KREBA DI'A LESO HO'O 19 MEI 2012

HO’O DḖ INJIL DE MORI YḖSUS ATA TUNTI LIHA YOHANES 16:23b-28
PAKA NARING GA LITḖ MORI KRAẺNG (19-05-12)


23b Tetu’ung kéta Aku taé ngger oné méu: Sanggéd ca o ca ata tegid le méu ngger oné hia Ema, manga kaut Liha sendod cepisa ngger oné méu ali/le ngasang Daku.
24 Sanggé te ho’on ga méu toé di tegi apa-apa oné ngasang Daku. Tegi ga le méu, yo manga kaut tiban le méu cepisa, kong penongn dé nisang nai de méu.
25 Sanggéd taung apa so’o tombos Laku ngger oné méu paké tombo ného rapang. Manga kaut cain rapak leson cepisa Aku ho’o toé curup kolé ngger oné méu paké tombo ného rapang hitu, maik tombo terus terang kaut Laku tombo kréba ngong Hia Ema ngger oné méu.
26 Du leso hitu ga méu sembaéng iyo-tegi oné ngasang Daku. Toé ne nggo’o dé taé Daku ngger oné méu ngong Aku ho’o tegi latang te méu ngger oné Hia Ema,
27 ai Hia Ema weki Run dé ata poli momang méu, ai méu ga poli momang Aku agu imbi ngong Aku ho’o dé mai oné mai Mori Kraéng.
28 Aku mai oné mai Hia Ema agu Aku ho’o mai ngger oné lino ho’o; Aku ho’o kolé ngo oné mai lino ho’o agu téti ngo ngger éta Hia Ema.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)