KREBA DI'A LESO HO'O 07-04-12

HO’O DḖ INJIL DE MORI YḖSUS ATA TUNTI LIHA MARKUS 16:1-8
PAKA NARING GA LITḖ MORI KRAẺNG (07-04-12)


Cang du poli laun leso Sabat ga, hia Maria Magdaléna agu hia Maria endé diha Yakobus, agu hia Salomé weli rempa-rempa kudut te ngo ngger sina boa kudut te luma weki rapu Mori Yésus. Cang du gula ucap sapu rebem kin ga du leso te can one minggu hitu, cang du kudut parn leso ga, ngo isé ngger sina boa. Isé taé agu tombo cama taud, “Céi to’ong ata pandé nggolongn watu hitu latang te ité oné mai para boa hitu?” Maik cang du lélon lisé ruis main ga, ita lisé, watu hitu poli nggolongn ga. Ai watu hitu watu mésé kétay. Poli hitu isé ngo boné boa hitu agu ita lisé cengata ata ngai reba kin ata paké juba léwé warna bakok ngai lonton oné dungka wanangn boa hitu. Rantang da’at kétas isé, maik mai taé data reba hitu ga ngger one ise, “Néka rantang é! Méu nanang mai te kawé Hia Yésus ata Nazarét, ata hiot poli pangkot oné panggoln ga. Poli mosé kolén Hia ga. Hia toé manga cé’é ho’oY. Lélo ga! Ho’o dé osang baté loling boakn lisé Hia. Maik te ho’on ga ngo meu, tombo ngger oné sanggéd ata nungku Diha agu ngger oné hia Pétrus: Hia ngo ngger sina Galiléa olo mai méu; sina hitu méu ngancéng ita agu cumang Hia cepisa, ného apa ata poli taé Diha ngger oné méu.” Poli hitu isé ngo be pé’ang agu losi gélang-gélang oné mai boa hitu, ai jejer kétas isé; isé kolé rantang da’at kétas. Isé toé tombo apa-apa cekoén ngger oné ata ai isé rantang kétas.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 06-04-12

HO’O DḖ TOMBO NUNDUK CUKUNG SUSA DE MORI YḖSUS ATA TUNTI LIHA YOHANES 18:1-19:42
PAKA NARING GA LITḖ MORI KRAẺNG (06-04-12)


Isé Deko Mori Yésus
Cang du polin Mori Yésus taé sanggéd taung apa situ ga, Hia ngo be pé’ang mai osang hitu cama-cama agu ata nungku Diha; isé ngo be sina mai Ngalor Kidron. Sina hitu manga ca uma; Hia ngo boné uma hitu cama-cama agu ata Nungku Diha. Yudas, ata hiot nanang te pandé khianat Mori Yésus, baé kolé liha osang uma hitu, ai dondé kéta Mori Yésus mai agu nempung sina hitu agu sanggéd ata nungku Diha. Poli hitu ga mai kolé hia Yudas ngger sina hitu agu mai cama-cama agu ca pasukan tentara agu ata tukang lami Mbaru de Mori Kraéng; isé situ dé ata jera le sanggéd imam-imam ata tu’a laingd agu sanggéd ata Farisi; isé mai lekap kéta agu lampu lentéra, obor agu senapangd. Mori Yésus, poli baé kéta taungd sanggéd apa kaut ata nanang te mai jiri ngger oné mosé Diha, lako ngger olo agu mai taé Diha ga ngger oné isé situ, “Kawé céi leng méu ho’o ta?” Mai walé disé ga, “Hia Yésus sina mai Nazarét é.” Mai taé Diha ga ngger oné isé, “Aku ho’o dé Hia hitu.” Hia Yudas hiot nanang te pandé khianat Hia hesé kolé sina hitu cama-cama agu isé. Cang du Mori Yésus taé ne nggo’o ngger oné isé, “Aku ho’o dé Hia hitu,” hedong ngger musis isé agu pa’u ngger wa tanas. Poli hitu ga Hia réi kolé ngger oné isé, “Kawé céi léng méu ho’o ta?” Mai walé disé ga, “Hia Yésus sina mai Nazarét é.” Mai walé de Mori Yésus ga, “Poli Laku taén bao ngger oné méu ga, Aku ho’o dé Hia hitu. Ẻmé méu nanang te kawé Aku, kong kaut isé so’o ngod ga.” Ne nggitu dé ngoéng Diha kong jiri taungs sanggéd reweng ata poli taéd Liha lawang ho’o, “Oné mai isé so’ot ata poli téid Lité ngger oné Aku, toé kéta manga cengatan ata kongd Laku te mata ne nggitu kauts.” Poli hitu ga hia Simon Pétrus, manga lérong kopé léwén; emi liha kopé léwé hitu agu cako liha kopé hitu ngger oné cengata ata mendi de Imam Mésé wiga kedok muing tilu wanang data hitu. Ngasang de mendi hitu dé hia Malkhus. Mai taé de Mori Yésus ngger oné hia Pétrus, “Olé, na’a kolé ngger oné bakon le hau kopé léwé hitu ta; ai bom toé nanang te inung Laku piala hiot ata téing liha Ema ngger oné Aku ho’o?”

Mori Yésus Olo Mai Hia Hanas – Pétrus Walé Toé Ngong Mori Yésus
Poli hitu ga pasukan tentara agu perwira disé agu sanggéd ata lami ata poli jera lata Yahudi situ deko Mori Yésus agu wéo lisé Hia. Olo ba lisé Hia ngger oné hia Hanas, ai hia Hanas hitu dé amang diha Kayafas ata jiri Imam Mésé laingy du ntaung hitu; hia Kayafas ho’o dé olo ata poli téing naséhat ngger oné ata tu’a laing data Yahudi situ, “Céwé mésén gunan émé mata cengatan ata latang te sangged taung bangsa.” Hia Simon Pétrus agu cengata ata nungku haén ga lut hia Mori Yésus. Ata nungku hitut cengata ga baé tau agu hia Imam Mésé hitu; ata nungku hitu ngo be boné cama-cama agu Mori Yésus ha’éng oné dungka natas de istana Imam Mésé hitu, maik hia Pétrus ga ka’éng be pé’ang mai kin ruis dungka para. Ata nungku ce bana hitu, hitut baé tau agu Imam Mésé hitu, ngo kolé be pé’ang, agu saok oné inéwai ata lami para hitu agu dadé liha hia Pétrus ngo boné. Mai taé de mendi inéwai hitut lami para ngger oné hia Pétrus, “Olé cala hau ca ta ata nungku Data hitu é?” Mai walé diha Pétrus ga, “Toé yé!” Pas du rémé hitun ga sanggéd mendi-mendi agu ata tukang lami Mbaru de Mori Kraéng poli pandé ketén ca api kunceng, ai ces kéta wie hitu; sanggéd isé ga hesé ruis api hitu te pande mut wekid. Hia Pétrus kolé hesé te pandé mut wekin cama-cama agu isé.
Poli hitu ga wangka pu’ung hia Imam Mésé réi-réi Mori Yésus ngong sanggéd ata nungku Diha agu sanggéd apa ata toing Diha. Mai walé de Mori Yésus ga ngger oné hia, “Aku ho’o toé manga ceha-cehad tombo Daku latang te lino ho’o: Aku ho’o dondé kéta pandé ba toing oné mbaru-mbaru ngaji agu sina Mbaru de Mori Kraéng, osang baté nempung de sanggéd ata Yahudi; toé manga laséng ceha-cehad tombo Daku ta. Co’o tara réi Akum hau? Réi kaut le hau sanggéd isé, siot poli séngét apa ata poli taé Daku ngger oné isé; tetu’ung baé lisé apa ata poli taé Daku.” Cang du taé ne nggitun Hia ga, cengata ata tukang lami ata rémé hesé ruis hitun, pak le baka liha ranga Diha, agu ne nggo’o taén, “Olé ne nggitu kéta walé de Hau latang te Imam Mésé ko?” Mai walé de Mori Yésus ga ngger oné hia, “Ẻmé manga salan curup Daku hitu é, taé koé le hau nia wan salan, maik émé benarn curup Daku hitu é, co’o tara pak le bakag Aku le hau ga?” Poli hitu hia Hanas jera ba Hia du rémé wéo kin ngger oné hia Kayafas, Imam Mésé hitu.
Hia Simon Pétrus ngai hesén agu pandé mut wekin ruis dungka api. Mai taé data sina hitu ga ngger oné hia, “Olé cala hau ca ta ata nungku Data hitu é?” Walé toé kolé liha agu ne nggo’o taén, “Toé yé.” Mai taé de cengata ata ngai keluarga kin de mendi hiot poli ketek tilun liha Pétrus, “Olé ita hau ca laku ta sina uma hitu cama-cama agu Hia é?” Walé toé kolé liha Pétrus agu pas kéta cang du hitu ga kakor lalong.

