KREBA DI'A LESO HO'O 01 MEI 2012

HO’O DḖ INJIL DE MORI YḖSUS ATA TUNTI LIHA YOHANES 10:22-30
PAKA NARING GA LITḖ MORI KRAẺNG (01-05-12)


Toé naisn poli hitu ga caiy leso ramé mésé, leso pandé tahbisn Mbaru de Mori Kraéng sina kota Yérusalem; cang du hitu ga pas cekeng ces. Mori Yésus rémé lako-lakon sina Mbaru de Mori Kraéng hitu, sina natas mésé Salomo. Poli hitu sanggéd ata Yahudi mai impung lupi Hia agu mai taé disé ga ngger oné Hia, “Sanggé ce pisa kéta dé Ité ho’o pandé ami lawang ho’o bimbang terus kaut ga? Ẻmé Ité hitu dé hia Mésias, com taé terus terang kaut Lité ngger oné ami.” Mai walé de Mori Yésus ngger oné isé, “Aku poli tombon apa hitu ga ngger oné méu, maik méu toé imbi; sanggéd gejur-gejur ata poli pandéd Laku oné ngasang de Ema Daku, hitus dé apa ata téing kesaksian latang te Aku, maik méu toé imbi, ai méu ho’o dé toé bilang laing oné sanggéd jimbal-jimbal Daku. Jimbal-jimbal Daku séngét reweng Daku agu Aku ga baé isé agu isé kolé lut Aku, agu Aku téing mosé tédéng lén latang te isé agu isé pasti toé manga lerakd tayi sanggé dengkir tayin agu tédéng lén agu toé kéta manga cengatan ata ata ngancéng wencok isé oné mai limé Daku. Ema Daku, ata poli téing isé ngger oné Aku, céwé mésé oné mai céing-céing kaut, agu toé kéta manga cengatan ata ata ngancéng wencok isé oné mai limé diha Ema. Aku agu Hia Eme dé neki ca kaut agu toé woléng cama tau.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 30 APRIL 2012

HO’O DḖ INJIL DE MORI YḖSUS ATA TUNTI LIHA YOHANES 10:1-10
PAKA NARING GA LITḖ MORI KRAẺNG (30-04-12)


“Tetu’ung kéta Aku taé agu méu: Céing-céing kaut ata ocok ngger oné kandang de jimbal landing toé ocok oné dungka paran kandang hitu, maik le nggakér dungka baté cebana, ata hitu dé ata tako agu ata perampok; maik céing-céing kaut ata ocok oné dungka para, hia hitu dé ata gembalad jimbal situ. Ata tukang lami ngoéng te céngka para latang te hia agu jimbal-jimbal ga séngét reweng diha agu hia bénta sanggéd jimbal-jimbal situ lorong ngasang néténg-néténg isé agu dadangs liha ngger pé’ang kandang. Ẻmé poli pé’ang taungd sangged jimbald situ ga, hia lako be bolo mai isé agu jimbal-jimbaln ga lut hia musi main, ai isé baé di’a reweng diha. Maik ata cebana pasti toé lut lisé; isé losi tadang oné mai ata hitu, ai toé baé di’a lisé reweng data cebana situ.”

Mori Yésus tombo tombo rapang ho’o ngger oné isé, maik isé toé ngancéng idep apa maksudn Hia tombo ne nggitu ngger oné isé.

Wiga Mori Yésus curup kolé ne nggo’o, “Tetu’ung kéta Aku curup agu méu, Aku ho’o dé para latang te jimbal-jimbal situ. Sanggéd taung ata ata mai be bolo mai Aku, isé situ dé ata tako agu ata perampok, agu jimbal-jimbal situ toé séngét isés. Aku ho’o dé para; céing-céing kaut ata ata ocok ngger oné (kandang) lut Aku, hia hitu cepisa pandé selamak agu hia tayi ngo boné agu be pé’ang agu dumpu oka penong lebo ngoél. Mai ata tako ga maik isé mai nanang te tako kanang agu te mbelé agu te pandé lerak; Aku ho’o mai, kong isé manga moséd, agu mosé disé situ ga mosé di’a kéta, toé kéta manga kurang ca o cad.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 29 APRIL 2012

HO’O DḖ INJIL DE MORI YḖSUS ATA TUNTI LIHA YOHANES 10:11-18
PAKA NARING GA LITḖ MORI KRAẺNG (29-04-12)


Aku ho’o dé ata gembala di’a. Ata gembala di’a téing mosé nawa de run latang te jimbal-jimbal diha; maik cengata ata kerja séwa ata hiot toé ata gembala, agu ata hiot toé ata ngara rud sanggéd jimbal-jimbal situ, cang du ita maid liha acu puar ga, hia legong ne nggitu kauts sanggéd jimbal-jimbal situ agu losi, wiga acu puar hitu deko agu akit jimbal-jimbal situ agu pandé mbehars liha sanggéd jimbal-jimbal situ. Hia losi ai hia dé ata kerja séwa agu toé ngoéngn hia te lélo agu lami di’a-di’a sanggéd jimbal-jimbal situ. Aku ho’o dé ata gembala di’a agu Aku kolé baé di’a kéta taungs sanggéd jimbal-jimbal Daku agu jimbal-jimbal Daku ga baé di’a kolé Aku cama ného hia Ema baé di’a Aku agu Aku ga baé di’a Hia Ema, agu Aku ga téing mosé nawa Daku latang te sanggéd jimbal-jimbal Daku. Maik aku kolé manga jimbal-jimbal cebana, ata toé mai oné mai kandang ho’od; Aku kolé paka lami di’a-di’as agu dadang jimbal-jimbal situ agu isé tayi séngét reweng Daku agu isé tayi jiri neki ca élord agu ca ata gembalad. Hia Ema momang Aku, ai Aku téing mose nawa Daku kong Aku ngancéng tiba kolén mosé hitu. Toé kéta manga cengatan ata ata emin mosé hitu oné mai Aku, maik Aku weki Rug dé ata condon lorong ného ngoéng de Rug Aku. Aku ho’o manga rang kuasag te condo moség agu manga kolé rang kuasag te emi kolé mosé hitu. Ho’oy dé perénta ata poli tibad Laku oné mai Ema Daku.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 28 APRIL 2012

HO’O DḖ INJIL DE MORI YḖSUS ATA TUNTI LIHA YOHANES 6:60-69
PAKA NARING GA LITḖ MORI KRAẺNG (28-04-12)


Cang du dengé sanggéd apa situ ga do kétas oné mai ata nungku de Mori Yésus ata ne nggo’o taéd, “Olé mendon kéta reweng so’o é, céing kéta dé ata ata ngancéng séngétd reweng situ ta?” Mori Yésus baé oné nai de Run ngong sanggéd ata nungkun hitu rengus rangad cang du dengé sanggéd apa situ; hitu tara ne nggo’on taé Diha ngger oné isé, “Asa, reweng ho’o pandé gegé méu laingy ko? Co’o émé méu ita Hia Anak Mensia héndéng ngger éta osang baté ka’éngn Hia olo main ga? Nai Nggeluk dé ata téing mosé, weki toé kéta manga guna laingn. Sanggéd reweng ata poli taéd Laku ngger oné méu hitu dé nai agu mosé. Maik oné mai beréha méu ho’o mangas ata toé imbi.” Ai baé le Mori Yésus du wangka pu’ung main ga, céing ata toé imbi agu céing ata nanang te téing Hia tayi. Poli hitu mai taé Diha ga, “Wiga wili ga, Aku poli curup ngger oné méu ho’o: Toé kéta manga cengatan ata ata ngancéng mai ngger cé’é Aku, émé hia Ema toé téing berkak latang te hia hitu.” Wangka pu’ung kaut du hitu ga do kétas ata nungku Diha ata hedong agu toé kolé ngoéngd te lut Hia kolé.
Poli hitu mai taé de Mori Yésus ngger oné campulusua taus ata nungku Diha, “Asa méu ga, cala nanang te ngo kolé méu ta?” Mai walé diha Simon Pétrus ngger oné Hia, “Mori é, ngger oné céi kolé ami ho’o paka ngo? Ité hitu manga reweng mosé tédéng lén; agu ami ho’o ga poli imbi agu baé ngong Ité hitu dé Ata Nggeluk oné mai Mori Kraéng.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O, 27 APRIL 2012

HO’O DḖ INJIL DE MORI YḖSUS ATA TUNTI LIHA YOHANES 6:52-59
PAKA NARING GA LITḖ MORI KRAẺNG (27-04-12)


Sanggéd ata Yahudi situ léwang cama taud agu mai taéd ga, “Co’o kétay caran Hia ho’o te ngancéng téing weki de Run latangt ité kudut te hang lité?” Hitu tara ne nggo’o taé de Mori Yésus ngger oné isé, “Tetu’ung Aku taé ngger oné méu ho’o, émé méu toé hang weki de Anak Mensia agu inung dara Diha, méu toé ngancéng manga mosé oné weki rus méu. Céing-céing kaut ata hang weki Daku agu inung dara Daku, hia ngancéng haéng mosé tédéng lén agu Aku tayi pandé mosé kolé hia du leso cemol tayi. Ai weki Daku ho’o dé tetu’ung kéta latang te hang atau dara Daku ho’o dé tetu’ung kéta latang te inung. Céing-céing kaut ata hang weki Daku agu inung dara Daku, hia ka’éng oné Aku agu Aku oné hia. Cama ného hia Ema ata mosé poli jera Aku te mai agu Aku kolé mosé landing Hia Ema hitu, ne nggitu kolé dé céing-céing kaut ata hang Aku, manga mosén tayi hia wajo Laku. Ho’o dé roti ata poli wa’u éta mai surga, toé roti ného apa ata poli hang de empo de méu danong agu isé poli matad ga. Céing-céing kaut ata hang roti ho’o, hia hitu ngancéng haéng mosé tédéng lén.”

Sanggéd taung apa so’o, curupd le Mori Yésus sina Kapernaum cang du Hia pande téing toing (ajar) oné mbaru ngaji sina hitu.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 26 APRIL 2012

HO’O DḖ INJIL DE MORI YḖSUS ATA TUNTI LIHA YOHANES 6:44-51
PAKA NARING GA LITḖ MORI KRAẺNG (26-04-12)


Toé kéta manga cengatan ata, ata ngancéng mai ngger cé’é Aku, émé hia toé dadang liha Ema ata poli jera Aku te mai, agu hia kolé manga pandé mosé kolén Laku tayi du leso cemol. Manga apa ata poli tulisn oné kitab de nabi-nabi: ‘Sanggéd taung isé ce pisa manga titongd le Mori Kraéng’. Néténg-néténg ata, ata poli dengé agu nungku oné mai hia Ema, mai ngger cé’é Aku. Maik hitu toé ne nggo’o dé artin ngong manga atan ata poli ita hia Ema. Hanang Hia ata mai oné mai Mori Kraéng, Hia dé ata poli ita hia Ema. Tetu’ung Aku curup ngger oné méu ho’o: Céing-céing kaut ata imbi, hia hitu manga haéng mosé tédéng lén.

Aku ho’o dé roti te pandé mosé. Empo de méu danong poli hang mannad sina satar laing agu isé poli matad ga. Ho’o dé roti ata wa’u éta mai surga: Céing-céing kaut ata hang roti ho’o, hia hitu toé manga matan tayi. Aku ho’o dé roti te pandé mosé ata poli wa’u éta mai surga. Ẻmé ata hang roti ho’o, hia hitu tayi ngancéng haéng mosé tédéng lén, agu roti ho’ot nanang te téing Daku hitu dé ngong weki Derug Aku ata téingn Laku latang te mosé de lino ho’o.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O, 25 APRIL 2012

HO’O DḖ INJIL DE MORI YḖSUS ATA TUNTI LIHA MARKUS 16:15-20
PAKA NARING GA LITḖ MORI KRAẺNG (25-04-12)


Mai taé Diha ga agu isé: "Ngo méu ga, ngo lako labok tana lino, ba koé le méu Kréba di'a latang te sanggéd ca o ca oné tana lino hoo. Céing-céing kaut ata imbi agu tiba sakraméng cebong nggeluk, isé ce pisa tiba selamak oné mai Mori. Landing céing-céing kaut ata toé imbi, isé situ ce pisa tiba wahéng mésé. Sanggéd taung ata imbi (kréba di’a hitu) manga kaut isé tiba widang agu tanda lenget: Isé ce pisa ngancéng sonda jing da'at oné/le ngasang Daku, isé kolé ngancéng curup sangged curup-curup (bahasa) weru latang te isé, isé kolé nganceng cau ular; koném po isé inung waé rasung data landing isé toé ngancéng mata ko boat; isé kole ce pisa ngancéng cau (sapel) sa'i data beti, wiga ata beti situ ga ina kolés ga." Cang du poli curup ne nggitun Hia Mori Yésus ga latang te isé, Mori Yésus héndéng ngger éta surga, poli hitu ga Hia lonto oné lupi dungka racap wanang de Mori Kraéng. Poli hitu ga isé (ata nggeluk) ngo ba kréba di'a hitu labok tana lino hoo; Mori Kraéng ka'éng kolé agu isé, te dadang isé, agu pandé mberes’n kréba di’a hitu le tanda lenget ata céwé mésén kéta.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 24 APRIL 2012

HO’O DḖ INJIL DE MORI YḖSUS ATA TUNTI LIHA YOHANES 6:30-35
PAKA NARING GA LITḖ MORI KRAẺNG (24-04-12)


Wiga mai taé disé ga ngger oné Hia, “Ai tanda apa léng ata poli pandéd Lité, kong ami ho’o ngancéng itan agu imbi ngger oné Ité? Apa léng ata poli pandéd Lité? Empo dami danong poli hang manna sina satar laing’d danong, cama ného ata poli tulisn: Isé poli téing hangd Liha hang roti éta mai surga.”

