KREBA DI'A LESO HO'O 01-03-12

HO’O DḖ INJIL DE MORI YḖSUS ATA TUNTI LIHA MATIUS 7:7-12
NARING GA LITḖ YḖSUS KRISTUS (01-03-12)


“Tegi ga le méu, manga kaut sendon tegi de méu hitu ce pisa; kawé ga le méu, manga kaut dumpun apa hitut kawé de méu ce pisa; ketok ga le méu, manga kaut céngkan para latang te méu ce pisa. Ai céing-céing kaut ata siot seber te tegi, manga kaut sendod tay, céing-céing kaut ata siot seber te kawé, manga kaut dumpun ce pisa, céing-céing kaut ata siot ketok para mbaru, manga kaut céngkan para ce pisa latang te hia. Ai manga léng ata oné mai be réha méu ho’o ko, ata hiot téing watu latang te anakn, émé kanta rotiy anak koé hitu, ko téing ular, émé kanta ikangy anak koé hitu? Wiga wili ga, émé méu kaut ata da’at ho’o baé te téing apa ata di’ad kanang latang te anak-anak de méu, apan kolé Ema de méu éta surga! Hia pasti téing apa kaut ata di’ad latang te isé siot tegi ngger oné Hia.”
“Sanggéd apa kaut ata ngoéng de méu kudut te pandé lata latang te méu, olo pandé ga le méu ného hitu latang te isé. Ai hitu dé sanggén taung icin hukum Taurat agu sanggéd taung Kitab de nabi-nabi.”


HO’O DẺ REWENG DE MORIN:
NARING GA LITḖ YḖSUS KRISTUS
@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 29-02-12

HO’O DḖ INJIL DE MORI YḖSUS ATA TUNTI LIHA LUKAS 11:29-32
NARING GA LITḖ YḖSUS KRISTUS (29-02-12)


Cang du ata do situ mai impung lupi Hia, mai taé de Mori Yésus, “Sanggéd ata leso ho’o dé ata da’at kéta taungs. Isé nanang kéta te tegi can tanda, be pé’ang mai tanda Yunus. Ai ného danong hia Yunus hitu jiri tanda latang te ata Niniwé, ne nggitu kolé dé Anak Mensia jiri tanda laing’y ce pisa (agu te ho’on) latang te ata leso ho’o. Cang du leso pandé beté bicar tay, hia ratu hiot mai lau main to’o koléy wa mai boan tay cama-cama agu ata leso ho’o agu hia tay pandé beté bicar sanggéd isé. Ai hia ratu ho’o dé mai kéta lau mai bitingn tana lino mai latang te séngét hikmat diha Salomo, padahal ata setu’un ga hiat manga cé’é ho’o te ho’on ga céwé mésé oné mai hia Salomo! Cang du leso beté bicar tay, sanggéd ata Niniwé to’o kolés wa mai boad tay cama-cama agu ata leso ho’o agu isé (ata Niniwé) situ tay pandé beté bicar sanggéd isé. Ai ata Niniwé situ danong tesers du poli dengén lisé kréba diha Yunus, padahal ata setu’un wili ga hiat manga cé’é ho’o te ho’on ga céwé mésé oné mai hia Yunus!”


HO’O DẺ REWENG DE MORIN:
NARING GA LITḖ YḖSUS KRISTUS
@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 28-02-12

HO’O DḖ INJIL DE MORI YḖSUS ATA TUNTI LIHA MATIUS 6:7-15
NARING GA LITḖ YḖSUS KRISTUS (28-02-12)


Agu oné ngaji de méu hitu, méu néka ngaji léwé-léwé ného laséng data siot toé baé Mori Kraéng. Nuk disé ga émé léwén ngaji pasti sendos tegi disé. Wiga méu wili ga néka ného isé, ai Ema de méu poli baéd taung sanggéd apa kaut ata perlu de méu, be bolon tegin le méu ngger oné Hia. Wiga, ne nggo’o kaut ngaji de méu ga:
Yo Ema dami ata ka’éng oné surga
Nggeluk koé ngasang Dité Mori
Jari koé ngoéng Dité Mori
Oné lino agu ného oné surga.
Mosé dami leson-leson téing koé ami leso ho’on
Ampong koés ndékok dami, ného ami ami ampong ata pandé sala agu ami; agu néka dadé kami ngger oné damang, maik tadang koés sanggéd da’at. (Ai Ité Mori Ema pun kuasa agu Perénta agu néra bong dengkir tayn agu tédéng lén, Améng).
Ai émé méu ampong ndékok data, Ema de méu éta surga kolé ampong méu ce pisa. Landing émé méu toé ampong ndékok data, Ema de méu kolé toé ampong sanggéd sala de méu.”


HO’O DẺ REWENG DE MORIN:
NARING GA LITḖ YḖSUS KRISTUS
@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 27-02-12

HO’O DḖ INJIL DE MORI YḖSUS ATA TUNTI LIHA MATIUS 25:31-46
NARING GA LITḖ YḖSUS KRISTUS (27-02-12)


“Ẻmé maiy ce pisa Anak Mensia agu néra bé’angN agu sanggéd malékat-malékat mai cama-cama agu Hia, Hia ce pisa lonto lobo béta tahta néra bé’angN. Poli hitu sanggéd taung wa’u siro te nempung kéta taung olo mai ranga Diha; poli hitu Hia pandé ka’éng diod sanggéd isé oné mai cama taud; cama ného ata gembala pandé ka’éng diod jimbal oné mai mbé; poli hitu Hia na’as sanggéd jimbal dungka racap wanangN; mbéd ga na’as Liha oné dungka racap léo Diha. Poli hitu mai taé de Raja hitu ngger oné iséd hesé oné racap wanang Diha: Mai méu gé, méu ho’ot poli berkak le Ema Daku, tiba ga le méu Perénta de Mori Kraéng ata poli pandé siapn latang te méu danong du wangka pu’ung dédékn tana lino ho’o. Ai pas du darémg Aku, méu téing Aku hang; pas du masa waég Aku, méu téing Aku inung; pas du Aku ného ata bana mai pé’ang mai tana pé’ang, méu céngka para mbarus latang te Aku; pas du toé manga paké wéngko wekig Aku, méu téing Aku wéngko wéki; pas du betig Aku, méu mai la’at Aku; pas du oné buig Aku, méu mai lélo agu lémbu nai Daku. Sanggéd ata mosé molor situ réi oné Hia, Mori é, oné pisa kéta dé ami ho’o ita Ité rémé daremD mai ami ga téing hang Ité, ko rémé masa waéD mai ami ga téing Ité inung waé? Oné pisa dé ami ho’o ita Ité ného ata pali bana pé’ang mai tana pé’ang mai ami ga céngka para mbaru dami te tiba Itét Mori, ko rémé toé manga wéngko wekiD Ité mai ami ga téing Ité wéngko weki? One pisa ami ita Ité rémé betiD ko oné bui mai ami ga ngo la’at agu lélo Itét Mori? Mai walé de Raja hitu ga ngger oné isé: Te tu’ung kéta taé Daku oné mau ho’o ta, sanggéd apa kaut ata pandé de meu latang te asé-ka’é Daku ata so’ot taki wad kéta, méu pandé sanggéd situ latang te Aku. Mai taé Diha ga ngger oné isét hesé oné racap léo Diha: Ngo méu ga oné mai ranga Daku, sanggés méu ho’o ata poli kutuk laing, paka ngo oné api tédéng lén ata poli pandé siapn latang te Jing da’at agu sanggéd malékat diha. Ai pas du darémg Aku, toé téing hangk Aku le méu; du masa waég Aku, toé téing inungk Aku le méu; pas du Aku ného ata pali bana pé’ang mai tana pé’ang, toé céngka para mbarus méu te tiba Aku; pas du toé manga wéngko wekig Aku, toé téing wéngko wéki Kaku le méu; pas beti agu oné buig Aku, méu toé mai la’at Aku. Mai taé dise ga ngger oné Hia, Mori é, oné pisa kéta ami ho’o ita Ité rémé daremD, ko rémé masa waéD, ko rémé ného ata pali bana pé’ang mai tana pé’ang, ko toé manga wéngko weki, ko beti, ko rémé oné bui landing ami toé manga pandé apa-apag latang te Itét Mori? Mai walé Diha ga: Te tu’ung kéta taé Daku oné méu ho’o ta, sanggéd taung apa kaut ata toé pandéd le méu latang te cengatan ata oné mai ata so’ot taki wad kéta, méu toé pandé apa-apa latang te Aku. Isé so’o dé ce pisa oké kéta taungs ngger oné gonggém tédéng len, maik sanggéd ata mosé molor ce pisa ga ngo ngger oné mosé di’a dengkir tayin agu tédéng len.”