Dadé Lisé Mori Yésus Ngger Olo Ranga Diha Pilatus
Poli hitu, ba lisé Mori Yésus mai sina mai hia Kayafas ngger sina mbaru istana de gubernur. Cang du hitu ngai gula kin tana. Weki rud isé toé ngo be boné mbaru istana de gubernur hitu, rantang boto pandé najis (rinek) weki rud isé, ai isé nanang te hang ramé Paska. Hitu de tara ngo be pé’angn hia Pilatus kudut te cumang isé agu ne nggo’o taé diha, “Apa léng mangkong de méu latang te ata ho’o ta?” Mai walé disé ga ngger oné hia, “Ẻmé Hia ho’o toé ata da’aty, toé kéta manga sorokn lami hia ngger cé’é ité!” Mai taé diha Pilatus ga ngger oné isé, “Emi kaut le méu Hia ta agu pandé beté bicar le méu Hia lorong agu hukum de rus méu.” Mai taé de sanggéd ata Yahudi situ ga, “Toé sendo dé ami ho’o te pandé wahéng mata ata é.” Ne nggitu de jirin kong pandé genap apa ata poli taé de Mori Yésus, ata poli taén liha kudut te toing ngong cara mataN Hia cepisa.
Pilatus ngo be boné kolé ngger oné istana de gubérnur, agu bénta liha Mori Yésus agu mai réin hia ga ngger oné Hia, “Ai Raja data Yahudi léng Hau ho’o ko?” Mai walé de Mori Yésus ga, “Ai mai wa mai de rum kéta apa ata ho’ot réi de hau ko, ko manga ata cebanan ata saok ngger oné hau ngong Aku ho’o?” Mai taé diha Pilatus ga, “Ai ata Yahudi léng aku ho’o ko? Bangsa de Rum dé Hau agu sanggéd imam-imam ata tu’a laingd ata poli téing Hau ngger cé’é aku; apa léng pande de Hau lawang ho’o ta? Mai walé de Mori Yésus ga, “Perénta Daku toé mai oné mai lino ho’on; émé Perenta Daku mai oné mai lino ho’on, pasti sanggéd ro’éng Daku poli pandé rahad ga, maik Perénta Daku toé mai cé’é ho’o main.” Poli hitu mai taé diha Pilatus ga ngger oné Hia, “Aéh, jadi Hau ho’o raja ko?” Mai walé de Mori Yésus ga, “Hau dé ata taé Aku ho’o raja é. Hitu dé tara loas Gaku agu hitu dé tara maig Aku ngger oné tana lino ho’o, kong Aku ngancéng téing saksi ngong kebenaran; sanggéd ata ata mai oné mai kebenaran pasti séngét reweng Daku.” Mai taé diha Pilatus ga ngger oné Hia, “Ngong apa léng kebenaran hitu ta dé?”

Mori Yésus Wahéng le Wahéng Mata
Cang du poli taé ne nggitun ga, hia Pilatus ngo be pé’ang kolé ngo te cumang sanggéd ata Yahudi situ agu taé ne nggo’o ngger oné isé, “Olé, toé kéta manga dumpu can laku salan ata ho’o ta. Landing manga laséng de méu lawang ho’o du rémé leso ramé Paska, lego laku cengatan ata latang te méu. Ngoéngs méu ko, kong aku ho’o legong raja data Yahudi ho’o latang te méu?” Mai ciék walé disé ga, “Néka hia é, maik hia Barabas!” Hia Barabas ho’o dé ata tukang perampok mésé.

Poli hitu hia Pilatus witir hia Mori Yésus agu jera ata liha kudut pandé ndaék Hia. Sangged ata prajurit dolé ca songkok karot agu na’a lisé béta sa’i Diha. Isé kolé emi ca juba-léwé ata laka warnan agu paké lisé ngger oné weki Diha; poli hitu lako ngger olos isé agu mai taéd ga, “Tabé o, raja data Yahudi!” Poli hitu pak le baka lisé ranga Diha.
Pilatus ngo be pé’ang kolé agu mai taén ga ngger oné isé, “Lélo ga, aku ho’o ba Hia ngger pé’ang te lélo le méu, kudut te baé le méu aku ho’o toé kéta manga dumpu can laku salan ata ho’o.” Poli hitu Mori Yésus ngo be pé’ang, agu paké ca songkok karot agu paké kolé juba léwé laka. Poli hitu mai taé diha Pilatus ga ngger oné isé, “Lélo ga le méu ata ho’o!” Cang du sanggéd imam-imam ata tu’a laingd agu sanggéd ata tukang lami situ ita Hia, mai ciék disé ga, “Pangkot oné panggol kaut Hia, pangkot oné panggol kaut Hia!” Mai taé diha Pilatus ga ngger oné isé, “Emi le rus kaut méu Hia agu panggol kaut Hia; ai weki rug aku ho’o toé kéta manga dumpu can laku salan ata ho’o.” Mai walé de sanggéd ata Yahudi situ ga ngger oné hia, “Manga ca hukum dami é, agu émé lorong hukum hitu, Hia ho’o dé paka pande matay, ai Hia lélo weki Run dé Anak de Mori Kraéng.”
Cang du dengén liha Pilatus sanggéd taé situ, wangka pu’ung rantangn hia ga, wiga hia ngo kolé ngger oné mbaru istana de gubérnur hitu agu mai taén ga ngger oné Mori Yésus, “Nia maim léng Hau ho’o ta?” Maik Mori Yésus toé walé apa ata réi diha hitu. Wiga mai taé diha Pilatus ga ngger oné Hia, “Olé toé kéta ngoéng te curup agu aku Hau ho’o ko? Toé bau le Hau ko, ngong aku ho’o dé manga rang kuasa te lego Hau, agu manga kolé rang kuasa te pangkot Hau oné panggol?” Mai walé de Mori Yésus ga, “Toé manga rang kuasam hau é émé rang kuasa hitu toé manga téing oné haud mai éta maid. Itu tara ne nggo’on wili ga: Ata hiot polig deko agu téing Aku ngger oné hau ho’o, céwé mésé kéta ndékokn.” Wangka pu’ung du hitu kaut ga Pilatus sibuk kéta te kawé paté salang co’o caran te pandé lego Hia, maik sanggéd ata Yahudi ga raka-raka molés ciékd isé ga, “Ẻmé lego le hau ata ho’o é, hitu dé tandan hau ho’o toé dé haé reba de Kaisar. Céing-céing kaut ata ata lélo weki run sebagai raja, hitu dé ata nanang te melawan dungkang Kaisar.”