Mai taé de Mori Yésus ga ngger oné isé, “Tetu’ung kéta taé Daku ngger oné méu, toé hia Mosés dé ata poli téing méu roti éta mai surga, maik Hia Ema Daku ata poli téing méu roti ata molorn (benarn) éta mai surga. Ai roti hiot téing de Mori Kraéng dé roti ata wa’u éta mai surga ata ngancéng téing mosé ngger oné lino.” Wiga mai taé disé ga ngger oné Hia, “Mori é, téing tédéng molém taung koé ami Lité roti hitu.” Wiga mai taé de Mori Yesus ga ngger oné isé, “Aku ho’o dé roti mosé; céing-céing kaut ata mai ngger cé’é Aku, hia toé ngancéng darem kolén tay, agu céing-céing kaut ata imbi ngger oné Aku, hia hitu dé toé manga masa waén kolé tayi.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 23 APRIL 2012

HO’O DḖ INJIL DE MORI YḖSUS ATA TUNTI LIHA YOHANES 6:22-29
PAKA NARING GA LITḖ MORI KRAẺNG (23-04-12)


Pas ného diangn ga sanggéd ata do situ, siot ngai ka’éng be sina kid, noing lisé sina hitu toé manga kolé perahu (lambo) cebana be pé’ang mai perahu hitut cay kali; baé kolé lisé Mori Yésus toé lut léti ngger éta perahu hitu cama-cama agu sanggéd ata nungku Diha; hanang ata nungku Diha kanang kali ata poli tétid nitu maid. Pas du rémé ne nggitun ga pisad perahu cebana cais sina mai Tibérias pas kéta dungka osang baté hang roti disé, du poli pandé torok delék le Mori Yésus be bétan roti hitu. Cang du ata do situ toé ita Mori Yésus sina hitu ne nggitu kolé sangged ata nungku Diha toé manga sina hitu koled ga, gélang-gélangd isé léti ngger oné perahu-perahu situ agu téti te ngo ngger sina Kapérnaum, ngo kudut te kawé Mori Yésus.

Cang du ata do situ ita Mori Yésus sina tana be sina hitu, mai taé disé ga ngger oné Hia, “Rabi, oné pisa caid Ité cé’é ho’o ga?” Mai walé de Mori Yésus ga ngger oné isé, “Tetu’ung kéta taé Daku ngger oné méu ho’o, méu kawé Aku, toé landing méu poli ita sanggéd tanda-tanda situ, maik landing méu poli hang roti hitu agu becur tukas méu ga. Damang dé méu pandé gejur, toé kudut te ita hang ata ngancéng lerak koléd, maik kudut ita hang ata ngancéng pandé méu haéng mosé tédéng lén, hang ata kudut te téing liha Anak Mensia latang te méu; ai Hia hitu dé ata poli téing meterai le Mori Kraéng Ema.” Poli hitu mai taé disé ga ngger oné Hia, “Apa léng ata paka pandé dami ga, kong ami ho’o pandé gejur sanggéd gejur ata siot niakd (senang laingd) le Mori Kraéng?” Mai walé de Mori Yésus ga ngger oné isé, “Ho’o dé gejur ata niak (senang) laingn le Mori Kraéng, porong méu ho’o imbi ngger oné Hia ata poli jera le Mori Kraéng te mai cé’é ho’o.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 22 APRIL 2012

HO’O DḖ INJIL DE MORI YḖSUS ATA TUNTI LIHA LUKAS 24:36-48
PAKA NARING GA LITḖ MORI KRAẺNG (22-04-12)


Cang du isé rémé kéta tombo-tombod ngong sanggéd apa situ ga, rodo hesén kaut Mori Yésus oné beréha isé agu mai taén ga ngger oné isé, “Tabé agu hambor latang te méu é!” Géga da’at kétas isé agu rantang éros ai nuk disé ga isé ita poti. Maik, mai taé Diha ga ngger oné isé, “Co’o tara gégas dé méu ho’o ta agu co’o tara bimbang kétan dé nai de méu hitu? Lélo ga limé Daku agu wa’i Daku: Aku weki Rug kéta dé ho’o é; damang cau dé le méu Aku ho’o agu lélo paka di’a ga, ai poti dé toé manga toko agu ici wekin, cama ného apa ata ita de méu manga oné Aku ho’o.” Pas du rémé tombo ne nggitun Hia ga, totos liha limé agu wa’iN ngger oné isé. Cang du toé kin di imbi lisé ai wajo le nisang bail naid agu rémé mésén kéta lenget disé, mai taé Diha ga ngger oné isé, “Cala manga hangs dé méu cé’é ho’o ta?” Poli hitu téing lisé ngger oné Hia ca kepu ikang ata poli céron ga. Emi Liha ikang hitu agu hang Liha olo mai ranga disé.


Poli hitu mai taé Diha ga ngger oné isé, “Ho’o dé reweng Daku é, ata poli taén Laku olo ngger oné méu cang du Aku ngai cama-cama agu méu kin, yo porong olo jiri kéta taungs di sanggéd taung apa ata poli tulisn ngong Aku oné Buku Taurat diha Mosés agu kitab de Nabi-nabi agu kitab Mazmur.” Poli hitu céngka Liha nai disé, wiga isé nganceng idep Buku Nggeluk. Mai taé Diha ga ngger oné isé, “Manga ata poli tulisn ne nggo’on: Hia Mésias paka cukung susa agu to’o kolé oné mai beréha ata matan du leso te telun ga, agu manga kolé ne nggo’o: Oné ngasang Diha kréba ngong mosé tesert latang te ampong sanggéd ndékok paka ba agu tombo ngger oné sanggéd bangsa, wangka pu’ung kaut sina mai Yérusalém. Méu ho’o dé ata itad agu lélod sanggéd apa so’o.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 21 APRIL 2012

HO’O DḖ INJIL DE MORI YḖSUS ATA TUNTI LIHA YOHANES 6:16-21 PAKA NARING GA LITḖ MORI KRAẺNG (21-04-12) Cang du wangka pu’ung wién tana ga, sanggéd ata nungku de Mori Yésus nanang ngo ngger sina sano be sina, poli hitu isé léti ngger éta lobo lambo (perahu) agu ngo ngger sina Kapernaum. Wié nendep tana ga maik Mori Yésus toé kin di caiy mai raes (cumang) isé; agu cang du hitu ga waé sano hitu mésé kéta bombangn ai wajol le pur de buru warat mésé. Cang du poli pandé lakon lisé lambo/perahu hitu am bo lima ko enem kilométér tadangn ga, ita lisé Mori Yésus lako lobo wai mai ngger cé’é ruis perahu disé. Rantang da’at kétas isé. Landing mai taé Diha ga ngger oné isé, “Aku dé ho’o é, néka rantang!” Wiga, isé ngoengd te sendo Hia te léti ngger éta lobo lambo hitu, agu pas kéta cang du hitu ga caiy lambo (perahu) hitu ngger sina panté tana masa baté ngo disé. HO’O DẺ REWENG DE MORI KRAẺNG: PAKA NARING GA LITḖ YḖSUS KRISTUS @Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 20-04-12

HO’O DḖ INJIL DE MORI YḖSUS ATA TUNTI LIHA YOHANES 6:1-15
PAKA NARING GA LITḖ MORI KRAẺNG (20-04-12)


Poli hitu ga Mori Yésus téti te ngo ngger sina Sano Galiléa, ko Sano Tibérias. Ata do lako londang lut Hia, ai isé poli itad sanggéd taung tanda lenget ata poli pandéd Liha latang te ata beti. Poli hitu Mori Yésus tuké ngger éta ca golo agu lonto nitu agu sanggéd ata nungku Diha. Leso ramé mésé Paskah ga, leso ramé mésé data Yahudi, tiong te caiy gi. Cang du Mori Yesus lélo lupi baling-baling Hia agu itas Liha do kéta ata mai lut ngger cé’é Hia, mai taé Diha ga ngger oné hia Filipus, “Nia wan ité ngancéng weli roti, kong sanggéd isé so’o ngancéng hangd?” Hia taé ne nggitu kudut te damangé/uji hia Filipus hitu, ai Hia weki run baé apa ata nanang te pandé Diha te ho’on ga. Mai walé diha Filipus ga ngger oné Hia, “Koném po roti ata harga suaratus dinar ne Mori toé kin di ngancéng sakong isé so’o, koném po isé hanang tiba ca kepu/ketek koén roti hitu.” Cengata ata oné mai ata nungku Diha, hia Andréas, asé-ka’é diha Simon Pétrus, taé ne nggo’o ngger oné Hia, “Cé’é ho’o manga cengata anak koé; hia hitu manga ba limad roti jelai (hosu) agu suad ikangn; maik capa laingy bokong situ latang te ata do so’o ga?” Mai taé de Mori Yésus ga, “Damang dé jera ata so te lontos di.” Sina dungka osang hitu do todo remangn. Poli hitu lontos ata situ ga, am lima sebud hanang ata ronad kali. Poli hitu Mori Yésus emi roti hitu, agu torok ngaji delék agu poli hitu puil-puil Liha te pati-pati ngger oné iséd lonto sina hitud, ne nggitu kolé apa ata pandé Diha oné dungka ikang-ikang situ, jirid ga do ketas lorong apa kaut ata ngoéng disé situ. Cang du poli becurd isé ga mai taé Diha ga ngger oné sanggéd ata nungku Diha, “Damang dé nongkos le méu retangd roti situ rantang boto oke bod ne nggitu kautd.” Poli hitu cébong nongkos lisé, agu hasiln ga manga campulu sua roto ata penong kéta le retangd oné mai lima roti jelai ata siot poli hangd lata situ ného baon ga. Cang du itad lata situ tanda lenget ata poli pandén Liha ga, mai taé disé, “Hia ho’o dé ata tetu’ung kéta nabi ata te maiy tay ngger oné lino ho’o.”

Ai baé le Mori Yésus ngong ata do situ nanang te ba Hia le paksa molé kudut te téti jiri raja laing Hia lisé, wiga Hia Mori Yésus gélang-gélang ngo inggos-pesotN ngger éta ca poco; Hia ngo hanang koén kaut.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 19-04-12

HO’O DḖ INJIL DE MORI YḖSUS ATA TUNTI LIHA YOHANES 3:31-36
PAKA NARING GA LITḖ MORI KRAẺNG (19-04-12)


Céing kaut ata mai éta mai manga be béta mai taung sanggéd ca o ca; céing kaut ata mai oné mai lino ho’o mai cé’é mai lino ho’od agu isé ga curupd ga curup ngong sanggéd ca o ca oné lino ho’o. Céing kaut ata mai éta mai surga isé situ béta mai taung sanggéd ca o ca. Hia téing saksi ngong apa ata poli itad Liha agu apa ata poli dengéd Liha, maik toé kéta manga cengatan ata ata tibad kesaksian Diha hitu. Céing kaut ata tiba kesaksian Diha hitu, ata hitu mengaku ngong Mori Kraéng dé benarn. Ai émé céing kaut dé ata jera le Mori Kraéng te mai, Hia hitu dé ata tombo-krébad sanggéd reweng-kréba de Mori Kraéng, ai Mori Kraéng loli widang Nai Nggeluk Diha toé kéta manga baé beténgn. Hia Ema momang Hia Anak agu poli téing sanggéd ca o ca ngger oné Hia. Céing-céing kaut ata imbi oné Anak, hia hitu ngancéng haéng mosé tédéng lén, maik céing-céing kaut ata toé lorong hia Anak hitu, ata hitu tay toé ngancéng ita mosé, maik Mori Kraéng manga kaut rabo mésén Hia tay latang te ata hitu.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 18-04-12

HO’O DḖ INJIL DE MORI YḖSUS ATA TUNTI LIHA YOHANES 3:16-21
PAKA NARING GA LITḖ MORI KRAẺNG (18-04-12)


Ai Mori Kraéng momang kéta tana lino ho’o, hitu dé tara jeraN Liha Anak Léca’N te wa’u oné tana lino ho’o, kong sanggéd ata siot imbi ngger oné Hia toé leraks tay, maik ngancéng haéng mosé tédéng lén. Ai Mori Kraéng jera te maiy Anak’N ngger oné tana lino ho’o toé kudut te pandé beté bicar tana lino ho’o, maik mai kong tana lino ho’o ngancéng tiba mosé di’a oné mai Hia. Céing-céing kaut ata imbi ngger oné Hia, toé manga wahéngn tayi; céing-céing kaut ata toé imbi, ata hitu dé poli wahéng’d ga, ai hia toé imbi oné ngasang de Anak Léca de Mori Kraéng. Ho’o’y dé wahéng hitu: Cai’y Gérak ngger oné tana lino ho’o ga, landing mensia céwé senang ka’éng oné dungka nendep itu po oné dungka gérak, ai da’at kéta taung dé pande agu gauk disé. Ai céing-céing kaut ata ata pandé da’at (toé di’a) ata hitu dé reget nain agu gérak agu toé ngoéng te mai ngger sina gérak hitu, rantang boto ita latas sanggéd pandé agu gauk da’at disé; maik céing-céing kaut ata ata pandé mosé molor, hia dé mai ngger oné gérak, kudut baé kéta taung le sanggéd ata ngong gauk agu pandé diha dé pandé kéta taungs oné Mori Kraéng.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 17-04-12

HO’O DḖ INJIL DE MORI YḖSUS ATA TUNTI LIHA YOHANES 3:7-15
PAKA NARING GA LITḖ MORI KRAẺNG (17-04-12)


Néka lenget hau ta, ai Aku taé ne nggo’o ngger oné hau hitu: Méu paka pandé loas kolé. Buru é pur ngger nia kaut ngoéng’n hia, hau ga ngancéng dengé runin, maik hau toé baé nia maiy main buru hitu ko ngger niay hia ngon. Ne nggitu kolé dé ngong céing-céing kaut ata ata loas oné mai Nai Nggeluk.” Mai taé diha Nikodemus ga ngger oné Hia, “Co’o kétay caran kong ngancéng jirin apa hitu ta?” Mai walé de Mori Yésus ga, “Hau ho’o dé tuang guru data Israél, maik hau toé idep sanggéd taung apa so’o? Tetu’ung Aku taé ngger oné hau, ami tombo ngong apa ata baéd lami agu ami kolé téing saksi ngong apa ata poli itad lami, maik méu toé ngoéng tiba kesaksian dami. Méu toé imbi, cang du Aku tombo ngger oné hau ngong sanggéd apa-apa kaut oné lino ho’o, co’o kétay caran méu te imbi, émé Aku tombo ngger oné hau ngong apa-apa kaut ngong hal surgawi? Toé manga dé’it di cengatan ata ata poli héndéng ngger éta surga, be pé’ang mai Hia ata poli wa’u éta mai surga hitu, hia hitu dé Anak Mensia.

