KREBA DI'A LESO HO'O 09 MEI 2012

HO’O DḖ INJIL DE MORI YḖSUS ATA TUNTI LIHA YOHANES 15:1-8
PAKA NARING GA LITḖ MORI KRAẺNG (06-05-12)


“Aku ho’o dé pu’u anggor ata setu’un (molorn) agu Ema Daku dé ata ngaran. Néténg-néténg panga oné Aku ata toé manga wuan, ketek Liha agu sanggéd dangka ata siot toé manga wuad, pandé rociks Liha, kong pu’u anggor hitu ngancéng wua do kétay. Méu ho’o ga poli nggéloks ai le reweng ata poli taéd Laku ngger oné méu. Ka’éng ga méu oné Aku agu Aku ga oné méu. Cama ného panga haju toé ngancéng manga wuan oné mai wéki run kaut, émé panga hitu toé tum-ra’um neki ca kin agu pu’u anggor, ne nggitu kolé dé méu toé ngancéng manga wuas, émé méu toé ka’éng oné Aku. Aku ho’o dé pu’u anggor agu méu ga panga-panga de pu’u hitu. Céing-céing kaut ata ka’éng oné Aku, hia ngancéng manga do wuan, ai be pé’ang mai Aku méu toé ngancéng pandé apa-apas. Céing-céing kaut ata toé ka’éng oné Aku, hia hitu peké oké be pé’ang cama ného panga/dangka agu jiri dangoy cepisa, poli hitu pandé nongkos lata agu pandé cempong ngger oné api kudut te pandé muntung kéta taungs. Ẻmé méu ka’éng oné Aku agu reweng Daku manga oné méu, tegi apa-apa kaut ata ngoéng de méu, méu ce pisa manga kaut tibad sanggéd tegi situ. Oné paté ho’oy dé Hia Ema Daku pandé nggeluky, yaitu émé méu manga do wuas; hitu dé tandan sanggen taung méu hitu dé ata nungku Daku.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)