Cang du dengén liha Pilatus sanggéd curup situ, jera liha te ba Hia Mori Yésus te ngo be pé’ang; weki run hia ga lonto lobo kursi pengadilan, lobo tempat ata caro Litostrotos lata, oné curup Ibranin ga Gabata. Leso hitu de pas Leso te mengkek pandé ramé Paska; du hitu ga am rémé ongga campulusua kin di. Mai taé diha Pilatus ga ngger oné sanggéd ata Yahudi situ, “Lélo ga raja de méu!” Poli hitu raka-raka kéta ciék disé ga, “Oké Hia ta! Oké Hia e! Panggol kaut Hia ga!” Mai taé diha Pilatus ga ngger oné isé, “Olé paka panggol laku raja de méu ho’o ko?” Mai walé de sanggéd imam-imam ata tu’a laingd situ ga, “Toé manga raja cebanag ami ta; raja dami kali hia Kaisar kali!” Cemoln ga hia Pilatus téing Hia Mori Yésus ngger oné isé kudut te pangkot lisé oné panggol.

Mori Yésus Pangkot éta Panggol
Tiba lisé Hia Mori Yesus. Poli hitu Hia téti te ngo pé’ang mai kota te ngo sina ca osang, ngasangn Osang Tengkorak; oné curup Ibrani ga caron: Golgota. Hia lako déméng agu pola panggolN. Sina hitu isé pangkot Hia oné panggol. Manga kolé sua taus ata cebana, ata pangkot cama-cama agu Hia, cupu mai bali-bali hia, Mori Yésus ga oné réha. Jera liha Pilatus kudut te paku can banggang koé éta panggol hitu ata ne nggo’o tulisn a, “Yésus, ata Nazaret, Raja data Yahudi.” Do ata Yahudi ata baca tulisan hitu, ai tempat baté Mori Yesus pangkot oné panggol toé tadang koén oné mai kota, apan kolé tulisan hitu tulis oné curup Ibrani, Latin, agu Yunani. Poli hitu ga mai taé de imam-imam ata tu’a laingd oné mai ata Yahudi situ ngger oné hia Pilatus, “Olé, néka tulis ne nggitu le hau ta, ‘Raja data Yahudi,’ ata di’an ta tulis ne nggo’o, ‘Taé le Run Hia: Aku ho’o dé Raja data Yahudi.’” Mai walé diha Pilatus ga, “Apa ata poli tulisn laku, kong kaut ne nggitu kin.”
Cang du poli pangkot le sanggéd prajurit situ Hia Mori Yésus ga, isé emi baju Diha agu pati laing pat lisé baju hitu, néténg-néténg prajurit ca bagian – ne nggitu kolé juba léwé Diha emi kole lisé. Juba léwé hitu toé manga ja’ikn, cay kali tenungn mai éta main haéng wan. Wiga mai taé disé ga cama taud, “Olé asi ketekn lité juba ho’o jiri pisa potong ta, céwé di’an émé pandé téka ndu’a lité kudut te baé céi ata pasn te tiba juba léwé ho’o.” Pandé ne nggitu lisé kudut te pandé genap apa ata poli tulisn oné Buku Nggeluk, “Isé pati baju Daku latang te weki rud isé agu poli hitu ga pandé téka ndu’a lisé juba Daku.”
Poli pandén le sangged prajurit sanggéd apa situ ga. Ruis panggol de Mori Yésus ngai heséd Ende Diha agu haé wa’u de endéN hitu, hia Maria, wina diha Kleopas agu hia Maria Magdaléna. Cang du ita liha Mori Yésus endéN hitu ga agu ata nungku hiot momang Diha hesé cupu mai hia, mai taé Diha ga ngger oné endéN hitu, “Endé ye, hitu dé anak de hau ga!” Poli hitu mai taé Diha ngger oné ata NungkuN, “Hitu dé endém e!” Wangka pu’ung kaut du hitu ga ata nungku hitu tiba hia (endé hitu) oné mbaru diha.

Mori Yésus Mata gi
Poli hitu, ai baé kolé le Mori Yésus ngong sanggéd ca o ca poli jiri kéta taungs gi, mai taé Diha ga – kudut te pandé genap apa ata poli tulisn oné Buku Nggeluk – “Aku masa waé!” Sina hitu manga ca gumbang mésé ata penong le anggor héo. Poli hitu emi lisé ca wéla karang, agu bembo lisé wéla karang hitu ngger oné anggor héo hitu, agu wolet lisé wéla karang hitu oné lobon ca laro léwé agu sotor lisé laro hitu ngger éta mu’u de Mori Yésus. Du poli inungn le Mori Yésus anggor héo hitu, mai taé Diha ga, “Poli taungs ga.” Poli hitu pandé tengguk sa’iN Hia agu té’ing Liha nawaN ga.

Isé Ceka Racap de Mori Yésus
Leso hitu de leso te pandé mengkek; rantang boto rapu-rapu situ ngai pangkot ndéong kid éta panggol du leso Sabat – ai leso Sabat hitu dé leso mésé – wiga mais dé sanggéd ata tu’a laing data Yahudi ngger oné hia Pilatus agu tegi lisé porong wa’i data situ pandé tepo kauts agu poli hitu ga, pandé wa’us lisé sanggéd rapu situ. Poli hitu mais sanggéd ata prajurit mai te pandé tepo wa’i dihat cengata ne nggitu kolé wa’i dihat cengata kolé ata panggot oné panggol cama-cama agu Mori Yésus; maik du caid isé oné Mori Yésus agu lélo lisé Hia poli rowan gi, toé jadi pandé tepon lise wa’i Diha, maik cengata oné mai sanggéd prajurit situ ceka le korung racap Diha; poli hitu ga rodo concang nitu main dara agu waé. Ata hitu ita le run kéta apa hitu dé ata téing kesaksian agu kesaksian diha hitu dé benar, agu baé kolé liha ngong hia poli curup kebenaran hitu, kudut nganceng te imbis kolé mé’u ho’o. Ai poli jirid kéta taungd sanggéd ca o ca situ kudut te pandé genapn apa ata poli tulisn oné Buku Nggeluk, “Toé manga can toko Diha ata pandé tepod.” Manga kolé ca nas ce bana ata ne nggo’oy taén, “Isé ce pisa lélo Hia ata poli cekan lisé.”

Boak Mori Yésus ga
Poli hitu hia Yusuf sina mai Arimatéa tegi ngger oné hia Pilatus, porong sendo hia te pandé wa’u rapu de Mori Yésus. (Hia ho’o dé ca ata nungku de Mori Yésus, landing ceha-ceha moléy main hia ai hia rantang sanggéd ata kuasa laingn oné mai ata Yahudi situ.) Sendo liha Pilatus apa ata tegi disé. Poli hitu mai hia ga agu pandé wa’u liha rapu hitu. Ne nggitu kolé hia Nikodémus mai sina hitu. Hia dé olo ata mai le wié tana mai ngger cé’é Mori Yésus. Hia ba mina mur ata poli halok (haor) agu mina gaharu, am telu mpulu kilo mendon. Isé emi rapu de Mori Yésus, rokot lisé le towé lénan agu luma lisé agu rempah-rempah lorong adak data Yahudi émé nanang te boak ata mata. Ruis osang baté pangkot oné panggoln lisé Mori Yésus manga ca uma agu be boné uma hitu manga ca boa weru ata toé di perna paké laingn te boak ata. Ai leso hitu dé leso te pandé mengkek data Yahudi, apan kolé boa hitu toé tadang koén nitu main, wida boak lisé rapu de Mori Yésus ga oné boa hitu.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 05-04-12

HO’O DḖ INJIL DE MORI YḖSUS ATA TUNTI LIHA YOHANES 13:1-15
PAKA NARING GA LITḖ MORI KRAẺNG (05-04-12)