Cama ného hia Musa pandé téti ngger éta ular oné satar laing, ne nggitu kolé dé Anak Mensia paka pandé téti ngger étay, kong sanggéd ata ata imbi ngger oné Hia ngancéng haéng mosé tédéng lén.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 16-04-12

HO’O DḖ INJIL DE MORI YḖSUS ATA TUNTI LIHA YOHANES 3:1-8
PAKA NARING GA LITḖ MORI KRAẺNG (16-04-12)


Manga cengata ata Farisi hia Nikodémus ngasangn; hia ho’o dé cengata ata pemimpin agama data Yahudi. Hia mai le wié tana ngger oné Mori Yésus agu mai taén ga, “Rabi, baé lami ngong Ité mai sebagai tuang guru ata jera te mai le Mori Kraéng; ai toé kéta manga cengatan ata ata ngancéng pandé sanggéd tanda lenget ného siot poli pandé Dité lawang ho’o, émé Mori Kraéng toé manga agu Ité.” Mai walé de Mori Yésus ga, “Tetu’ung kéta taé Daku ngger oné hau, émé ata toé pandé loas kolé cengkalin kolé, hia hitu dé toé ngancéng ita Perénta de Mori Kraéng.” Mai taé diha Nikodémus ga ngger oné Hia, “Co’o kétay dé caran ta cengata ata ngancéng pandé loas kolé cengkalin, émé tu’ay ata hitu ga? Ngancéng léng hia ko ngo kolé ngger oné tuka dading de endén poli hitu loas kolé gi?” Mai walé de Mori Yésus ga, “Tetu’ung kéta taé Daku ngger oné hau é, émé cengata ata toé pandé loas kolé oné mai waé agu Nai Nggeluk, hia hitu dé toé ngancéng ocok ngger oné Perénta de Mori Kraéng. Apa kaut ata poli loasd le weki jasmani sifatn kole jasmania; apa kaut ata poli loasd oné mai Nai Nggeluk sifatn kolé rohania. Néka lenget hau ta, ai Aku taé ne nggo’o ngger oné hau hitu: Méu paka pandé loas kolé. Buru é pur ngger nia kaut ngoéngn hia, hau ga ngancéng dengé runin, maik hau toé baé nia maiy main buru hitu ko ngger niay hia ngon. Ne nggitu kolé dé ngong céing-céing kaut ata ata loas oné mai Nai Nggeluk.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 15-04-12

HO’O DḖ INJIL DE MORI YḖSUS ATA TUNTI LIHA YOHANES 20:19-31
PAKA NARING GA LITḖ MORI KRAẺNG (15-04-12)


Cang du wangka wié nendepn tana ga du leso te can minggu hitu pandé nempungs sanggéd ata nungku de Mori Yésus oné ca mbaru; sanggéd taung parad mbaru hitu tadu jimet kétas lisé ai isé ngai rantang kid ngger oné sanggéd penguasa data Yahudi situ. Cang du hitu ga maiy Mori Yésus agu hesé oné beréha isé agu mai taén ga, “Hambor latang te méu!” Cang du poli taé ne nggitun Hia ga, Hia pandé toto limén agu racapN Hia ngger oné isé. Sanggéd ata nungku situ nisang kéta naid cang du itan lisé Hia Mori. Poli hitu mai taé de Mori Yésus cengkalin kolé, “Hambor latang te méu! Cama ného Hia Ema poli jera Aku te mai oné lino ho’o, ne nggitu kolé Aku te ho’on ga jera sanggés méu te ngo.” Cang du poli taé ne nggitun hia ga, Hia pandé pur isé agu taé ne nggo’o, “Tiba ga le méu Nai Nggeluk. Ẻmé méu ampong ndékok data, ndékok data hitu poli ampongd ga, agu émé méu taé ne nggo’o ngong ndékok data hitu ngai manga kid, ndékok data hitu ngai manga kid.”
Maik hia Tomas, cengata ata oné mai sanggéd campulusua taus ata nungku situ, ata caro kolé hia Didimus, toé manga nempung cama-cama agu isén hia, cang du main Mori Yésus ngger sina hitu. Wiga, mai taé de ata nungku situt iwod ga ngger oné hia, “Poli ita Morig ami ho’o gé!” Maik hia Tomas taé ne nggo’o ngger oné isé, “Ẻmé aku toé kin di ita le mata de rug aku baté réu le pakun oné dungka limé Diha agu émé aku toé kin sapel rempa limé daku oné dungka réu le paku situ agu cau laku réu oné dungka racap Diha, toé kin di ngancéng imbin laku tah.”

Alo leso poli hitu ga sanggéd ata nungku Diha Mori Yésus pandé nempung kolé oné mbaru hitu kin agu te ho’on ga manga kolé hia Tomas cama-cama agu isé. Du ngai rémé tadu jimed kid sanggéd para mbaru hitu ga, rodo mai kaut Hia Mori Yésus agu Hia hesé oné beréha isé agu mai taén ga, “Hambor ga latang te méu!” Poli hitu mai taé Diha ga ngger oné hia Tomas, “Damang dé na’a no’o le méu rempa limé de hau agu lélo ga limé Daku, damang dé los limém hau agu sapel dapang le hau racap Daku agu néka toé imbi kolé le hau e, maik hau paka imbi.” Mai walé diha Tomas ga, “Yo Mori go agu Mori Kraeng daku!” Mai taé de Mori Yésus ga ngger oné hia, “Ai le poli ita Akum dé hau tara ngancéng agu ngoéng te imbim dé hau é. Mosé di’a dé isé siot toé ita, maik imbi.”

Ngai do kéta kid tanda lenget cebana ata poli pandéd le Mori Yésus olo mai ranga de sangged ata nungku Diha, ata toé kin di poli tulisn oné kitab ho’o, maik sanggéd apa ata poli tulisd no’o ga, poli tulisd kong méu ngancéng imbi ngong Mori Yésus dé Hia Mesias, Anak de Mori Kraéng, agu kong méu landing le imbis hitu, méu ngancéng haéng mosé di’a oné ngasang Diha.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 13-04-12

HO’O DḖ INJIL DE MORI YḖSUS ATA TUNTI LIHA MARKUS 16:9-15
PAKA NARING GA LITḖ MORI KRAẺNG (14-04-12)


Du poli mosé kolén Hia Mori Yésus du gula ucap sapu rebem oné leso te can minggu hitu ga, Hia olo kéta pandé ita agu toto weki Run ngger oné hia Maria Magdaléna. Mori Yésus manga dé’it sonda pitud jing da’at oné mai hia. Poli hitu inéwai hitu ngo tombo ngong apa hitu ngger oné sanggéd isé siot poli lako lut cama-cama agu Mori Yésus lawang ho’o; isé situ dé rémé ngai rétang kid le wéong naid. Landing cang du dengén lisé ngong Mori Yésus hitu mosé kolé gi agu poli itan liha ga, toé kin di imbi lise.

Poli hitu Hia pandé toto weki Run oné tara cebana ngger oné sua taus oné mai isé situ, cang du isé rémé ngo ngger pé’ang kota. Poli hitu kolés isé agu tombo lisé apa ata poli itan lisé ngger oné iséd iwo situ, mai isé situ kolé toé kéta imbi ngger oné ata sua situ.

Cemoln ga Hia pandé toto weki Run ngger oné campuluca taus ata nungku situ cang du isé rémé hangd, agu rabos Liha isé ai isé toé imbi agu isé ndegel kéta naid, ai isé toé ngancéng imbi ngger oné sanggéd ata siot poli ita Hia du poli mosé kolén Hia ga. Poli hitu mai taé Diha ga ngger oné isé, “Ngo dé méu ga ngo labok tana lino ho’o, kréba le méu Injil ngger oné sanggéd caoca ata poli dédékd le Morin.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 13-04-12

HO’O DḖ INJIL DE MORI YḖSUS ATA TUNTI LIHA YOHANES 21:1-14
PAKA NARING GA LITḖ MORI KRAẺNG (13-04-12)


Poli hitu Mori Yésus pandé toto (ita) weki Run kolé ngger oné sanggéd ata nungku Diha oné lupi Sano Tibérias; Hia pandé ita weki Run ne nggo’oy caran. Oné lupi sano hitu ngai rémé nempung kid isé Simon Pétrus, Tomas ata caro hia Didimus, Natanaél hiot sina mai Kana sina Galiléa, anak-anak diha Zébédéus agu sua taus kolé ata nungku Diha iwod situ. Mai taé diha Simon Pétrus ga ngger oné isé situ, “Olé ta, nanang kudut te ngo deko ikang aku é.” Mai taé disé ga ngger oné hia, “Aéh ngo lut hau kolé ami ho’o ta.” Téti paka di’as isé ga agu léti ngger oné lambo/perahu; landing wié hitu toé kéta manga haéng can koé ikangd isé. Cang du wangka pu’ung éta-étan leso ga, Mori Yésus hesé sina lupi sano hitu; maik sanggéd ata nungku situ toé baé ngong hitu dé Mori Yésus. Mai taé de Mori Yésus ga ngger oné isé, “Asa nana, cala manga haéng ikangs méu ko?” Mai walé disé ga, “Toé manga é.” Poli hitu mai taé de Mori Yésus ga ngger oné isé, “Damang dé lego kolé wénta de méu ngger sina lupi wanang de perahu (lambo) de méu, pasti manga dumpu ikangs méu to’ong.” Lego kolé lisé wan wénta hitu; poli hitu ga, toé kaut ngancéng poto/lot kolén lisé ai do bail haéng ikangd isé. Poli hitu, ata nungku hiot momang le Mori Yésus taé ne nggo’o oné hia Pétrus, “Olé hitu Hia Mori é.” Cang du dengén liha Pétrus ga ngong Hia hitu dé Morin, gélang-gélang paké bajun hia, ai loak bajun hia ného baon, agu teku ngger wa sano hitu. Poli hitu ata nungku situt iwod ga mai agu leti perahu (lambo) ai isé toé tadang baild oné mai lupi tana masa, am ceratus métér’y kali tadangn oné mai tana masa; poli hitu isé poto/lot wénta hitut penong kéta ikangn. Cang du caid isé éta tana masa ga, ita lisé ca api agu mempos wara mésé agu be bétan ga manga ikang agu roti. Mai taé de Mori Yésus ga ngger oné isé, “Damang ba dé le meu pisad ikang, ata poli deko de méu situ tah.” Hia Simon Pétrus léti ngger éta lobo lambo hitu agu poto liha wénta hitu ngger éta tana masa; wénta hitu penong kéta le ikang-ikang mésé: Ceratus limampuluh telud dod ikang situ; landing koném po do ketas ikang situ, maik wénta disé toé beté’y. Mai taé de Mori Yésus ga ngger oné isé, “Mai gé, mai jumikd ga.” Toé kéta manga cengatan ata ata manga rangn te réi ngger oné Hia, “Céi dé Ité hitu ta?” Ai baé lisé Hia hitu dé Hia Mori. Poli hitu Mori Yésus lako ngger olo koé cekoén, emis Liha roti situ agu téings liha ngger oné isé, ne nggitu kolé ikang situ. Hitu dé te telu ngkalin ga Mori Yésus pande toto ita weki Run ngger oné sangged ata nungku Diha lawang poli pandé mosé kolén Hia wa mai boan oné mai beréha ata mata.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 12-04-12

HO’O DḖ INJIL DE MORI YḖSUS ATA TUNTI LIHA LUKAS 24:36-48
PAKA NARING GA LITḖ MORI KRAẺNG (12-04-12)


Cang du isé rémé kéta tombo-tombod ngong sanggéd apa situ ga, rodo hesén kaut Mori Yésus oné beréha isé agu mai taén ga ngger oné isé, “Tabé agu hambor latang te méu é!” Géga da’at kétas isé agu rantang éros ai nuk disé ga isé ita poti. Maik, mai taé Diha ga ngger oné isé, “Co’o tara gégas dé méu ho’o ta agu co’o tara bimbang kétan dé nai de méu hitu? Lélo ga limé Daku agu wa’i Daku: Aku weki Rug kéta dé ho’o é; damang cau dé le méu Aku ho’o agu lélo paka di’a ga, ai poti dé toé manga toko agu ici wekin, cama ného apa ata ita de méu manga oné Aku ho’o.” Pas du rémé tombo ne nggitun Hia ga, totos liha limé agu wa’iN ngger oné isé. Cang du toé kin di imbi lisé ai wajo le nisang bail naid agu rémé mésén kéta lenget disé, mai taé Diha ga ngger oné isé, “Cala manga hangs dé méu cé’é ho’o ta?” Poli hitu téing lisé ngger oné Hia ca kepu ikang ata poli céron ga. Emi Liha ikang hitu agu hang Liha olo mai ranga disé.

