KREBA DI'A LESO HO'O 03-03-12

HO’O DḖ INJIL DE MORI YḖSUS ATA TUNTI LIHA MATIUS 5:43-48
NARING GA LITḖ YḖSUS KRISTUS (03-03-12)


Poli dengén le méu reweng ne nggo’o: Méu paka momang cama taus mensia agu néka momang sanggéd ata bali de méu. Landing taé Daku ga latang te méu: Momang ga ata bali de méu agu ngaji ga latang te isét pandé ndaék méu. Ai le hitu dé méu ngancéng jiri anak-anak de Ema de méu éta surga, ata pandé parn mataleso latang te ata da’at agu ata di’a, agu ata pandé worangn (concangn) waé usang latang te ata molor agu ata toé molor. Ẻmé méu hanang momang ata siot momang méu kanang, apa wili gauk di’a de méu ga? Ai ne nggitu kolép dé pande agu gauk data siot nongko blasténg ta. Ẻmé méu hanang téing tabé latang te haé wa’u de rus kaut, apa koé lebin pandé de méu hitu oné mai ata iwod situ ga? Ai ne nggitu kolé dé pandé de sanggéd ata mensia siot toé baé ko io Mori Kraéng. Itu tara ne nggo’on wili ga, méu paka mosé di’a kéta (sempurna), cama ného Ema de méu éta surga kolé di’a kétay (sempurna).”


HO’O DẺ REWENG DE MORIN:
NARING GA LITḖ YḖSUS KRISTUS
@Copyright terjemahan: Fransiskus Borgias M. (Anggota Pakar LBI)