Rémé du hitun ga be bolon wangka pu’ungn leso ramé mésé Paska, Mori Yésus poli baén ngong tiong te caiy leso Diha ga kudut te téti mai oné mai tana lino ho’o ngger oné hia Ema. Hia momang sanggéd ata siot Diha morid ga ata siot ngai ka’éng oné lino ho’o, agu Hia kolé toé manga beténgn te momang sanggéd isé situ. Cang du isé rémé hang cama-camad ga, Jing Da’at poli saok rencana da’at diha oné nai diha Yudas Iskariot, anak diha Simon, rencana kudut te pandé khianat Mori Yésus. Mori Yésus baé kolé Liha ngong hia Ema poli condod sanggéd taung ca o ca ngger oné Hia agu ngong Hia kolé mai oné mai Mori Kraéng agu kolé koléy cepisa ngger oné Mori Kraeng. Poli hitu hesé paka di’a hia Mori Yésus agu na’a pé’ang Liha baju léwé Diha. Emi Liha ca lembar towé lénan; pongo liha towé hitu pas dungka lé’as Diha. Poli hitu ga Hia légé waé ngger oné ca baskom poli hitu wangka pu’ung te waca wa’id de sanggéd taung ata nungku Diha, poli hitu ga, lap kolé Liha le towé ata poli pongon Liha pas dungka lé’asN. Poli hitu cai Hia olo mai ranga diha Simon Pétrus. Mai taé diha Pétrus ga ngger oné Hia, “Mori é, Ité nanang te waca wa’i daku?” Mai walé de Mori Yésus ga ngger oné hia, “Apa ata pandé Daku, toé di idep le hau te ho’on ga, maik cepisa ngancéng idepn le hau apa ho’o.” Mai taé diha Pétrus ga ngger oné Hia, “Toé kéta sendo laku Tité te waca wa’i daku ta Mori sanggé kéta dengkir tayin agu tédéng lén.” Mai walé de Mori Yésus ga, “Ẻmé Aku toé waca wa’i de hau é, betuan dé hitu ga hau ho’o toé ngancéng tiba apa-apa oné mai Aku.” Mai taé de Simon Pétrus ga ngger oné Hia, “Mori é, toé hanang wa’i daku kaut ta Mori, maik limé agu sa’i daku kolé.” Mai taé de Mori Yésus ga ngger oné hia, “Ai céing-céing kaut ata poli cebong, hia hitu dé toé perlu waca wekin kolé ga, ai nggélok taung weki diha ga. Sanggéd méu ho’o kolé nggélok taung ga, landing toé sangged taung.” Ai baé Liha, céing ata nanang te deko agu téing Hia. Itu tara ne nggo’on taé Diha, “Toé sanggés taung méu ho’o nggélok ga.”

Cang du polid Liha waca wa’i disé, paké kolé liha bajuN, agu kolé kolé ngger oné osang baté lonto Diha. Poli hitu mai taé Diha ngger oné isé, “Idep le méu ho’o ko apa ata poli pandé Daku latang te méu? Méu ho’o caro agu bénta Aku Guru agu Mori; toé manga salan caro agu bénta hitu ta, ai Aku ho’o dé Guru agu Mori de méu. Wiga wili ga, émé Aku ho’o, Mori agu Guru de méu, waca wa’i de méu, sanggés méu kolé paka pandé waca wa’i de cama taus méu, ai Aku ho’o poli téing ca wintuk latang te méu, kong méu kolé pandé cama ného apa ata poli pandé Daku latang te méu.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 04-04-12

HO’O DḖ INJIL DE MORI YḖSUS ATA TUNTI LIHA MATIUS 26:14-25
PAKA NARING GA LITḖ MORI KRAẺNG (04-04-12)


Poli hitu ga cengata oné mai campulu sua taus ata nungku situ, ata hiot Yudas Iskariot ngasangn a, ngo ngger oné sanggéd imam-imam ata tu’a laingd. Mai taé diha ga, “Apa léng ata nanang te téi dé méu latang te aku, émé aku téing Hia ngger oné méu?” Isé bajar telumpulu séng perak ngger oné hia. Wangka pu’ung kaut leso hitu ga hia kéta cébong kawe leso ata di’an kéta te téing hia Mori Yésus.

Cang du leso te can oné mai leso ramé mésé Roti ata Toé Manga Ragin ga, mais sanggéd ata nungku de Mori Yésus mai te cumang Hia agu taé ne nggo’o, “Ité, nia wan Ité ngoéng ami kudut te pandé mengkek hang Paska latang te Ité?” Mai walé de Mori Yesus ga, “Damang dé ngo lé kota méu ngo cumang hia kraeng Anu agu taé ne nggo’o le méu ngger oné hia hitu: Ne nggo’o dé pedé de Guru é: Tiong te rapak cain leso Daku ga; Aku nanang te pandé ramé Paska oné mbaru dité ho’o cama-cama agu sanggéd ata nungku Daku.” Poli hitu sanggéd ata nungku Diha pandé ného apa ata poli jera de Mori Yésus ngger oné isé agu isé ga pandé mengkek ramé Paska hitu.

Cang du wié tana ga, Mori Yésus lonto hang cama-cama agu campulusua taus ata nungku situ. Cang du rémé hangd isé ga, mai taé Diha, “Te tu’ung taé Daku ngger oné méu, manga cengata ata oné mai be réha méu ho’o dé ata nanang kéta te deko agu téing Aku ho’o.” Poli hitu, wéong kéta nai disé, agu néténg-néténg isé réi ne nggo’o ngger oné Hia, “Cala toé aku ta Mori?” Mai walé Diha, “Hia hiot cama-cama agu Aku pandé bembo limén ngger oné mangko ho’o, hia hitu dé ata ata nanang te deko agu teing Aku. Anak Mensia cepisa ngoy pas kéta neho apa ata poli tulisn ngong Hia, landing woréng dé mosé data hitut nanang te deko agu téing Anak Mensia hitu. Céwé di’a danong ata hitu émé toé loas ngger oné mosé lino ho’o. Hia Yudas, hitut nanang te deko agu teing Hia taé ne nggo’o, “Cala toé aku ta, Rabi?” Mai taé de Mori Yésus ga ngger oné hia, “Poli taé le rum hau ga.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 03-04-12

HO’O DḖ INJIL DE MORI YḖSUS ATA TUNTI LIHA YOHANES 13:21-33.36-38
PAKA NARING GA LITḖ MORI KRAẺNG (03-04-12)


Cang du poi taé ne nggitun Mori Yésus ga, wéong kéta nai Diha, wiga poli hitu Hia taé ne nggo’o, “Tetu’ung dé Aku taé ngger oné méu ho’o, cengata ata oné mai be réha méu ho’o dé nanang te téing Aku.” Sanggéd ata nungku situ cébong lélo cama taud kali ga, toé baé di’a lisé céi péng ata hitu. Cengata ata oné mai ata nungku de Mori Yésus, ata nungku hiot momang Diha, lonto bérit ruis-ruis Hia, pas du racap wanang Diha. Hia Simon Pétrus téing tanda latang te ata nungku hitu agu mai taén ga, “Damang dé réi ta, ngong céi dé curup Diha hitu bao?” Poli hitu ga ata nungku hitut lonto ruis Mori Yésus hitu holés agu réi ngger oné Hia, “Mori é, céi léng hitu ta?” Mai walé de Mori Yésus ga, “Ata hitu dé ata hiot téing roti Laku to’ong, du poli bembon laku roti hitu.” Du poli taé ne nggitun Hia ga, Hia bembo roti hitu, agu emi Liha agu téing Liha ngger oné hia Yudas, anak diha Simon Iskariot. Cang du poli tiban liha Yudas roti hitu, rodo woréng le Jing Da’at kaut hia ga. Poli hitu mai taé de Mori Yésus ngger oné hia, “Apa kaut ata nanang te pandé de hau, pandé le hau te ho’on ga.” Landing toé kéta manga cengatan ata ata lonto hang cama-cama hitu ata idep co’o tara taé ne nggitun Mori Yésus ngger oné hia Yudas. Ata baé disén kali ga, hia Yudas ho’o dé ata cau kas, wiga ne nggo’o nuk disé, am Mori Yésus jera hia te ngo weli apa kaut ata perlu laingn kudut te ramé mésé hitu, ko ngo te téing apa-apa kaut latang te ata mosé lénggé. Cang du poli tiba roti hitun ga, hia Yudas gélang-gélang ngon. Cang du hitu wié tana ga.