Poli hitu mai taé Diha ga ngger oné isé, “Ho’o dé reweng Daku é, ata poli taén Laku olo ngger oné méu cang du Aku ngai cama-cama agu méu kin, yo porong olo jiri kéta taungs di sanggéd taung apa ata poli tulisn ngong Aku oné Buku Taurat diha Mosés agu kitab de Nabi-nabi agu kitab Mazmur.” Poli hitu céngka Liha nai disé, wiga isé nganceng idep Buku Nggeluk. Mai taé Diha ga ngger oné isé, “Manga ata poli tulisn ne nggo’on: Hia Mésias paka cukung susa agu to’o kolé oné mai beréha ata matan du leso te telun ga, agu manga kolé ne nggo’o: Oné ngasang Diha kréba ngong mosé tesert latang te ampong sanggéd ndékok paka ba agu tombo ngger oné sanggéd bangsa, wangka pu’ung kaut sina mai Yérusalém. Méu ho’o dé ata itad agu lélod sanggéd apa so’o.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 11-04-12

HO’O DḖ INJIL DE MORI YḖSUS ATA TUNTI LIHA LUKAS 24:13-35
PAKA NARING GA LITḖ MORI KRAẺNG (11-04-12)


Du leso hitu kin ga sua taus ata nungku Diha Mori Yésus ngo ngger sina ca béo, béo Ẻmaus ngasangn; am sebelas kiloy tadangn mai sina mai Yérusalém; isé lako agu cébo tombo-tombo cama taud ngong sanggéd apa ata poli jirid lawang ho’o. Cang du ngai tombo-tombo kid isé agu cébo céngka nuk de cama taud, rodo mai kaut hia Mori Yésus weki Run mai ruis isé, agu lako cama-cama agu isé situ. Maik manga apa-apan ata pandé tadu mata disé, wiga isé toé ngancéng baé Hia. Mai taé de Mori Yésus ga ngger oné isé, “Olé rémé tombo apas dé méu ho’o ta du rémé lako ho’o?” Poli hitu asis di isé agu rangad ga ranga susa kéta. Cengata oné mai isé situ, hia Kléopas ngasangn, wale réi Diha hitu, “Olé, asa léng ta, cala Ité hitu dé ata mai pé’ang mai Yérusalém, ata toé baé apa ata poli jiri lawang pisa leso ho’o sina hitu ta?” Mai taé Diha ga ngger oné isé, “Ai apa léng hitu ta?” Mai walé disé ga, “Ngong apa ata poli jiri lut mosé diha Mori Yésus sina mai Nazarét pé. Hia hitu dé cengata nabi, ata mberes rang kuasan oné tombon agu oné pandén olo mai ranga de Mori Kraéng agu olo mai ranga de sanggéd bangsa dami ho’o. Mai sanggéd imam ata tu’a laingd ga agu sangged ata tu’a laingd oné mai bangsa dami hitu poli deko agu téing Hia kudut te pandé wahéng mata agu poli pangkot lisé Hia oné panggol. Ami olo mésé kéta bengkes dami porong Hia hitu cepisa ata pandé légo bangsa Israel ho’o. Poli telu leso wan ga mai oné mai kejadian hitu. Maik pisa taus inéwai oné mai haé impung dami poli pandé géga ami: Gula ucap du sapu rebem kin isé ngo sina boa, maik toé ita rapu Diha sina hitu. Poli hitu kolé isé ga agu ba kréba ngon isé ita malékat-malékat ata taé ne nggo’o ngger oné isé, Hia hitu mosé gi. Pisa taus oné mai haé impung dami poli ngo sina boa hitu agu ita lisé cama kéta ného apa ata poli taé de inéwai situ bao, maik toé manga itan lisé Hia.” Poli hitu mai taé Diha ga ngger oné isé, “Olé méu ho’ot ata toé do baé tah, toé kéta manga ngancéng gélangn nai de méu kudut te imbi sanggéd ca o ca, apa ata poli taé de sanggéd nabi! Ai bom toé olo cukung susay di hia Mésias itu po ngancéng ngo ngger oné néra-bé’ang Diha?” Poli hitu hia tombo pandé gérak kéta taungs latang te isé apa ata poli tulisn ngong Hia oné sanggéd Buku Nggeluk, pu’ung kaut oné mai Buku-buku diha Mosés wiga agu sanggéd buku-buku de nabi-nabi.
Isé cai ruis dungka béo baté ngo disé; kudut te lako terus kaut Hia cang du hitu. Maik isé tegi paka di’a kéta ngger one Hia agu ne nggo’o taéd, “Yo ité, com toko cé’é ho’o di wié ho’o cama-cama agu ami, ai tiong te wié tana ho’o ga, tiong te kolep leso salé ga.” Cemoln ga Hia ocok mbaru disé cama-cama agu isé agu ka’éng cama-cama agu isé wié hitu. Cang du lonto te hang cama-camad isé wié hitu ga, Hia emi roti, torok tombo delék, poli hitu pu’il Liha roti hitu agu téing Liha roti hitu ngger oné isé. Pas kéta cang du hitu ga rodo cino (jinok) kaut mata disé agu baé lisé Hia ga, maik Hia rodo mora ne nggitu kauty oné mai beréha isén ga. Mai taé disé agu cama taud ga, “Olé, ai bom toé bet mésé kétan nai dité bao, cang du Hia tombo-tombo agu ité oné beréha salang bao agu du Hia rémé tombo pandé gérak kéta taung icin Buku Nggeluk latang te ité?”

Poli hitu ga gélang-gélang tétid isé agu kolé kolé ngger sina Yérusalém. Sina hitu isé cumang ata campuluca taus ata nungku agu sanggéd ata iwod ata cama-cama agu isé, rémé ngai nempung kid sina hitu. Mai taé disé ga, “Olé tetu’ung kéta hia Mori poli mosé kolén ga agu Hia poli toto weki Run ngger oné hia Simon.” Poli hitu isét sua hitu ga tombo kéta taungs apa ata poli jirin oné beréha salang agu co’oy cara baén lisé Hia pas cang du rémé pu’il-pu’il te pati rotin Hia.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 10-04-12

HO’O DḖ INJIL DE MORI YḖSUS ATA TUNTI LIHA YOHANES 20:11-18
PAKA NARING GA LITḖ MORI KRAẺNG (10-04-12)


Maik hia Maria hesé kin be pé’ang mai boa hitu agu ngai rétang kin. Du rémé rétang kin hia, hia ngandek ngger oné boa hitu, agu ita liha sua taus malékat ata paké baju bakok; cengata ga lonto dungka ulun boa hitu agu cengata kolé ga lonto dungka wa’in oné osang baté boakn Mori Yésus ného oné mesengn. Mai taé de sua taus malékat situ ngger oné hia, “Endé, co’o tara rétangm hau?” Mai walé diha Maria ga ngger oné isé, “Manga ata ata poli emi Mori daku agu toé baé laku nia wan na’an lisé ga.” Cang du poli taé ne nggitun hia ga hia holés ngger musi agu ita liha Hia Mori Yésus ngai hesén nitu, landing hia toé baé, ata hitu dé Hia Mori Yésus. Mai taé de Mori Yésus ga ngger oné hia, “Endé, co’o tara rétangm hau?” Nuk diha Maria ga ata hitu dé ata tukang lami uma libong hitu, wiga mai taé diha ga ngger oné Hia, “Mori é, émé Ité ata emin Hia, toi koé aku lité, nia wan na’an lité Hia, kudut aku nganceng emi Hia.” Mai taé de Mori Yésus ga ngger oné hia, “Maria!” Holés hia Maria agu mai taén ga ngger oné Hia oné curup Ibrani, “Rabuni!” ngong artin ga Guru. Mai taé de Mori Yesus ga ngger oné hia, “Néka cau terus Aku hau, ai Aku ho’o toé di ngo ngger éta hia Ema, maik ngo hau ga ngger oné sangged haé wa’u Daku agu taé le hau ngger oné isé ngong Aku ho’o ngo cepisa ngger oné Hia Ema Daku agu Ema de méu, ngger oné Mori Kraéng Daku agu Mori Kraéng de méu.” Hia Maria Magdaléna ngo agu taé ne nggo’o ngger oné sanggéd ata nungku situ, “Aku poli ita/cumang agu Mori ga!” agu Hia kolé ata poli taé sangged apa so’o ngger oné hia.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 09-04-12

HO’O DḖ INJIL DE MORI YḖSUS ATA TUNTI LIHA MATIUS 28:8-15
PAKA NARING GA LITḖ MORI KRAẺNG (09-04-12)


Gélang-gélang isé koléd oné mai boa hitu agu rantang éros kétas isé; landing isé kolé kolé le nisang nai agu isé mburuk gélang-gélang kudut te tombo ngong apa hitu ngger oné sangged ata nungku de Mori Yésus. Rodo mai kaut Hia Mori Yésus mai cumang isé agu mai taén ga, “Oé sanggés méu, Tabé.” Isé mai ruis dungka Hia agu nggao lisé dungka wa’iN agu suju Hia. Poli hitu mai taé de Mori Yésus ngger oné isé, “Néka rantang méu ta. Ngo agu tombo le méu ngger oné sanggéd haé wa’u Daku, kong isé ngo ngger sina Galiléa; sina hitu isé ngancéng ita ko cumang Aku cepisa.”

Cang du oné beréha salang kid isé, mais pisa taus ata situt lami boa hitu ngger oné kota; mai isé ga tombo kéta sanggéd taung apa ata poli jirin lawang ho’o ngger oné sanggéd imam ata tu’a laingd. Cang du poli nempung cama-cama agu ata tu’a laingd ise ga, emi lisé ca keputusan; isé kolé téing séng latang te sanggéd serdadu-serdadu situ, agu mai taé disé ga, “Méu paka taé ne nggo’o, yo sanggéd ata nungku Diha mai du wié tana agu tako lisé Hia cang du ngai toko témo kig ami. Ẻmé dengé lisé sanggéd apa so’o le gubérnur ga, ami kaut ata tombo agu hia cepisa, wiga méu toé kéta manga cumang susa cekoén kéta.” Tiba lisé séng situ agu pandé lisé cama ného apa ata poli pedén lisé ngger oné isé. Tombo hitu dé héla kéta tombon oné beréha ata Yahudi sanggé kéta leso ho’o.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 08-04-12

HO’O DḖ INJIL DE MORI YḖSUS ATA TUNTI LIHA YOHANES 20:1-9
PAKA NARING GA LITḖ MORI KRAẺNG (08-04-12)


Cang du leso te can oné minggu hitu, du gula ucap sapu rebem kéta, du toé di par kin leso, ngo hia Maria Magdaléna ngger sina boa hitu; ita liha watu te tadu paran boa hitu ga poli nggolongn oné mai dungka para boa hitu. Gélang-gélangn hia mburuk te ngo cumang isé Simon Petrus agu ata nungku hiot momang de Mori Yésus; agu mai taé diha ga ngger oné isé, “Olé poli émi latan Hia Mori ga sina mai boan; toé baé lami nia wan na’an lisé Hia te ho’on ga.”

Poli hitu ngos isé Pétrus agu ata nungku hitu cebana kolé ngger sina boa. Isét sua mburuk cama-camas; maik hiat ata nungku cebana hitu céwé gélang mburuk na oné mai hia Petrus wiga hia cai olo sina boa hitu. Ngandek ngger oné boa hitu hia; ita liha towé rokot ngai manga nitu kin; landing hia toé ngo be boné boa hitu. Poli hitu cai kolé hia Simon Pétrus ga; hia ngo be boné boa hitu. Ita liha towé rokot pa’u wa tanay gi; towé te lapéng koso nolak ga, hiot ata na’a oné dungka sa’i de Mori Yésus toé kolé manga ruis agu towé rokot hitu, maik poli lepet paka di’an ga agu manga kin oné osang paté bana. Poli hitu, ngo be boné kolé ata nungku hitut ce bana, hiot cai teke olo oné boa hitu; lélo liha boa hitu agu imbi liha. Ai lawang ho’o toé di idep lisé icin Buku Nggeluk ata hiot ne nggo’o taén, Hia paka olo to’oy wa mai boaN, to’o one mai beréha ata mata. Poli hitu kolés sanggéd ata nungku situ ngger oné mbaru disé.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 07-04-12

HO’O DḖ INJIL DE MORI YḖSUS ATA TUNTI LIHA MARKUS 16:1-8
PAKA NARING GA LITḖ MORI KRAẺNG (07-04-12)


Cang du poli laun leso Sabat ga, hia Maria Magdaléna agu hia Maria endé diha Yakobus, agu hia Salomé weli rempa-rempa kudut te ngo ngger sina boa kudut te luma weki rapu Mori Yésus. Cang du gula ucap sapu rebem kin ga du leso te can one minggu hitu, cang du kudut parn leso ga, ngo isé ngger sina boa. Isé taé agu tombo cama taud, “Céi to’ong ata pandé nggolongn watu hitu latang te ité oné mai para boa hitu?” Maik cang du lélon lisé ruis main ga, ita lisé, watu hitu poli nggolongn ga. Ai watu hitu watu mésé kétay. Poli hitu isé ngo boné boa hitu agu ita lisé cengata ata ngai reba kin ata paké juba léwé warna bakok ngai lonton oné dungka wanangn boa hitu. Rantang da’at kétas isé, maik mai taé data reba hitu ga ngger one ise, “Néka rantang é! Méu nanang mai te kawé Hia Yésus ata Nazarét, ata hiot poli pangkot oné panggoln ga. Poli mosé kolén Hia ga. Hia toé manga cé’é ho’oY. Lélo ga! Ho’o dé osang baté loling boakn lisé Hia. Maik te ho’on ga ngo meu, tombo ngger oné sanggéd ata nungku Diha agu ngger oné hia Pétrus: Hia ngo ngger sina Galiléa olo mai méu; sina hitu méu ngancéng ita agu cumang Hia cepisa, ného apa ata poli taé Diha ngger oné méu.” Poli hitu isé ngo be pé’ang agu losi gélang-gélang oné mai boa hitu, ai jejer kétas isé; isé kolé rantang da’at kétas. Isé toé tombo apa-apa cekoén ngger oné ata ai isé rantang kétas.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 06-04-12

HO’O DḖ TOMBO NUNDUK CUKUNG SUSA DE MORI YḖSUS ATA TUNTI LIHA YOHANES 18:1-19:42
PAKA NARING GA LITḖ MORI KRAẺNG (06-04-12)


Isé Deko Mori Yésus
Cang du polin Mori Yésus taé sanggéd taung apa situ ga, Hia ngo be pé’ang mai osang hitu cama-cama agu ata nungku Diha; isé ngo be sina mai Ngalor Kidron. Sina hitu manga ca uma; Hia ngo boné uma hitu cama-cama agu ata Nungku Diha. Yudas, ata hiot nanang te pandé khianat Mori Yésus, baé kolé liha osang uma hitu, ai dondé kéta Mori Yésus mai agu nempung sina hitu agu sanggéd ata nungku Diha. Poli hitu ga mai kolé hia Yudas ngger sina hitu agu mai cama-cama agu ca pasukan tentara agu ata tukang lami Mbaru de Mori Kraéng; isé situ dé ata jera le sanggéd imam-imam ata tu’a laingd agu sanggéd ata Farisi; isé mai lekap kéta agu lampu lentéra, obor agu senapangd. Mori Yésus, poli baé kéta taungd sanggéd apa kaut ata nanang te mai jiri ngger oné mosé Diha, lako ngger olo agu mai taé Diha ga ngger oné isé situ, “Kawé céi leng méu ho’o ta?” Mai walé disé ga, “Hia Yésus sina mai Nazarét é.” Mai taé Diha ga ngger oné isé, “Aku ho’o dé Hia hitu.” Hia Yudas hiot nanang te pandé khianat Hia hesé kolé sina hitu cama-cama agu isé. Cang du Mori Yésus taé ne nggo’o ngger oné isé, “Aku ho’o dé Hia hitu,” hedong ngger musis isé agu pa’u ngger wa tanas. Poli hitu ga Hia réi kolé ngger oné isé, “Kawé céi léng méu ho’o ta?” Mai walé disé ga, “Hia Yésus sina mai Nazarét é.” Mai walé de Mori Yésus ga, “Poli Laku taén bao ngger oné méu ga, Aku ho’o dé Hia hitu. Ẻmé méu nanang te kawé Aku, kong kaut isé so’o ngod ga.” Ne nggitu dé ngoéng Diha kong jiri taungs sanggéd reweng ata poli taéd Liha lawang ho’o, “Oné mai isé so’ot ata poli téid Lité ngger oné Aku, toé kéta manga cengatan ata kongd Laku te mata ne nggitu kauts.” Poli hitu ga hia Simon Pétrus, manga lérong kopé léwén; emi liha kopé léwé hitu agu cako liha kopé hitu ngger oné cengata ata mendi de Imam Mésé wiga kedok muing tilu wanang data hitu. Ngasang de mendi hitu dé hia Malkhus. Mai taé de Mori Yésus ngger oné hia Pétrus, “Olé, na’a kolé ngger oné bakon le hau kopé léwé hitu ta; ai bom toé nanang te inung Laku piala hiot ata téing liha Ema ngger oné Aku ho’o?”

