KREBA DI'A LESO HO'O 15-03-12

HO’O DḖ INJIL DE MORI YḖSUS ATA TUNTI LIHA LUKAS 11:14-23
PAKA NARING GA LITḖ MORI KRAẺNG (15-03-12)


Manga cengkalin Mori Yésus sonda jing da’at oné mai cengata ata; jing hitu ngancéng pandé dopel laing’y. Cang du pé’ang’n jing hitu ga, ata dopel hitu ngancéng curup kolé’y. Lenget kéta taungs ata do situ. Maik manga cengata oné mai isé situ ata ne nggo’o taén, “Aé Hia sonda jing le rang kuasa dé Béélzebul, tu’a laing de jing-jing situ.” Manga kolés ata ata tegi can tanda éta mai surga ngger oné Hia, kudut te damang Hia. Landing Mori Yésus baé apa ata nuk disé agu mai taéN ga, “Néténg-néténg Perénta (Kerajaan) si’ot bikés ga pasti renco’y tay, agu néténg-néténg kilo siot bikés ga pasti rusaks tayi. Ẻmé jing da’at hitu kolé toé ca naiy agu pulang tau kolé agu weki run ga, co’o kétay caran perénta (kerajaan) diha ngancéng hesén terusn? Ai taé de méu Aku ho’o dé sonda jing situ le rang kuasa de Béélzebul, wiga wili ga émé Aku sonda jing le rang kuasa de Béélzebul, le kuasa apa péng sanggéd ata nungku de méu sonda jing hitu? Wiga wili ga isé situ dé cepisa ata jiri hakim laing latang te méu. Maik émé Aku sonda jing le rang kuasa de Mori Kraéng, brarti setu’un ga perénta de Mori Kraéng hitu poli cain ga ngger cé’é méu. Ẻmé cengata ata ata mberes agu lekap kéta senapang te lami mbaru de run, wiga toé manga co’o-co’od cepisa sanggéd ceca diha, landing émé manga cengata ata céwé mberes oné mai hia agu ata hitu mai rampas hia agu pandé koda hia, wiga ata hitu cepisa emi kéta taungs sanggéd senapang data hitu ata andal kétas liha, agu patis liha cepisa sanggéd ceca ata poli emid lisé.
Céing kaut ata ata toé cama-cama agu Aku, hia hitu dé ata bali dungkang Aku, agu céing kaut ata siot toé nongko cama agu Aku, hia hitu dé pandé wéra-waras kaut dé gemergujuk koén.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS
@Copyright terjemahan: Fransiskus Borgias M. (Anggota Pakar LBI)