HO’O DẺ REWENG DE MORIN:
NARING GA LITḖ YḖSUS KRISTUS
@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 260-02-12

HO’O DḖ INJIL DE MORI YḖSUS ATA TUNTI LIHA MARKUS 1:12-15
NARING GA LITḖ YḖSUS KRISTUS (26-02-12)


Toé béhéng poli hitu ga Nai Nggeluk dadang dadé Hia ngger oné satar laing mésé. Sina satar laing mésé hitu lawang patmpulu leso Hia tatong le Jing da’at. Hia ka’éng agu sanggéd kaka mila; malékat-malékat mai raés agu jaga Hia. Cang du poli dekon hia Yohanés ga maiy Mori Yésus ngger sina Galiléa kudut te kréba Injil de Mori Kraéng; mai taé Diha ga, “Rapak cai leson ho’o ga; Perénta de Mori Kraéng ruis gi. Teser méu ga agu imbi oné Injil.”


HO’O DẺ REWENG DE MORIN:
NARING GA LITḖ YḖSUS KRISTUS
@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 25-02-12

HO’O DḖ INJIL DE MORI YḖSUS ATA TUNTI LIHA LUKAS 5: 27-32
NARING GA LITḖ YḖSUS KRISTUS (25-02-12)


Poli hitu ga, cang du Mori Yésus ngo lako ngger pé’ang mai béo hitu, ita Liha cengata ata tukang nongko pajak; ngasang data hitu hia Léwi; hia ho’o dé rémé kéta lonto jongokn oné dungka kantor nongko pajak hitu. Mai taé de Mori Yésus ga latang te hia, “Mai lut Aku dé hau gé!” Hia Lewi hitu hesé wa mai dungka lonton hitu agu lego ne nggitu kauts liha sanggéd apa ca o ca oné kantor nongko pajak hitu, agu poli hitu ga ngo lut Mori Yésus. Poli hitu ga hia Léwi pandé ca ramé agu hang mésé latang te Hia Mori Yésus oné mbaru diha. Dooo kéta ata pegawai nongko pajak agu ata cebana pé’ang mai hitu ata mai hang cama-cama agu Mori Yésus. Sanggéd ata Farisi agu ata mbeko getok Taurat rengus kéta taungs rangad be bolo mai sanggéd ata nungku Diha Mori Yésus, agu mai taé disé ga, “Co’o dé méu ho’o ta tara hang agu inung cama-cama agu ata nongko pajak agu sanggéd ata ndékok so’o?” Mai walé de Mori Yésus ga latang te isé, “Toé dé mai latang te ata weki di’a (séhat) dé ata mbeko é, maik hia mai latang te ata beti; ne nggitu kolé dé Aku ho’o, Aku ho’o dé toé mai te bénta sanggéd ata siot mosé molor, maik mai te bénta sanggéd ata ndekok, kudut isé ngancéng teserd oné mosé lino ho’o.”


HO’O DẺ REWENG DE MORIN:
NARING GA LITḖ YḖSUS KRISTUS
@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 24-02-12

HO’O DḖ INJIL DE MORI YḖSUS ATA TUNTI LIHA MATIUS 9:14-15
NARING GA LITḖ YḖSUS KRISTUS (24-02-12)


Poli hitu ga mais sanggéd taung ata nungku diha Yohanés ngger olo mai rangaD Mori Yésus, agu mai taé disé ga, “Ami ho’o agu sanggéd taung ata Farisi dé pandé puasa, landing sanggéd taung ata nungku Dité so’o toé kéta manga pandé puasad? Co’o dé tara ne nggitun kali go Mori?” Mai walé de Mori Yésus ga latang te isé, “Ai disn ko toé ta émé sanggéd haé reba de kopé harat pandé susa naid pas kéta du rémé manga kéta kin oné bréha isén hia kopé harat hitu? Ai mangay dé cain rapak leson ce pisa du kopé harat hitu rodo toé manga ne nggitu kauty oné mai bréha sanggéd isé taung, cang du hitu dé isé po pandé puasa.”


HO’O DẺ REWENG DE MORIN:
NARING GA LITḖ YḖSUS KRISTUS
@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 23-02-12

HO’O DḖ INJIL DE MORI YḖSUS ATA TUNTI LIHA LUKAS 9:22-25
NARING GA LITḖ YḖSUS KRISTUS (23-02-12)


Poli hitu ga mai taéd Mori Yésus, “Anak Mensia paka éko do kéta susa agu mbéis le ata tua-tua, tuang-tuang mésé laing agu ata mbeko getok Taurat, poli hitu ga mbelé lisé landing pandé to’o kolé du leso te telun.” Mai kolé taé Diha latang te sanggéd isé, “Sanggéd taung ata so’ot ngoéng/nanang te lut Aku isé paka toé nuk weki rud, agu pola panggold néténg-néténg leso agu lut Aku. Ai céi-céing kaut ata ngoéng te pandé selamak moséd, hia hitu de ce pisa mora moséd; landing céi-céing kaut ata mora moséd landing Aku, hia hitu dé ce pisa ngancéng pande selamak mosén. Apa dé ata guna laing émé manga ata ata ngancéng caun sanggén labok tana lino ho’o, landing hia wili ga pandé lerak ko bambo mosé de run?


HO’O DẺ REWENG DE MORIN:
NARING GA LITḖ YḖSUS KRISTUS
@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 22-02-12

HO’O DḖ INJIL DE MORI YḖSUS ATA TUNTI LIHA MATIUS 6:1-6.16-18
NARING GA LITḖ YḖSUS KRISTUS (22-02-12)


“Nuk di’a-di’a dé, méu ho’o néka pandé sanggéd taung adak de agama be bolo ranga data do kudut te ita lisé sanggéd apa ata pandé de méu, ai émé ne nggitu dé pandé de méu, méu ho’o ce pisa toé ngancéng tiba widang di’a oné mai Ema de méu éta surga. Itu tara ne nggo’on wili ga, émé hau nanang te téing sedeka, néka tombo siwisok lé lau kéta le hau pandé di’a hitu, ného kéta pandé data munafik oné mbaru-mbaru ngaji agu oné dungka salang-salang mésé, kudut te naring lata do. Tu’u-tu’ung kéta taé Daku ho’o latang te méu: Isé situ dé poli tiba widang di’ad ga. Landing émé méu nanang te téing sedeka, apa kaut ata pandé le limé wanang de méu paka néka baé le limé léo de méu. Ata di’an dé ga téing le méu sedeka hitu oné dungka paté ciko, wiga Ema de méu éta surga ngancéng ita gauk di’a hitu one paté ceha agu Mori Ema hitu dé ce pisa ata téing lékon/walin pandé di’a hitu latang te méu.”
“Ẻmé méu nanang te ngaji, méu néka ngaji ného kéta ata munafik so’o. Isé situ dé ngoéng kéta te ngaji mbongang mésé-mésé agu ngaji pas kéta rémé heséd oné mbaru-mbaru ngaji ko one jéko-jéko salang mésé, ai kudut te ita agu naring lata do. Tu’u-tu’ung kéta dé taé Daku latang te méu ho’o: Isé situ poli tiba widang di’ad ga. Landing émé méu nanang te ngaji, méu paka ngo oné lo’ang de méu, tadu di’a-di’a paran lo’ang hitu, poli hitu ga ngaji méu nitu sina ngaji nggere oné ranga de Ema ata ka’eng oné osang paté ceha. Ẻmé ne nggitu pandé de méu ga, Ema de méu hitu ngancéng ata ita pandé di’a oné paté ceha, manga kaut lékon/walin Liha ce pisa pandé agu gauk di’a de méu hitu.”
“Ẻmé méu nanang te pandé puasa, paka néka pandé rengus ko susa kéta ranga de méu ného kéta pandé data munafik so’o. Ai isé situ pandé diod kéta rangad émé rémé puasad, kudut te ita lata bana ngong isé rémé kéta puasa méséd.Tu’u-tu’ung kéta taé Daku latang te méu ho’o: Sanggéd isé situ ga poli tiba widang di’ad latang sanggéd apa ata pandé disé. Landing émé méu nanang te pandé puasa, pandé loma le méu sa’i de méu agu baki kolé ranga de méu kudut nggélok agu mbilar kéta itan lata, kudut toé baé lata bana ngong méu ho’o rémé kéta puasa mésé. Kong hanang Ema de méu ata ka’eng oné osang paté ceha ata itan apa ata pandé di’a de méu. Ema hitu dé ce pisa ata itan pandé de méu hitu oné paté ceha, Hia kolé dé ata lékon pandé agu gauk di’a de méu hitu ce pisa.”