Mori Yésus Olo Mai Hia Hanas – Pétrus Walé Toé Ngong Mori Yésus
Poli hitu ga pasukan tentara agu perwira disé agu sanggéd ata lami ata poli jera lata Yahudi situ deko Mori Yésus agu wéo lisé Hia. Olo ba lisé Hia ngger oné hia Hanas, ai hia Hanas hitu dé amang diha Kayafas ata jiri Imam Mésé laingy du ntaung hitu; hia Kayafas ho’o dé olo ata poli téing naséhat ngger oné ata tu’a laing data Yahudi situ, “Céwé mésén gunan émé mata cengatan ata latang te sangged taung bangsa.” Hia Simon Pétrus agu cengata ata nungku haén ga lut hia Mori Yésus. Ata nungku hitut cengata ga baé tau agu hia Imam Mésé hitu; ata nungku hitu ngo be boné cama-cama agu Mori Yésus ha’éng oné dungka natas de istana Imam Mésé hitu, maik hia Pétrus ga ka’éng be pé’ang mai kin ruis dungka para. Ata nungku ce bana hitu, hitut baé tau agu Imam Mésé hitu, ngo kolé be pé’ang, agu saok oné inéwai ata lami para hitu agu dadé liha hia Pétrus ngo boné. Mai taé de mendi inéwai hitut lami para ngger oné hia Pétrus, “Olé cala hau ca ta ata nungku Data hitu é?” Mai walé diha Pétrus ga, “Toé yé!” Pas du rémé hitun ga sanggéd mendi-mendi agu ata tukang lami Mbaru de Mori Kraéng poli pandé ketén ca api kunceng, ai ces kéta wie hitu; sanggéd isé ga hesé ruis api hitu te pande mut wekid. Hia Pétrus kolé hesé te pandé mut wekin cama-cama agu isé.
Poli hitu ga wangka pu’ung hia Imam Mésé réi-réi Mori Yésus ngong sanggéd ata nungku Diha agu sanggéd apa ata toing Diha. Mai walé de Mori Yésus ga ngger oné hia, “Aku ho’o toé manga ceha-cehad tombo Daku latang te lino ho’o: Aku ho’o dondé kéta pandé ba toing oné mbaru-mbaru ngaji agu sina Mbaru de Mori Kraéng, osang baté nempung de sanggéd ata Yahudi; toé manga laséng ceha-cehad tombo Daku ta. Co’o tara réi Akum hau? Réi kaut le hau sanggéd isé, siot poli séngét apa ata poli taé Daku ngger oné isé; tetu’ung baé lisé apa ata poli taé Daku.” Cang du taé ne nggitun Hia ga, cengata ata tukang lami ata rémé hesé ruis hitun, pak le baka liha ranga Diha, agu ne nggo’o taén, “Olé ne nggitu kéta walé de Hau latang te Imam Mésé ko?” Mai walé de Mori Yésus ga ngger oné hia, “Ẻmé manga salan curup Daku hitu é, taé koé le hau nia wan salan, maik émé benarn curup Daku hitu é, co’o tara pak le bakag Aku le hau ga?” Poli hitu hia Hanas jera ba Hia du rémé wéo kin ngger oné hia Kayafas, Imam Mésé hitu.
Hia Simon Pétrus ngai hesén agu pandé mut wekin ruis dungka api. Mai taé data sina hitu ga ngger oné hia, “Olé cala hau ca ta ata nungku Data hitu é?” Walé toé kolé liha agu ne nggo’o taén, “Toé yé.” Mai taé de cengata ata ngai keluarga kin de mendi hiot poli ketek tilun liha Pétrus, “Olé ita hau ca laku ta sina uma hitu cama-cama agu Hia é?” Walé toé kolé liha Pétrus agu pas kéta cang du hitu ga kakor lalong.

Dadé Lisé Mori Yésus Ngger Olo Ranga Diha Pilatus
Poli hitu, ba lisé Mori Yésus mai sina mai hia Kayafas ngger sina mbaru istana de gubernur. Cang du hitu ngai gula kin tana. Weki rud isé toé ngo be boné mbaru istana de gubernur hitu, rantang boto pandé najis (rinek) weki rud isé, ai isé nanang te hang ramé Paska. Hitu de tara ngo be pé’angn hia Pilatus kudut te cumang isé agu ne nggo’o taé diha, “Apa léng mangkong de méu latang te ata ho’o ta?” Mai walé disé ga ngger oné hia, “Ẻmé Hia ho’o toé ata da’aty, toé kéta manga sorokn lami hia ngger cé’é ité!” Mai taé diha Pilatus ga ngger oné isé, “Emi kaut le méu Hia ta agu pandé beté bicar le méu Hia lorong agu hukum de rus méu.” Mai taé de sanggéd ata Yahudi situ ga, “Toé sendo dé ami ho’o te pandé wahéng mata ata é.” Ne nggitu de jirin kong pandé genap apa ata poli taé de Mori Yésus, ata poli taén liha kudut te toing ngong cara mataN Hia cepisa.
Pilatus ngo be boné kolé ngger oné istana de gubérnur, agu bénta liha Mori Yésus agu mai réin hia ga ngger oné Hia, “Ai Raja data Yahudi léng Hau ho’o ko?” Mai walé de Mori Yésus ga, “Ai mai wa mai de rum kéta apa ata ho’ot réi de hau ko, ko manga ata cebanan ata saok ngger oné hau ngong Aku ho’o?” Mai taé diha Pilatus ga, “Ai ata Yahudi léng aku ho’o ko? Bangsa de Rum dé Hau agu sanggéd imam-imam ata tu’a laingd ata poli téing Hau ngger cé’é aku; apa léng pande de Hau lawang ho’o ta? Mai walé de Mori Yésus ga, “Perénta Daku toé mai oné mai lino ho’on; émé Perenta Daku mai oné mai lino ho’on, pasti sanggéd ro’éng Daku poli pandé rahad ga, maik Perénta Daku toé mai cé’é ho’o main.” Poli hitu mai taé diha Pilatus ga ngger oné Hia, “Aéh, jadi Hau ho’o raja ko?” Mai walé de Mori Yésus ga, “Hau dé ata taé Aku ho’o raja é. Hitu dé tara loas Gaku agu hitu dé tara maig Aku ngger oné tana lino ho’o, kong Aku ngancéng téing saksi ngong kebenaran; sanggéd ata ata mai oné mai kebenaran pasti séngét reweng Daku.” Mai taé diha Pilatus ga ngger oné Hia, “Ngong apa léng kebenaran hitu ta dé?”

Mori Yésus Wahéng le Wahéng Mata
Cang du poli taé ne nggitun ga, hia Pilatus ngo be pé’ang kolé ngo te cumang sanggéd ata Yahudi situ agu taé ne nggo’o ngger oné isé, “Olé, toé kéta manga dumpu can laku salan ata ho’o ta. Landing manga laséng de méu lawang ho’o du rémé leso ramé Paska, lego laku cengatan ata latang te méu. Ngoéngs méu ko, kong aku ho’o legong raja data Yahudi ho’o latang te méu?” Mai ciék walé disé ga, “Néka hia é, maik hia Barabas!” Hia Barabas ho’o dé ata tukang perampok mésé.

Poli hitu hia Pilatus witir hia Mori Yésus agu jera ata liha kudut pandé ndaék Hia. Sangged ata prajurit dolé ca songkok karot agu na’a lisé béta sa’i Diha. Isé kolé emi ca juba-léwé ata laka warnan agu paké lisé ngger oné weki Diha; poli hitu lako ngger olos isé agu mai taéd ga, “Tabé o, raja data Yahudi!” Poli hitu pak le baka lisé ranga Diha.
Pilatus ngo be pé’ang kolé agu mai taén ga ngger oné isé, “Lélo ga, aku ho’o ba Hia ngger pé’ang te lélo le méu, kudut te baé le méu aku ho’o toé kéta manga dumpu can laku salan ata ho’o.” Poli hitu Mori Yésus ngo be pé’ang, agu paké ca songkok karot agu paké kolé juba léwé laka. Poli hitu mai taé diha Pilatus ga ngger oné isé, “Lélo ga le méu ata ho’o!” Cang du sanggéd imam-imam ata tu’a laingd agu sanggéd ata tukang lami situ ita Hia, mai ciék disé ga, “Pangkot oné panggol kaut Hia, pangkot oné panggol kaut Hia!” Mai taé diha Pilatus ga ngger oné isé, “Emi le rus kaut méu Hia agu panggol kaut Hia; ai weki rug aku ho’o toé kéta manga dumpu can laku salan ata ho’o.” Mai walé de sanggéd ata Yahudi situ ga ngger oné hia, “Manga ca hukum dami é, agu émé lorong hukum hitu, Hia ho’o dé paka pande matay, ai Hia lélo weki Run dé Anak de Mori Kraéng.”
Cang du dengén liha Pilatus sanggéd taé situ, wangka pu’ung rantangn hia ga, wiga hia ngo kolé ngger oné mbaru istana de gubérnur hitu agu mai taén ga ngger oné Mori Yésus, “Nia maim léng Hau ho’o ta?” Maik Mori Yésus toé walé apa ata réi diha hitu. Wiga mai taé diha Pilatus ga ngger oné Hia, “Olé toé kéta ngoéng te curup agu aku Hau ho’o ko? Toé bau le Hau ko, ngong aku ho’o dé manga rang kuasa te lego Hau, agu manga kolé rang kuasa te pangkot Hau oné panggol?” Mai walé de Mori Yésus ga, “Toé manga rang kuasam hau é émé rang kuasa hitu toé manga téing oné haud mai éta maid. Itu tara ne nggo’on wili ga: Ata hiot polig deko agu téing Aku ngger oné hau ho’o, céwé mésé kéta ndékokn.” Wangka pu’ung du hitu kaut ga Pilatus sibuk kéta te kawé paté salang co’o caran te pandé lego Hia, maik sanggéd ata Yahudi ga raka-raka molés ciékd isé ga, “Ẻmé lego le hau ata ho’o é, hitu dé tandan hau ho’o toé dé haé reba de Kaisar. Céing-céing kaut ata ata lélo weki run sebagai raja, hitu dé ata nanang te melawan dungkang Kaisar.”

Cang du dengén liha Pilatus sanggéd curup situ, jera liha te ba Hia Mori Yésus te ngo be pé’ang; weki run hia ga lonto lobo kursi pengadilan, lobo tempat ata caro Litostrotos lata, oné curup Ibranin ga Gabata. Leso hitu de pas Leso te mengkek pandé ramé Paska; du hitu ga am rémé ongga campulusua kin di. Mai taé diha Pilatus ga ngger oné sanggéd ata Yahudi situ, “Lélo ga raja de méu!” Poli hitu raka-raka kéta ciék disé ga, “Oké Hia ta! Oké Hia e! Panggol kaut Hia ga!” Mai taé diha Pilatus ga ngger oné isé, “Olé paka panggol laku raja de méu ho’o ko?” Mai walé de sanggéd imam-imam ata tu’a laingd situ ga, “Toé manga raja cebanag ami ta; raja dami kali hia Kaisar kali!” Cemoln ga hia Pilatus téing Hia Mori Yésus ngger oné isé kudut te pangkot lisé oné panggol.

Mori Yésus Pangkot éta Panggol
Tiba lisé Hia Mori Yesus. Poli hitu Hia téti te ngo pé’ang mai kota te ngo sina ca osang, ngasangn Osang Tengkorak; oné curup Ibrani ga caron: Golgota. Hia lako déméng agu pola panggolN. Sina hitu isé pangkot Hia oné panggol. Manga kolé sua taus ata cebana, ata pangkot cama-cama agu Hia, cupu mai bali-bali hia, Mori Yésus ga oné réha. Jera liha Pilatus kudut te paku can banggang koé éta panggol hitu ata ne nggo’o tulisn a, “Yésus, ata Nazaret, Raja data Yahudi.” Do ata Yahudi ata baca tulisan hitu, ai tempat baté Mori Yesus pangkot oné panggol toé tadang koén oné mai kota, apan kolé tulisan hitu tulis oné curup Ibrani, Latin, agu Yunani. Poli hitu ga mai taé de imam-imam ata tu’a laingd oné mai ata Yahudi situ ngger oné hia Pilatus, “Olé, néka tulis ne nggitu le hau ta, ‘Raja data Yahudi,’ ata di’an ta tulis ne nggo’o, ‘Taé le Run Hia: Aku ho’o dé Raja data Yahudi.’” Mai walé diha Pilatus ga, “Apa ata poli tulisn laku, kong kaut ne nggitu kin.”
Cang du poli pangkot le sanggéd prajurit situ Hia Mori Yésus ga, isé emi baju Diha agu pati laing pat lisé baju hitu, néténg-néténg prajurit ca bagian – ne nggitu kolé juba léwé Diha emi kole lisé. Juba léwé hitu toé manga ja’ikn, cay kali tenungn mai éta main haéng wan. Wiga mai taé disé ga cama taud, “Olé asi ketekn lité juba ho’o jiri pisa potong ta, céwé di’an émé pandé téka ndu’a lité kudut te baé céi ata pasn te tiba juba léwé ho’o.” Pandé ne nggitu lisé kudut te pandé genap apa ata poli tulisn oné Buku Nggeluk, “Isé pati baju Daku latang te weki rud isé agu poli hitu ga pandé téka ndu’a lisé juba Daku.”
Poli pandén le sangged prajurit sanggéd apa situ ga. Ruis panggol de Mori Yésus ngai heséd Ende Diha agu haé wa’u de endéN hitu, hia Maria, wina diha Kleopas agu hia Maria Magdaléna. Cang du ita liha Mori Yésus endéN hitu ga agu ata nungku hiot momang Diha hesé cupu mai hia, mai taé Diha ga ngger oné endéN hitu, “Endé ye, hitu dé anak de hau ga!” Poli hitu mai taé Diha ngger oné ata NungkuN, “Hitu dé endém e!” Wangka pu’ung kaut du hitu ga ata nungku hitu tiba hia (endé hitu) oné mbaru diha.

