KREBA DI'A LESO HO'O 28 MEI 2012

HO’O DḖ INJIL DE MORI YḖSUS ATA TUNTI LIHA MARKUS 10:17-27
PAKA NARING GA LITḖ MORI KRAẺNG (28-05-12)


17 Cang du Mori Yésus téti kolé te lako nggaruk kaut oné lako labok Diha, rodo mai kaut cengata ata ata mburuk mai te cumang Hia; ata hitu tikul paka di’a olo mai ranga Diha, agu mai taén ga, “Tuang Guru ata di’a kéta, apa kéta ata paka pandén laku kong aku ngancéng haéng mosé tédéng lén?”
18 Mai walé de Mori Yésus ga, “Ai co’o léng tara caro di’ag dé Aku le hau ta? Toé kéta manga cengatan ata di’a oné lino ho’o be pé’ang mai Mori Kraéng kanang.
19 Pasti poli baéd le hau sanggéd perénta-perénta so’o ta: néka paki, néka ngoéng ata, néka tako, néka téing kesaksian adong, néka tombo nggopét, hiang ga endém agu emam!”
20 Poli hitu mai taé data hitu ga ngger oné Hia, “Tuang Guru, sanggéd taung apa situ ga poli taungs laku lorongd lawang rémé mose uwa ho’og aku.”
21 Landing Mori Yésus lélo hia agu momang Liha hia hitu, poli hitu ga mai taén ga ngger oné hia, “Hanang cay kali ata toé kin di pandé le hau é: Ngo hau ga, pikas le hau apa kaut ata manga oné hau poli hitu ga téings le hau sanggéd apa situ latang te ata lénggé, wiga hau cepisa ga ngancéng tiba ceca éta surga, poli hitu ga mai cé’é ho’o kolé hau agu lut Aku hau!”
22 Cang du dengén liha sanggéd curup situ ga, wéong kéta rangan hia, poli hitu agu ngon hia ga du rémé susa kin nain, ai do kétas dé ceca diha.
23 Mori Yésus lélo sanggéd taung ata nungku Diha dungka lupi Hia agu mai taén ga ngger oné isé, “Toé kéta émongn dé ata siot do kétas cecad te ocok ngger oné osang baté perénta de Mori Kraéng.”
24 Sanggéd taung ata nungku Diha ga lenget kéta taungs du dengén lisé sanggéd pa’u reweng situ oné mai mu’u Diha. Maik mai taé de Mori Yésus kolé ga, “Anak-anak Daku, toé kéta émongn dé te ocok ngger oné osang baté perénta de Mori Kraéng.
25 Céwé émong émé ca unta lako tembus oné nua ca jarung itu po ata bora te ocok ngger oné osang baté Perénta de Mori Kraéng.
26 Tambang-tambang kéta lenget isé agu mai taéd ga agu cama taud, “Ẻmé ne nggitu ga, céi kéta cepisa ata ngancéng te pandé selamakd?
27 Mori Yésus lélo isé agu mai taén ga, “Latang te manusia apa hitu dé toé kéta nganceng te jiri laingn, maik toé ne nggituy dé latang te Mori Kraéng. Ai sanggéd ca o ca hitu nganceng jiri laingd, latang te Mori Kraéng.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)