KREBA DI'A LESO HO'O 19-03-12

HO’O DḖ INJIL DE MORI YḖSUS ATA TUNTI LIHA LUKAS 2:41-51a
PAKA NARING GA LITḖ MORI KRAẺNG (19-03-12)


Néténg-néténg ntaung ata tu’a de Mori Yésus ngo ngger sina Yérusalém du cekeng ramé mésé Paska. Cang du Mori Yésus pas campulusua ntaung umur’n ga isé ngo ngger sina Yérusalém cama ného ata laséngn pandé disé du leso ramé mésé hitu. Du cemoln leso ramé mésé hitu ga, cang du londang’d isé te kolé béo, Mori Yésus ngai ka’éng kin sina Yérusalém landing toé baé lata tu’aN. Nuk disé ga Hia Mori Yésus manga oné be réha ata do situ ata cama-cama lako londang kolé cama-cama agu isé, wiga isé lako lawang ca leso ménan; poli hitu isé kawé Hia oné be réha wa’u agu sanggéd ata baé disé. Maik isé toé ita ko cumang Hia. Itu tara gélang-gélang koléd isé ngger sina Yérusalém te kawé Hia sina hitu. Telu leso wa ga camoln isé cumang Hia oné Mbaru de Mori Kraéng; Hia rémé lontoN oné be réha sanggéd guru-guru agama, rémé séngét tombo disé agu do kéta réiN Hia ngger oné isé. Sanggéd taung ata séngét Hia lenget kéta taungs ai pintar kéta Hia; sanggéd walé Diha kolé ata minakd kéta taung. Cang du ita Hia’n ata tu’a Diha ga, lenget kolés isé; poli hitu mai taé de endén ga, “Nana é, co’o kéta tara ne nggo’on pandéM Hau latang te ami? Lélo dé, ema de Hau agu aku bonga kéta nai’g ami kawé Hau.” Mai walé Diha ga ngger oné isé, “Co’o tara kawé Akus méu? Toé baé le méu ko ngong Aku ho’o dé paka ka’éng oné mbaru de Ema Daku?” Landing isé toé idep apa ata taé Diha ngger oné isé. Poli hitu Hia kolé cama-cama agu isé ngger sina Nazarét; sina hitu Hia ka’éng terus agu isé; isé lami agu tinu Hia. (Endé Diha na’a kéta taungs sanggéd apa situ oné nain. Ẻta-éta kéta tu’an Mori Yésus ga agu tambang-tambang kéta hikmat Diha; tambang-tambang kéta momang Hia’an Mori Kraéng agu mensia.).


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)