Mori Yésus Mata gi
Poli hitu, ai baé kolé le Mori Yésus ngong sanggéd ca o ca poli jiri kéta taungs gi, mai taé Diha ga – kudut te pandé genap apa ata poli tulisn oné Buku Nggeluk – “Aku masa waé!” Sina hitu manga ca gumbang mésé ata penong le anggor héo. Poli hitu emi lisé ca wéla karang, agu bembo lisé wéla karang hitu ngger oné anggor héo hitu, agu wolet lisé wéla karang hitu oné lobon ca laro léwé agu sotor lisé laro hitu ngger éta mu’u de Mori Yésus. Du poli inungn le Mori Yésus anggor héo hitu, mai taé Diha ga, “Poli taungs ga.” Poli hitu pandé tengguk sa’iN Hia agu té’ing Liha nawaN ga.

Isé Ceka Racap de Mori Yésus
Leso hitu de leso te pandé mengkek; rantang boto rapu-rapu situ ngai pangkot ndéong kid éta panggol du leso Sabat – ai leso Sabat hitu dé leso mésé – wiga mais dé sanggéd ata tu’a laing data Yahudi ngger oné hia Pilatus agu tegi lisé porong wa’i data situ pandé tepo kauts agu poli hitu ga, pandé wa’us lisé sanggéd rapu situ. Poli hitu mais sanggéd ata prajurit mai te pandé tepo wa’i dihat cengata ne nggitu kolé wa’i dihat cengata kolé ata panggot oné panggol cama-cama agu Mori Yésus; maik du caid isé oné Mori Yésus agu lélo lisé Hia poli rowan gi, toé jadi pandé tepon lise wa’i Diha, maik cengata oné mai sanggéd prajurit situ ceka le korung racap Diha; poli hitu ga rodo concang nitu main dara agu waé. Ata hitu ita le run kéta apa hitu dé ata téing kesaksian agu kesaksian diha hitu dé benar, agu baé kolé liha ngong hia poli curup kebenaran hitu, kudut nganceng te imbis kolé mé’u ho’o. Ai poli jirid kéta taungd sanggéd ca o ca situ kudut te pandé genapn apa ata poli tulisn oné Buku Nggeluk, “Toé manga can toko Diha ata pandé tepod.” Manga kolé ca nas ce bana ata ne nggo’oy taén, “Isé ce pisa lélo Hia ata poli cekan lisé.”

Boak Mori Yésus ga
Poli hitu hia Yusuf sina mai Arimatéa tegi ngger oné hia Pilatus, porong sendo hia te pandé wa’u rapu de Mori Yésus. (Hia ho’o dé ca ata nungku de Mori Yésus, landing ceha-ceha moléy main hia ai hia rantang sanggéd ata kuasa laingn oné mai ata Yahudi situ.) Sendo liha Pilatus apa ata tegi disé. Poli hitu mai hia ga agu pandé wa’u liha rapu hitu. Ne nggitu kolé hia Nikodémus mai sina hitu. Hia dé olo ata mai le wié tana mai ngger cé’é Mori Yésus. Hia ba mina mur ata poli halok (haor) agu mina gaharu, am telu mpulu kilo mendon. Isé emi rapu de Mori Yésus, rokot lisé le towé lénan agu luma lisé agu rempah-rempah lorong adak data Yahudi émé nanang te boak ata mata. Ruis osang baté pangkot oné panggoln lisé Mori Yésus manga ca uma agu be boné uma hitu manga ca boa weru ata toé di perna paké laingn te boak ata. Ai leso hitu dé leso te pandé mengkek data Yahudi, apan kolé boa hitu toé tadang koén nitu main, wida boak lisé rapu de Mori Yésus ga oné boa hitu.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 05-04-12

HO’O DḖ INJIL DE MORI YḖSUS ATA TUNTI LIHA YOHANES 13:1-15
PAKA NARING GA LITḖ MORI KRAẺNG (05-04-12)


Rémé du hitun ga be bolon wangka pu’ungn leso ramé mésé Paska, Mori Yésus poli baén ngong tiong te caiy leso Diha ga kudut te téti mai oné mai tana lino ho’o ngger oné hia Ema. Hia momang sanggéd ata siot Diha morid ga ata siot ngai ka’éng oné lino ho’o, agu Hia kolé toé manga beténgn te momang sanggéd isé situ. Cang du isé rémé hang cama-camad ga, Jing Da’at poli saok rencana da’at diha oné nai diha Yudas Iskariot, anak diha Simon, rencana kudut te pandé khianat Mori Yésus. Mori Yésus baé kolé Liha ngong hia Ema poli condod sanggéd taung ca o ca ngger oné Hia agu ngong Hia kolé mai oné mai Mori Kraéng agu kolé koléy cepisa ngger oné Mori Kraeng. Poli hitu hesé paka di’a hia Mori Yésus agu na’a pé’ang Liha baju léwé Diha. Emi Liha ca lembar towé lénan; pongo liha towé hitu pas dungka lé’as Diha. Poli hitu ga Hia légé waé ngger oné ca baskom poli hitu wangka pu’ung te waca wa’id de sanggéd taung ata nungku Diha, poli hitu ga, lap kolé Liha le towé ata poli pongon Liha pas dungka lé’asN. Poli hitu cai Hia olo mai ranga diha Simon Pétrus. Mai taé diha Pétrus ga ngger oné Hia, “Mori é, Ité nanang te waca wa’i daku?” Mai walé de Mori Yésus ga ngger oné hia, “Apa ata pandé Daku, toé di idep le hau te ho’on ga, maik cepisa ngancéng idepn le hau apa ho’o.” Mai taé diha Pétrus ga ngger oné Hia, “Toé kéta sendo laku Tité te waca wa’i daku ta Mori sanggé kéta dengkir tayin agu tédéng lén.” Mai walé de Mori Yésus ga, “Ẻmé Aku toé waca wa’i de hau é, betuan dé hitu ga hau ho’o toé ngancéng tiba apa-apa oné mai Aku.” Mai taé de Simon Pétrus ga ngger oné Hia, “Mori é, toé hanang wa’i daku kaut ta Mori, maik limé agu sa’i daku kolé.” Mai taé de Mori Yésus ga ngger oné hia, “Ai céing-céing kaut ata poli cebong, hia hitu dé toé perlu waca wekin kolé ga, ai nggélok taung weki diha ga. Sanggéd méu ho’o kolé nggélok taung ga, landing toé sangged taung.” Ai baé Liha, céing ata nanang te deko agu téing Hia. Itu tara ne nggo’on taé Diha, “Toé sanggés taung méu ho’o nggélok ga.”

Cang du polid Liha waca wa’i disé, paké kolé liha bajuN, agu kolé kolé ngger oné osang baté lonto Diha. Poli hitu mai taé Diha ngger oné isé, “Idep le méu ho’o ko apa ata poli pandé Daku latang te méu? Méu ho’o caro agu bénta Aku Guru agu Mori; toé manga salan caro agu bénta hitu ta, ai Aku ho’o dé Guru agu Mori de méu. Wiga wili ga, émé Aku ho’o, Mori agu Guru de méu, waca wa’i de méu, sanggés méu kolé paka pandé waca wa’i de cama taus méu, ai Aku ho’o poli téing ca wintuk latang te méu, kong méu kolé pandé cama ného apa ata poli pandé Daku latang te méu.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 04-04-12

HO’O DḖ INJIL DE MORI YḖSUS ATA TUNTI LIHA MATIUS 26:14-25
PAKA NARING GA LITḖ MORI KRAẺNG (04-04-12)


Poli hitu ga cengata oné mai campulu sua taus ata nungku situ, ata hiot Yudas Iskariot ngasangn a, ngo ngger oné sanggéd imam-imam ata tu’a laingd. Mai taé diha ga, “Apa léng ata nanang te téi dé méu latang te aku, émé aku téing Hia ngger oné méu?” Isé bajar telumpulu séng perak ngger oné hia. Wangka pu’ung kaut leso hitu ga hia kéta cébong kawe leso ata di’an kéta te téing hia Mori Yésus.

Cang du leso te can oné mai leso ramé mésé Roti ata Toé Manga Ragin ga, mais sanggéd ata nungku de Mori Yésus mai te cumang Hia agu taé ne nggo’o, “Ité, nia wan Ité ngoéng ami kudut te pandé mengkek hang Paska latang te Ité?” Mai walé de Mori Yesus ga, “Damang dé ngo lé kota méu ngo cumang hia kraeng Anu agu taé ne nggo’o le méu ngger oné hia hitu: Ne nggo’o dé pedé de Guru é: Tiong te rapak cain leso Daku ga; Aku nanang te pandé ramé Paska oné mbaru dité ho’o cama-cama agu sanggéd ata nungku Daku.” Poli hitu sanggéd ata nungku Diha pandé ného apa ata poli jera de Mori Yésus ngger oné isé agu isé ga pandé mengkek ramé Paska hitu.

Cang du wié tana ga, Mori Yésus lonto hang cama-cama agu campulusua taus ata nungku situ. Cang du rémé hangd isé ga, mai taé Diha, “Te tu’ung taé Daku ngger oné méu, manga cengata ata oné mai be réha méu ho’o dé ata nanang kéta te deko agu téing Aku ho’o.” Poli hitu, wéong kéta nai disé, agu néténg-néténg isé réi ne nggo’o ngger oné Hia, “Cala toé aku ta Mori?” Mai walé Diha, “Hia hiot cama-cama agu Aku pandé bembo limén ngger oné mangko ho’o, hia hitu dé ata ata nanang te deko agu teing Aku. Anak Mensia cepisa ngoy pas kéta neho apa ata poli tulisn ngong Hia, landing woréng dé mosé data hitut nanang te deko agu téing Anak Mensia hitu. Céwé di’a danong ata hitu émé toé loas ngger oné mosé lino ho’o. Hia Yudas, hitut nanang te deko agu teing Hia taé ne nggo’o, “Cala toé aku ta, Rabi?” Mai taé de Mori Yésus ga ngger oné hia, “Poli taé le rum hau ga.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 03-04-12

HO’O DḖ INJIL DE MORI YḖSUS ATA TUNTI LIHA YOHANES 13:21-33.36-38
PAKA NARING GA LITḖ MORI KRAẺNG (03-04-12)


Cang du poi taé ne nggitun Mori Yésus ga, wéong kéta nai Diha, wiga poli hitu Hia taé ne nggo’o, “Tetu’ung dé Aku taé ngger oné méu ho’o, cengata ata oné mai be réha méu ho’o dé nanang te téing Aku.” Sanggéd ata nungku situ cébong lélo cama taud kali ga, toé baé di’a lisé céi péng ata hitu. Cengata ata oné mai ata nungku de Mori Yésus, ata nungku hiot momang Diha, lonto bérit ruis-ruis Hia, pas du racap wanang Diha. Hia Simon Pétrus téing tanda latang te ata nungku hitu agu mai taén ga, “Damang dé réi ta, ngong céi dé curup Diha hitu bao?” Poli hitu ga ata nungku hitut lonto ruis Mori Yésus hitu holés agu réi ngger oné Hia, “Mori é, céi léng hitu ta?” Mai walé de Mori Yésus ga, “Ata hitu dé ata hiot téing roti Laku to’ong, du poli bembon laku roti hitu.” Du poli taé ne nggitun Hia ga, Hia bembo roti hitu, agu emi Liha agu téing Liha ngger oné hia Yudas, anak diha Simon Iskariot. Cang du poli tiban liha Yudas roti hitu, rodo woréng le Jing Da’at kaut hia ga. Poli hitu mai taé de Mori Yésus ngger oné hia, “Apa kaut ata nanang te pandé de hau, pandé le hau te ho’on ga.” Landing toé kéta manga cengatan ata ata lonto hang cama-cama hitu ata idep co’o tara taé ne nggitun Mori Yésus ngger oné hia Yudas. Ata baé disén kali ga, hia Yudas ho’o dé ata cau kas, wiga ne nggo’o nuk disé, am Mori Yésus jera hia te ngo weli apa kaut ata perlu laingn kudut te ramé mésé hitu, ko ngo te téing apa-apa kaut latang te ata mosé lénggé. Cang du poli tiba roti hitun ga, hia Yudas gélang-gélang ngon. Cang du hitu wié tana ga.

Cang du poli ngon hia Yudas ga, mai taé de Mori Yésus, “Te ho’on dé Anak Mensia pandé hiang agu Mori Kraéng pandé hiang oné Hia. Ẻmé Mori Kraéng pandé hiang oné Hia, Mori Kraéng kolé pandé Hiang Hia kolé oné weki Run Hia, agu nanang te gélang-gélang kolé pandé hiang Hia. Oé anak-anak Daku, toé naisn kolé ga Aku ho’o manga cama-cama agu méu. Méu cepisa kawé Aku, agu ného apa ata poli taé Daku latang te sanggéd ata Yahudi ga: Aku taé ne nggitu kolé te ho’on ga ngger oné méu, Méu toé ngancéng ngo ngger sina osang baté ngo Daku.

Hia Simon Pétrus taé ne nggo’o ngger oné Mori Yésus, “Mori é, ai te ngo ngger nia léng Ité ta?” Mai walé de Mori Yésus ga, “Ngger sina osang baté ngo Daku, hau toé ngancéng lut Aku te ho’on di, landing tayi hau ngancéng lut Aku cepisa.” Mai taé de Pétrus ga ngger oné Hia, “Mori é, co’o tara toé ngancéng lut Itég aku te ho’on ga? Aku ho’o nanang te lagang nawa/mosé daku latang te Ité!” Mai walé de Mori Yésus ga, “Apa, hau nanang te lagang nawam (mosém) latang te Aku? Tetu’ung Aku taé ne nggo’o latang te hau: Be bolon kakor lalong ga, hau poli walé toe ngong Aku telu ngkalin.”