Cang du poli ngon hia Yudas ga, mai taé de Mori Yésus, “Te ho’on dé Anak Mensia pandé hiang agu Mori Kraéng pandé hiang oné Hia. Ẻmé Mori Kraéng pandé hiang oné Hia, Mori Kraéng kolé pandé Hiang Hia kolé oné weki Run Hia, agu nanang te gélang-gélang kolé pandé hiang Hia. Oé anak-anak Daku, toé naisn kolé ga Aku ho’o manga cama-cama agu méu. Méu cepisa kawé Aku, agu ného apa ata poli taé Daku latang te sanggéd ata Yahudi ga: Aku taé ne nggitu kolé te ho’on ga ngger oné méu, Méu toé ngancéng ngo ngger sina osang baté ngo Daku.

Hia Simon Pétrus taé ne nggo’o ngger oné Mori Yésus, “Mori é, ai te ngo ngger nia léng Ité ta?” Mai walé de Mori Yésus ga, “Ngger sina osang baté ngo Daku, hau toé ngancéng lut Aku te ho’on di, landing tayi hau ngancéng lut Aku cepisa.” Mai taé de Pétrus ga ngger oné Hia, “Mori é, co’o tara toé ngancéng lut Itég aku te ho’on ga? Aku ho’o nanang te lagang nawa/mosé daku latang te Ité!” Mai walé de Mori Yésus ga, “Apa, hau nanang te lagang nawam (mosém) latang te Aku? Tetu’ung Aku taé ne nggo’o latang te hau: Be bolon kakor lalong ga, hau poli walé toe ngong Aku telu ngkalin.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 02-04-12

HO’O DḖ INJIL DE MORI YḖSUS ATA TUNTI LIHA YOHANES 12:1-11
PAKA NARING GA LITḖ MORI KRAẺNG (02-04-12)


Enem leso be bolon leso ramé Paska, Mori Yésus mai ngger cé’é Bétania, cé’é osang baté ka’éng diha Lazarus ata hiot poli pandé to’o kolé wa mai boan le Mori Yésus béhéng. Sina hitu pandé lisé ca perjamuan latang te Hia; hia Marta cébo urus layan isé; cengata ata ata hang cama-cama agu Mori Yésus dé hia Lazarus. Poli hitu hia Maria emi ca stengan mina narwastu kanang (murni) ata wegit kéta hargan; poli hitu luma liha wa’i de Mori Yésus le mina hitu agu susak (lap) liha wa’i hitu le wuk de run; lawer bengé de mina hitu ngancéng noingn oné labok mbaru hitu. Maik hia Yudas Iskariot ga, cengata oné mai ata nungku de Mori Yésus, hiat nanang te téing Hia, taé ne nggo’o, “Olé co’o tara toé pikan mina narwastu ho’o ta, pika teluratus dinar, poli hitu séngn ga téing ngger oné ata mosé lénggé (kasiasi)?” Hia taé ne nggitu toé le manga momang agu perhatian hia latang te ata mosé lénggé situ, maik ai hia dé ata tako; dondé kéta hia emi séng ata na’a oné kas ata cau liha. Poli hitu mai taé de Mori Yésus ga, “Kongn kaut hia pandé apa ho’o ta ai kudut te nuk leso boak Daku cepisa. Ai ata mosé lénggé dé manga molém taung agu méu, maik Aku ho’o dé toé manga molém taung cama-cama agu méu cepisa.

Dengé le pisa taus atas Yahudi ngong Mori Yésus manga sina hitu, o maid isé landing toé mai te cumang Mori Yésus kaut, maik te lélo hia Lazarus, ata hiot poli pandé to’on Liha wa mai boan béhéng. Poli hitu sanggéd imam-imam ata tu’a laingd manga nanangd te mbelé hia Lazarus kolé, ai le hia dé do kéta ata Yahudi poli legong iséd ga agu imbi ngger oné Mori Yésus.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 01-04-12

HO’O DḖ TOMBO NUNDUK CUKUNG SUSA DE MORI YḖSUS ATA TUNTI LIHA MARKUS 14:1-15:47
PAKA NARING GA LITḖ MORI KRAẺNG (01-04-12)


Bantang te Mbelé Mori Yésus
Leso ramé mésé Paska agu leso ramé mésé Roti ata Toé manga Ragin téké sua leson kolé te tiong caid ga. Tuang-tuang ata tu’a laingd agu sangged ata mbeko getok Taurat cébo kéta kawé patén te deko agu te mbelé Mori Yésus le aréng mésé, ai ne nggo’o taé disé, “Néka pas du leso ramé mésé hitu, ai boto manga ngai-ngaok oné be réha ro’éng-ro’éng so’o.”

Mori Yésus Luma le Mina
Cang du Mori Yésus manga sina Bétania, sina mbaru diha Simon ata kusta, agu rémé lonto hangn sina hitu, maiy cengata inéwai mai ba ca botol pualam; icin botol hitu ga mina narwastu bengé ata wegit kéta hargan. Du poli pandé bikén liha dungka bokakn botol hitu, poli hitu ga loli liha mina hitu ngger lobo sa’i de Mori Yésus. Landing pisa taus ata nitu rengus rangad agu reget naid agu mai taéd agu cama taud, “Te co’on kéta tara pandé kéba-kaékn mina bengé narwastu ho’o ga? Ai mina ho’o ngancéng pikan agu hargan ga lebi oné mai teluratus dinar; poli hitu ga séngn ngancéng téing ngger oné ata mosé lénggé.” Wiga isé rabo ata inéwai hitu. Landing mai taé de Mori Yésus ga, “Kongn kaut hia. Co’o tara pandé susa hias méu ta? Hia poli pandé ca gejur ata di’an latang te Aku. Ai ata mosé lénggé manga tédéng agu méu; ce pisa kaut méu ngoéng te campé isé, méu ngancéng campé isé, landing Aku ho’o dé toé manga tédéng cama-cama agu méu. Hia poli pandé apa ata ngancéng pandén liha. Poli luman liha weki Daku; hitu dé persiapan latang te ruku boak Daku ce pisa. Tetu’ung kéta taé Daku ngger oné méu: Nia-nia kaut Injil kréban oné labok tana lino ho’o, apa ata poli pandé diha ho’o ga pasti caro tédéngy tayi kudut te nuk agu tenang hia.”

Yudas Pandé Kianat Mori Yésus
Poli hitu hia Yudas Iskariot, cengatad oné mai campulusuad ata nungku situ, ngo ngger oné sanggéd imam ata tu’a laing kudut te téing Mori Yésus ngger oné isé. Senang kéta nai disé cang du dengé tombo hitu; pandé reké lisé kudut te téing séng ngger one hia. Poli hitu ga hia (Yudas) cébo kawé ca kesempatan ata di’an kéta kudut te teing Mori Yésus.