HO’O DẺ REWENG DE MORIN:
NARING GA LITḖ YḖSUS KRISTUS
@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 21-02-12

HO’O DḖ INJIL DE MORI YḖSUS ATA TUNTI LIHA MARKUS 9:30-37
NARING GA LITḖ YḖSUS KRISTUS (21-02-12)


Mori Yésus agu sanggéd ata nungkuN téti mai nitu maid agu lako liba sina Galiléa; toé ngoéngN Mori Yésus te baé lata lako disé hitu, ai Hia rémé toing sanggéd ata nungkuN. Mai taé Diha ga oné isé, “Anak Mensia ce pisa dekoy te téing ngger oné ata mensia; isé ce pisa mbelé Hia, landing telu leso wa ga du poli mbelén lisé, Hia to’o koléy wa mai boaN.” Toé idep lisé apa betuan tombo hitu, landing isé rantang kéta te réi oné Hia.
Poli hitu cais de Mori Yésus agu sanggéd ata nungkuN sina Kapernaum. Cang du cai oné mbaruN Hia Mori Yésus ga, mai réi Diha ngger oné sanggéd ata nungkuN: “Tombo apas dé méu bao ta oné salang?” Landing hema kauts isé, ai oné salang bao isé cébo gangga taud ngong céing kéta ata céwé mésén oné mai sanggéd isé situ. Mori Yésus lonto paka di’ay agu béntas Liha campulu sua ata nungkuN. Mai taén ga ngger oné isé: “Ẻmé manga cengata ata ngoéng te jiri ata taki olon kéta, ata hitu dé porong ngoéng te jiri ata taki musin oné mai sanggén taung, agu jiri ata te jera laing latang te ata do.” Poli hitu Mori Yésus bénta cengata anak koé; jera lonto Liha anak koé hitu oné bréha isé; nggao Liha anak koé hitu agu ne nggo’o taéN oné isé, “Céing kaut ata ata tiba anak koé ného ho’o oné ngasang Daku, ata hitu dé tiba Aku. Céing kaut ata ata tiba Aku, toé Aku ata tiba diha, maik Hia ata jera Aku te mai cé’é ho’o.”


HO’O DẺ REWENG DE MORI KRAẺNG:
NARING GA LITḖ YḖSUS KRISTUS
@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 20-02-12

HO’O DḖ INJIL DE MORI YḖSUS ATA TUNTI LIHA MARKUS 9:14-29
NARING GA LITḖ YḖSUS KRISTUS (20-02-12)


Cang du koléd Mori Yésus, Pétrus, Yakobus agu Yohanés agu nempung kolé agu ata nungku iwod situ ga, ita lisé ata do rémé kéta hesé lupi isé; manga pisa taus ata mbeko getok Taurat rémé kéta léwang taud agu isé. Cang du ita Mori Yésusd ata do situ ga, lenget kéta taungs isé agu gélang-gélang d isé mai te curu Mori Yésus. Mai réi de Mori Yésus ga oné isé, “Apa léng icin bao léwang tau de méu hitu agu isé ta?” Mai walé de cengata oné mai bréha ata do situ, “Sengaji Guru, aku ho’o mai dadé anakg ngger cé’é Itét Mori, ai hia woréng le jing da’at wiga jiri dopel muingy. Néténg-néténg kaut jing hitu woréng hia, jing hitu pandé péncar anak ho’o ngger wa tana; oné mai mu’un ga do losa wusa; ngi’isn ga anteng taud, agu wekin ga rodo wedét. Poli paka di’a tegin laku oné ata nungku Dité so’o, porong isé pande wur (sonda) jing hitu, landing toé ngancéng lisé yé Mori.” Mai taé de Mori Yésus ga oné isé, “Oé méu ho’ot toé ngancéng imbi tah, sanggé ce pisan kéta dé Aku ho’o tay ka’éng oné bréha méu? Sanggé ce pisa kéta Aku ho’o ta’ong lélo ba weki de méu ta? Dadé cé’é ho’o le méu anak koé hitu ta!”
Dadé lisé hia ga ngger oné ranga de Mori Yésus. Cang du ita Mori Yésusn jing hitu, gélang-gélang hia kéngkung weki danak koé hitu, wiga anak koé hitu pa’u wa tana, agu ngguli-ngguting wa tana, agu do losa wusa oné mai mu’un. Mai réi de Mori Yésus ga oné ema de anak koé hitu, “Pu’ung oné pisa main anak ho’o hena le beti ho’o ta?” Mai walé diha, “Pu’ung kaut cang du koe main ga. Dondé kéta jing hitu sorok hia ngger oné api ko ngger oné waé kudut te pandé mata hia. Landing émé Ité ngancéng campé hia, Mori é campé koé ami taaa Mori, agu ba’éng koé ami.” Mai walé de Mori Yésus ga, “Taé de hau: Ẻmé Ité ngancéng campé! Sanggéd ca o ca dé ngancéng jiri laingn latang te ata imbi.” Gélang-gélang walé de ema de anak koé hitu: “Imbi laku o Mori. Campé koé aku ata toé imbi ho’o!” Du itad le Mori Yésus tambang-tambang kéta dod ata situt mai nempung ga, mai Hia mu’u mésé jing da’at hitu, agu ne nggo’oy taén, “Oé hau jing ata pandé kosé ata ho’o wiga jiri dopel agu nentengy; Aku jera hau, paka gélang-gélang ngom hau oné mai anak koé ho’o agu néka pandé woréng hia kolé ce pisa!” Ngo paka di’ay jing hitu agu ciék werés mésé-mésé agu kéngkung-héur mésé-mésé liha anak koé hitu. Lélo anak koé hitu lisé ného kéta ata matay taran ga, wiga mai taé data do situ ga, “Olé matay anak ho’o gé.” Landing Mori Yésus cau limé de anak koé hitu agu kéngko Liha, agu hesén anak koé hitu. Cang du ocok/tuké ngger oné mbaruN Mori Yésus ga, agu hanang koéd kaut Hia agu sanggéd ata nungkuN, mai réi disé ngger oné Hia, “Co’o tara toé ngancéng n lami ho’o te sonda jing hitu?” Mai walé Diha ga oné isé: “Jing ho’o bao toé ngancéng sonda ne nggitu kaut na, paka sonda le ngajiy kali.”


