceca maki dihad agu ngo mbéot hia ga ngger pé’ang tana bana ata tadang kétay. Pé’ang tana bana hitu hia pandé kéba-kaék kaut sangged cecan hitu le mosé ného ata bora mésé. Cang du cipot kéta taungs cecan hitu ga, rodo cain kaut cekeng darem mésé oné tana bana hitu, wiga mosé diha ga pu’ung kasi-asi agu melarat kéta. Poli hitu hia ngo te kawé kerja oné cengata ata oné tana bana hitu. Ata hitu jera hia te ngo pé’ang oka, ngo te lami ela-ela diha. Hia ga (anak cucu hitu) belek kéta te hang pakang de ela situ, landing toé kéta manga cengatan ata ata téing pakang situ latang te hia. Cang du hitu ga rodo noing kaut liha mosé kasi-asi diha, agu ne nggo’o taén: Olé, do ketas ata pala de ema daku; isé ga do kéta hangd; aku cé’é ho’o ga mata le darem mésé. Ta co’om hesé aku ho’o ga agu kolé ngger oné ema daku agu ne nggo’o taé daku ngger oné hia ce pisa: Ema é, aku poli pandé ndékok ngger oné surga agu ngger oné Ema, toé patun kolé aku ho’o te caro anak dité Ema kolé; tiba koé aku lité kong jiri ata pala dité cé’é ho’o é Ema. Hesé paka di’a hia ga agu kolé ngger oné eman hitu. Cang du mai tadang mai kin hia, ita le eman hitu ga hia; wéong kéta nain ata tu’a ema hitu le momang mésé. Mburuk data tu’a ema hitu ngo curu anak hitu; nggao agu omo liha. Mai taé de anak hitu ga ngger oné hia: Ema é, aku poli pandé ndékok ngger oné surga agu ngger oné Ema, toé patun kolé aku ho’o te caro anak dité Ema kolé. Landing mai taé de ema hitu ngger oné sanggéd mendin: Gélang koé ba cé’é ho’o can baju léwé ata céwé di’an kéta, pandé wéngko koé weki diha, agu téing kila oné rempa limén agu sepatu wa wa’in. Emi ga le méu can anak lembu ata dai becén, mbelé koé le méu; mai tité ga mai naka le nisang nai. Ai anak daku ho’o poli matan mose kolé gi, poli moran landing ita kolé gi. Wangka pu’ung disé ramé naka nisang nai hitu.
Landing anakn ata ngason ga rémé pé’ang uman cang du hitu; cang du kolé wé’én hia agu ruis dungka mbaru gi, dengé liha runi de perkakas musik agu déré agu congka saé agu sanda. Bénta liha cengata ata mendi agu réi liha oné mendi hitu ngong apa betuad sanggéd ramé situ. Mai walé de mendi hitu ga: Ai koléy asé de hau ga; ema de hau poli mbelé anak lembu ata dai becén, ai hia ngancéng ita kolé anakn hitu agu ngai cébo kin mosén. Rabo mésé dé anak ngaso hitu agu hia toé ngoéng te ngo ngger oné mbaru. Mai eman ga ngo be pé’ang te awar-awar hia. Landing mai wale diha ga ngger oné eman: Ole Ema ba’ang kéta bail é, lélo lité ga, pisa ntaung aku ho’o duat latang te ité Ema, agu aku kolé toé di manga dé’it koléng perénta dité Ema, landing hau Ema toé di manga dé’it téing aku can anak mbé kaut kong aku ngancéng pande naka nisang nai agu sanggéd haé reba daku. Landing cang du cain kaut anak de hau ga, anak ata poli pandé kéba-kaékd sanggéd ceca de hau sama-sama agu inéwai sundal, mai hau ga mbelé can anak lembu ata dai becén kéta latang te hia. Mai taé de eman ga ngger oné hia: Anak é, hau ho’o de mosé cama-cama agu aku molém taung lawang ho’o, agu sangged ca o ca paéng daku, de hau kolé morid. Ité ho’o patun agu naun kéta te naka agu nisang nai, ai asé de hau poli matan ga landing mosé kolé gi, poli moran ga, landing ita kolé gi.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS
@Copyright terjemahan: Fransiskus Borgias M. (Anggota Pakar LBI)