Mori Yésus Hang Ramé Paska agu sanggé ata Nungkun
Cang du leso te can oné mai Leso Ramé mésé Roti ata toé manga Ragin, pas cang du ata mbelé Domba Paska, ata nungku de Mori Yésus taé ne nggo’o ngger oné Hia, “Ngger nia Ité nanang jera ami te ngo kudut pandé siap-siap latang te Hang Paska latang te Ité ga?” Poli hitu Hia jera sua taus ata nungku Diha agu mai pedé Diha ga, “Ngo méu ga ngger sina kota; sina hitu manga cengata ata ba sémpé/gélo ata manga waén bonén; ata hitu manga kaut mai cumang méun. Lut kaut hia méu agu taé ne nggo’o le méu ngger oné ata morin mbaru ata cénggo diha: ne nggo’o de pedé de Mori Tuang Guru: Nia wan lo’ang osang baté Aku hang Paska cama-cama agu sanggéd ata nungku Daku? Poli hitu ata hitu toto ngger oné méu ca lo’ang béta lobo, loang ata mésén kéta; poli taungs lengkapd sanggéd persiapan kudut pésta hitu. Sina hitu dé méu paka pandé siap hang Paska hitu latang te sanggéd ité ho’o!” Sua taus ata nungku situ téti te ngo sina hitu; cang du caid isé ga sina kota hitu, isé ita kéta taung cama ného apa ata poli taé de Mori Yésus latang te isé bao. Poli hitu ga isé pandé siap ramé Paska.
Pas cang du wié tana ga, maiy Mori Yésus cama-cama agu campulu sua taus ata nungku Diha. Cang du rémé lontod isé sina lo’ang hitu agu rémé hangd isé, mai taé de Mori Yésus, “Tetu’ung kéta taé Daku ngger oné méu, manga cengata ata oné mai be réha méu ho’o ata nanang te deko Aku kudut te téing Aku ngger oné Tu’a-tu’a data Yahudi, hia hitu dé ata hang cama agu Aku.” Wangka pu’ung wéongd nai disé ga wiga néténg-néténg isé réi ngger oné Hia, “Cala toé aku ta Mori?” Mai walé Diha ga, “Ata hitu dé cengata oné mai be réha méut campulusua ho’o, hia hitu bembo rotin ngger oné ca mangko cama-cama agu Aku. Ai Anak Mensia ho’o ngoy cepisa lorong manga ata poli tulisn ngong Hia, landing ata hitut deko Anak Mensia hitu cepisa lerak agu mempoy tayi. Céwé di’a ata hitu danong émé toé loas ngger oné mosé tana lino ho’o.”

Pandé Tetapn Perjamuan de Morin
Cang du Mori Yésus agu sanggéd ata nungkuN rémé hangd ga, Mori Yésus emi roti, torok paka di’a Liha sanggéd delék Disé, poli hitu pandé pati-pati Liha roti hitu poli hitu ga téing roti hitu ngger oné isé agu mai taéNga, “Ẻmi ga le méu, ho’o dé weki Daku.” Poli hitu Hia émi piala, torok paka di’a Liha delék Disé, poli hitu téing Liha piala hitu ngger oné isé; sanggéd isé ga inung oné mai piala hitu. Mai taé Diha ga ngger oné isé, “Ho’o dé dara Daku, dara reké, dara ata concang latang te ata do. Tetu’ung kéta taé Daku ngger oné méu: Aku ho’o toé tara inung kolé tayi dani oné mai pu’u anggor sanggé du leso Aku inung anggor hitu, pas du leso weru tayi, oné Perénta de Mori Kraéng.”

Hia Pétrus Walé Toé ngong Mori Yésus Cepisa
Cang du polid isé déré sanggéd déré naring’d ga, isé ngo ngger sina Golo Zaitun. Poli hitu mai taé de Mori Yésus ga ngger oné isé, “Sanggéd taung imbi de méu ho’o cepisa manga kaut gégégoa laingd. Ai manga ata poli tulisn ne ngo’oy: Aku cepisa ongga gembalad wiga sangged domba-domba’n ga losi mbirakang pinanaéngd. Landing, cang du poli to’o kolég Aku wa mai boa ga, Aku ho’o cepisa ngo ngger sina Galiléa be bolo mai méu.” Mai taéd Pétrus ga ngger oné Hia, “Koném po sanggéd isé so’o gégégoa imbid cepisa, aku toé ne nggituk cepisa.” Poli hitu mai taé de Mori Yésus ngger oné hia, “Tetu’ung kéta taé Daku ngger oné hau, du leso ho’o, pas keta wié ho’o to’ong ga, du bebolon kakor lalong sua ngkalin, hau poli telu ngkalin ga toé mengaku hau ata nungku Daku.” Landing mai taé diha Pétrus ga ného kéta mai wa nain kéta, “Koném po aku ho’o paka mata cama-cama agu Ité, toé keta gori’g aku te pandé woréng Ité.” Sanggéd taung isé iwod situ ga curup ne nggitu kéta taungs kolé.

Sina Uma Mina
Poli hitu cais isé Mori Yésus agu sanggéd ata nungkuN ngger sina ca osang, Getsemani ngasangn osang hitu. Mai taé de Mori Yésus ga ngger oné sanggéd ata nungkuN hitu, “Lonto no’o méu ga, ai Aku nanang ngo te ngaji.” Dadé Liha hia Pétrus, Yakobus agu hia Yohanés cama-cama agu Hia. Cang du hitu ga Hia wangka pu’ung susa agu wéong kéta nain agu rantang kéta Hia, wiga mai taé Diha ga ngger oné isé, “Olé wéong kéta noingn nai Daku, ného kéta ngoéng te mata noing na. Ka’éng dapang no’o méu agu lami terus cama-cama.” Poli hitu Hia lako ngger olo koé cekoén; Hia toko tegep ngger wa tana agu pu’ung ngajin Hia, ngaji kudut te tegi émé ngai kong kin, porong mosé ké’ot hitu gélang-gélang koé lagén oné mai mosé Diha te ho’on ga. Mai taé Diha ga, “Ema, yo Ema, sanggéd ca o ca toé kéta manga ata toéd oné ranga Dité, emi koé Lité piala ho’o olo mai ranga Daku, maik néka lorong apa ata ngoéng Daku, maik lorong apa ata ngoéng Dité.”
Poli hitu ga Hia kolé kolé, agu repéngs Liha isé rémé toko témo/lémot kid. Mai Hia ga taé ne nggo’o ngger oné hia Pétrus, “Simon é, rémé tokom hau ko? Toé ngancéng welam hau kudut te lami lawang ce jam ho olon? Néka toko témo é maik seber ngaji, rantang boto méu pa’u ngger oné damang; ai bo nuk de nai é di’ad kéta taung, landing ruku de weki mensia dé toé mberesd.” Poli hitu Hia ngo koléy agu ne nggitu kéta kin kolé ngaji’N Hia. Cang du kolé kolén Hia, repéng kolés Liha isé rémé toko témo/lémot kid, ai mendo kétas mata disé ga agu toé kolé baé lisé apa ata paka taén lisé ngger oné Hia.
Poli hitu Hia kolé te telu ngkalin ga agu mai taén ga ngger oné isé, “Olé ngai toko lémot kéta kis méu ko agu halas? Ẻmo dé’it é. Caiy rapak rekén ga, lélo ga le meu, Anak Mensia dekoy te téing ngger oné limé data ndekok. To’o ga, mai tité ga téti no’o maid ga. Ata hiot nanang te deko agu téing Aku tiong te caiy gi.”

Isé Deko Mori Yésus
Cang du ngai curup kin Mori Yésus, rodo tuan kaut hia Yudas, cengatan ata oné mai campulu sua taus ata nungku situ; cama-cama agu hia cai kolés ata do ata mai ba agu kopé léwéd (pedang), agu semambu/semboré; isé situ dé ata ata jera data Tuang-tuang kepala agu ata mbeko getok Taurat agu ata tu’a-tu’a laing disé. Ata hitut nanang te téing Hia poli téing ca tanda ngger oné isé, “Ata hiot omo daku dé, hituy dé Hia, deko Hia hitu agu dadé le méu Hia porong néka kurang apa-apa cekoén.” Cang du cain hia nitu gélang-gélangn (hidi-hadan) hia ngo ruis Mori Yésus agu mai taén ga, “Rabi,” poli hitu omo Hia. Poli hitu isé cau Mori Yésus agu deko lisé Hia. Cengata ata oné mai ise situt manga nitu emi di’a liha pedang diha, poli hitu paki liha ata mendi de Imam Mésé, wiga kedok muing tilu data hitu. Mai taé de Mori Yésus ga ngger oné isé, “Olé co’o léng nuk de méu ho’o ta dé ngong Aku, perampok Aku ho’o ko, wiga méu mai lekap kéta agu kopé léwé, semambu/semboré, mai kudut te deko Aku? Néténg-néténg leso kaut Aku ho’o manga oné be réha méu ba toing (ajar) oné Mbaru de Mori Kraéng, landing méu toé deko Aku ho’o. Maik apa ata poli pandé tulisn oné Buku Nggeluk porong jiri kéta taungs di.
Poli hitu ga sanggéd taung ata nungku Diha ngo kéta taungs agu legong Hia hanang koén; isé losi kéta taungs ga.
Manga cengata ata ngai reba kin; pas cang du hitu rémé paké ca towé lénan hia kudut te wéngko wekin; ata reba hitu rémé kéta lut Hian. Sanggéd ata situ nanang te deko hia kolé ca; landing ata reba hitu gélang-gélang legon liha towé lénan hitu agu losin hia déméng toé manga wéngko wekin (laco/mbolang).

