KREBA DI'A LESO HO'O 11-03-12

HO’O DḖ INJIL DE MORI YḖSUS ATA TUNTI LIHA YOHANES 2:13-25
PAKA NARING GA LITḖ MORI KRAẺNG (11-03-12)


Cang du cain leso ramé Paska data Yahudi ga, Mori Yésus ngo ngger sina Yérusalem. Oné natas mésé Mbaru de Mori Kraéng sina hitu, itas Liha do kéta ata ata pika lembu, jimbal agu tekur jawa, agu sanggéd ata pandé paluk séng ata ngai lonto (jongok) kid nitu. Hia pandé can wasé lempa, poli hitu ga sondas Liha sanggéd ata situ oné mai Mbaru de Mori Kraéng ne nggitu kole sanggéd jimbal agu lembu disé; pandé wéra-waras (wécak-wacaks) Liha sanggéd séng data paluk séng situ ngger wa tana; méja-méjad ga pande wali-gélaks Liha. Mai taé Diha ga ngger oné ata pika tekur jawa situ, “Ba kéta taungs sanggéd apa so’o cé’é mai ho’o; méu néka pandé mbaru de Ema Daku jiri osang te pika-pika barang laing.” (Ného pande ného pasar le méu mbaru de Ema Daku). Cang du hitu rodo nuk kaut kolé le sanggéd ata nungku Diha ai manga poli tulis ne nggo’o danong oné buku nggeluk: “Momang latang te mbaru Dité pande wéong kéta nai Daku.” Sanggéd ata tu’a laingd oné mai ata Yahudi situ ra’up Mori Yésus, agu mai taéd ga, “Apa kéta léng tandan ata ngancéng téing le Hau latang te ami bahwa Hau manga hakM te pandé ne nggo’o?” Mai walé de Mori Yésus ga ngger oné isé, “Pandé renco le méu Mbaru Nggeluk ho’o; lawang telu leso poli hitu ga ngancéng laku pandé hesén kolé.” Mai taé data Yahudi situ ga ngger oné Hia, “Ole patmpuluenem ntaung dé danong pandé hesén lata Mbaru Nggeluk ho’o mai taé de Hau ga ngancéng pandé hesén kolé lawang telu leso kaut?” Maik Mbaru Nggeluk hitut caro de Mori Yésus dé ngong weki de Run. Wiga cang du poli to’on Hia wa mai boaN ga, nuk kolé le sanggéd taung ata nungkuN bahwa apa hitu poli tombon Liha olo ga, wiga ise imbi oné Buku Nggeluk agu imbi sanggéd apa ata poli taé de Mori Yésus. Lawang kaut ka’éngN Hia sina Yérusalem du Leso ramé Paska hitu, do ata imbi ngger oné ngasang Diha, ai isé poli ita sanggéd tanda lenget ata pandé Diha. Landing Mori Yésus toé imbi agu condo ne nggitu kaut moséN ngger oné isé, ai baé taungs Liha sanggéd ata mensia, ai toé perlu cengatan ata kudut pandé saksi ngger oné Hia ngong mensia, ai pecing taungs Liha apa kaut ata manga oné nai de mensia.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS
@Copyright terjemahan: Fransiskus Borgias M. (Anggota Pakar LBI)