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 02-04-12

HO’O DḖ INJIL DE MORI YḖSUS ATA TUNTI LIHA YOHANES 12:1-11
PAKA NARING GA LITḖ MORI KRAẺNG (02-04-12)


Enem leso be bolon leso ramé Paska, Mori Yésus mai ngger cé’é Bétania, cé’é osang baté ka’éng diha Lazarus ata hiot poli pandé to’o kolé wa mai boan le Mori Yésus béhéng. Sina hitu pandé lisé ca perjamuan latang te Hia; hia Marta cébo urus layan isé; cengata ata ata hang cama-cama agu Mori Yésus dé hia Lazarus. Poli hitu hia Maria emi ca stengan mina narwastu kanang (murni) ata wegit kéta hargan; poli hitu luma liha wa’i de Mori Yésus le mina hitu agu susak (lap) liha wa’i hitu le wuk de run; lawer bengé de mina hitu ngancéng noingn oné labok mbaru hitu. Maik hia Yudas Iskariot ga, cengata oné mai ata nungku de Mori Yésus, hiat nanang te téing Hia, taé ne nggo’o, “Olé co’o tara toé pikan mina narwastu ho’o ta, pika teluratus dinar, poli hitu séngn ga téing ngger oné ata mosé lénggé (kasiasi)?” Hia taé ne nggitu toé le manga momang agu perhatian hia latang te ata mosé lénggé situ, maik ai hia dé ata tako; dondé kéta hia emi séng ata na’a oné kas ata cau liha. Poli hitu mai taé de Mori Yésus ga, “Kongn kaut hia pandé apa ho’o ta ai kudut te nuk leso boak Daku cepisa. Ai ata mosé lénggé dé manga molém taung agu méu, maik Aku ho’o dé toé manga molém taung cama-cama agu méu cepisa.

Dengé le pisa taus atas Yahudi ngong Mori Yésus manga sina hitu, o maid isé landing toé mai te cumang Mori Yésus kaut, maik te lélo hia Lazarus, ata hiot poli pandé to’on Liha wa mai boan béhéng. Poli hitu sanggéd imam-imam ata tu’a laingd manga nanangd te mbelé hia Lazarus kolé, ai le hia dé do kéta ata Yahudi poli legong iséd ga agu imbi ngger oné Mori Yésus.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)

KREBA DI'A LESO HO'O 01-04-12

HO’O DḖ TOMBO NUNDUK CUKUNG SUSA DE MORI YḖSUS ATA TUNTI LIHA MARKUS 14:1-15:47
PAKA NARING GA LITḖ MORI KRAẺNG (01-04-12)


Bantang te Mbelé Mori Yésus
Leso ramé mésé Paska agu leso ramé mésé Roti ata Toé manga Ragin téké sua leson kolé te tiong caid ga. Tuang-tuang ata tu’a laingd agu sangged ata mbeko getok Taurat cébo kéta kawé patén te deko agu te mbelé Mori Yésus le aréng mésé, ai ne nggo’o taé disé, “Néka pas du leso ramé mésé hitu, ai boto manga ngai-ngaok oné be réha ro’éng-ro’éng so’o.”

Mori Yésus Luma le Mina
Cang du Mori Yésus manga sina Bétania, sina mbaru diha Simon ata kusta, agu rémé lonto hangn sina hitu, maiy cengata inéwai mai ba ca botol pualam; icin botol hitu ga mina narwastu bengé ata wegit kéta hargan. Du poli pandé bikén liha dungka bokakn botol hitu, poli hitu ga loli liha mina hitu ngger lobo sa’i de Mori Yésus. Landing pisa taus ata nitu rengus rangad agu reget naid agu mai taéd agu cama taud, “Te co’on kéta tara pandé kéba-kaékn mina bengé narwastu ho’o ga? Ai mina ho’o ngancéng pikan agu hargan ga lebi oné mai teluratus dinar; poli hitu ga séngn ngancéng téing ngger oné ata mosé lénggé.” Wiga isé rabo ata inéwai hitu. Landing mai taé de Mori Yésus ga, “Kongn kaut hia. Co’o tara pandé susa hias méu ta? Hia poli pandé ca gejur ata di’an latang te Aku. Ai ata mosé lénggé manga tédéng agu méu; ce pisa kaut méu ngoéng te campé isé, méu ngancéng campé isé, landing Aku ho’o dé toé manga tédéng cama-cama agu méu. Hia poli pandé apa ata ngancéng pandén liha. Poli luman liha weki Daku; hitu dé persiapan latang te ruku boak Daku ce pisa. Tetu’ung kéta taé Daku ngger oné méu: Nia-nia kaut Injil kréban oné labok tana lino ho’o, apa ata poli pandé diha ho’o ga pasti caro tédéngy tayi kudut te nuk agu tenang hia.”

Yudas Pandé Kianat Mori Yésus
Poli hitu hia Yudas Iskariot, cengatad oné mai campulusuad ata nungku situ, ngo ngger oné sanggéd imam ata tu’a laing kudut te téing Mori Yésus ngger oné isé. Senang kéta nai disé cang du dengé tombo hitu; pandé reké lisé kudut te téing séng ngger one hia. Poli hitu ga hia (Yudas) cébo kawé ca kesempatan ata di’an kéta kudut te teing Mori Yésus.

Mori Yésus Hang Ramé Paska agu sanggé ata Nungkun
Cang du leso te can oné mai Leso Ramé mésé Roti ata toé manga Ragin, pas cang du ata mbelé Domba Paska, ata nungku de Mori Yésus taé ne nggo’o ngger oné Hia, “Ngger nia Ité nanang jera ami te ngo kudut pandé siap-siap latang te Hang Paska latang te Ité ga?” Poli hitu Hia jera sua taus ata nungku Diha agu mai pedé Diha ga, “Ngo méu ga ngger sina kota; sina hitu manga cengata ata ba sémpé/gélo ata manga waén bonén; ata hitu manga kaut mai cumang méun. Lut kaut hia méu agu taé ne nggo’o le méu ngger oné ata morin mbaru ata cénggo diha: ne nggo’o de pedé de Mori Tuang Guru: Nia wan lo’ang osang baté Aku hang Paska cama-cama agu sanggéd ata nungku Daku? Poli hitu ata hitu toto ngger oné méu ca lo’ang béta lobo, loang ata mésén kéta; poli taungs lengkapd sanggéd persiapan kudut pésta hitu. Sina hitu dé méu paka pandé siap hang Paska hitu latang te sanggéd ité ho’o!” Sua taus ata nungku situ téti te ngo sina hitu; cang du caid isé ga sina kota hitu, isé ita kéta taung cama ného apa ata poli taé de Mori Yésus latang te isé bao. Poli hitu ga isé pandé siap ramé Paska.
Pas cang du wié tana ga, maiy Mori Yésus cama-cama agu campulu sua taus ata nungku Diha. Cang du rémé lontod isé sina lo’ang hitu agu rémé hangd isé, mai taé de Mori Yésus, “Tetu’ung kéta taé Daku ngger oné méu, manga cengata ata oné mai be réha méu ho’o ata nanang te deko Aku kudut te téing Aku ngger oné Tu’a-tu’a data Yahudi, hia hitu dé ata hang cama agu Aku.” Wangka pu’ung wéongd nai disé ga wiga néténg-néténg isé réi ngger oné Hia, “Cala toé aku ta Mori?” Mai walé Diha ga, “Ata hitu dé cengata oné mai be réha méut campulusua ho’o, hia hitu bembo rotin ngger oné ca mangko cama-cama agu Aku. Ai Anak Mensia ho’o ngoy cepisa lorong manga ata poli tulisn ngong Hia, landing ata hitut deko Anak Mensia hitu cepisa lerak agu mempoy tayi. Céwé di’a ata hitu danong émé toé loas ngger oné mosé tana lino ho’o.”

Pandé Tetapn Perjamuan de Morin
Cang du Mori Yésus agu sanggéd ata nungkuN rémé hangd ga, Mori Yésus emi roti, torok paka di’a Liha sanggéd delék Disé, poli hitu pandé pati-pati Liha roti hitu poli hitu ga téing roti hitu ngger oné isé agu mai taéNga, “Ẻmi ga le méu, ho’o dé weki Daku.” Poli hitu Hia émi piala, torok paka di’a Liha delék Disé, poli hitu téing Liha piala hitu ngger oné isé; sanggéd isé ga inung oné mai piala hitu. Mai taé Diha ga ngger oné isé, “Ho’o dé dara Daku, dara reké, dara ata concang latang te ata do. Tetu’ung kéta taé Daku ngger oné méu: Aku ho’o toé tara inung kolé tayi dani oné mai pu’u anggor sanggé du leso Aku inung anggor hitu, pas du leso weru tayi, oné Perénta de Mori Kraéng.”

Hia Pétrus Walé Toé ngong Mori Yésus Cepisa
Cang du polid isé déré sanggéd déré naring’d ga, isé ngo ngger sina Golo Zaitun. Poli hitu mai taé de Mori Yésus ga ngger oné isé, “Sanggéd taung imbi de méu ho’o cepisa manga kaut gégégoa laingd. Ai manga ata poli tulisn ne ngo’oy: Aku cepisa ongga gembalad wiga sangged domba-domba’n ga losi mbirakang pinanaéngd. Landing, cang du poli to’o kolég Aku wa mai boa ga, Aku ho’o cepisa ngo ngger sina Galiléa be bolo mai méu.” Mai taéd Pétrus ga ngger oné Hia, “Koném po sanggéd isé so’o gégégoa imbid cepisa, aku toé ne nggituk cepisa.” Poli hitu mai taé de Mori Yésus ngger oné hia, “Tetu’ung kéta taé Daku ngger oné hau, du leso ho’o, pas keta wié ho’o to’ong ga, du bebolon kakor lalong sua ngkalin, hau poli telu ngkalin ga toé mengaku hau ata nungku Daku.” Landing mai taé diha Pétrus ga ného kéta mai wa nain kéta, “Koném po aku ho’o paka mata cama-cama agu Ité, toé keta gori’g aku te pandé woréng Ité.” Sanggéd taung isé iwod situ ga curup ne nggitu kéta taungs kolé.

Sina Uma Mina
Poli hitu cais isé Mori Yésus agu sanggéd ata nungkuN ngger sina ca osang, Getsemani ngasangn osang hitu. Mai taé de Mori Yésus ga ngger oné sanggéd ata nungkuN hitu, “Lonto no’o méu ga, ai Aku nanang ngo te ngaji.” Dadé Liha hia Pétrus, Yakobus agu hia Yohanés cama-cama agu Hia. Cang du hitu ga Hia wangka pu’ung susa agu wéong kéta nain agu rantang kéta Hia, wiga mai taé Diha ga ngger oné isé, “Olé wéong kéta noingn nai Daku, ného kéta ngoéng te mata noing na. Ka’éng dapang no’o méu agu lami terus cama-cama.” Poli hitu Hia lako ngger olo koé cekoén; Hia toko tegep ngger wa tana agu pu’ung ngajin Hia, ngaji kudut te tegi émé ngai kong kin, porong mosé ké’ot hitu gélang-gélang koé lagén oné mai mosé Diha te ho’on ga. Mai taé Diha ga, “Ema, yo Ema, sanggéd ca o ca toé kéta manga ata toéd oné ranga Dité, emi koé Lité piala ho’o olo mai ranga Daku, maik néka lorong apa ata ngoéng Daku, maik lorong apa ata ngoéng Dité.”
Poli hitu ga Hia kolé kolé, agu repéngs Liha isé rémé toko témo/lémot kid. Mai Hia ga taé ne nggo’o ngger oné hia Pétrus, “Simon é, rémé tokom hau ko? Toé ngancéng welam hau kudut te lami lawang ce jam ho olon? Néka toko témo é maik seber ngaji, rantang boto méu pa’u ngger oné damang; ai bo nuk de nai é di’ad kéta taung, landing ruku de weki mensia dé toé mberesd.” Poli hitu Hia ngo koléy agu ne nggitu kéta kin kolé ngaji’N Hia. Cang du kolé kolén Hia, repéng kolés Liha isé rémé toko témo/lémot kid, ai mendo kétas mata disé ga agu toé kolé baé lisé apa ata paka taén lisé ngger oné Hia.
Poli hitu Hia kolé te telu ngkalin ga agu mai taén ga ngger oné isé, “Olé ngai toko lémot kéta kis méu ko agu halas? Ẻmo dé’it é. Caiy rapak rekén ga, lélo ga le meu, Anak Mensia dekoy te téing ngger oné limé data ndekok. To’o ga, mai tité ga téti no’o maid ga. Ata hiot nanang te deko agu téing Aku tiong te caiy gi.”

Isé Deko Mori Yésus
Cang du ngai curup kin Mori Yésus, rodo tuan kaut hia Yudas, cengatan ata oné mai campulu sua taus ata nungku situ; cama-cama agu hia cai kolés ata do ata mai ba agu kopé léwéd (pedang), agu semambu/semboré; isé situ dé ata ata jera data Tuang-tuang kepala agu ata mbeko getok Taurat agu ata tu’a-tu’a laing disé. Ata hitut nanang te téing Hia poli téing ca tanda ngger oné isé, “Ata hiot omo daku dé, hituy dé Hia, deko Hia hitu agu dadé le méu Hia porong néka kurang apa-apa cekoén.” Cang du cain hia nitu gélang-gélangn (hidi-hadan) hia ngo ruis Mori Yésus agu mai taén ga, “Rabi,” poli hitu omo Hia. Poli hitu isé cau Mori Yésus agu deko lisé Hia. Cengata ata oné mai ise situt manga nitu emi di’a liha pedang diha, poli hitu paki liha ata mendi de Imam Mésé, wiga kedok muing tilu data hitu. Mai taé de Mori Yésus ga ngger oné isé, “Olé co’o léng nuk de méu ho’o ta dé ngong Aku, perampok Aku ho’o ko, wiga méu mai lekap kéta agu kopé léwé, semambu/semboré, mai kudut te deko Aku? Néténg-néténg leso kaut Aku ho’o manga oné be réha méu ba toing (ajar) oné Mbaru de Mori Kraéng, landing méu toé deko Aku ho’o. Maik apa ata poli pandé tulisn oné Buku Nggeluk porong jiri kéta taungs di.
Poli hitu ga sanggéd taung ata nungku Diha ngo kéta taungs agu legong Hia hanang koén; isé losi kéta taungs ga.
Manga cengata ata ngai reba kin; pas cang du hitu rémé paké ca towé lénan hia kudut te wéngko wekin; ata reba hitu rémé kéta lut Hian. Sanggéd ata situ nanang te deko hia kolé ca; landing ata reba hitu gélang-gélang legon liha towé lénan hitu agu losin hia déméng toé manga wéngko wekin (laco/mbolang).