HO’O DẺ REWENG DE MORI KRAẺNG:
NARING GA LITḖ YḖSUS KRISTUS
@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 19-02-12

HO’O DḖ INJIL DE MORI YḖSUS ATA TUNTI LIHA MARKUS 2:1-12
NARING GA LITḖ YḖSUS KRISTUS (19-02-12)


Poli hitu du poli laud pisa leso wan ga, cang du Mori Yésus mai kolé sina Kapernaum, rodo dengé labok béo kaut kolé kréba ngong Hia ai Hia manga cé’é mbaru. Mai data situ ga mai nempung wiga toé kolé manga osang baté linga; olo mai para mbaru kaut ké’ot keta. Cang du tombo kréba reweng de Mori kin Hia agu isé, caid ata ata mai dadé ngger olo mai ranga Diha cengata ata péko; ata ho’o rakang lata pat taus. Landing isé toé ngancéng ba hia ngger olo dungka ranga de Mori Yésus ai nemper baild ata do situ, wiga isé wili ga tuké ngger éta bobong mbaru agu céngka lisé bobong mbaru hitu pas kéta béta dungka éta mai Mori Yésus; du poli céngkan lisé gé, lendor ngger wa lisé locé baté tokon ata péko hitu. Cang du itan le Mori Yésus imbi disé ga, mai taé Diha one ata péko hitu, “Nana é, poli ampongd sanggéd ndékok de hau ga!” Landing manga ruis hitu ata mbeko getok Taurat ata rémé lonto kid ruis hitu; mai nuk disé oné naid ga, “Co’o tara taé ne nggo’on ata ho’o ta? Hia pandé hojat (mbécik) Mori Kraéng. Ai hanang Mori Kraéng dé kali ata ngancéng ampong ndékok; toé manga kolé ata ce banan pé’ang mai Hia.” Landing baé le Mori Yésus oné nai de Run bahwa isé ne nggitu nuk koéd, mai taé Diha ga agu isé, “Co’o tara ne nggitun nuk de méu oné nais ta? Nia ata céwé émong ne, taé oné ata péko ho’o: Poli ampongd sanggéd ndékok de hau, ko taé ne nggo’o: To’o hau ga, téti locém agu lako hau ga? Landing kudut te baén le meu Anak Mensia manga kuasaN te ampong ndékok oné lino ho’o” – mai taé Diha ga ngger oné ata péko hitu -, téti di’a-di’a locém agu kolé hau ga ngger oné mbarum!” Gélang-gélang to’on ata hitu ga, téti di’a-di’a locé koén agu ngo be pé’ang oné mai bréha ata do situ, wiga isé wili ga lenget kéta taungs agu isé naring Mori Kraéng; ne nggo’o taé disé, “Apa ne nggo’o toé di manga dé’it itan lami.”


HO’O DẺ REWENG DE MORI KRAẺNG:
NARING GA LITḖ YḖSUS KRISTUS
@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 18-02-12

HO’O DḖ INJIL DE MORI YḖSUS ATA TUNTI LIHA MARKUS 9:2-13
NARING GA LITḖ YḖSUS KRISTUS (18-02-12)


Enem bari/leso poli hitu ga Mori Yésus dadé hia Petrus, Yakobus agu Yohanés; cama-cama agu isé Hia tuké ca poco ata langkas kétay. Eta poco hitu isé hanang koéd kaut. Cang du hitu, rodo jiri dion kaut taraN Mori Yésus olo mai ranga disé; baju léwéN ga jiri bakok kétay. Toé kéta manga cengatan ata tukang wewas baju oné lino ho’o ata ngancéng wewas pandé bakok ného bakok de baju léwé Diha ho’o ga. Poli hitu rodo ita kauts lisé hia Ẻlia agu Mosés; isét sua so’o rémé kéta tombo-tombo taud agu Mori Yésus. Mai taéd Pétrus ga ngger oné Mori Yésus, “Tuang sengaji é, di’aaaa kéta lami noingn ka’éng oné osang ho’o. Asa co’om hesé telun lami ndéi koé ga, can latang te Ité, can latang te Mosés agu can kolé ga latang te Ẻlia.” Ne nggitu kaut curup imi-amasn hia Pétrus, ai toé baé liha apa ata paka taén liha, ai isé rémé rantang kéta kid. Cang du hitu ga rodo cain kaut rewung nengkem taki tana mai te tadu isé; oné mai rewung nengkem hitu ga, dengé lisé ca reweng ata ne nggo’o taén, “Ho’o dé Anak Daku ata momang Daku, séngét koé Hia le méu.” Cang du lélo-lélon lisé ga lupi baling isé, rodo mora ne nggitu kauts ata sio bao ga, toé kéta ita cengatan lisé lupi hitu; téké Mori Yésus hanang koén kali ga.
Cang du wa’ud isé éta mai poco hitu, Mori Yésus pedé oné isé porong isé néka kéta tombo oné céing-céing kaut apa ata poli ita disé bao, émé Anak Mensia toé di to’o koléy wa mai boaN. Nuk agu na’a di’a-di’a lisé pedé hitu oné naid landing tombo agu gangga tau kid isé ngong apa péng betuan curup hitu, “to’o koléy wa mai boaN.” Poli hitu mai réi disé ga ngger oné Mori Yésus, “Co’o tara ne nggo’on taé data mbeko getok Taurat ga, paka olo caiy di hia Ẻlia ce pisa? Mai walé de Mori Yesus, “Ẻng olo maiy di hia Ẻlia ce pisa kudut te pandé di’a koles sanggéd ca o ca. Landing, co’o koléy de apa ata poli tulisn ngong hia Anak Mensia, ai hia hitu ce pisa do kéta cukung susa agu pandé loér lata do? Landing ne nggo’o taé Daku oné méu ho’o: Te ho’on caiy hia Ẻlia hitu ga; ata do pandé sanggé ngoéngd kaut latang te hia, pas kéta ného apa ata poli tulisn danong ngong hia.”


HO’O DẺ REWENG DE MORI KRAẺNG:
NARING GA LITḖ YḖSUS KRISTUS
@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 18-02-12

HO’O DḖ INJIL DE MORI YḖSUS ATA TUNTI LIHA MARKUS 9:2-13
NARING GA LITḖ YḖSUS KRISTUS (18-02-12)


Enem bari/leso poli hitu ga Mori Yésus dadé hia Petrus, Yakobus agu Yohanés; cama-cama agu isé Hia tuké ca poco ata langkas kétay. Eta poco hitu isé hanang koéd kaut. Cang du hitu, rodo jiri dion kaut taraN Mori Yésus olo mai ranga disé; baju léwéN ga jiri bakok kétay. Toé kéta manga cengatan ata tukang wewas baju oné lino ho’o ata ngancéng wewas pandé bakok ného bakok de baju léwé Diha ho’o ga. Poli hitu rodo ita kauts lisé hia Ẻlia agu Mosés; isét sua so’o rémé kéta tombo-tombo taud agu Mori Yésus. Mai taéd Pétrus ga ngger oné Mori Yésus, “Tuang sengaji é, di’aaaa kéta lami noingn ka’éng oné osang ho’o. Asa co’om hesé telun lami ndéi koé ga, can latang te Ité, can latang te Mosés agu can kolé ga latang te Ẻlia.” Ne nggitu kaut curup imi-amasn hia Pétrus, ai toé baé liha apa ata paka taén liha, ai isé rémé rantang kéta kid. Cang du hitu ga rodo cain kaut rewung nengkem taki tana mai te tadu isé; oné mai rewung nengkem hitu ga, dengé lisé ca reweng ata ne nggo’o taén, “Ho’o dé Anak Daku ata momang Daku, séngét koé Hia le méu.” Cang du lélo-lélon lisé ga lupi baling isé, rodo mora ne nggitu kauts ata sio bao ga, toé kéta ita cengatan lisé lupi hitu; téké Mori Yésus hanang koén kali ga.
Cang du wa’ud isé éta mai poco hitu, Mori Yésus pedé oné isé porong isé néka kéta tombo oné céing-céing kaut apa ata poli ita disé bao, émé Anak Mensia toé di to’o koléy wa mai boaN. Nuk agu na’a di’a-di’a lisé pedé hitu oné naid landing tombo agu gangga tau kid isé ngong apa péng betuan curup hitu, “to’o koléy wa mai boaN.” Poli hitu mai réi disé ga ngger oné Mori Yésus, “Co’o tara ne nggo’on taé data mbeko getok Taurat ga, paka olo caiy di hia Ẻlia ce pisa? Mai walé de Mori Yesus, “Ẻng olo maiy di hia Ẻlia ce pisa kudut te pandé di’a koles sanggéd ca o ca. Landing, co’o koléy de apa ata poli tulisn ngong hia Anak Mensia, ai hia hitu ce pisa do kéta cukung susa agu pandé loér lata do? Landing ne nggo’o taé Daku oné méu ho’o: Te ho’on caiy hia Ẻlia hitu ga; ata do pandé sanggé ngoéngd kaut latang te hia, pas kéta ného apa ata poli tulisn danong ngong hia.”


