KREBA DI'A LESO HO'O 13 MEI 2012

HO’O DḖ INJIL DE MORI YḖSUS ATA TUNTI LIHA YOHANES 15:9-11
PAKA NARING GA LITḖ MORI KRAẺNG (13-05-12)


“Cama ného Hia Ema poli momang Aku, ne nggitu kolé dé Aku ho’o poli momamng méu; ka’éng ga méu one momang Daku. Ẻmé méu mosé lorong sanggéd perénta Daku, méu cepisa ka’éng oné momang Daku, cama ného Aku poli lorong perénta Diha Ema Daku agu ka’éng oné momang Diha.
Sanggéd taung apa so’o poli taéd Laku ngger oné méu, kong nisang nai Daku manga agu méu agu nisang nai de méu ga jiri tambang-tambang penongn kéta gi.

“Ho’oy dé perénta ata ngoéng Daku, ngong sanggés méu mosé momang cama taus, cama ného Aku poli momang sanggés méu. Toé kéta manga ca momang ata céwé mésén oné mai momang ho’o, ngong cengata ata ata téing mosé nawan latang te haé reba ko haé molasn. Méu ho’o dé haé reba Daku émé méu pandé apa ata poli jerad Laku ngger oné méu. Aku ho’o toé caro méu hitu ata taki mendi laing, ai ata taki mendi toé baé apa ata nanang te pandé le mori sengajin hia, maik Aku caro méu haé reba, ai Aku poli taung toid ngger oné méu sanggéd ca o ca ata poli dengéd Laku oné mai Hia Ema Daku. Toé méu dé ata pili Aku, maik Aku ho’o dé ata pili méu. Aku poli pili méu, kong méu ngo agu manga danis méu agu dani hitu manga terus kauty, kong apa ata tegi de méu ngger oné Hia Ema oné/lut ngasang Daku, sendos Liha latang te méu.
Ho’oy dé perénta/ngoéng Daku, latang te méu: Momang ga méu latang te cama taus.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)