KREBA DI'A LESO HO'O 30 MEI 2012

HO’O DḖ INJIL DE MORI YḖSUS ATA TUNTI LIHA MARKUS 10:32-45
PAKA NARING GA LITḖ MORI KRAẺNG (30-05-12)


32 Mori Yésus agu sanggéd ata nungkuN rémé oné beréha salang’d te ngo ngger sina Yérusalem; Mori Yésus ga lako be bolon kéta. Ata nungku situ simpung kéta naid agu sanggéd taung ata siot lut Hia musi main ga rantang kéta taungs. Cengkalin kolé Mori Yésus bénta campulusua taus ata nungkuN agu Hia wangka pu’ung taé ngger oné isé ngong apa ata te jiri laing oné mosé Diha cepisa,
33 “Te ho’on ga ité téti te ngo ngger sina Yérusalem agu Anak Mensia cepisa ga nanang te deko agu téing ngger oné imam-imam ata tu’a laing agu ata mbeko getok Taurat, agu isé cepisa manga nanang te pandé wahéng Hia le wahéng mata. Isé cepisa nanang te téing Hia ngger oné ata bangsa wa’u cebana,
34 agu Hia cepisa pandé loér lisé, pandé ipo, ongga le wasé lempa agu mbelé lisé, maik telu leso poli hitu ga Hia mosé kolé’y gi.”
35 Poli hitu ga hia Yakobus agu hia Yohanés, anak-anak diha Zébédéus, ngo ruis-ruis lupi Hia Mori Yésus agu mai taéd ga ngger oné Hia, “Mori Tuang Guru, bengkes dami ho’o ga porong Ité pandé lorong apa ata kudut te tegi dami oné mai Ité!”
36 Mai walé Diha ga ngger oné isé, “Ai apa léng ata ngoéng de méu kudut te pandé Laku latang te méu cepisa tah?”
37 Poli hitu mai taé disé, “Porong sendo koé Lité ami ho’o lonto oné néra-bé’ang Dité tayi, cengata ga lonto du racap wanang Dité agu cengatan kolé ga lonto du racap léo Dité.”
38 Maik mai walé de Mori Yésus ga ngger oné isé, “Toé baé le méu apa ata tegi de méu hitu. Ai ngancéng léng le méu ko te inung cawan ata hiot paka inungn Laku ko pandé cebong cama ného cebong hiot paka tiban Laku tayi?”
39 Mai walé disé ga, “Iyo Mori ngancéng lami.” Mai taé de Mori Yésus ga ngger oné isé, “Bo tu’ung kali ta, méu cepisa inung cawan ata paka inungn Laku agu pandé cebong cama ného cebong ata paka tiban Laku. Maik te lonto du racap wanang ko racap léo Daku, toé manga hak Gaku te téing keputusan hitu. Apa hitu tayi manga kaut téingn ngger oné ata-ata siot poli piléd ga kudut te lonto oné osang hitu.”
40 Landing te lonto du racap wanang Daku ko du racap léo Daku, toé dé manga hak Gaku te téing keputusan hitu. Hitu cepisa manga kaut téingn ngger oné ata siot poli dé’i laingn te tiba apa hitu cepisa.”
41 Cang du dengén le ata campulu taus oné mai ata nungku situ ga isé rabo kéta ngger oné hia Yakobus agu Yohanés.
42 Poli hitu Mori Yésus bénta isé agu mai taén ga, “Baé le méu ngong isé siot poli tibad lata te jiri ata pemerénta laing latang te wa’u de sanggéd bangsa-bangsa, isé situ dé pande pina-naéng sara nai rud kaut latang te ro’éng disé.
43 Landing toé ne nggituy dé oné beréha méu ho’o. Céing-céing kaut ata ngoéng te jiri ata mésé oné mai beréha méu ho’o, ata hitu dé porong ngoéngn te jiri ata jera laingy de méu,
44 agu céing-céing kaut ata ngoéng te jiri ata pertaman kéta oné mai beréha méu ho’o, ata hitu dé porong ngoéng’n te jiri ata mendi laing latang te sangged ata iwod situ.
45 Ai Anak Mensia dé mai toé kudut te tiba pelayanan, maik mai te téing pelayanan agu mai kudut te téing nawan Hia kudut te jiri léko laing latang te ata do.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)