HO’O DẺ REWENG DE MORI KRAẺNG:
NARING GA LITḖ YḖSUS KRISTUS
@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 17-02-12

HO’O DḖ INJIL DE MORI YḖSUS ATA TUNTI LIHA MARKUS 8:34-9:1
NARING GA LITḖ YḖSUS KRISTUS (17-02-12)


Poli hitu mai Mori Yésus bénta ata do agu sanggéd taung ata nungkuN agu mai taéN ga agu isé, “Ẻmé manga ata ata ngoéng te lut Aku, ata hitu dé paka toé nuk weki run kaut, agu hia siap te pola panggoln agu lut Aku.” Ai céing-céing kaut ata ngoéng te pandé selamak mosé de run, ata hitu ce pisa matay; maik céing-céing kaut ata mata landing Aku agu landing Injil, hia pandé selamak mosé de run. Apa gunan émé ata ngancéng kuasan labok lino ho’o liha, landing hia mora mosén? Ai apa léng ata ngancéng téing diha kudut te léko mosén hitu? Ai céing-céing kaut ata ata ritak landing Aku agu landing sanggéd curup-curup Daku oné bréha ata do so’ot toé setia agu ata ndékok so’o, Anak Mensia kolé ritak y ce pisa te lélo ata hitu émé mai kolé Hia tay oné bréha néra béang kemuliaan de EmaN, agu sanggéd malékat-malékat nggeluk.” Mai kolé taéN Hia oné isé, “Tu-ung-tu’ung taé Daku agu méu, oné bréha sanggés taung meu ata manga cé’é ho’o ga, manga cengata ata ata toé di mata kin tay émé isé toé di ita cain perénta de Mori Kraéng agu néra kuasa méséN.”


HO’O DẺ REWENG DE MORI KRAẺNG:
NARING GA LITḖ YḖSUS KRISTUS
@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 16-02-12

HO’O DḖ INJIL DE MORI YḖSUS ATA TUNTI LIHA MARKUS 8:27-33
NARING GA LITḖ YḖSUS KRISTUS (16-02-12)


Poli hitu Mori Yésus agu sanggéd ata nungkuN ngo ngger oné béo-béo sina dungka tana Kaisaréa Filipi. Oné bréha salang mai Hia réi oné ata nungkuN situ, “Lorong taé data do, céi léng Aku ho’o ta?” Mai walé disé ga, “Mangas ata ne nggo’o taéd o Ité, Ité hitu dé Hia Yohanés Cebong; landing ata iwod kolé ga ne nggo’o taéd, “Ité hitu dé hia Ẻlia; landing ata iwod kolé ga ne nggo’o taéd, “Ité hitu dé cengatan kaut oné mai sanggéd nabi-nabi ata manga danong maid ga.” Mai réi Diha ga ngger oné isé, “Landing co’o lorong nuk de rus méu ga, céi dé Aku ho’o?” Mai waléd Pétrus ga, “Yo Mori Ité hitu dé Hia Mésias.” Poli hitu Yésus ré’ing tu’ung-tu’ung kéta isé kudut isé néka tombo oné ata do ngong Hia. Poli hitu Mori Yésus pu’ung kolé ajar/toing isé; icin toing hitu ga ne nggo’oy: Anak Mensia paka ta’ong agu cukung susa do agu toé tiba le ata tu’a adak, le tuang-tuang mésé agu ata mbeko getok Taurat, agu mbelé lisé landing poli hitu ga to’o koléY du leso te telun. Taés Liha apa situ getas kéta agu toé kéta manga can ata cehad Liha. Landing hia Pétrus nggewit Mori Yésus te ngo oné lupi pé’ang ce koén agu wangka pu’ung rabo ce koén liha. Du dengé hitu holés paka di’a Mori Yésus; lélos Liha sanggéd taung ata nungkuN, poli hitu Hia mu’u mésé hia Pétrus: “Ngo tadang hau é jing da’at, ai hau toé nuk apa ata nuk de Mori Kraéng, maik nuk kaut apa ata nuk de mensia.”


HO’O DẺ REWENG DE MORI KRAẺNG:
NARING GA LITḖ YḖSUS KRISTUS
@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 15-02-12

HO’O DḖ INJIL DE MORI YḖSUS ATA TUNTI LIHA MARKUS 8:22-26
NARING GA LITḖ YḖSUS KRISTUS (15-02-12)


Yésus pandé ina ata buta matan sina Bétsaida.
Poli hitu cais isé Yésus agu sanggéd ata nungkuN sina Bétsaida. Ata sina hitu mai dadé cengata ata buta ngger oné ranga de Mori Yésus, agu tegi lisé porong Hia ngoéng te sapél (omar) ata buta hitu. Cau limén ata buta hitu le Mori Yésus agu dadé Liha ata buta hitu ngger pé’ang mai béo. Pé’ang hitu ga Hia ipo oné dungka mata data hitu agu na’a liméN éta mai hia, agu mai réinN ga oné hia, “Asa, ngancéng ita apa-apam hau ge ko?” Ata hitu lélo ngger olo agu mai taén ga, “Ita laku ata do ného kéta po’ong hajus, landing itas laku ise rémé laki-lako kid.” Sapel kolé liméN Mori Yésus oné dungka mata data hitu, wiga ata hitu ga ngancéng kéta lélo tu’ung-tu’ungn ga, wiga hia ngancéng ita jinok kéta sanggéd ca o ca. Poli hitu Mori Yésus jera hia te kolé nggaruk kaut ngger oné mbarun agu mai taéN ga, “Hau néka lako liba oné béo hitu é.”


HO’O DẺ REWENG DE MORI KRAẺNG:
NARING GA LITḖ YḖSUS KRISTUS
@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 14-02-12

HO’O DḖ INJIL DE MORI YḖSUS ATA TUNTI LIHA MARKUS 8:12-21
NARING GA LITḖ YḖSUS KRISTUS (14-02-12)

Ata nungku de Mori Yésus hémong te ba roti; ca kanang roti ata ba disé ngger one prahu (lambo). Yésus taé oné isé, kudut néka témo: “Néka témo méu é, agu jaga di’a-di’a, ai manga dé ragi data Farisi agu ragi diha Hérodés.” Isé gé cébong tombo cama taud; ne nggo’oy icin tombo disé, ai isé toé manga rotid. Cang du baén le Mori Yésus icin tombo disé, mai taé Diha ga, “Co’o tara tombo ngong toé manga rotis dé méu ho’o ta? Toé di pinga di’a ko idep kin le méu ko? Toé di tara noing le nai de méu ko? Bo manga matas méu ho’o, landing toé ngancéng lélo; bo manga tilus méu ho’o landing toé séngét. Hémong le méu ge ko? Cang du pati rotiG Aku latang te ata lima sebu taus, pisa lidéd (pénggékd) ata récid ata nongko de méu?” Mai walé disé ga, “Campulu sua lidéd o Ité.” “Cang du pitud roti latang te ata pat sebu tau, pisa lidéd (pénggékd) ata récid ata nongko de méu?” Mai walé disé ga, “Pitu lidéd o Ité.” Mai taé Diha oné isé, “Toé kin di idép le méu ko?”

HO’O DẺ REWENG DE MORI KRAẺNG:
NARING GA LITḖ YḖSUS KRISTUS
@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 13-02-12

HO’O DḜ INJIL DE MORI YḜSUS ATA TUNTI LIHA MARKUS 8:11-13
NARING GA LITḜ YḜSUS KRISTUS (13-02-12)

Poli hitu ga caid ata Farisi agu wangka pu’ung gangga taud agu Yésus. Te damang Hia tegi lisé oné Hia can tanda éta mai surga. Gesar Hia oné naiN agu ne nggo’o taéN, “Ata leso ho’o, co’o kéta tara menteng kétad te tegi tanda? Tu’ung-tu’ung taé Daku agu méu, latang te méu ho’o, toé kéta manga can cepisa téing tanda.” Poli taé ne nggituN Hia ga, Hia legong isé, léti ngger oné prahu (lambo) agu téti nitu maid te ngo be sina.

