KREBA DI'A LESO HO'O 17 FEBRUARI 2010

PENERJEMAH: FRANSISKUS BORGIAS M
PENELITI CCRS (Center for Cultural and Religious Studies) FF-UNPAR BANDUNG

MAT.6:1-6.16-18

“Nuk di’a-di’a de, mau hoo neka pande sangged taung adak de agama be bolo ranga data do kudut te ita lise sangged apa ata pande de meu, ai eme ne nggitu de pande de meu, meu ho’o ce pisa toe nganceng tiba waheng di’a one mai Ema de meu eta surga. Itu tara ne nggo’on wili ga, eme hau nanang te teing sedekah, neka tombo siwisok le lau keta le hau pande di’a hitu, neho keta pande data munafik one mbaru-mbaru ngaji agu one salang-salang mese, kudut te naring lata do. Te tu’ung keta tae Daku ho’o latang te meu: Ise situ de poli tiba waheng di’ad ga. Landing eme meu nanang te teing sedekah, apa kaut ata pande le lime wanang de meu paka neka bae le lime leo de meu. Ata di’an de ga teing le meu sedekah hitu one pate ciko, wiga Ema de meu eta surga nganceng ita gauk di’a hitu one pate ceha agu Mori Ema hitu de ce pisa ata teing lekon pande di’a hitu latangt meu.”
“Eme mau nanang te ngaji, meu neka ngaji neho keta ata munafik soo. Ise situ de ngoeng keta te ngaji mbongang mese agu ngaji reme hesed one mbaru-mbaru ngaji ko one jeko-jeko salang mese, ai kudut te ita agu naring lata do. Te tu’ung keta de tae Daku latangt meu hoo: Ise situ poli tibad waheng di’ad ga. Landing eme meu nanang te ngaji, meu paka ngo one lo’ang de meu, tadu paran lo’ang hitu, poli hitu ga ngaji meu nitu sina ngaji nggere one ranga de Ema ata ka’eng one osang pate ceha. Eme ne nggitu pande de meu ga, Ema de meu hitu nganceng ata ita pande di’a one pate ceha, manga kaut lekon Liha ce pisa pande agu gauk di’a de meu hitu.”
“Eme meu nanang te pande puasa, paka neka pande rengus ko susa keta ranga de meu neho keta pande data munafik soo. Ai ise situ pande diod keta rangad eme reme puasa, kudut te ita lata bana ngong ise reme keta puasa mesed.Te tu’ung keta tae Daku latangt meu hoo: Sangged ise situ ga poli tiba wahengd latang sangged apa ata pande dise. Landing eme meu nanang te pande puasa, pande loma le meu sa’i de meu agu baki kole ranga de meu kudut nggelok agu mbilar keta itan lata, kudut toe bae lata bana bahwa meu hoo reme keta puasa mese. Kong hanang Ema de meu ata ka’eng one osang pate ceha ata itan apa pande di’a de meu. Ema hitu de ce pisa ata itan pande de meu hitu one pate ceha, Hia kole ata lekon pande agu gauk di’a de meu hitu ce pisa.”

BANDUNG, 17 FEBRUARI 2010
SIS B (CCRS FF UNPAR BANDUNG)