KREBA DI'A LESO HO'O 11-04-12

HO’O DḖ INJIL DE MORI YḖSUS ATA TUNTI LIHA LUKAS 24:13-35
PAKA NARING GA LITḖ MORI KRAẺNG (11-04-12)


Du leso hitu kin ga sua taus ata nungku Diha Mori Yésus ngo ngger sina ca béo, béo Ẻmaus ngasangn; am sebelas kiloy tadangn mai sina mai Yérusalém; isé lako agu cébo tombo-tombo cama taud ngong sanggéd apa ata poli jirid lawang ho’o. Cang du ngai tombo-tombo kid isé agu cébo céngka nuk de cama taud, rodo mai kaut hia Mori Yésus weki Run mai ruis isé, agu lako cama-cama agu isé situ. Maik manga apa-apan ata pandé tadu mata disé, wiga isé toé ngancéng baé Hia. Mai taé de Mori Yésus ga ngger oné isé, “Olé rémé tombo apas dé méu ho’o ta du rémé lako ho’o?” Poli hitu asis di isé agu rangad ga ranga susa kéta. Cengata oné mai isé situ, hia Kléopas ngasangn, wale réi Diha hitu, “Olé, asa léng ta, cala Ité hitu dé ata mai pé’ang mai Yérusalém, ata toé baé apa ata poli jiri lawang pisa leso ho’o sina hitu ta?” Mai taé Diha ga ngger oné isé, “Ai apa léng hitu ta?” Mai walé disé ga, “Ngong apa ata poli jiri lut mosé diha Mori Yésus sina mai Nazarét pé. Hia hitu dé cengata nabi, ata mberes rang kuasan oné tombon agu oné pandén olo mai ranga de Mori Kraéng agu olo mai ranga de sanggéd bangsa dami ho’o. Mai sanggéd imam ata tu’a laingd ga agu sangged ata tu’a laingd oné mai bangsa dami hitu poli deko agu téing Hia kudut te pandé wahéng mata agu poli pangkot lisé Hia oné panggol. Ami olo mésé kéta bengkes dami porong Hia hitu cepisa ata pandé légo bangsa Israel ho’o. Poli telu leso wan ga mai oné mai kejadian hitu. Maik pisa taus inéwai oné mai haé impung dami poli pandé géga ami: Gula ucap du sapu rebem kin isé ngo sina boa, maik toé ita rapu Diha sina hitu. Poli hitu kolé isé ga agu ba kréba ngon isé ita malékat-malékat ata taé ne nggo’o ngger oné isé, Hia hitu mosé gi. Pisa taus oné mai haé impung dami poli ngo sina boa hitu agu ita lisé cama kéta ného apa ata poli taé de inéwai situ bao, maik toé manga itan lisé Hia.” Poli hitu mai taé Diha ga ngger oné isé, “Olé méu ho’ot ata toé do baé tah, toé kéta manga ngancéng gélangn nai de méu kudut te imbi sanggéd ca o ca, apa ata poli taé de sanggéd nabi! Ai bom toé olo cukung susay di hia Mésias itu po ngancéng ngo ngger oné néra-bé’ang Diha?” Poli hitu hia tombo pandé gérak kéta taungs latang te isé apa ata poli tulisn ngong Hia oné sanggéd Buku Nggeluk, pu’ung kaut oné mai Buku-buku diha Mosés wiga agu sanggéd buku-buku de nabi-nabi.
Isé cai ruis dungka béo baté ngo disé; kudut te lako terus kaut Hia cang du hitu. Maik isé tegi paka di’a kéta ngger one Hia agu ne nggo’o taéd, “Yo ité, com toko cé’é ho’o di wié ho’o cama-cama agu ami, ai tiong te wié tana ho’o ga, tiong te kolep leso salé ga.” Cemoln ga Hia ocok mbaru disé cama-cama agu isé agu ka’éng cama-cama agu isé wié hitu. Cang du lonto te hang cama-camad isé wié hitu ga, Hia emi roti, torok tombo delék, poli hitu pu’il Liha roti hitu agu téing Liha roti hitu ngger oné isé. Pas kéta cang du hitu ga rodo cino (jinok) kaut mata disé agu baé lisé Hia ga, maik Hia rodo mora ne nggitu kauty oné mai beréha isén ga. Mai taé disé agu cama taud ga, “Olé, ai bom toé bet mésé kétan nai dité bao, cang du Hia tombo-tombo agu ité oné beréha salang bao agu du Hia rémé tombo pandé gérak kéta taung icin Buku Nggeluk latang te ité?”

Poli hitu ga gélang-gélang tétid isé agu kolé kolé ngger sina Yérusalém. Sina hitu isé cumang ata campuluca taus ata nungku agu sanggéd ata iwod ata cama-cama agu isé, rémé ngai nempung kid sina hitu. Mai taé disé ga, “Olé tetu’ung kéta hia Mori poli mosé kolén ga agu Hia poli toto weki Run ngger oné hia Simon.” Poli hitu isét sua hitu ga tombo kéta taungs apa ata poli jirin oné beréha salang agu co’oy cara baén lisé Hia pas cang du rémé pu’il-pu’il te pati rotin Hia.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)