HO’O DẺ REWENG DE MORI KRAẺNG:
NARING GA LITẺ YẺSUS KRISTUS
@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 12-02-12

HO’O DḜ INJIL DE MORI YḜSUS ATA TUNTI LIHA MARKUS 1:40-45
NARING GA LITḜ YḜSUS KRISTUS (12-02-12)

Manga cengata ata beti kusta; hia mai cumang Mori Yesus; tikul agu io pada di’a hia olo mai ranga De Mori Yésus agu tegi campé Diha. Mai ta’én ga, “Ḗmé ngoéngD Ité, Ité ngancéng pandé ina beti daku.” Wéong kéta naiN Hia le momang mésé du ita ata hitu. Los liméN Hia te sapél ata hitu agu mai taéN ga, “Ngoéng Daku wili ga, ina hau ga.” Cang du hitu rodo mora kauts beti kusta data hitu, agu inan hia ga. Gélang-gélang jeraN Liha ata hitu te ngo nitu main agu ré’ing tetu’ung kéta Liha, “Nuk dé, néka tombo olo-olo oné ata do le hau; maik hau wili ga, ngo toto wekim olo mai ranga de tuang agu néka hémong te pandé takung latang te upacara oké de hau, ného apa ata poli taé diha Mosés danong main ga; hitu de tanda latang te isé.” Landing ata hitu téti nitu main agu kréba tanda lenget hitu liha agu tombo néténg béo labok kampong; hitu dé tara toé ngancéng ngo oné kotaN Hia Mori Yésus ai rantang ita lata do; cemoln wili ga Hia ka’éng kin oné osang baté ciko agu lik kéta; koném po ne nggitu ga, mai kid ada do situ, mai cé’é Hia; isé mai oné mai labok béo.

HO’O DẺ REWENG DE MORI KRAẺNG:
NARING GA LITẺ YẺSUS KRISTUS
@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 11-02-12

HO’O DḜ INJIL DE MORI YḜSUS ATA TUNTI LIHA MARKUS 8:1-10
NARING GA LITḜ YḜSUS KRISTUS (11-02-12)


Cang du hitu manga kolé ata do oné ruis hitu; landing isé toé manga ba bokongd. Bénta le Mori Yesus sanggéd ata nungkuN agu mai taéN ga, “Olé, wéong kéta nai Daku ta, ita ata do so’o, ai ho’ot te telu lesod isé ga dindor lut Aku landing isé toé manga ba bokongd. Ẻmé jera kolés Laku ngger oné béod déméng agu tuka daremd, bonga Daku ga am doals isé to’ong oné bréha salang, ai mangas ata mai tadang maid.” Mai walé data nungku Diha ga, “Co’o kétay caran lité téing hangd (sakongd) ata do so’o oné osang baté ciko agu lik hoo ta, sakong sanggé becurd?” Mai réiD Mori Yésus ga oné isé, “Pisad léng roti de méu ta?” Mai walé disé ga, “Pitud kali o ité.” Poli hitu ga Hia jera ata do situ kudut te lonto wa tana. Poli hitu Mai hia emis pitu roti situ, ngaji tegi berkak, poli hitu patis Liha roti situ, agu téings Liha roti situ ngger oné ata nungkuN ai kong lised pati olo-olod; pati olo-olos lisé roti situ ngger oné ata do. Manga kolé oné luni bokong disé pisad ikang; Yésus ngaji tegi berkak kolé lobo ikang-ikang situ, poli hitu ga jeraD Liha isé kudut te pati olo-olos ikang situ. Sanggéd ata do situ ngancéng hang sanggé becur kétad. Poli hitu ga nongkos lisé sanggéd récid roti-roti situ; nekid ga pitu lidé/pénggék. Nekid ata do situ am pat sebu taus. Poli hang hitu ga itu po jera kolés Liha sanggéd ata do situ. Poli hitu gélang-gélang Hia léti lambo/prahu cama-cama agu sanggéd ata nungkuN; isé ngo ngger sina tana Dalmanuta.

HO’O DẺ REWENG DE MORI KRAẺNG:
NARING GA LITẺ YẺSUS KRISTUS

@Copyright terjemahan: Fransiskus Borgias M.
(Anggota Pakar LBI)

KREBA DI'A LESO HO'O 10-02-12

HO’O DḜ INJIL DE MORI YḜSUS ATA TUNTI LIHA MARKUS 7:31-37
NARING GA LITḜ YḜSUS KRISTUS (10-02-12)


Poli hitu Yésus téti oné mai tana Tirus hitu; Hia lako liba oné tana Sidon kudut ngo ngger sina Sano Galiléa, lako liba tana Dékapolis. Sina tana hitu manga ata ata dadé ngger oné Hia ata nenteng agu bapa béngot; tegi lisé porong Yésus omar liméN oné ulu data hitu. Poli hitu Yésus pandé hesé hanang koén ata hitu, hesé bégas oné mai ada do situ, wiga isét sua ga hesé hanang koéd; Yésus rohék tilu data hitu le rempa liméN; poli hitu Hia ipo/iso agu sapel lema data hitu. Poli hitu Yésus lélo jongang ngger éta agu siwisok/nggum hanang koéN, agu mai taéN ga, oné ata hitu, “Ḗfata!” ngong ne nggo’o dé artin hitu ga: Céngka koé ga! Rodo ngancéng dengé laingn kaut tilu data hitu agu ina kolé leman; poli hitu hia ngancéng curup agu getas kéta curup na. Mai pedéD Yesus oné isé kudut isé néka tombo-tombo ngong apa ho’o oné ata do. Landing koném po ného nian kaut ré’ingn Liha, ngai kréba kin lisé labok béo oné néténg-néténg ata. Lenget kétas isé agu mai taéd ga, “Hia pandé ca o ca di’aaa kéta; ata nenteng pandé di’as Liha wiga ngancéng séngét laing tilud; ata bapa pandé di’as Liha wiga ngancéng curup di’a agu getas kéta.”

HO’O DẺ REWENG DE MORI KRAẺNG:
NARING GA LITẺ YẺSUS KRISTUS
@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 09-02-12

HO’O DḜ INJIL DE MORI YḜSUS ATA TUNTI LIHA MARKUS 7:24-30
NARING GA LITḜ YḜSUS KRISTUS (09-02-12)

Poli hitu ga Yesus téti mai nitu maiN ga agu ngo sina tana Tirus. Hia inggos ocok ngger oné ca mbaru ai toé ngoéngN Hia manga ata baén; landing kréba caiN Hia toé ngancéng cehan. Manga cengata ata tu’a endé; anak inéwai diha woréng le jing da’at; dengé liha cai Diha; hitu dé tara main hia mai io agu suju olo mai wa’i Diha. Inéwai hitu dé ata Yunani, ngai wa’u de panga ata Siro-Fénisia. Tegi kéta wa mai nain liha oné Yesus porong Hia pandé mbér (sonda) jing da’at hitu oné mai weki de anak inéwai diha. Mai taéD Yésus ga ngger oné hia, “Com kong di anak-anak de ru olo becurs di, ai toé patun dé te émi roti latang te anak kudut te téing acu.” Landing mai walé de inéwai hitu ga, “Tu’ung é Mori Sengaji. Landing acu siot lonto wa mai méja ngancéng kolé hang hang réci ata oké de anak-anak koé lobo méja.” Mai taéD Yésus ga oné inéwai hitu, “Wajo le taé/curup de rum hitu, ngo hau ga, ai jing da’at hitu poli losan ga oné mai weki de anak de hau.” Koléy inéwai hitu gé ngger oné mbarun; ita liha anakn rémé keta tokon oné wongka tokon; jing da’at hitu losa ného baon ga.

HO’O DẺ REWENG DE MORI KRAẺNG:
NARING GA LITẺ YẺSUS KRISTUS
@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 08-02-12

HO’O DE INJIL DE MORI YESUS ATA TUNTI LIHA MARKUS 7:14-23
NARING GA LITE YESUS KRISTUS


Poli hitu ga Yesus benta koles ata do situ agu ne nggo’o tae Diha one ise, “Sangges taung meu ho’o e, senget koe Aku agu pinga di’a-di’a koe le meu. Toe keta manga apa-apa kaut ata mai be pe’ang mai weki, apa hiot ngo ngger one weki data, ata nganceng pande ning laing (najis) ata hitu; landing apa-apa kaut ata losa one mai weki data, apa hitu de ata nganceng pande ning (najis) laing.” [Ceing-ceing kaut ata manga tilu te senget, porong senget koe.”]
Cang du poli ngo bone ca mbaru kudut te lece agu ceha one mai ata do situ, sangged ata nungku Diha rei one Hia ngong apa artin rapang hitu bao. Mai wale Diha ga, “Ole toe kole idep le meu rapang hitu ko?” Ba’ang keta toe bae le meu e sangged apa kaut ata mai be pe’ang mai weki hiot ngo ngger one weki data toe nganceng pande ning laing (najis) ata hitu, ai apa hitu toe ngo ngger one nai maik ngo ngger one tuka, poli hitu ga losa kole one kakus ko pe’ang puar/ponceng?” Wiga wili ga le tae Diha sangged taung hang e halal keta taung; toe manga ata ireng laingd. Mai kole taeN ga, “Apa-apa kaut ata losa one mai weki data, apa hitu de ata pande ning laing (najis), ai one mai, one mai nai de maid sangged taung nuk ata toe di’ad, nuk te ngoeng ata, nuk te tako, te mbele, nuk te toko (loma) wina data, nuk gopa, gauk toe di’a, beti nai, mbecik (hojat) Mori Kraeng, mese nai, pande senggilar sara nai ru. Sangged taung apa da’at so’o de mai one maid keta taung; ho’os de apa ata pande ning (najis) laing ata mensia.