Mori Yésus Bebolo Mai Sanhédrin
Poli hitu ga Mori Yésus dadé ngger olo mai ranga de Imam Mésé. Nempung kéta taungs sanggéd imam-imam kepala, sanggéd ata tu’a laingd, agu ata mbeko getok Taurat sina hitu. Rémé du hitu ga, hia Pétrus lut Hia mai tadang main, sanggé kéta be bonén natas de Imam Mésé hitu; sina hitu lonto hia oné beréha sanggéd tentara ata lami nitu; hia lonto nitu kudut te pisi api kudut te pandé mut koé ce koén wekin hia.
Sanggéd imam-imam kepala agu sanggéd weki lawa (anggota) Sanhédrin iwod situ ga cébo kéta kawé kesaksian kudut te dungkang hia Mori Yésus kong Hia ngancéng wahéng le wahéng mata; landing toé ngancéng cumangn lisé ata saksi ne nggitu. Dod kolé ata ata téing kesaksian lancung (ata pandé molé) dungkang Hia, maik sanggéd kesaksian situ toé manga kopd agu cama taud. Poli hitu ga manga ata pisa taus ata ata téing kesaksian adong (lancung) dungkang Hia agu ne nggo’o taé disé, “Poli dengén lami ata ho’o manga dé’it ne nggo’o taén olo: Aku ho’o nanang te pandé renco Mbaru Nggeluk ata pandé de limé de mensia ho’o poli hitu ga telu leso wan ga Aku ngancéng pandé hesé kolé Mbaru hitu, mbaru ata toé pandé le limé de mensia.” Landing oné tombo ho’o kolé kesaksian disé toé manga duha agu cama taud.
Poli hitu Imam Mésé to’o wa mai lonto agu hesén hia oné be réha nempung mésé hitu agu mai réin hia ga ngger oné Mori Yésus, “Olé toé ngoéngm Hau ho’o ko te walé sanggéd réi agu mangkong situ? Co’o wili sanggéd mangkong data so’o latang te Hau ga?” Maik Hia hema kéta kin; hia toé walé ce koén koé. Imam Mésé hitu réi kolé ngger oné Hia, ne nggo’o taén, “Asa, Hia Mésias léng Hau ho’o ko, Anak Dihat ata Naring Mésé kéta?” Mai walé de Mori Yésus ga, “Ẻng é, Aku ho’o dé Hia hitu; méu cepisa ita Hia Anak Mensia hitu lonto du racap wanang Dihat Pu’un Kuasa agu Hia mai boné mai rewung-rewung éta awang.” Poli hitu Imam Mésé hitu pandé beté jiok baju de run agu ne nggo’o taén ga, “Te co’on kolé lité kawén saksi ce bana ta? Poli dengén le méu Hia ho’o pandé mbecik (hojat) Mori Kraéng. Co’o wili nuk de méu ga?” Cengkali agu ca reweng kaut lisé pandé beté bicarn kudut Hia pandé wahéng le matay. Poli hitu ga, rodo pu’ung kaut lisé ipo Hia, pandé tadu ranga Diha, poli hitu racuk lisé Hia, agu ne nggo’o taé disé ngger oné Hia, “Oé nabi, damang dé walé terka tah!” Sanggéd tentara ata lami situ ongga kolé Hia.

Hia Pétrus Walé Toé Ngong Mori Yésus
Cang du hitu hia Pétrus rémé pé’ang wa natas kin hia. Poli hitu mai cengata ata inéwai ata tukang jera laing de Imam Mésé; cang du itan le inéwai hitu hia Pétrus ata rémé pandé mut weki kin ruis dungka api, lélo di’a-di’a liha rangan agu ne nggo’o taén, “Olé hau ho’o kolé cengata ata ata lako cama-cama agu Hia Yésus, ata Nazarét hitu ta.” Landing hia Pétrus walé toé liha réi de inéwai hitu agu ne nggo’o taén, “Aéh toé baé laku é, toé idép kolé laku apa ata tombo de hau hitu.” Poli hitu hia Pétrus ngo bolo natas be bolon kéta (agu cang du hitu pas kakor lalong). Cang du inéwai ata jerang laing hitu ita kolé hia Petrus, mai taé diha ga ngger oné ata ruis-ruis nitu, “Ata ho’o dé cengata ata oné mai isé situ.” Landing walé toé kolé liha Petrus. Toé naisn wa ga sanggéd ata ata manga ruis nitu taé ne nggo’o oné hia Pétrus, “Pasti hau ho’o dé cengata ata oné mai isé situ ta, apan kolé hau ho’o dé ata sina mai Galiléa!” Rodo pu’ung kaut hia Pétrus taé sumpa liha agu rabo-rabon hia, “Olé toé kéta manga baén laku ata hitut caro de méu ta!” Pas kéta cang du hitu ga kakor kolé lalong te sua ngkalin ga. Rodo nuk kaut kolé liha Pétrus apa ata poli taé de Mori Yésus ngger oné hia, “Be bolon kakor lalong te sua ngkalin ga, hau ho’o poli walé toé ngong Aku telu ngkalin.” Poli hitu ga, rétang hia Pétrus le wéong nain.

Mori Yésus be bolo Mai Hia Pilatus
Du gula ucap ga sanggéd imam-imam kepala agu ata tu’a-tu’a agu ata mbeko getok Taurat agu sanggéd lawa weki Sanhédrin iwod situ ga impung te pandé ca empung kolé. Poli hitu pongo lisé Mori Yésus agu ba lisé Hia agu téing lisé Hia ngger oné hia Pilatus. Mai réi diha Pilatus ga ngger oné Hia, “Raja data Yahudi léng Hau ho’o ko?” Mai walé de Mori Yésus ga, “Weki rum hau dé ata taé ne nggitu é.” Poli hitu ga imam-imam kepala téing do kéta réi agu mangkong disé dungkang Hia. Mai réi diha Pilatus kolé ngger oné Hia, “Olé toé kéta walés le Hau sanggéd apa situ ko? Lélo dé yé, do kétas réi agu mangkong situ dé dungkang Hau!” Landing hia Mori Yésus toé kéta walé koé cekoén Liha, wiga lenget kolé weki run hia Pilatus.
Du néténg-néténg leso ramé ho’o, hia Pilatus lego cengatan ata ata poli wahéngd lorong ného ata tegi disé. Cang du hitu manga cengata ata ngasangn hia Barabas; hia rémé ka’éng oné bui kin cama-cama agu sangged ata pemberontak iwod situ. Isé situ poli pandé rampas agu do mbelé atad. Poli hitu maid ata do situ ga agu tegi lisé porong hia pandé lego kolé cengatan ata ného laséngn du leso ramé mésé hitu. Mai walé diha Pilatus ga ngger oné isé agu ne nggo’o réin, “Asa léng ta, cala ngoéngs méu te lego laku Hia Raja data Yahudi ho’o?” Ai baé liha sanggéd imam-imam kepala situ poli deko agu téing hia ai isé reget kéta naid ngger oné Hia. Landing sanggéd imam-imam kepala situ sosok ata do situ kong isé tegi hia Barabas kaut ata legon latang te isé. Cengkalin kolé réin liha Pilatus ngger oné isé, “Ẻmé ne nggitu ga, apa ata paka pandén laku latang te ata ho’ot caro raja data Yahudi ho’o ga?” Rodo ciék kolés isé, “Wéo oné panggol kaut Hia hitu ta!” Poli hitu hia Pilatus taé ne nggo’o kolé ngger oné isé, “Ai apa léng pandé da’at data ho’o ta?” Maik isé tambang mésé-mésé kétad ciék werésd isé, “Pangkot one pangggol kaut Hia hitu é!” Ai hia Pilatus ho’o nanang kéta te pandé senang nai data do situ ga, wiga hia lego hia Barabas latang te isé; poli hitu ongga le lémpa liha Hia Mori Yesus agu téing liha Hia kudut te pangkot oné panggol.”