Mori Yésus Bebolo Mai Sanhédrin
Poli hitu ga Mori Yésus dadé ngger olo mai ranga de Imam Mésé. Nempung kéta taungs sanggéd imam-imam kepala, sanggéd ata tu’a laingd, agu ata mbeko getok Taurat sina hitu. Rémé du hitu ga, hia Pétrus lut Hia mai tadang main, sanggé kéta be bonén natas de Imam Mésé hitu; sina hitu lonto hia oné beréha sanggéd tentara ata lami nitu; hia lonto nitu kudut te pisi api kudut te pandé mut koé ce koén wekin hia.
Sanggéd imam-imam kepala agu sanggéd weki lawa (anggota) Sanhédrin iwod situ ga cébo kéta kawé kesaksian kudut te dungkang hia Mori Yésus kong Hia ngancéng wahéng le wahéng mata; landing toé ngancéng cumangn lisé ata saksi ne nggitu. Dod kolé ata ata téing kesaksian lancung (ata pandé molé) dungkang Hia, maik sanggéd kesaksian situ toé manga kopd agu cama taud. Poli hitu ga manga ata pisa taus ata ata téing kesaksian adong (lancung) dungkang Hia agu ne nggo’o taé disé, “Poli dengén lami ata ho’o manga dé’it ne nggo’o taén olo: Aku ho’o nanang te pandé renco Mbaru Nggeluk ata pandé de limé de mensia ho’o poli hitu ga telu leso wan ga Aku ngancéng pandé hesé kolé Mbaru hitu, mbaru ata toé pandé le limé de mensia.” Landing oné tombo ho’o kolé kesaksian disé toé manga duha agu cama taud.
Poli hitu Imam Mésé to’o wa mai lonto agu hesén hia oné be réha nempung mésé hitu agu mai réin hia ga ngger oné Mori Yésus, “Olé toé ngoéngm Hau ho’o ko te walé sanggéd réi agu mangkong situ? Co’o wili sanggéd mangkong data so’o latang te Hau ga?” Maik Hia hema kéta kin; hia toé walé ce koén koé. Imam Mésé hitu réi kolé ngger oné Hia, ne nggo’o taén, “Asa, Hia Mésias léng Hau ho’o ko, Anak Dihat ata Naring Mésé kéta?” Mai walé de Mori Yésus ga, “Ẻng é, Aku ho’o dé Hia hitu; méu cepisa ita Hia Anak Mensia hitu lonto du racap wanang Dihat Pu’un Kuasa agu Hia mai boné mai rewung-rewung éta awang.” Poli hitu Imam Mésé hitu pandé beté jiok baju de run agu ne nggo’o taén ga, “Te co’on kolé lité kawén saksi ce bana ta? Poli dengén le méu Hia ho’o pandé mbecik (hojat) Mori Kraéng. Co’o wili nuk de méu ga?” Cengkali agu ca reweng kaut lisé pandé beté bicarn kudut Hia pandé wahéng le matay. Poli hitu ga, rodo pu’ung kaut lisé ipo Hia, pandé tadu ranga Diha, poli hitu racuk lisé Hia, agu ne nggo’o taé disé ngger oné Hia, “Oé nabi, damang dé walé terka tah!” Sanggéd tentara ata lami situ ongga kolé Hia.

Hia Pétrus Walé Toé Ngong Mori Yésus
Cang du hitu hia Pétrus rémé pé’ang wa natas kin hia. Poli hitu mai cengata ata inéwai ata tukang jera laing de Imam Mésé; cang du itan le inéwai hitu hia Pétrus ata rémé pandé mut weki kin ruis dungka api, lélo di’a-di’a liha rangan agu ne nggo’o taén, “Olé hau ho’o kolé cengata ata ata lako cama-cama agu Hia Yésus, ata Nazarét hitu ta.” Landing hia Pétrus walé toé liha réi de inéwai hitu agu ne nggo’o taén, “Aéh toé baé laku é, toé idép kolé laku apa ata tombo de hau hitu.” Poli hitu hia Pétrus ngo bolo natas be bolon kéta (agu cang du hitu pas kakor lalong). Cang du inéwai ata jerang laing hitu ita kolé hia Petrus, mai taé diha ga ngger oné ata ruis-ruis nitu, “Ata ho’o dé cengata ata oné mai isé situ.” Landing walé toé kolé liha Petrus. Toé naisn wa ga sanggéd ata ata manga ruis nitu taé ne nggo’o oné hia Pétrus, “Pasti hau ho’o dé cengata ata oné mai isé situ ta, apan kolé hau ho’o dé ata sina mai Galiléa!” Rodo pu’ung kaut hia Pétrus taé sumpa liha agu rabo-rabon hia, “Olé toé kéta manga baén laku ata hitut caro de méu ta!” Pas kéta cang du hitu ga kakor kolé lalong te sua ngkalin ga. Rodo nuk kaut kolé liha Pétrus apa ata poli taé de Mori Yésus ngger oné hia, “Be bolon kakor lalong te sua ngkalin ga, hau ho’o poli walé toé ngong Aku telu ngkalin.” Poli hitu ga, rétang hia Pétrus le wéong nain.

Mori Yésus be bolo Mai Hia Pilatus
Du gula ucap ga sanggéd imam-imam kepala agu ata tu’a-tu’a agu ata mbeko getok Taurat agu sanggéd lawa weki Sanhédrin iwod situ ga impung te pandé ca empung kolé. Poli hitu pongo lisé Mori Yésus agu ba lisé Hia agu téing lisé Hia ngger oné hia Pilatus. Mai réi diha Pilatus ga ngger oné Hia, “Raja data Yahudi léng Hau ho’o ko?” Mai walé de Mori Yésus ga, “Weki rum hau dé ata taé ne nggitu é.” Poli hitu ga imam-imam kepala téing do kéta réi agu mangkong disé dungkang Hia. Mai réi diha Pilatus kolé ngger oné Hia, “Olé toé kéta walés le Hau sanggéd apa situ ko? Lélo dé yé, do kétas réi agu mangkong situ dé dungkang Hau!” Landing hia Mori Yésus toé kéta walé koé cekoén Liha, wiga lenget kolé weki run hia Pilatus.
Du néténg-néténg leso ramé ho’o, hia Pilatus lego cengatan ata ata poli wahéngd lorong ného ata tegi disé. Cang du hitu manga cengata ata ngasangn hia Barabas; hia rémé ka’éng oné bui kin cama-cama agu sangged ata pemberontak iwod situ. Isé situ poli pandé rampas agu do mbelé atad. Poli hitu maid ata do situ ga agu tegi lisé porong hia pandé lego kolé cengatan ata ného laséngn du leso ramé mésé hitu. Mai walé diha Pilatus ga ngger oné isé agu ne nggo’o réin, “Asa léng ta, cala ngoéngs méu te lego laku Hia Raja data Yahudi ho’o?” Ai baé liha sanggéd imam-imam kepala situ poli deko agu téing hia ai isé reget kéta naid ngger oné Hia. Landing sanggéd imam-imam kepala situ sosok ata do situ kong isé tegi hia Barabas kaut ata legon latang te isé. Cengkalin kolé réin liha Pilatus ngger oné isé, “Ẻmé ne nggitu ga, apa ata paka pandén laku latang te ata ho’ot caro raja data Yahudi ho’o ga?” Rodo ciék kolés isé, “Wéo oné panggol kaut Hia hitu ta!” Poli hitu hia Pilatus taé ne nggo’o kolé ngger oné isé, “Ai apa léng pandé da’at data ho’o ta?” Maik isé tambang mésé-mésé kétad ciék werésd isé, “Pangkot one pangggol kaut Hia hitu é!” Ai hia Pilatus ho’o nanang kéta te pandé senang nai data do situ ga, wiga hia lego hia Barabas latang te isé; poli hitu ongga le lémpa liha Hia Mori Yesus agu téing liha Hia kudut te pangkot oné panggol.”

Mori Yésus Loér-loér Lata
Poli hitu ga sanggéd ata serdadu situ dadé Hia Mori Yésus ngger sina natas de istana, osang baté ka’éng diha gubérnur; isé siro kéta taungs pasukan disé te nempung sina hitu. Emi paka di’a lisé ca juba ungu léwé, agu paké lisé juba léwé hitu ngger oné weki de Mori Yésus; poli hitu pandé dolé lisé ca songkok karot agu pandé tesong lise songkok hitu oné sa’i Diha. Poli hitu ga wangka pu’ungs isé téing io ngger oné Hia agu mai taéd ga, “Tabé o ité, raja data Yahudi!” Ongga lisé sa’i Diha le helung, ipo lisé Hia agu tikul isé te io Hia. Du poli loér-loérn lisé Hia ga isé loak juba léwé ungu ata paké Diha bao, poli hitu paké kolé lisé baju de Run Hia.

Mori Yésus Pangkot oné Panggol
Poli hitu Mori Yésus ba ngger pé’ang kota kudut pangkot oné panggol sina hitu. Cang du hitu manga cengata ata ata rémé lako liba dungka salang hitu, ngasangn hia Simon ata Kiréné; hia de ema disé Aléksander agu hia Rufus; hia ho’o ata rémé kolé pé’ang mai kotan di; paksa lisé hia hitu te pola panggol de Mori Yésus.
Ba lisé hia Mori Yésus ngger ca osang, Golgota ngasangn osang hitu, ngong Osang Sa’i Longkor. Poli hitu isé téing Hia anggur ata poli halok agu mur; landing toé gorin Hia te inung. Poli hitu pangkot lise Hia one panggil; poli hitu pati lise baju Diha; caran ga, olo pandé téka ndu’an lisé, te baén céing ata tiba cupun agu cupun baju hitu.
Ongga sembilan le gula hitu, pangkot lisé Hia oné panggol. Tulis kolé lisé éta panggol hitu wangka pu’ung co’o tara panggoln lisé hia; ne nggo’o tulisn lisé: “Raja Data Yahudi.”
Cama-cama agu Hia pangkot oné panggol kolé lisé sua taus ata perampok; cengata du racap wanang Diha, cengata kolé ga du racap léo Diha.
[Ne nggituy dé caran Hia pas kéta ného apa ata poli tulisn oné Buku Nggeluk ngong Hia, ne nggo’o runin, “Hia bilang lata cama-cama agu ata pandé da’at”]
Sanggéd ata ata lako liba sina hitu mbécik (hojat) Hia; ngéngur-ngéngur said isé agu ne nggo’o taéd isé, “Oé Hau ho’ot nanang te pandé renco Mbaru Nggeluk agu nanang te pandé hesé kolé mbaru hitu lawang telu leso, damang dé wa’u Hau éta mai panggol hitu agu damang dé pandé selamak weki Rum ga!” Ne nggitu kolé sangged imam-imam kepala cama-cama agu ata mbeko getok Taurat cébo loér-loér Hia agu cama taud agu mai taé disé ga, “Ata iwod liha ngancéng pandé selamakd, landing weki Run Hia toé ngancéng pandé selamakd Liha! Asa, di’an kéta émé hia Mésias ho’o, Raja data Israél ho’o, wa’u éta mai panggol hitu te ho’on ga kudut ngancéng itan lité agu imbin lité ga.” Ata sua taus situt pangkot oné panggol cama-cama agu Hia kolé cébong loér agu mbécik Hia.

Mori Yésus Mata Oné Panggol
Pas cang du ongga campulusua ga, rodo nendep kéta tana lino hitu; nendep hitu lawang kaut telu jam naisn. Pas du ongga telu ga, Mori Yésus ciék mésé-mésé agu ne nggo’oy taéN, “Ẻloi, Ẻloi, léma sabakhtani?” ngong artin ga, “Mori, Yo Mori Kraéng Daku, co’o tara legong hanang koég Aku Lité?” Cang du dengén lisé ciék idé mésé hitu, pisa taus ata hesé ruis hitu taé ne nggo’o, “Séngét é, Hia bénta hia Ẻlia.” Poli hitu gélang-gélang cengata ata agu bembo liha ca spons ngger oné waé anggor héo poli hitu wolét liha oné lobon ca helung agu téing liha Mori Yésus te inung agu ne nggo’o kolé taén, “Aéh ta com géréng lité agu lélo lité am maiy to’ong hia Ẻlia hitu mai te campé pandé wa’u Hia.” Poli hitu ciék idé kolé Mori Yésus mésé-mésé agu taung naiN poli hitu ga. Pas kéta cang du hitu ga roto beté kaut towé te pélé sina Mbaru Nggeluk beté laing sua mai kéta éta main sanggé wan. Cang du hitu kepala pasukan ata hesé bolo mai Hia agu ita liha Hia taung naiN ga, taé ne nggo’o, “Olé tetu’ung kéta dé ata ho’o é Anak de Mori Kraéng!”
Manga kolé pisa taus inéwai ata lélo tadang maid; cengata ga hia Maria Magdélena, Maria endé diha Yakobus ata ngai Reban agu hia Yosés, agu hia Salomé. Sanggéd isé situ poli lut hia Mori Yésus agu campé-campé Hia cang du sina Galiléa kin Hia. Manga kolé dungka hitu do inéwai cebana ata mai ngger sina Yérusalem cama-cama agu Mori Yésus.

Mori Yésus Boak gi
Du rémé hitun ga mané rep agu tiong wié tana ga; agu leso hitu dé leso te pandé mengkek, ngong leso bebolon leso Sabat. Wiga hia Yusuf, ata Arimatéa, cengata ata weki lawa oné mai Sanhédrin ata mésén kolé pangkat wiga hiang latang do hia, ata rémé géréng-géréng kin Perénta de Mori Kraéng, pandé mberes agu racang rakn kudut te ngo cumang hia Pilatus kudut te tegi weki rapu Diha Mori Yésus. Lenget kéta hia Pilatus cang du dengén liha poli matan Mori Yésus ga. Poli hitu hia bénta kepala pasukan agu réi liha oné ata hitu, tetu’ung ko toé poli matan Mori Yésus ga. Cang du poli dengén liha apa ata baro de kepala pasukan hitu, sendo liha te teing weki rapu hitu ngger oné hia Yusuf. Weli paka di’a liha Yusuf ca towé lénan, poli hitu ga pandé wa’u liha weki rapu de Mori Yésus éta mai panggolN; rokot paka di’a liha weki rapu hitu le towé lénan hitu. Poli hitu ga pandé toko labang liha weki rapu de Mori Yésus oné ca boa ata poli tekangn oné dungka golo watu hitu. Poli hitu nggolong ca watu mésé liha te tadu para boa hitu. Hia Maria Magdaléna agu hia Maria endé diha Yosés lélo di’a-di’a lisé baté baokN Mori Yésus.


HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS

@Copyright terjemahan: Fransiskus Borgias M. (Anggota Pakar LBI)