HO’O DE REWENG DE MORI KARAENG:
NARING GA LITE YESUS KRISTUS
@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 07-02-12

HO’O DE INJIL DE MORI YESUS ATA TUNTI LIHA MARKUS 7:1-13
NARING GA LITE YESUS KRISTUS

Ata Farisi agu pisa taus ata mbeko getok (ahli) Taurat sina mai Yerusalem mai cumang Yesus. Ita lise pisa taud ata nungkuD Mori Yesus ga hang pake lime saki, ngong lime ata toe di samo kin. Ai ata Farisi situ de cama neho sangged taung ata Yahudi iwod ga toe di hang eme toe di samo lime lut adak dise, ai ise lorong kid sangged adak mose de empo dise danong main ga; eme kole one mai pasard ise ko kole lako-lako, ise toe rodo hang kaut eme toe di olo waca wekid le wae. Do keta kid adak bana ata lorong kid lise, neho rapangn ga adak cuci cawan (mok), gelo/sempe agu sangged perkakas one mai perunggu agu osang bate toko/halas. Itu de tara reid lata ata Farisi agu ata mbeko getok Taurat situ ngger one Yesus, “Co’o de ata nungku Dite so’o ta tara toe mose lorong adak de empo dite danong main ga, ai ise hang pake lime saki?” Mai wale Diha ge one ise, “Pas agu tu’ung keta danong nubuat diha nabi Yesaya ta ngong meu ho’o e, meu ata munafik eros, ai ne nggo’o de tulisn one buku hitu:
Ata bangsa ho’o e io Aku lobo mu’u kaut, landing naid ga tadang keta one mai Aku. Oke bon (Keba kaek) kaut ise io one ranga Daku, ai toing ata toing dise de perenta de mensia. Prenta de Mori Karaeng toe lorongs le meu landing adak de mensia lorong ne nggitu kauts le meu.”
Mai taeD Yesus agu ise, “Pintar tu’ungs meu ho’o ta oke perentaD Mori Karaeng, ai kudut te lorong adak de rus meu. Ai ne nggo’o tae diha Moses danong: Hiang ga ende agu emam! Agu: ceing kaut ata mbecik enden ko eman ata hitu de paka mata. Landing mai taed meu ga: Eme manga cengata ata tae ne nggo’o one enden ko eman: sangged taung campe ko tunggeng ata paka tei laku ngger one meu hitu de Takung Mese – ngong condo ngger one Mori Karaeng – wiga meu ga toe sendo hia te pande apa pali bana kole latangt enden agu eman. Wiga, le adak hitut lorong de meu ga, cemoln de reweng de Mori Karaeng pande keba kaeik ne nggitu kauts le meu. Do keta kid apa bana ata cama neho hitu ata pande de meu ho’o.”

HO’O DE REWENG DE MORI KARAENG:
NARING GA LITE YESUS KRISTUS
@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 06-02-12

HO’O DE INJIL DE MORI YESUS ATA TUNTI LIHA MARKUS 6:53-56
NARING GA LITE YESUS KRISTUS

Cang du caid ise be sina ga Yesus agu sangged taung ata nungkuN wa’u one tana masa sina Genesaret; pongo nitu lise lambod (perahud). Cang du wa’ud ise one mai lambo ga, rodo bae kaut lata do situ hia Yesus. Hidi-hada dise ga lako labok tana hitu kudut te rakang ko eko ase-ka’e dise ata beti agu loced-loced te lut bate lakoD Yesus; ngger nia kaut bate lakoN Yesus, lut lise. Ngger nia kaut ngo lakoN Yesus, ngger pe’ang oka, ngger one kota, ko ngger one beo-beo, sangged ata do situ ba ase ka’e dise ata beti, agu pande toko lise one dungka pasar ko lupi salang; tegi lise wa mai naid ga porong Yesus sendo ise am te cau cekoen kaut lobon baju lewe Diha. Sangged taung ata cau Hia rodo ina kauts betid ga.

HO’O DE REWENG DE MORI KARAENG: NARING GA LITE YESUS KRISTUS
@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 05-02-12

HO’O DE INJIL DE MORI YESUS ATA TUNTI LIHA MARKUS 6:30-34
NARING GA LITE YESUS KRISTUS

Cang du kolen Hia one mai mbaru ngaji hitu, Yesus agu hia Yakobus agu Yohanes ngo ngger sina mbarud di Simon agu Andreas. Inang di Simon reme tokon hia ai reme beti/pempangn hia. Gelang-gelang toin lise kreba beti hitu ngger one Yesus. Hia ngo ngger one bate toko diha inang hitu; mai Hia ga cau limed data tu’a ende hitu; kengko Liha ata tu’a ende hitu; poli hitu rodo ina kaut beti pempangn ata tu’a ende hitu. Poli hitu ga ata tu’a ende hitu to’o agu rebok urus meka dise situ. Du tiong wie tana ga, du poli kolepn mata leso, ba lise sangged ata beti agu ata woreng le jing da’at ngger one Yesus. Sangged ata ka’eng one kota hitu mai impung lupi Hia; ise hese olo para mbaru. Hia pande ina do keta ata beti mese agu pande mber kole Liha do jing da’at; toe sendos liha sangged jing da’at situ kudut te curup ko tombo, ai bae lise Hia.

Du gula ucap ga, du sapu rebem kin gula hitu, to’o tokoN Hia agu ngo be pe’ang mai kota hitu. Hia ngo one osang bate ciko agu lik keta kudut te ngaji sina hitu. Landing ise Simon agu sanggaed hae reban ga nggili-nggoeng kawe Hia. Du itan lise Hia ga, mai tae dise one Hia, “Sangged ata do reme kawe IteD.” Mai wale diha ga, “Eme ne nggitu ge, tah com ngo tite ge ngger one osang bate bana, ngger one kota-kota iwod lupi ce’e ho’o, kudut Aku nganceng ba kreba di’a Injil sina hitu, ai hitu de betuan mai Daku mai one lino ho’o.” Poli hitu ga Hia ngo lako labok tana Galilea, ngo kreba injil one mbaru-mbaru ngaji dise agu pande mbers Liha sangged jing-jing da’at.

HO’O DE REWENG DE MORI KARAENG: NARING GA LITE YESUS KRISTUS

KREBA DI'A LESO HO'O

HO’O DE INJIL DE MORI YESUS ATA TUNTI LIHA MARKUS 6:30-34
NARING GA LITE YESUS KRISTUS (04-02-12)

Poli hitu ga sangged taung ata nungku situ impung tau agu Yesus agu tura lise one Hia sangged apa kaut ata poli pande dise agu toing dise lawang ho’o. Mai tae Diha ga agu ise, “Ole eme ne nggitu e, com ngo one osang pate ciko di Ite to, kudut te asi mael di ce koen.” Ai do keta ata ata mai kawe ise agu poli hitu kole koles, wiga ise wili ga toe nganceng te hang ko asi-asi. Itu de tara tetid ise ga leti lambo (perahu) ngo one osang pate ciko ngo kudut te asi-asi ce koen agu te ka’eng hanang koe. Landing du kudut wangka pu’ung lakod perahu dise ga ita lata do lako dise agu bae kole lise ngo ngger nia lambo dise hitu. Ata do situ ga lako lut salang tana masa; ise lako gelang-gelang (lako sput) mai one mai sangged kota-kota te ngo ngger sina osang hitu; ise lako paor loleng salang kepu ngo ngger sina hitu. Cang du wa’ud ise one mai lambo ga, ita liha Yesus ata do situ reme keta impungd sina hitu; ita ise so’o ga, weong keta nain Mori Yesus le momang, ai ise situ cama keta neho jimbal-jimbal ata toe manga mori gembalad. Poli hitu ga Yesus wangka kole toing sangged ise; Hia toing do keta apa-apa agu ise.