Mori Yésus Loér-loér Lata
Poli hitu ga sanggéd ata serdadu situ dadé Hia Mori Yésus ngger sina natas de istana, osang baté ka’éng diha gubérnur; isé siro kéta taungs pasukan disé te nempung sina hitu. Emi paka di’a lisé ca juba ungu léwé, agu paké lisé juba léwé hitu ngger oné weki de Mori Yésus; poli hitu pandé dolé lisé ca songkok karot agu pandé tesong lise songkok hitu oné sa’i Diha. Poli hitu ga wangka pu’ungs isé téing io ngger oné Hia agu mai taéd ga, “Tabé o ité, raja data Yahudi!” Ongga lisé sa’i Diha le helung, ipo lisé Hia agu tikul isé te io Hia. Du poli loér-loérn lisé Hia ga isé loak juba léwé ungu ata paké Diha bao, poli hitu paké kolé lisé baju de Run Hia.

Mori Yésus Pangkot oné Panggol
Poli hitu Mori Yésus ba ngger pé’ang kota kudut pangkot oné panggol sina hitu. Cang du hitu manga cengata ata ata rémé lako liba dungka salang hitu, ngasangn hia Simon ata Kiréné; hia de ema disé Aléksander agu hia Rufus; hia ho’o ata rémé kolé pé’ang mai kotan di; paksa lisé hia hitu te pola panggol de Mori Yésus.
Ba lisé hia Mori Yésus ngger ca osang, Golgota ngasangn osang hitu, ngong Osang Sa’i Longkor. Poli hitu isé téing Hia anggur ata poli halok agu mur; landing toé gorin Hia te inung. Poli hitu pangkot lise Hia one panggil; poli hitu pati lise baju Diha; caran ga, olo pandé téka ndu’an lisé, te baén céing ata tiba cupun agu cupun baju hitu.
Ongga sembilan le gula hitu, pangkot lisé Hia oné panggol. Tulis kolé lisé éta panggol hitu wangka pu’ung co’o tara panggoln lisé hia; ne nggo’o tulisn lisé: “Raja Data Yahudi.”
Cama-cama agu Hia pangkot oné panggol kolé lisé sua taus ata perampok; cengata du racap wanang Diha, cengata kolé ga du racap léo Diha.
[Ne nggituy dé caran Hia pas kéta ného apa ata poli tulisn oné Buku Nggeluk ngong Hia, ne nggo’o runin, “Hia bilang lata cama-cama agu ata pandé da’at”]
Sanggéd ata ata lako liba sina hitu mbécik (hojat) Hia; ngéngur-ngéngur said isé agu ne nggo’o taéd isé, “Oé Hau ho’ot nanang te pandé renco Mbaru Nggeluk agu nanang te pandé hesé kolé mbaru hitu lawang telu leso, damang dé wa’u Hau éta mai panggol hitu agu damang dé pandé selamak weki Rum ga!” Ne nggitu kolé sangged imam-imam kepala cama-cama agu ata mbeko getok Taurat cébo loér-loér Hia agu cama taud agu mai taé disé ga, “Ata iwod liha ngancéng pandé selamakd, landing weki Run Hia toé ngancéng pandé selamakd Liha! Asa, di’an kéta émé hia Mésias ho’o, Raja data Israél ho’o, wa’u éta mai panggol hitu te ho’on ga kudut ngancéng itan lité agu imbin lité ga.” Ata sua taus situt pangkot oné panggol cama-cama agu Hia kolé cébong loér agu mbécik Hia.

Mori Yésus Mata Oné Panggol
Pas cang du ongga campulusua ga, rodo nendep kéta tana lino hitu; nendep hitu lawang kaut telu jam naisn. Pas du ongga telu ga, Mori Yésus ciék mésé-mésé agu ne nggo’oy taéN, “Ẻloi, Ẻloi, léma sabakhtani?” ngong artin ga, “Mori, Yo Mori Kraéng Daku, co’o tara legong hanang koég Aku Lité?” Cang du dengén lisé ciék idé mésé hitu, pisa taus ata hesé ruis hitu taé ne nggo’o, “Séngét é, Hia bénta hia Ẻlia.” Poli hitu gélang-gélang cengata ata agu bembo liha ca spons ngger oné waé anggor héo poli hitu wolét liha oné lobon ca helung agu téing liha Mori Yésus te inung agu ne nggo’o kolé taén, “Aéh ta com géréng lité agu lélo lité am maiy to’ong hia Ẻlia hitu mai te campé pandé wa’u Hia.” Poli hitu ciék idé kolé Mori Yésus mésé-mésé agu taung naiN poli hitu ga. Pas kéta cang du hitu ga roto beté kaut towé te pélé sina Mbaru Nggeluk beté laing sua mai kéta éta main sanggé wan. Cang du hitu kepala pasukan ata hesé bolo mai Hia agu ita liha Hia taung naiN ga, taé ne nggo’o, “Olé tetu’ung kéta dé ata ho’o é Anak de Mori Kraéng!”
Manga kolé pisa taus inéwai ata lélo tadang maid; cengata ga hia Maria Magdélena, Maria endé diha Yakobus ata ngai Reban agu hia Yosés, agu hia Salomé. Sanggéd isé situ poli lut hia Mori Yésus agu campé-campé Hia cang du sina Galiléa kin Hia. Manga kolé dungka hitu do inéwai cebana ata mai ngger sina Yérusalem cama-cama agu Mori Yésus.

Mori Yésus Boak gi
Du rémé hitun ga mané rep agu tiong wié tana ga; agu leso hitu dé leso te pandé mengkek, ngong leso bebolon leso Sabat. Wiga hia Yusuf, ata Arimatéa, cengata ata weki lawa oné mai Sanhédrin ata mésén kolé pangkat wiga hiang latang do hia, ata rémé géréng-géréng kin Perénta de Mori Kraéng, pandé mberes agu racang rakn kudut te ngo cumang hia Pilatus kudut te tegi weki rapu Diha Mori Yésus. Lenget kéta hia Pilatus cang du dengén liha poli matan Mori Yésus ga. Poli hitu hia bénta kepala pasukan agu réi liha oné ata hitu, tetu’ung ko toé poli matan Mori Yésus ga. Cang du poli dengén liha apa ata baro de kepala pasukan hitu, sendo liha te teing weki rapu hitu ngger oné hia Yusuf. Weli paka di’a liha Yusuf ca towé lénan, poli hitu ga pandé wa’u liha weki rapu de Mori Yésus éta mai panggolN; rokot paka di’a liha weki rapu hitu le towé lénan hitu. Poli hitu ga pandé toko labang liha weki rapu de Mori Yésus oné ca boa ata poli tekangn oné dungka golo watu hitu. Poli hitu nggolong ca watu mésé liha te tadu para boa hitu. Hia Maria Magdaléna agu hia Maria endé diha Yosés lélo di’a-di’a lisé baté baokN Mori Yésus.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)