HO’O DE REWENG DE MORI KARAENG: NARING GA LITE YESUS KRISTUS

KREBA DI'A LESO HO'O

HO’O DE INJIL DE MORI YESUS ATA TUNTI LIHA MARKUS 6:14-29
NARING GA LITE YESUS KRISTUS (03-02-12)

Poli dengen kole liha Raja Herodes ga ngong Yesus, ai mesen ngasang Dia ho’o agu ne nggo’o tae data situ ngong Hia, “Yohanes Cebong poli mose kolen wa mai boan ga, ai hitu de tara manga rang kuasa mesen Hia.” Landing ne nggo’o tae data iwod: “Hia ho’o de hia Elia!” Landing mai tae data iwod ga: “Hia ho’o de nabi, cama neho nabi sio danong.” Cang du dengen liha Herodes ga ngong sangged tombo situ, mai taen ga, “Toe tah, ata hitu de hia Yohanes, hiot poli mbelen laku ga, landing poli mose kolen gi.”
Ai hia Herodes hitu de ata jera (susung) ata kudut te deko hia Yohanes hitu agu langki hia one bui soho mbotek (perkara) diha Herodias, wina diha Filipus, ngai ase-ka’e de run kin hia Herodes; ai hia Herodes ho’o emi/wendo hia Herodias kudut te jiri wina laingy liha.

Cang du hitu donde keta hia Yohanes tegur hia Herodes, ne nggo’o taen: “Toe dis de hau te emi/wendo wina de ase-ka’e de rum hau e.” Itu de tara heres keta nain hia Herodias one hia Yohanes; nanang kudut te mbele liha, landing toe di nganceng kin, ai hia Herodes tengguk sa’in one hia Yohanes, ai bae kole liha hia Yohanes ho’o de ata mose molor agu ata nggeluk; itu tara kamben liha. Eme senget tombo di Yohanes hia, gega le-lau molem taung nain, landing hia senang ketay nain te senget tombo situ.

Cemoln ga caiy de leso ata di’an keta latangt hia Herodias, pas du hia Herodes pande pesta leso loasn; du hitu hia Herodes pande pesta mese; siros liha sangged ata mese diha kudut te mai one pesta mese hitu, te mai hang; ne nggitu koles sangged ata mese one dinas tentara diha, agu sangged ata mese one tana Galilea hitu. Cang du hitu ga anak molas diha Herodias congka-sae one pesta mese hitu; senang ketay nain hia raja Herodes agu sangged meka mese diha. Mai taed de Raja ga one anak molas hitu: “Tegi apa kaut ata ngoeng de hau, sendos laku ce pisa, konem po berehan one mai Kerajaan daku hoo!” Landing anak molas ho’o gelang-gelang ngo one enden, “Ende ye, tegi apa keta de ata di’an ga?” Mai wale de enden hitu ga, “Tegi sa’i diha Yohanes Cebong.” Gelang-gelang ngon anak molas ho’o ngger one istana raja agu mai tegin ga, “Ne nggo’oy de ngoeng daku e ema raja, kudut te ho’on lite ga, ba sa’i diha Yohanes Cebong lobo mangko (dulang) mese.” Weong keta nain hia raja ho’o ga, landing wajol le reke-sumpan hio bao ga agu wajol le sangged meka mese situ diha, toet toe sendo liha tegi hitu. Gelang-gelang jeran (susungn) liha ce ngata ata algoju kudut te ngo emi sa’i diha Yohanes one bui. Ata hitu ngo one bui agu ketek liha bokak diha Yohanes. Poli hitu ga, ba liha sa’in lobo mangko (dulang) mese, agu teing liha sa’i hitu one anak molas hitu, agu mai anak molas hitu ga teing kole ngger one enden.
Cang du dengen le sangged ata nungkun hia Yohanes kreba susa mese hitu, mais ise ga mai te emi rapu diha Yohanes; poli hitu ga mai lise boak one boa.

HO’O DE REWENG DE MORI KARAENG: NARING GA LITE YESUS KRISTUS

KREBA DI'A LESO HO'O

HO’O DE INJIL DE MORI YESUS ATA TUNTI LIHA LUKAS (2:22-40)
NARING GA LITE YESUS KRISTUS (02-02-12)

Cang du rapak leson te pande cebong neho tae de adak hukum diha Moses ga, dade lise Hia ngger lau Yerusalem kudut te condo Hia ngger one rang de Morin, neho manga ata poli tulisn one hukum de Morin, “Sangged anak ngaso ata rona paka pande nggeluk latangt te Mori Karaeng,” agu kudut pande takung lut apa ata poli peden one reweng de Morin; ise paka ba suan tekur wina-rona ko suan anak tekur-tuang (merpati).
Sina Yerusalem hitu manga cengata ata rona, ngasangn hia Simeon. Hia ho’o de ata molor keta mosen agu ata nggeluk; hia cebo gereng kin lembu nai latangt ata Israel; hia kole ata poli de’in le Nai Nggeluk. Nai Nggeluk poli toi agu cengka one hia: hia ce pisa toe di matay dengkir cain Mesias, agu ita liha Mesias hitu; Mesias hitu de ata ata Luma le Mina Nggeluk le Mori Karaeng. Nai Nggeluk hitu kole jera hia te ngo sina Mbaru de Mori Karaeng. Cang du Yesus, Anak hitu, dade le ende-emaN ngger one mbaru hitu kudut te pande apa ata paka pande latang te Hia lorong tae de hukum de Mori Karaeng, Simeon tiba Anak hitu agu kapu liha Anak hitu agu cebo naring Mori Karaeng, agu ne nggo’o taen hia:

“Mori e, te ho’on ga,
kong kaut lako-koleg aku mendiD,
lako agu hambor one naig,
lorong runin reweng Dite,
ai ita keta le mata de rug aku ho’o ga mose di’a ata mai one mai Iten,
ata poli pandeN Lite olo mai ranga de sangged ata mensia,
ngong gerak mese ata panden toton ngoeng Dite latangt sangged bangsa ce bana
agu jiri bong nai laing latangt ro’eng nggeluk Dite, Israel.”

Ende agu emaN lenget tu’ung du denged lise sangged taung apa ata taed dise ngong Hia. Poli hitu ga, Simeon teing berkak agu ise agu mai taen one hia Maria, endeD Anak hitu, “Bo setu’un e, Anak ho’o de poli pilen kudut te pande pa’un ko mosen ata do one Israel agu kudut te jiri tanda pande lewang taut ata, kudut nggirongn sangged nuk nai de ata do. Landing ce pisa ga manga ca kelewang lewe ata ceka wakar de hau.”

Manga kole sina hitu cengata ata inewai tua, ngasangn hia Hanna; hia ho’o de ata nabi inewai, anak inewai diha Fanuel one mai uku data Asyer. Tu’a dunggak keta hia ho’o ga. Du poli kawingn danong ga hia mose lawang pitu ntaung agu ronan, sangge to ho’on ga hia mose luang agu alompulu ntaung umurn ga. Toe manga pernan hia ngo be pe’ang mai mbaru De Mori Karaengn hitu; wie-leso hia seber te pande ibadah, pande puasa agu ngaji. Cang du hitu kole ga hia ngo sina Mbaru de Mori Karaeng hitu agu condo delek mose ngger one Morin agu manga taen kole hia ngong Anak hitu latangt sangged ata ata gereng kreba losan Yerusalem one mai susan.

Du poli panded sangged taung apa ata paka panded lise ga lorong hukum adak de Mori Karaeng, koles de ise ga ngger one kota osang bate ka’eng dise, sina kota Nazaret sina Galilea. Anak hitu tambang-tambang keta eta-eta tuan ga, tambang mberes kole wekiN, penong le Hikmat de Mori Karaeng, agu berkak de Mori Karaeng manga agu Hia.

HO’O DE REWENG DE MORI KARAENG: NARING GA LITE YESUS KRISTUS